Mateo 28 - Kashibo-Kakataibo Biblia

Jesús baísquia

¹ Anun ñu mëëtima nëtë ñantabuonxa pëcaracëma ꞌaínshi ca María Magdalena ꞌimainun María itsi anu Jesús mëníocë isi cuantëcëancëxa.

² Cuanxa bëbacëbëbi ca mecama cushíinra shaíquiacëxa. Shaíquicëbëtan ca ángelnën Nucën ꞌIbu Diosan xucëx uquin, anúan anu Jesús ꞌicë quini xëpucë maxax cha taranacëxa. Usotancëx ca anu tsóbuacëxa.

³ A ángelnëx ca caná mëritia iscësa ꞌianan aín chupa uxuira uxu ꞌiacëxa, matsi uxuira iscësaribi ꞌiacëxa.

⁴ Usa ꞌicë isi ca anu ꞌicë suntárucamax ꞌaisamaira racuëti bërëi bamacësa ꞌiacëxa.

⁵ Usaría suntárucamax racuë́mainun ca ángelnën xanu rabë́ cacëxa: —Racuë́axma ca ꞌit. Cana ꞌunanin, mitsun camina Jesús, a i curúsocënu matásëxancë, a barin.

⁶ Ax ca ënuma ꞌicën. Axa quicësabi oi ca baísquiaxa. Anua unin racáënxancë ca isi ut.

⁷ Istancëx bënëtishi cuanxun camina aín ꞌunánmicë unicama ësaquin cati ꞌain: Jesús ca bamaxbi baísquiaxa. Ax pain ca Galilea menu cuania. Mitsúnribi camina anu cuantancëxun anuxun a isti ꞌain. Ësaquin mitsu canux cana ënu ꞌain.

⁸ Usaquian ángelnën cacëxun, asérabi ca Jesús anuma ꞌicë quixun istancëx ca quininuax chiquíquiani racuëtibi cuëënquiani aín ꞌunánmicë unicama ñuixuni abáquiani cuancëxa.

⁹ Bain abáquiani cuanquinbi ca Jesús aia isacëxa. A isia ratutia ca Jesusan —¿caramina ain? —cacëxa. Cacëx a tanáin rantin puruni tsóbuquin ca Jesús tamëëquin rabiacëxa.

¹⁰ Rabicëxun ca Jesusan cacëxa: —Racuë́axma ca ꞌit. Cuanxun camina Galileanua cuanun ꞌën xucë́antu cati ꞌain. Anuxun ca ꞌë isti ꞌicën.

Suntárucaman judíos unicama ca

¹¹ Jesús isbiania, a xanu rabëtax aín ꞌunánmicë unicama cai cuantamainun ca an anu Jesús mëníocë me bërúancë suntárucama raírinën Jerusalénu cuanxun judíos sacerdotenën cushicamanu cuanxun atúan iscë ángel ꞌimainun Jesús ꞌaíma ꞌicë, acama ñuiquin cacëxa.

¹² Usoquian cacëx ca ꞌapucamax uni caniacëcëcamabë bananux timë́acëxa. Timë́ax acamaxbi banaquin ca uisoti cara quixun sináncancëxa. Sinani canantancëxun ca suntárucama ꞌitsaira curíqui ꞌinánquin cacëxa:

¹³ —Mitsun camina “nuxnu ꞌuxan ca imë́, aín ꞌunánmicë unicaman bibianquin Jesús buánxa” quixun paránquin unicama cati ꞌain.

¹⁴ Usoquinmi cacëxuan unicaman chaniocëbëtan mitsun ꞌapun cuacëbë cananuna nux abë banati ꞌain. Nux abë banacëbë camina mitsux uisaríma asábi ꞌiti ꞌain.

¹⁵ Usoquian judíos unibunën ꞌapucaman cacëx ca suntárucamax curíqui bibiani atúan cacësabi oquin unicama parani cuancëxa. Atúan usoquin cá cupí ca bërí nëtë́nribi judíos unicama usai quia.

Jesusan aín ꞌunánmicë unicama ashiquin cá bana

¹⁶ Angelnën cacësabi oi cuanxúan xanucaman cacëx ca Jesusan ꞌunánmicë uni mëcën rabë́ ꞌimainun achúshi, acamax Galileanu ꞌicë matá me anu cuancëxa, anu cuanúan Jesusan cacë anu.

¹⁷ Cuanxun anua mëraxun ca cuëënquin —ënëx ca asérabi Nucën ꞌIbu Jesús ꞌicë —quixun sinánquin rabiacëxa, raírinëan —asérabi ca Nucën ꞌIbu Jesús ꞌicë —quixun sináncëbëtanmabi.

¹⁸ Usoquian rabicëxun ca Jesusan a rapasu cuanquin atu cacëxa: —ꞌËn Papa Diosan ca naínuxun ꞌanan menuxunribi añu ñu carana ꞌaisa tani a ꞌëx cuëëncësa oquin ꞌanun aín cushi ꞌë ꞌinánxa.

¹⁹ Usa ꞌain camina mitsun camabi menu cuanquin anu ꞌicë unicama ꞌëmi catamënun sinánmiti ꞌain. Usoquin sinánmiquin camina, ëmi ca catamëtia quixun ꞌunántioquin ꞌën Papa Diosmi sinani, ꞌëmiribi sinánan aín Bëru Ñunshin Upími sinania, nashimiti ꞌain.

²⁰ Nashimianan camina ꞌën mitsu ñuixuncë banacama ꞌunánmiquin a banacama quicësabi oquin ꞌanun quixun atu ꞌunánmiti ꞌain. Usaquin ꞌaquin camina ꞌunánti ꞌain, ꞌëx cana camabi nëtën usaquin ꞌacë ꞌën unicamabë ꞌain, ꞌëx utëcënti nëtë sënë́ntamainun. Ashi.