Mateo 26 - Kashibo-Kakataibo Biblia

IV. BAMAXBIA JESUCRISTO BAISQUIA BANA (26-28) Judíos unicamax Jesúsmi ꞌësë́nan

¹ ꞌUran bana ñuixuntancëxun ca Jesusan aín ꞌunánmicë unicama ësaquin cacëxa:

² —Camina ꞌunanin, rabë́ nëtë ꞌicëbë ca Pascua anun carnero ꞌati nëtë ꞌiti ꞌicën. A nëtën ca unían binun uni itsin ꞌë ꞌinánti ꞌicën. ꞌInáncëxun ca i curúsocënu bamanun ꞌë matásti ꞌicën. Usaquin ca Jesusan aín ꞌunánmicë unicama cacëxa.

³ Usa ꞌain ca judíos sacerdotenën cushicama ꞌimainun caniacëcë unicama, anua atun cushiira Caifás ax ꞌicë, a xubunu timë́acëxa.

⁴ Anu timë́ax ca —ꞌanuxun caranuna uisoxun Jesús unían ꞌunánunmaishi biti ꞌai —quiax ꞌësë́nancëxa.

⁵ ꞌËsë́nani ca quicancëxa: —Unicamaxma anun rabanan nëëti tsuáquiruia, usa ꞌain cananuna anun carnero ꞌati nëtën bitima ꞌain.

Betanianuxuan xanuxun Jesúsmi ro tutuca

⁶ Betania ëmanu cuanx ca Jesús Simonan xubunu ꞌiacëxa. Simón ax ca an aín nami chëquímicë ꞌinsínñu ꞌaíshbia pëxcúcë uni ꞌiacëxa.

⁷ Anua mesanu pi tsotan ca xanu achúshinën, anu sanuira ꞌinínti ro ꞌaruti ñu bëi uxun a ro cupíira cupí ꞌicëbi Jesusan maxcá a ron chabócëxa.

⁸ Usoia isi ca Jesusan ꞌunánmicë unicamax a xanumi nishi canancëxa: —¿Uisati cara ro ñancábi cëñuax?

⁹ Anun ñuñuma uni ꞌaquinti ënë ro ꞌitsaira curíqui cupí maruti ca ꞌiaxa.

¹⁰ Usai canania cuaquin ca Jesusan cacëxa: —¿Uisati caramina ënë xanu ami nishquin ñuin? Ësoquian ꞌë ꞌacë ënëx ca asábiira ꞌicën.

¹¹ Camabi nëtën camina ñuñuma uni isin. Usa ꞌaínbi camina mitsun xënibuquin ꞌë istima ꞌain.

¹² Bamacë maínuxun usoquin unin ꞌati tanquin ca ënë xanun ꞌë ron ꞌaxa.

¹³ Asérabi cana mitsu cain, uinuxun cara camabi menuxun ꞌën unibunën ꞌën bana, anúan uni Nucën Papa Diosnan ꞌiti, a ñuixunia, anuxun ca ënë xanúan ësoquin ꞌe ꞌacë ënëribi ñuixunti ꞌicën, camabi unían ꞌunánun.

Judasnëan Jesús uni ꞌinan

¹⁴ Usa ꞌain ca Jesusan ꞌunánmicë uni achúshi, Judas Iscariote, ax anua judíos sacerdotenën cushicama ꞌicë anu cuancëxa.

¹⁵ Cuanxun ca cacëxa: —¿ꞌËn Jesús mitsu ꞌinánun caramina uiti curíqui ꞌë ꞌinánti ꞌain? Cacëxun ca atun Judas treinta curíqui ꞌináncëxa.

¹⁶ ꞌInáncëxun ca Judasnë, uisaxun carana ënë unicama Jesús bimiti ꞌai quixun sináncëxa.

Jesúsbëtan aín ꞌunánmicë unicaman ashiquin piia

¹⁷ Anun chamiti ñucëñunma ꞌacë pán anun piti nëtëa ꞌain ca aín ꞌunánmicë unicaman anu cuanxun Jesús ñucáquin cacëxa: —¿Uinuxuinra nun Pascua nëtën a piti ñu mi mëníoxunti caramina cuëënin?

¹⁸ Cacëxun ca Jesusan cacëxa: —Ëma ꞌuri cuantancëx bëbaquin camina ꞌën mitsu a ñuiquin cacë uni a ësoquin cati ꞌain: An nu ꞌunánmicë uni an ca ësaquin mi canun nu caxa, Anúan bamanun ꞌë bicanti nëtë ca uaxa. Usa ꞌain cana min xubunuxun pain ꞌën ꞌunánmicë unicamabëtan Pascua nëtën piti ñu piti ꞌain.

¹⁹ Usaquian cacëx cuanxun ca aín ꞌunánmicë unicaman an cacësabi oquin an ñuicë xubu mëraxun anuxun Jesúsbëtan piti ñucama mëníocëxa.

²⁰ Mëníocë ꞌain ca Jesúsbë aín ꞌunánmicë unicama mëcën rabë́ ꞌimainun rabë́ acamax bëbaquishcëbë pinux mesanu bucubuacëxa.

²¹ Bucubuxuan abëtan piia ca Jesusan cacëxa: —Asérabi cana ꞌën mitsu cain, micama achúshinën camina axa ꞌëmi nishcë unicama ꞌë ꞌinánuxun ꞌain.

²² Ësaquian cacëxun oi masá nuituquin ca aín ꞌunánmicë unicama achúshi achúshinën Jesús ñucáquin cacëxa: —¿ꞌËn carana uni mi ꞌinánti ꞌain? ¿ꞌË cat?

²³ Quia ca Jesusan cacëxa: —An ꞌëbëtan manë xampami pán chabóxun picë, an ca ꞌë uni ꞌinánti ꞌicën.

²⁴ Asérabi Nucën Papa Diosan bana cuënëosabi oi cana uni ꞌinux anuax uá, ꞌëx bamati ꞌain. Usa ꞌaínbi ca an ꞌatimonuxun binun uni ꞌë ꞌináncë uni, ax ꞌuchañuira ꞌaish uisoquin cara ꞌati ꞌicë usoquian Nucën Papa Diosan ꞌacë ꞌiti ꞌicën. Usai ꞌitima cupí ax unitima ca ꞌiacëxa.

²⁵ Quia ca an a binun uni ꞌinánti Judas an Jesús ñucáquin cacëxa: —¿ꞌËx carana a ꞌain? Cacëxun ca Jesusan cacëxa: —Ca usa ꞌicën, mixmi quicësa.

²⁶ Usaquin cacëxuan aín ꞌunánmicë unicaman pimainun ca Jesusan pán biquin Nucën Papa Dios —asábi ca —catancëxun, pán tucapaxun ꞌinánquin atu cacëxa: —Ënë ca pit. Mitsúnmi piti pán ënëx ca ꞌë ꞌicën.

²⁷ Cacëxun a páncama pian ca Jesusan uvas baca anu ꞌarucë xampa biquin, Nucën Papa Dios pain —asábi ca —catancëxun aín ꞌunánmicë unicama ꞌinánquin cacëxa: —Camaxunbi camina ënë uvas baca ꞌati ꞌain.

²⁸ ꞌËn imi ꞌapati ꞌëx bamacë cupí ca ꞌaisamaira unix aín ꞌuchacama tërë́ncë ꞌaish Nucën Papa Diosnan ꞌiti ꞌicën. Ënëx ca a ꞌapati ꞌëx bamati a ꞌicën.

²⁹ ꞌËn cana mitsu cain, ësa uvas baca cana ënuxun ꞌatëcëniman. ꞌËn Papan nëtë anua axa aín unicaman ꞌApu ꞌicë, anuxun cuni cana mitsubëtan ꞌatëcënti ꞌain.

—ꞌËn ꞌunáncëma ca —quiaxa Pedro a ñui quiti Jesusan ñuiá bana

³⁰ Nucën Papa Dios rabi cantatancëx ca Jesúsbë aín ꞌunánmicë unicama Olivos cacë matánu cuancëxa.

³¹ Anu cuantancëxun ca Jesusan aín ꞌunánmicë unicama cacëxa: —Unin ꞌë bicëbë camina mitsux racuëti abati tsuáquiti ꞌain, Nucën Papa Diosan bana cuënëo ësai quicësabi oi: “An carnero bërúancë uni ꞌën ꞌacëbë ca carnerocamax abati tsuáquiti ꞌicën”.

³² Usai ꞌitancëxmi mitsux cuainsama pain ꞌain cana ꞌëx pain baísquiquiani Galileanu cuaunti ꞌain.

³³ Usaía quia ca Pedronën cacëxa: —Raírinëxa mi ëbiani axa mimi nishcë unicamami racuëti abácëbëbi cana ꞌëxëshi mi ëbiani abátima ꞌain.

³⁴ Quia ca Jesusan cacëxa: —Asérabi cana mi cain, mix camina usai quin, ꞌixunbi camina ënë ñantan ꞌatapa banatisama ꞌain, min isamina ꞌë ꞌunáncëma ꞌain quixun rabë́ ꞌimainun achúshi oquin uni paránti ꞌain.

³⁵ Cacëxun ca Pedronën Jesús cacëxa: —ꞌËx mibë bamanuxunbi cana, ꞌën cana mi ꞌunáncëma ꞌai quixun uni parántima ꞌain. Ësaquian caia ca raírinënribi cacëxa.

Jesúsa Getsemaní naënuax aín Papabë bana

³⁶ Olivos cacë matánu cuanbaiti Getsemaní cacë me mëníocë, anu bëbaquin ca Jesusan aín ꞌunánmicë unicama cacëxa: —ꞌËx ꞌuriax Nucën Papa Diosbë banamainun ca ënu tsóxun ꞌë cain.

³⁷ Usaquin cabiani Pedro ꞌimainun Zebedeonën bëchicë rabë́, Jacobocëñun Juan, acama buani cuaníbi ca Jesús —uisai carana ꞌiti ꞌai —quixun sinani masá nuituacëxa.

³⁸ Usai ꞌiquin ca acama cacëxa: —Cana ꞌaisamaira masá nuitutin. Micamax ca ënu tiquit. ꞌAíshbi camina ꞌëmi sinani ꞌuxtima ꞌain.

³⁹ Cabiani ꞌurira cuani memi bëúmpucuti racábuquin ca aín Papa Dios cacëxa: —Papan, mix cuëëncëbëtan cana ꞌën bërí paë tantima ꞌain. Usa ꞌaínbi cana ꞌëx cuëëncësa oi ꞌitima ꞌain, mix cuëëncësa oíshi cana ꞌiti ꞌain.

⁴⁰ Usaquin catancëx cuanquin aín ꞌunánmicë unicama ꞌuxcë mëraquin ca bësúnquin Pedro cacëxa: —¿Uisacatsi caramina ꞌëmi sinanima bënëtishi ꞌuxan?

⁴¹ Mitsux ꞌëx cuëëncësoi ꞌiisa taníbi camina asérabi usai ꞌiman. Usa ꞌain camina ꞌuchati rabanan ꞌuxti tëai Nucën Papa Diosbë banati ꞌain.

⁴² Usaquin cabiani cuantëcënxun ca Jesusan Nucën Papa Diosbë banatëcënquin ësaquin catëcëancëxa: —ꞌËn Papa Dios, mixmi ꞌën bërí paë tantima cuëëncëbëma cana mix cuëëncësabi oi ꞌiti ꞌain.

⁴³ Cabëtsini uquinbi ca Pedro, Juan, Jacobo, acamaxa ꞌuxcënan tënántëcëncëx ꞌuxcë mëratëcëancëxa.

⁴⁴ ꞌUxcënan tënáncëxa ꞌuxcë isquin ëbiani cuantëcënxun ca Jesusan usaribiquin aín Papa Dios catëcëancëxa.

⁴⁵ Catëcëanx amiribishi utëcënxun ca Pedro, Juan, Santiago, acama cacëxa: —Asá ca. Bërí camina tantianan ꞌuxti ꞌain. Anúan uni ꞌuchañucaman binun uni itsin ꞌë ꞌinánti nëtë ca uaxa.

⁴⁶ Cuanun ca nirucuatsin. An ꞌë unin binun ꞌinánti uni ca aia.

Jesús bican

⁴⁷ Jesusan cacëbëbi ca aín ꞌunánmicë uni achúshi, Judas, ax uacëxa. Abë ca ꞌitsa uni, manë xëtocë bëanan imaxu tëacë bëi uacëxa. Axa ucëcama ax ca judíos sacerdotenën cushicamabëtan caniacëcë unicamanribi Jesús binun quixun xucë ꞌiacëxa.

⁴⁸ Usa ꞌain ca buánquin Judasnën abë ꞌicë unicama cacëxa: —ꞌËn bëtsucucaia isquin camina ꞌunánti ꞌain, ax ca Jesús ꞌicë quixun. ꞌUnánquin camina a biti ꞌain.

⁴⁹ Usaquian unicama cacësabi oquin ca anua Jesús ꞌicë anu bëbaquin Judas Iscariotenën ax pain anu cuanquin ¿ënu caina ꞌain? —caquin Jesús bëtsucucacëxa.

⁵⁰ Bëtsucucacëxun ca Jesusan cacëxa: —¿Mix ꞌën ꞌunáncë uni ꞌaíshbi caramina uisacatsi ꞌë bari uan? Caia ca abë ucë unicaman Jesús biacëxa.

⁵¹ Bicëbëtan ca aín uni achúshinën aín manë xëtocë aín xacánua biquin, judíos sacerdotecaman cushia an ñu mëëxuncë uni mëëquin aín pabí amocüa pabíscacëxa.

⁵² Pabíscaiabi ca Jesusan cacëxa: —Min manë xëtocë a ca aín xacánu ꞌarutëcën. Axa manë xëtocën ꞌacanancë unicama ax ca anúnribi ꞌacë ꞌiti ꞌicën.

⁵³ ¿Caramina ꞌunaniman, ꞌën cana ꞌën Papa aín ángelcama ꞌë ꞌaquinun xunun ñucáquin cati ꞌain? ꞌËn ñucácëxun ca aín ángelcama uitishi cara ꞌë ꞌaquinun bëríbi xuti ꞌicën.

⁵⁴ An aín ángelcama ꞌë ꞌië́minun xucëbë cana bamatima ꞌain. Usa ꞌaínbi cana ꞌëx aín bana quiásabi oi ꞌiisa tancë cupí an aín ángelcama xunun caiman.

⁵⁵ Usaquin catancëxun ca Jesusan axa anu ucë unicama cacëxa: —¿Manë xëtocë ꞌimainun imaxu tëacë tuíanx caramina mëcamacë uni ꞌacësoquin ꞌë binux ucan? Camabi nëtën ꞌën mitsu nëbë́tsi tsóxun, anuxun Nucën Papa Dios rabiti xubunuxun bana ñuiabi camina uisa ꞌixunbi ësoquin ꞌë bicancëma ꞌain.

⁵⁶ Anuxun ꞌë bixunmabimi mitsun bërí ꞌë bicë ënëx ca asérabia an Nucën Papa Dios quicë bana uni ñuixuncë unin cuënëo bana quicësabi oi ꞌia. Usoquian atu caia cuabiani ca aín ꞌunánmicë unicamax Jesús ëbiani abácëxa.

Judíos unin ꞌapucamanua Jesús buáncan

⁵⁷ Usoquin bitancëxun Jesús buánxun ca a unicaman judíos sacerdotenën cushicaman ꞌapu, Caifás cacë, anua an Moisésnën cuënëo bana ꞌunáncë unicamabë caniacëcë unicama timë́cë, anu buáncëxa.

⁵⁸ Jesúsa buántamainun ca ꞌuránxun nuibiantancëx Pedro a xubu rapasu me mëníocënu bërúax suntárucamabë tsoócëxa, uisa cara oia quixun iscatsi quiax.

⁵⁹ Usa ꞌain ca judíos sacerdotenën cushicamabë caniacëcë unicama ꞌimainun camabi judíos unibunën ꞌapucama anu timë́xun, uix caraisa asérabia usai ꞌiánmabi, cëmëi atúan ꞌanun Jesúsmi manánti ꞌicë quixun cuaisa tancëxa.

⁶⁰ Cuaisa tancëbëa ꞌitsa unix cëmëi Jesúsmi manáncëxbi ca ꞌatima bana anúan ꞌacánun quixun Jesús ꞌuchoti ꞌaíma ꞌiacëxa. Usaía manáncëbë anu cuanquin ca cëmë uni rabëtan ꞌapucama cacëxa:

⁶¹ —Ënë unix ca quiaxa: ꞌËn cana anuxun Nucën Papa Dios rabiti xubu rurupatancëxun rabë́ ꞌimainun achúshi nëtë́inshi amiribishi nitsínruquin ꞌatëcënti ꞌain.

⁶² Usaía quicëbë niruquin ca judíos sacerdotenën cushicaman ꞌapu an Jesús cacëxa: —¿Mi ñuia quicancëbëtanbi caramina nu uisaquinbi caiman? ¿Uisai qui cara ësai mi ñui quicanin?

⁶³ Quixuan cacëxbi ca Jesús quiáma ꞌicën. Quiamoquin ca judíos sacerdotenën cushicaman ꞌapun amiribishi catëcëancëxa: —Nucën Papa Dios axa bamatimoi tsócë, an cuamainun ca nu ñuixun, ¿mix caramina asérabi aín Bëchicë, Cristo, axa utinu nun caíncë, a ꞌain?

⁶⁴ Cacëxun ca Jesusan cacëxa: —Minmi ꞌë cacë, usa cana ꞌëx ꞌain. Mitsun camina, uni ꞌinux anuax uá, ꞌë Nucën Papa Dios, cushiira, abë ꞌApu ꞌaish aín mëqueu tsócë isanan ꞌëx naí cuin mëucüax utëcënia isnuxun ꞌain.

⁶⁵ Usai quia cuati xuamairai nishquin aín chupabi tucaquin ca judíos sacerdotenën cushicaman ꞌapun abë ꞌicë unicama cacëxa: —Nucën Papa Diosmi ca ꞌatimati banaxa. Mitsun camina Nucën Papa Dios ñuia, ꞌatimati banaia cuacan.

⁶⁶ ¿Uisa caramina sináncanin? Cacëxun ca camaxunbi cacëxa: —Nucën Papa Diosmi ca ꞌatimati banaxa. Usa ꞌain ca bamati ꞌicën. Axbi ca ꞌatimati banaxa.

⁶⁷ Usai quiquian a ꞌurama ꞌicë uni raírinën bëtushucamainun ca raírinënribi Jesús mëëacëxa. Usoia ca raírinënribishi bëtáshcacëxa.

⁶⁸ Bëtáshcaquin ca cacëxa: —Cristo cana ꞌai quiax camina quin. Usa ꞌixun ca uin cara mi mëëaxa quixun nu cat.

—ꞌËn cana a uni ꞌunáncëma ꞌai —quixuan Pedronën ca

⁶⁹ Usaquian Jesús ꞌamainun ca Pedro xubu tanáin me mëníocë anu ꞌiacëxa. Anu ꞌicë ca xanu an ꞌapu ñu mëëxuncë ax Pedronu cuanquin: Mixribi camina Jesús, Galileanu ꞌicë uni, abë ꞌion quixun cacëxa.

⁷⁰ Cacëxun ca Pedronën anu ꞌicëcaman cuanun cacëxa: —Mixmi a ñui quicë uni a cana ꞌën ꞌunaniman.

⁷¹ Usaquin cabianía ëman cuancëbëtan ca xanu itsi, anribia ꞌapu ñu mëëxuncë, an a ꞌurama ꞌicë unicama cacëxa: —Ënë unix ca Jesús, Nazaretnu ꞌicë uni, abë ꞌiaxa.

⁷² Cacëxun ca Pedronën amiribishi catëcëancëxa: —ꞌËn cana a uni ꞌunaniman. Nucën Papa Diosan ca ꞌunania, ꞌën mi cacë ënëx ca asérabi ꞌicën.

⁷³ Usaquian cacëa panácëma ꞌaínshi ca anu ꞌicë uni raírinën anu cuanquin Pedro cacëxa: —Mix camina Galileanu ꞌicë unix banacësari banain. Usa ꞌaish camina mix Jesúsbë nicë uni a ꞌain.

⁷⁴ Cacëxun ca Pedronën munuma banaquin cacëxa: —ꞌËx cëmëia ca Nucën Papa Diosan ꞌë ꞌatimoti ꞌicën. An cuamainun cana mitsu cain, ꞌën cana a uni ꞌunaniman. Usaía quicëbëshi ca ꞌatapa banacëxa.

⁷⁵ Banacëbëtan ca Pedronën ësaquian Jesusan cooncë bana sináncëxa: ꞌAtapa banatisama ꞌain camina min isamina ꞌë ꞌunáncëma ꞌai quixun rabë́ ꞌimainun achúshi oquin uni paránti ꞌain. Usoquian Jesusan cooncë bana sinani ca Pedro ëman chiquiti masá nuituirai bëunan mëscuti iancëxa.