Mateo 4 - Kashibo-Kakataibo Biblia

Ñunshin ꞌatimanën ꞌapúan Jesús ꞌatima ñu ꞌamiti sinan

¹ Nashimicë ꞌicë ca Nucën Papa Diosan Bëru Ñunshin Upitan Jesús anu uni ꞌicëma menu cuanti sinánmiacëxa, anuxun ca ñunshin ꞌatimanën ꞌapun ñu ꞌatima ꞌamicatsi quixun ꞌati ꞌicë quixun ꞌunánquinbi.

² Anu ꞌixun ca Jesúsan añu ñubi cuarenta imë́ ꞌimainun cuarenta nëtën piama ꞌicën. Ñu piima ca panancëxa.

³ Panancë ca ñunshin ꞌatimanën ꞌapun anu uxun ꞌatima ñu ꞌamicatsi quixun ësaquin cacëxa: —Asérabi Diosan Bëchicë ꞌixun ca ënë maxáxcama pán ꞌinun cat.

⁴ Cacëxunbi ca Jesusan cacëxa: —Ësai ca Nucën Papa Diosan bana cuënëo quia: “Pán piishi ca uni tsótima ꞌicën. Uisai cara Nucën Papa Dios quia a bana ꞌairibi ca uni tsóti ꞌicën”.

⁵ Usotancëxun ca ñunshin ꞌatimanën ꞌapun Jesús Jerusalén ëma upí anu buáncëxa. Buántancëxun ca anuxun Nucën Papa Dios rabiti xubu aín mascuan sënë́ncënu buánruacëxa.

⁶ Buánrutancëxun ca cacëxa: —Diosan bana cuënëo ca ësai quia: An ca aín ángelcama mi bërúanmia. Bërúancëxmi maxáxmi tachacaxma ꞌinun ca aín mëcënan biquin mi bacáruti ꞌicën. Usa ꞌain ca mix asérabi Diosan Bëchicë ꞌaish ënuax nuánquianx menu nipacëtan.

⁷ Cacëxunbi ca Jesusan cacëxa: —Ësairibi ca aín bana quia: “Nucën ꞌIbu Diosan cara ꞌë ië́miti ꞌicë iscatsi quixun camina a tantima ꞌain”.

⁸ Usotancëxun ca ñunshin ꞌatimanën ꞌapun amiribishi tantëcëncatsi quixun aín bashi chairucë manan Jesús buáncëxa. Buántancëxun ca anuxun camabi me ꞌimainun a menu ꞌicë ëmacamaxa cha ꞌaish upí ꞌicë ismiacëxa.

⁹ Ismiquin ca cacëxa: —Minmi ꞌë rantin puruni tsóbuquin ꞌë rabicëxun cana ënë mecama, camabi anu ꞌicë ñucamacëñunbi minan ꞌinun mi ꞌinánti ꞌain.

¹⁰ Usaquian cacëxun ca Jesusan cacëxa: —Ñunshin ꞌatimanën ꞌapu, ënuax ca cuantan. Nucën Papa Diosan bana cuënëo ca ësai quia: “Min ꞌIbu Diosëshi camina rabiti ꞌain. Rabiquin camina ashi ax cuëëncësabi oquin ñu ꞌaxunti ꞌain”.

¹¹ Usoquian cacëx ca ñunshin ꞌatimanën ꞌapu Jesús ëbiani cuancëxa. Cuancëbëtan ca Nucën Papa Diosan ángelcaman uxun Jesús ꞌaquiancëxa.

Galilea nëtënuxuan ꞌatabaquin Jesúsan bana ñuixuanan ñu ꞌa bana

¹² Usa ꞌain ca Juan, an uni nashimicë, ami nishquin ꞌapun sipuacëxa. Juan sipuacë ñuicania cuabiani ca Jesús Judea nëtënuax Galilea nëtënu cuantëcëancëxa.

¹³ Anu cuanx Nazaret ëmanu bëbatancëx ca a ëbiani Galilea cacë parúmpapa rapasu ꞌicë ëma, Capernaúm, anu ꞌi cuancëxa. A me anu Capernaúm ꞌicë ax ca Zabulón ꞌimainun Neftalí cacë me ꞌiacëxa.

¹⁴ Anu ca Jesús ꞌiti ꞌicë quixun ca Nucën Papa Diosan ꞌamicëxun Isaíasnën cuënëocëxa, ësaquin:

¹⁵ Zabulón me ꞌimainun Neftalí me, a Jordán baca ꞌucë manan ꞌicë, ꞌimainun anun parúmpapanu cuanti bai acamax ca Galilea me, anu judíosma unibu bucucë, anu ꞌicën.

¹⁶ Anu ꞌicë unicamax ainanma ꞌixun Nucën Papa Dios cuëëncësabi oquin ꞌati ꞌunáncëma ꞌaíshbi ca Cristo ucëbë an ꞌunánmicë ꞌiaxa. Ainanma ꞌaish bamati ꞌaíshbi ca Cristo ucëbë an ꞌunánmicëx xabánu ꞌicësa ꞌiaxa.

¹⁷ Bana ñuixuntabaquin ca Capernaúm ëmanu ꞌixun Jesusan anu ꞌicë unicama ësaquin cacëxa: —Anun Nucën Papa Diosan abë upí ꞌinun mitsu ainan ꞌimiti nëtë ca ꞌurama ꞌicën. Usa ꞌain ca ami sináncë ꞌaíshmabi sinanati ami sinan. Usaquian anuxun bana ñuixunquin cacësabi oquin ca Jesusan ꞌitsa oquin a bana unicama ñuixuancëxa.

An tsatsa bicë uni rabë́ ꞌimainun rabë́ Jesusan abë cuanun ca

¹⁸ Parúmpapa Galilea cuëtani cuanquinbi ca Jesusan rabë́ uni mëracëxa. A uni rabëtax ca achúshi Simón ꞌicëbi Pedroribi cacë, a ꞌimainun aín xucë́n Andrés cacë ꞌiacëxa. A rabëtax an tsatsa bicë uni ꞌixuan tsatsa ricania ca Jesusan mëracëxa.

¹⁹ Mëraquin ca cacëxa: —ꞌËn mi ꞌunánminun ca ꞌëbë cuani ut. An tsatsa bicë uni ꞌicëbi cana ꞌëmi catamënunmi uni sinánminun mitsu ꞌimiti ꞌain.

²⁰ Usaquian Jesusan cacëxuinshi aín rica ëbiani ca abë cuancëxa.

²¹ A uni rabë́ bibiani cuanquinbi ca Jesusan bëtsi uni rabë́ribi, Zebedeonën bëchicë, Jacobo ꞌimainun aín xucën Juan, an aín papa Zebedeobëtan nuntinuxun rica mëníoia mëracëxa.

²² Mëraquian cuënquin Jesusan abëa cuanun cacëxëshi ca nuntinubi aín papa ëbiani Jesúsbë cuancëxa.

Galilea nëtënuxun Jesusan bana ꞌitsa uni ñuixuan

²³ Usa ꞌain ca Jesusan Capernaúm anuax cuanxun Galilea mecamanuxun anua judíos unicama timë́ti xubucamanuxun bana ñuixuancëxa. —Nucën Papa Diosan ca ami catamëcë unicama abë ꞌinun ainan ꞌimiti ꞌicë —quixun caquin upí bana unicama ñuixuanan ca uni ñucëcama pëxcüacëxa.

²⁴ Usoquian ꞌaia Jesús chanioia cuaquin ca Siria nëtënu ꞌicë unicaman axa ñucëcama Jesusan pëxcunun quixun anu buáncancëxa. Bëtsi bëtsi ñucëcama ꞌimainun ñunshin ꞌatimanën ꞌibuacë unicama ꞌimainun uni ñucë nirucuainquinbi tancëma, ꞌimainun aín nami nimëti saquiquicë acama anu buáncëxun ca Jesusan pëxcüacëxa.

²⁵ Usoquin bana ñuixuanan unicama pëxcubiania cuania ca ꞌaisamaira unin Jesús nuibiancëxa. Galilea menu ꞌicë unicama ꞌimainun Decapolis cacë menu ꞌicë unicama ꞌimainun Jerusalénu ꞌicë unicama ꞌimainun Judea mecamanu ꞌicë unicama ꞌimainun Jordán baca ꞌucë manánuaxribi ucë unicaman ca abë cuanquin Jesús nuibiancëxa.