Miqueas 2 - Kashibo-Kakataibo Biblia

Israel unikama ꞌaisamaira okin tëmëramiti unikama ax ka kushiirabu ꞌikë kixun ñuikë bana

¹ ¡Uisa kara Judánu ꞌikë unikama an ꞌuxkinma imë́bi ꞌatima ñu ꞌatishi sinánkë unikama a oti ꞌain, kixun sinánëkin ka pëkarakëbëtan, an sinánëkë ñu a ꞌaia, atun ka usokin ñu ꞌati ꞌunánkëira ꞌikën, usa ꞌixun ka usakin ñu ꞌakanania!

² Bëtsi unin mekama kuëënkin ka atun bikuankania; usakin ꞌanan ka xubukama aribi biti kuëënkin mëkamakania. ꞌAnan ka uni ꞌimainun ꞌain ꞌaintsi ꞌibukamabi, an kasunankë ꞌain ñukama binuxun ꞌatima oia.

³ Usa ꞌain ka ësai Nukën ꞌIbu kia: ꞌËnribi kana uisa karana mitsu oti ꞌai kixun sinanin. Usa ꞌixun kana mitsúxmi ꞌatima ñuira inuti uisai kaina ꞌikani usai ꞌimi, ñuina ꞌarakakë aín tëxanu tëkërëkakëx aín maxká pikukasmakësa usaribiti ꞌinun mitsu ꞌimiti ꞌain, usai ꞌi kamina mitsux rabiakati nitsi nux kananuna bëtsi unikamasama ꞌai kixun sinánkë a nëtë́ti ꞌain, anun ꞌatima ñuira inuti nëtë ꞌikëbë.

⁴ A nëtën ka mitsu raíri unikaman ꞌatima okëx masá nuitutia kantaxunkin. Ësakin mitsumi kuaikin kakanti ꞌikën: Nukamax kananuna ꞌaisamaira masokin këñúkë ꞌian; nun ëmax ka Diosnan ꞌikën, ꞌaínbi ka Nukën ꞌIbunan ꞌikëbi axa numi nishkë unikaman ꞌibuaxa usa ꞌikë ka uínbi usakin ꞌaxuma ka ꞌa kixun kati ꞌaíma ꞌikën; usa ꞌain ka nun mekama nu bikuantankëx bëtsi unikamabë ꞌinánanxa.

⁵ Usa ꞌain kamina mitsux anua Nukën ꞌIbun unikama ꞌikë anu ꞌitima ꞌain.

Dios kikë bana ñuikinbi ꞌatimakin bana ñuikë unikama ñui kikë bana

⁶ ¡Usa ꞌain ka ësai kia an Diosan bana uni ñuixunkë unikaman ka paránkin nu bana ñuixuntima ꞌikën! —kiax ka atux kia—. Usa ꞌain ka nunu ꞌatima ñukama ꞌinútima ꞌikën.

⁷ ¿Mitsun kaina Diosan ka aín uni Israelkama ꞌatima okëma ꞌikë kixun sinanin? ¿Mitsun kaina Diosan ka nishkin aín uni ꞌakinti ëanxa kixun sinanin? ¿Mitsun kaina ꞌëx kikësokinsa Diosan aíma kixun sinanin? ¿Mitsun kaina Dios kikë bana an kara upíñu anun amima kixun sinanin?

⁸ Mitsux kamina ꞌën unikama ꞌiakën, usa ꞌaishi kamina ꞌën unikamami ꞌin. ꞌAínbi kamina bërí mitsux ꞌëmi nishkë unibu ꞌain, usa ꞌixun kamina axa ꞌakanankuatsini ukë unikaman chupa kupíkë bikuankanin, usakin ꞌakin kamina usakin ñu ꞌai ismina upí ꞌiti ꞌai kixun sinánkanin.

⁹ ꞌAnan kamina atun xubunuabi aín xanukama ëman chikinkan, chikíanan kamina atun bakë bëchikë ꞌimainun ꞌini bëchikëkamaribi, atu ꞌinanuxuma ꞌashikin bikan, ꞌanan kamina ꞌën ꞌinan ñukama aribi ëmian.

¹⁰ ¡Usa ꞌain kamina bërí nirukiani ënuax kuankanti ꞌain! Ënë mex ka anumi mitsux tantikanti ama ꞌikën. ꞌËn kana anuxumi mitsun ꞌatima ñuishi ꞌai ꞌëmi manukankë kupí, asérabi ꞌatimokin ënë me masóti ꞌain.

¹¹ Bëtsi unix ka këmëkin abi sinanx ësai kia: ꞌËn kana uvas baka ꞌakë ꞌimainun bëxnan ñui kin, ësaia an bana ñuikë unikama këmëi kikë ax ka ënë ëmanuxun mitsun kuakëx asábi ꞌikën.

Diosan an kaískë Israel unikama ꞌakinuxun ká ñuikë bana

¹² Usa ꞌain ka ësai Dios kia: ꞌËn unikama kana bëtsi unikaman buan ꞌikëbi amiribishi Jacobnën rëbúnkikama kamabi timë́nun ꞌimiti ꞌain; usokin ꞌakin kana Israel unikama ꞌitsamara ꞌikëbi atu timë́nun ꞌimiti ꞌain ꞌimikin kana ñuina ꞌarakakë aín kënënu ꞌikësa ꞌinun ꞌimianan carnerokaman pasto pia ꞌikësa ꞌinun ꞌimiti ꞌain, usokin ꞌimikëx ka Israel unikamax ꞌuakamë ꞌëoi ꞌitsaira ñuina ꞌarakakëx ꞌikësai sharákanti ꞌikën.

¹³ Usai ꞌikëbë rëkuë́nkiani kuania ka atun Dios nuibiankanti ꞌikën, nuibiani ka anun ëmanu atsínti xëputi anun chikikanti ꞌikën. Usai ꞌikankëbë ka Dios aín ꞌapu ax kamaxunbi atun ismainun kuanti ꞌikën.