Mateo 7 - Kashibo-Kakataibo Biblia

—Unin ca uni itsi ꞌuchotima ꞌicë —quiáxa Jesús quia bana

¹ Nucën Papa Diosanma mitsuribi ꞌuchoia, usa ꞌain camina bëtsi uni ñui manánquin ꞌuchotima ꞌain.

² Mitsúnmi uni itsin ñu ꞌaia isquin a uni ꞌuchoia ca Nucën Papa Dios ꞌimainun unínribi, mitsúnribi caramina uisa ñu ꞌai quixun isti ꞌicën. Mitsun —min usa ñu ꞌati ca ꞌaisama ꞌicë —quixun uni itsi cacë ꞌixunbi usaribi oquin ꞌaia ca Nucën Papa Dios ꞌimainun unínribi mitsúnmi bëtsi uni ꞌuchocësaribi oquin mitsu ꞌuchoti ꞌicën.

³ Bëtsi unin ꞌucha ꞌitsamashi ꞌicë a sinánquinbi camina mitsun ꞌucha ꞌaisamaira ꞌicëbi sinaniman. Ënëx ca ësa ꞌicën. Bëtsi uníxa aín bëru xamë́nu i sani chamaratsuñu ꞌicësa ꞌaínbi camina mitsux i mo mitsun bëru xamë́nu ꞌicësa ꞌain. ¿Uisa ꞌixun caramina bëtsi unin bëru xamë́nu ꞌicë i sani chamaratsu a sinánquinbi axa mitsun bëru xamë́nu ꞌicë i mo sinaniman?

⁴ ¿Mitsun bëru xamë́nu ꞌicë i mo mëníoquin bicëma ꞌixun caramina uisa cupí —i sani chamaratsu min bëru xamë́nu ꞌicë camina ꞌë bimiti ꞌai —quixun bëtsi uni cati ꞌain?

⁵ Mitsun pain mitsun bëru xamë́nu ꞌicë i mo a bitancëxun camina upí oquin isquin bëtsi uni aín bëru xamë́nu ꞌicë i sani chamaratsu bixunti ꞌain.

⁶ An Nucën Papa Dios timaquin aín bana cuaisama tancë uni camina ꞌën mitsu cacë banacama ñuixuntima ꞌain, ñuixuncëxbia atux Nucën Papa Dios ꞌusani ami ꞌatimati banai mitsumi nishquin mitsu ꞌatimoti rabanan. Usa unicamax ca an ñu upí pimicëxunbia uni ꞌuchítinën ami nishquin picësaribi ꞌicën. ꞌIanan ca unían aín cënënu niia cuchin ꞌaisamaira cupícë ñu a amáquin chuoórucësa ꞌicën.

Nucën Papa Diosbë banaquin a ñucáti Jesús quia bana

^7-8 Camina ꞌunánti ꞌain, ui unin cara Nucën Papa Dios ñucáquin caia a uni ca Nucën Papa Diosan ꞌinania. Ësa ca: Bari bariquin ca unin ñu mëraia. ꞌImainun ca unin bëtsi unían xëcuë taxcaia cuaquin a xubunu ꞌicë unin xëocaxunia. Usaribi oquinmi mitsun ñucáquin cacëxun ca mitsun bana cuaquin Nucën Papa Diosan mitsux cuëëncë ñu mitsu ꞌaxunti ꞌicën.

⁹ ¿Mix aín papa ꞌixunbi caramina min bëchicënëan mi pán ñucácëxun maxax ꞌinánti ꞌain? Camina ꞌinántima ꞌain.

¹⁰ ¿Tsatsa mi ñucácëxun caramina runu a ꞌinánti ꞌain? Camina ꞌinántima ꞌain.

¹¹ Mitsux ꞌatima uni ꞌixunbi camina mitsun bëchicë upí ñu ꞌinanin. Mitsúnmi ꞌacësamaira oquin ca Nucën Papa Dios naínu ꞌicë an a ñucácë uni a upí ñu ꞌinánti ꞌicën.

¹² Bëtsi uníxa mibë upí ꞌianan mi ꞌaquintimi mix cuëëncë, usaribi oquin camina min bëtsi unibë upí ꞌianan a ꞌaquinti ꞌain. Usaquin ꞌanun ca Moisésnën cuënëo bana quia. ꞌImainun ca an Nucën Papa Dios quicë bana uni ñuixuncë unicaman cuënëo banaribi usai quia.

Rabë́ ca bai ꞌicë quiáxa Jesús quia bana

^13-14 Ësa ca. Anúan uni cuanti bai ca rabë́ ꞌicën, cha ꞌimainun chucúma. Bai cha anun atsínti, anúinra ca ꞌaisamaira uni cuania. A bain cuanx ca uni anu Nucën Papa Dios ꞌicëma nëtë anuaxa ꞌaisamaira tëmërati, anu bëbati ꞌicën. Bëtsi bai chucúma, anun atsínti chucúma, anun ca ꞌitsamashi uni cuania. A bain atsínquiani cuantancëx ca uni nëtë́timoi Nucën Papa Diosan nëtë upí anu abë ꞌiti ꞌicën. A bai chucúma anun camina mitsux cuanti ꞌain.

Aín bimi isquin uisa i cara quixun i ꞌunánti Jesús quia bana

¹⁵ Bëtsi bëtsi unin ca mitsu parántisa tanquin —Nucën Papa Diosan sinánmicëxun cana mitsu bana ñuixunin —quiquinbi anbi sináncë bana ñuixunia. Usa unin ñuicë bana camina cuatima ꞌain. A unicamax ca ꞌunánmaratsu ñuinasa ꞌaíshbi aín nuitu mëu ꞌatima sinánñu ꞌaish pianancë ñuinasa ꞌicën.

¹⁶ Atun ñu ꞌacë isquin camina uisa uni cara quixun ꞌunánti ꞌain. Ësaribi ca. A cuti bimi a ca aín bimi cutima i an tuaíma.

¹⁷ Usaribiti ca aín íxa xanáncë ꞌaish ꞌaisama ꞌain aín bimi ꞌaisama ꞌicën. Aín íxa upí ꞌain cuni ca aín bimíxribi upí ꞌia.

¹⁸ Aín íxa upí ꞌain ca aín bimi ꞌaisama ꞌima. Aín íxa xanáncë ꞌaish ꞌaisama ꞌain ca aín bimi upí ꞌima.

¹⁹ ꞌApácëxbia upiti bimiama ca unin i rëtancëxun nëënia.

²⁰ Aín bimi isquin ca unin ꞌunánti ꞌicën, a i cara upí ꞌicë, cara ꞌaisama ꞌicë quixun. Usaribi oquin camina unin ñu ꞌaia isquin asérabi cara Nucën Papa Diosan uni ꞌicë quixun ꞌunánti ꞌain.

Camabi uníxira Nucën Papa Diosan nëtënu ꞌitima Jesús quia bana

²¹ An —mix camina ꞌën ꞌIbu ꞌai —quixun ꞌë cacë unicama ax ca camáxira Nucën Papa Dios naínu ꞌicë aín nëtënu abë ꞌitima ꞌicën. An aín cuëëncësabi oquin ꞌacë unicamax cuni ca anu abë ꞌiti ꞌicën.

²² Anun ënë nëtëcama cëñúcë nëtën ca ꞌitsa unin ꞌë cati ꞌicën: Mix nun ꞌIbu ꞌain cananuna min cushínbi bana ñuixuan, min cushin ñunshin ꞌatima uninua chiquíanan cananuna min cushin uni itsin ꞌacëma ñu ꞌan.

²³ Quiabi cana atu cati ꞌain: Mitsux camina ꞌën unima ꞌain. Ñu ꞌatima ꞌacë ꞌaish camina mitsux ꞌëbë ꞌitima ꞌain. Ca cuantan.

Upí oquin ꞌacë xubu ꞌimainun ꞌatimaquin ꞌacë xubu Jesusan ñuia bana

^24-25 Usa ꞌaínbi ca an ꞌëmi sinánquin ꞌën bana cuanan a bana quicësabi oquin ꞌacë uni ax an upí oquin sinánxun masinuma matánu xubu ꞌacë unisaribi ꞌicën. A unin xubu ca ꞌaisamaira ꞌuí ꞌibúcëbë ꞌitsaira baca ꞌëmainun ꞌaisamaira suñúan bëquiquinbi uisabi ocëma ꞌicën.

²⁶ Usa ꞌaínbi ca an ꞌën bana aín pabitan cuaxunbi a bana quicësabi oquin ꞌacëma uni an upí oquin sinánxunma masinu xubu ꞌacë unisaribi ꞌicën.

²⁷ A unin xubu ca ꞌaisamaira ꞌuí ꞌibúcëbë ꞌitsaira baca ꞌëmainun ꞌaisamaira suñúan bëquiquin puxuaxa. Usoquin ca aín itácamaribi tsasipaquin cëñuaxa.

^28-29 An xuá ꞌixun ca Jesusan Nucën Papa Diosan cushínbi bana ñuixuancëxa. An Moisésnën cuënëo bana ꞌunáncë unicaman banasamaira ca Jesusan bana ꞌiacëxa. Jesusan bana ñuixunquin sënë́oncëbë ca an aín bana cuacë unicama ratuti —usa bana cuacëma cananuna ꞌain —quiacëxa.