Mateo 8 - Kashibo-Kakataibo Biblia

Jesusan an aín nami chëquímicë ꞌinsínñu uni pëxcüa

¹ Bana ñuixunquin sënë́ontancëx matánuax cuantëcënia ca ꞌitsa unin Jesús nuibiancëxa.

² Nuibiancëbë ca an aín nami chëquímicë ꞌinsínñu unin amiquiquiani cuani rantin puruni tsóbuquin Jesús cacëxa: —Mix cushi ꞌixun camina ꞌaisa tanquin ꞌë pëxcuti ꞌain.

³ Cacëxun aín mëcënan ramëquin ca Jesusan ꞌinsíncë uni cacëxa: —Cana mi ꞌati ꞌain. Min nami ca upí ꞌitëcëni motia. Usaquian cacëxëshi moti ca aín ñucë nëtë́acëxa.

⁴ Pëxcutia ca Jesusan a uni ꞌësëquin cacëxa: —ꞌËn mi pëxcucë ñuiquin camina uinu ꞌicë unibi catima ꞌain. Caíma cuanxun camina min nami pëxcúcë judíos sacerdote ismiti ꞌain. Ismianan camina Nucën Papa Dios rabiquin Moisés quiásabi oquin a ñu ꞌinánti ꞌain, camina asérabi pëxcúa quixun camabi unin ꞌunánun.

An Romanu ꞌicë capitán ñu mëëxuncë uni Jesusan pëxcüa

⁵ Usoquin ꞌatancëxa Jesús Capernuaúm ëmanu cuantëcëncëbë ca Romanu ꞌicë capitán achúshi, ax amiquiquiani cuancëxa.

⁶ Cuanquin ca ësaquin cacëxa: —An ꞌë ñu mëëxuncë bëná uni ca ꞌinsíanxbi baquirucëma paë tani bënëti ꞌën xubunu racataxa.

⁷ Quia ca Jesusan cacëxa: —Cana a pëxcui cuanti ꞌain.

⁸ Cacëxunbi ca capitánën cacëxa: —Mix cushi ꞌimainun ꞌëx mi meuira ꞌain camina ꞌën xubunu atsíntisama tanti ꞌain. Usa ꞌain camina cuanquinma ënuxunbi ꞌën ñu mëëmicë uni pëxcúnun cati ꞌain.

⁹ Cana ꞌunan min banaxbi ca cushi ꞌicë quixun. ꞌËn cana ꞌën ꞌapun ꞌë cacësabi oquin ꞌain. ꞌËn suntárucamanribi ca ꞌë bana cuatia. ꞌËn suntáru —ca cuantan —quixun ꞌën cacëx ca cuania. —Ca ut —quixun ꞌën cacëx ca bëtsix aia. An ꞌë ñu mëëxuncë uni —ñu ca ꞌat —quixun ꞌën cacëxun ca ꞌaia. Usaribiti ca ꞌën ñu mëëmicë uni mixmi —ca pëxcúti ꞌicë —quicëbëshi pëxcúti ꞌicën.

¹⁰ Usaía judíosma uni ꞌaíshbi a capitán quia cuaquin ca Jesusan an a nuibiancë unicama cacëxa: —Asérabi cana ꞌën mitsu cain, ënë uníxa ꞌëmi catamëcësaribitia ꞌia cana judío uni achúshibi iscëma ꞌain.

¹¹ ꞌËn cana mitsu cain, ꞌaisamaira judíosma unicamaxribi ca aucüaxa bari urucë amiax uanan anúan bari cuabúcë amiaxribi unuxun ꞌaia. Ai ca anua Abraham, Isaac, Jacob, ꞌimainun axa ꞌëmi catamëcë judíos unicama ꞌicë, anu acamabë Nucën Papa Diosan nëtënu ꞌiti ꞌicën.

¹² Usaía atux ꞌimainun ca judíos unicama axira Nucën Papa Diosan nëtënu ꞌiti ꞌaíshbi ꞌën bana cuaisama tancë, acamax ëman ꞌicë bëánquibucë anu ꞌiti ꞌicën. Anuax ca anu ꞌicë unicamabë tëmërai bënëti inti ꞌicën.

¹³ Usaquin unicama catancëxun ca Jesusan capitán cacëxa: —Camina min xubunu cuanti ꞌain. ꞌËmi catamëquinmi ꞌën usoquin ꞌaxúnun quixun ꞌë cacësabi oi ca min uni pëxcutia. Jesús ësai quicëbëshi ca capitanën ñu mëëmicë uni anu ꞌaíshmabi pëxcüacëxa.

Pedronën nachi Jesusan pëxcüa

¹⁴ Usaquin cabiani Pedronën xubunu cuanxun ca Jesusan Pedronën nachi ꞌitsisan ꞌi racácë mëracëxa.

¹⁵ Mëraxuan aín mëcën mëëcëxëshi ca aín ꞌitsis nëtë́acëxa. Usocëxëshi pëxcuti niruxun ca atu pimiacëxa.

ꞌItsa uni ñucë Jesusan pëxcüa

¹⁶ A nëtë́nbi ca bari cuabúcëbëa bëbáquishbucëbëtan a ëmanu ꞌicë unicaman ñunshin ꞌatimañu unicama an pëxcunun Jesúsnu bëacëxa. Bëia ca Jesusan aín banáinshi ñunshin ꞌatimacama uninua chiquíanan uni ñucëcamaribi pëxcüacëxa.

¹⁷ Isaías quiásabi oquin ca usaquin ꞌacëxa, ësai quicë: “An ca nun ñucë pëxcüanan an nu paëocëcama nu tërë́caxuanxa”.

—Aín unicamax ca ax cuëëncësoi ꞌima Jesúsmishi sinánti ꞌicë —quicë bana

¹⁸ ꞌAisamaira unían nëbë́tsioracëxun oquin ca Jesusan aín ꞌunánmicë unicama cacëxa: —ꞌUcë manan cuanun ca cuan.

¹⁹ Usaquian cacëbë anu cuanquin ca an Moisésnën cuënëo bana ꞌunáncë uni achúshinën Jesús cacëxa: —Uinu caramina mix cuani anuribi cana ꞌëx mibë cuanti ꞌain.

²⁰ Cacëxun ca Jesusan cacëxa: —Ñu pëchiñunëxbi ca anua batsi oti nañu ꞌicën. Capa ꞌinúxbi ca aín anu ꞌuxti quiniñu ꞌicën. Usa ꞌaínbi cana uni ꞌinux Nucën Papa Diosnuax uá, ꞌëx anu ꞌuxtiñumabi ꞌain. Usa ꞌain sapi camina ꞌëbë cuantima ꞌain.

²¹ Caia ca bëtsi uniribi an aín bana cuacë, an cacëxa: —Mibë cuanti ꞌaínbi cana ꞌën papanu pan cuainsa tanin. A bamaia maíntancëx cana mibë cuanti ꞌain.

²² Quia ca Jesusan cacëxa: —Camina ꞌëmi sinánan ꞌëbë cuanti ꞌain. Axa Nucën Papa Diosmi sinántisama tancë uni, an bamacë uni maínun ëanan camina ꞌëbë cuanti ꞌain.

Bëchun ꞌimainun suñúan Jesusan nëtë́mia

²³ Usaquin cabiania ꞌucë manan cuanux manë nuntinu ꞌiruquiancëbë ca aín ꞌunánmicë unicamaxribi ꞌiruacëxa.

²⁴ ꞌIruquiani cuanía Jesús ꞌuxánbi suñúan ꞌicuatsíncëbë parúmpapa bëchuni ca ꞌumpax aín nuntinu ꞌiruacëxa.

²⁵ Usai ꞌia oquin ca aín ꞌunánmicë unicaman Jesús bësúnquin cacëxa: —Nu ca ië́mit, cananuna nanëtin.

²⁶ Quia ca Jesusan bësuquin cacëxa: —¿Uisacatsi caramina racuëtin? Mitsun camina Nucën Papa Diosan ca asérabi nu bërúanquin ꞌaquinia quixun sinaniman. Cai niruquin ca suñúan —ca nëtë́t —canan parúmpaparibi —ca bucubut —quixun cacëxa. Cacëxëshia suñu nëtë́ishimainun ca baca bëchúnribi nëtë́acëxa.

²⁷ Usoia isi ca aín ꞌunánmicë unicama ratuti canancëxa: —¿Uisa uni cara ënëx ꞌic? Suñúanënbi, bacánbi ca aín bana cuatia.

Ñunshin ꞌatimañu uni rabë́ Gadara menuxun Jesusan pëxcüa

²⁸ Usaquiani ꞌucë manan cuantancëx ca Gadara cacë menu bëbacëxa. Bëbatancëx nuntinuax ꞌibúquiani cuaniabi ca ñunshin ꞌatimañu uni rabëtan, anu uni maíncënuax uquin Jesús mëracëxa. A uni rabëtan ca ñunshin ꞌatimañu ꞌaish uinu ꞌicë unínbia chichabiantisama ꞌixun anun cuanti bai bëaraxun ui unibi anun inumiama ꞌicën.

²⁹ Usa ꞌixun ca a isi munuma cuëncë́nquin Jesús cacëxa: —¿Uisati caramina Jesús, Diosan Bëchicë, min nu ubíoin? ¿Anúnmi nu masóti nëtë ucëma pan ꞌaínbi caramina nu ubíoi uan?

³⁰ Usaia ꞌimainun ca ꞌaisamaira cuchi atu ꞌurama pi bucüacëxa.

³¹ Usa ꞌain ca ñunshin ꞌatimanën Jesús cacëxa: —Nu ënua xuquin camina nux cuchicamanu ꞌinun nu xuti ꞌain.

³² Cacëxun ca Jesusan cacëxa: —Ca cuantan. Cacëx ca ñunshin ꞌatimacama a uni rabë́nuax chiquíquianx cuchicamanu atsíancëxa. Atsíncëbë ca cuchicama camáxbi tsuáquiquiani abáquiani cuanx cuëtúnuax parúmpapanu rëucubuti bacamiqui cëñúacëxa.

³³ Usacëbëtan ca an cuchi bërúancë unicaman a ꞌurama ꞌicë ëma chanu abáquiani cuanxun anu ꞌicë unicama usaia cuchicama ꞌicë ñuixuanan ñunshin ꞌatimañu uni rabë́ribi usai ꞌicë ñuixuancëxa.

³⁴ Ñuixunquin chanioia cuabiani ca a ëmanu ꞌicë unicamax aín ëma ëbiani Jesús isi riquiancëxa. Riquianxun isquin ca camaxunbi atun nëtënuaxa cuantánun Jesús cacëxa.