Miqueas 1 - Kashibo-Kakataibo Biblia

Diosan ka Samaria ꞌimainun Jerusalén ëmanu tsókë unikama atun ꞌuchakë kupí masóti ꞌikë kixun ñuikë bana

¹ Ënë bana ka Nukën ꞌIbun Miqueas kakë uni Moréset kakë ëma chukúma anuxun namákësokin uisa kara Samaria ëma ꞌimainun Jerusalén oti ꞌikë kixun a nëtëkaman Jotam, Ahaz ꞌimainun Ezequías Judá menu ꞌapu ꞌain bana ꞌikën.

² Kamabi unikama mitsun kamina ënë banakama upíokin kuakanti ꞌain; ꞌimainun ka kamabi menu ꞌikë ëmakamanu ꞌikë unikamanribi bëmë́kin kuati ꞌikën: Diosan ka anua ꞌikë naíkamë ꞌëo anuxunbi, mitsun ꞌatima ñu ꞌakë kupí uisa kara oti ꞌikë usokin mitsu ꞌati ꞌikën.

³ Nukën ꞌIbu ax ka anua ꞌikë anuaxbi ai aín bashi rëbukaman nikuatsini uti ꞌikën.

⁴ Aín taë shimuküax ka aín bashikamax unin xara tsinu ꞌarukëx charákësa usaribiti ꞌinun ꞌiti ꞌikën, ꞌimainun ka me sapankamaxribi bakan kushiira ꞌëkin panarabëtanun tukakësa usaribiti ꞌiti ꞌikën.

⁵ Ënë ñukamax ka usai ꞌiti ꞌikën Israel unikama Jacobnën rëbúnki atun Diosan kakësabiokin ꞌakëma kupín, ꞌimainun ka Israel unikamax anua atux tsókë me anuaxbi ꞌuchakë ꞌain ka usai ꞌiti ꞌikën. ¿Uinuxun kara Jacobnën rëbúnkikaman aín bana kuaisama tanin? ¡Ax ka Samaria kakë ëma anu ꞌikën! ¿ꞌImainun kara uinu Diosmabi atun uniokë ñu rabikankë Judá menua ꞌikë ax ꞌit? ¡Ax ka Jerusalén kakë ëma anubi ꞌikën!

⁶ Usa ꞌain ka ësai Nukën ꞌIbu kia: ꞌËn kana Samaria kakë ëma rurupakëx bukukiankë ꞌain. A me kana anu uvas ꞌapátisa ꞌinun ꞌimiti ꞌain. Usokin ꞌakin kana anu ꞌikë maxáxkama me sapan amiokin puti ꞌain usokin ꞌakin kana amibirukin ꞌati nitsínkë akamaribi uisokin ꞌakë kara kixun ꞌunánti ꞌain.

⁷ Usokin ꞌakëbë ka atun rabikë ñukama ax tukapakin masókë ꞌiti ꞌikën, ꞌianan ka tëakëkama upíirabu a ꞌinánti nankëkama axribi nëënkëx këñuti aín chimapuishi ꞌiti ꞌikën. Akamax ka bëtsi bëtsi unibëa ꞌikë xanukaman aín nami uni ꞌamixuan bikë kuríkinën ꞌamikë ꞌikën, ꞌianan ka a rabinuxun ñu tankin ꞌakanxa, usa ꞌain kana a kuríki charotankëxun amiribishi kuríki ꞌinun ꞌimitëkënti ꞌain.

Miqueas usai Israel unikamax ꞌiti ñuikë bana kuati nitë́xëti masá nuituti ian ñuikë bana

⁸ Usa ꞌain kana usokin ñu ꞌakankëbë anun ꞌitsaira masá nuituti nitë́xëti inti ꞌain; usai ꞌi kana ꞌën taxakabi ëchiax nianan ꞌën chupa pëaxribi niti ꞌain, ñuina raëkëma an nami paxa pikë axa masánuitukë usaribiti ꞌiti ꞌain, ꞌianan kana ñuina pëchiñu avestruz kakë aín tuakëxa banai sharákësaribi ꞌinun ꞌiti ꞌain.

⁹ Usa ꞌain kana ꞌëx ësai kin: Samaria ëmanu tsókë unikamax ka ꞌën ꞌatimanun ꞌimikëx unix chankun ꞌikë rontisama usaribi atun ꞌucha ꞌikën, usa ꞌixun ka Judánu ꞌikë unikama ꞌaxa. ꞌAnan ka Jerusalén ëmanu ꞌikë unikamanuribi nukuaxa, anua ꞌën unikama tsókë ëma anuribi.

¹⁰ Usa ꞌain kamina mitsun ënë banakama Gat kakë ëmanua tsókë filisteo axa numi nishkë unikama atu uisa banabi ñuixuntima ꞌain; ꞌianan kamina atun ismainun masá nuitutibi ꞌitsaira intima ꞌain. Usai ꞌima kamina Bet-le-afrá kakë ëmanu ꞌikë me kupúkë anun chuarui shikíkanti ꞌain.

¹¹ ¡Axa Safir kakë ëmanu tsókë mikamax ka ñatanbiankin buánkëx chupañuma ꞌaish ꞌitsaira katë́kë kuankanti ꞌikën! ¡ꞌImainun ka Zaanán kakë ëmanu tsókë unikamax uinubi chikítima ꞌikën! ꞌIanan ka axa Bet-ésel ëmanu tsókë unikamax ꞌitsaira masá nuituti inia, usa ꞌain kamina mitsux an ꞌakintiñuma bërúkanti ꞌain.

¹² ꞌImainun ka axa Marot kakë ëmanu tsókë unikamax uin karaisa axa atumi nishkë unikamanua chikínun ꞌakinti ꞌikë kixun sinani bënëtiabi uínbi ꞌakintima ꞌikën, Nukën ꞌIbunbi ꞌimikëx ꞌatima ñu inúkanti ax Jerusalén ëmanu anun atsínti xëpútikama anubi bëbaruti ꞌikën.

¹³ Axa Laquis kakë ëmanu tsókë unikama mitsunribi kamina, Israel kamaxa ꞌiásaribiti ꞌikin, bana kuaisama tani ꞌiakën, usai ꞌikë ax ka Jerusalénnu tsókë unikama ꞌuchakë kupí ꞌikë ꞌiakëxa, usa ꞌain kamina caballo kamami bikin an nirinbianun mitsun caballonën nikinkë akama tëkërëkakanti ꞌain.

¹⁴ Axa Judánu tsókë unikama mitsun kamina abë istëkënananxuma Moréset-gat kakë ëmanu ꞌikë unikama ashiti kuantanun kati ꞌain. Aczib kakë ëma ax ka anu ñuina pakëti ñu nankë usaribi Israel unikaman ꞌapu an paránti ꞌiti ꞌikën.

¹⁵ Ësai ka Nukën ꞌIbu kia: ꞌËn kana an Maresá kakë ëmanua tsókë unikaman mitsu bitëkëntanun uni xuti ꞌain, usakin ꞌakëbë ka Israel unikaman ꞌapu atúxribi aín kërubu axbi abati kuantankëx, aín bashi kini Adulam kakë ëma ꞌurama ꞌikë anu axa ami nishkë unikamami rakuë́ti unëti kuanti ꞌikën.

¹⁶ Usaia ꞌimainun kamina axa Jerusalén ëmanu tsókë unikama mitsux ami sinaínrakë mitsun bakë bëchikëkama sinani masá nuituti ini ꞌaímai maxkukin mitsun bu tëakanti ꞌain, usakin mitsun tëai kamina ñuina pëchiñu nonshianën maxká raniñuma iskësa usaribi mitsun maxká ꞌiti ꞌain, mitsun bakë bëchikëkama ka axa mitsumi nishkë unikaman ñatanbiankin buánti ꞌikën, usa ꞌain kamina, mitsúxbi upiti maxkuti ñuina pëchiñu nonshianën maxká usaribi ꞌitánun ꞌikanti ꞌain.