Mateo 24 - Kashibo-Kakataibo Biblia

Anuxun Nucën Papa Dios rabiti xubua rurucubúti bana

¹ Anuxun Nucën Papa Dios rabiti xubunuaxa cuania ca aín ꞌunánmicë unicaman a rapasu cuanquin Jesús cacëxa: —Ënë xubux ca cahaira ꞌaish upí ꞌicën.

² Cacëxun ca Jesusan cacëxa: —Ënë xubu camina maxax ꞌacë ꞌaish upí isin. Usa ꞌaínbi cana mitsu cain, axa Nucën Papa Diosmi sináncëma unicaman ënë xubu camáxbi aín maxáxcamaribi rurupacëbë rurucubúti ꞌicën.

Ax utëcë́nti nëtë ꞌuramacuatsinia unin ꞌunánti Jesusan ñuiá bana

³ Usaquin atu cabiani cuanx matá me Olivos cacë anu tsóbutia ca uni ꞌaíma ꞌain, aín ꞌunánmicë unicaman a nëbë́tsioraquin cacëxa: —¿Uínsaran cara mixmi quicësabi oi anuxun Nucën Papa Dios rabiti xubu aín maxáxcama rurupacë ꞌiti ꞌic? ¿Mix anun utëcënti nëtë anúan ënë mecama cëñúti, a nëtëx ca ꞌuramacuatsinia quixun ꞌunánuxun caranuna uisa ñu ꞌia isti ꞌain? A camina nu ñuixunti ꞌain.

^4-5 Usaquian aín ꞌunánmicë unicaman ñucácëxun ca Jesusan anun ax utëcënti nëtë ñuixunquin ësaquin cacëxa: —ꞌItsa unin ca, “ꞌËx cana Cristo ꞌai” quiax quiquin ꞌitsaira uni paránuxun ꞌaia. Usoquian mitsuribi paránti rabanan camina bërúancati ꞌain.

⁶ Mitsun camina uni itsían —bëtsi menu ꞌicë unicamax ca bëtsibë ꞌacanania —quixun ñuia cuanuxun ꞌain. Cuanan —raíri unicamaxribi ca raíribë ꞌacánania —quixun ñuia cuatibi camina racuë́tima ꞌain. Asérabi ca usai ꞌiti ꞌicën. Usaía ꞌicëbëbi ca ënë mecama cëñúcëma pain ꞌiti ꞌicën.

⁷ Bëtsi menu ꞌicë unicamax ca bëtsi menu ꞌicë unicamabë nishánani ꞌacánanti ꞌicën. ꞌImainunribi ca bëtsi menu ꞌicë ꞌapun suntárucama bëtsi menu ꞌicë suntárucamabë ꞌacánanti ꞌicën. Bëtsi bëtsi nëtënu ꞌicë unicamax ca a piti ñuñuma ꞌinuxun ꞌaia. Bëtsi bëtsi mecamax ca shaíquinuxun ꞌaia.

⁸ Usoquin pain tëmëratancëxunbi ca ꞌëx utëcëncëbëtainra unin an ꞌacësamaira oquin tëmëranuxun ꞌaia.

⁹ Usoquin canan ca ësaquinribi Jesusan aín ꞌunánmicë unicama cacëxa: —ꞌËmi sináncëma uni raírinën ca uni itsían mitsu bëtsi bëtsi onun ꞌinánuxun ꞌaia. ꞌInánan ca micama raíri ꞌanuxun ꞌaia. Mitsúxmi ꞌëmi catamëcë cupí ca camabi menu ꞌicë unicamax ꞌëmi sináncëma ꞌaish mitsumi ꞌi nishnuxun ꞌaia.

¹⁰ Unían ami nishquin ꞌatimocëxun ca ꞌitsa unin ꞌëmi catamëti ënti ꞌicën. Usai ꞌi abë nishánanquin ca uni raíri, bëtsi unin ꞌatimonuxun binun ꞌinánti ꞌicën.

¹¹ Usai ꞌicëbëtan ca —ꞌën cana Nucën Papa Dios quicë bana unicama ñuixuni —quiquinbi anbi sináncë banaishi uni ñuixunuxun ꞌaia. Usaquin ñuixunquin ca ꞌitsaira uni paránquin Nucën Papa Diosmi sinánxma ꞌinun quixun ꞌimiti ꞌicën.

¹² Usai ꞌicëbëtan ca unin ꞌaisamaira ꞌatima ñu ꞌati ꞌicën, ꞌanan ca bëtsibëa nuibanani ꞌaquiananti a ënuxun ꞌaia.

¹³ Usai ñu ꞌicëbëtanbia ꞌëmi sinánquin ëncëma unicamax ca Nucën Papa Diosan nëtënu ꞌëbë ꞌiti ꞌicën.

¹⁴ Uicamax cara ꞌëmi catamëtia acamax ca Nucën Papa Diosan nëtënu ꞌëbë ꞌiti ꞌicë quixun ꞌën mitsu cacë bana ënë ca ꞌën unicaman camabi menu ꞌicë unicaman cuanun ñuixunti ꞌicën. Usaquian camabi menu ꞌicë unicama ñuixuncëbë ca ꞌëx utëcëncëbë ënë mecama cëñúnuxun ꞌaia.

¹⁵ Usaquin caxun ca Jesusan ësaquinribi aín ꞌunánmicë unicama cacëxa: —An Nucën Papa Dios quicë bana unicama ñuixuncë uni Danielnëan a ñuiquin cuënëo uni ax ca ꞌatimaira ꞌicëa unin timacë ꞌaíshbi aín suntárucamabë uti ꞌicën. Danielnëan ñuia uni ax ca utancëx ami sinanimabi anuxun Nucën Papa Dios rabiti xubu Jerusalénu ꞌicë, anu ꞌiti ꞌicën. An ënë bana iscë uni an ca uisai quice cara quixun ꞌunánti ꞌicën.

¹⁶ Usai ꞌicëbë ca unicamax ami racuëti Judea menu ꞌicë ëmacamanuax abáquiani matánu cuanti ꞌicën.

¹⁷ Aín xubu ëman ꞌicë unicamaxribi ca abánuxun, aín ñu pain bitsi aín xubunu atsíntëcënima ashiti cuanti ꞌicën.

¹⁸ ꞌImainun ca aín naënuxuan ñu mëëcë unicamaxribi abánuxun aín chupa bitsi xubunu cuaníma naënuaxëshi abáti ꞌicën.

¹⁹ Usaía ꞌicëbë ca xanu tuñucama ꞌimainun aín tuá ꞌicúcë xanucamaxribi abáquiani cuani nuibacanuxun ꞌaia.

²⁰ Usaími anun ñu mëëtima nëtën ꞌianan mitañu ꞌitin rabanan camina Nucën Papa Dios ñucáti ꞌain.

²¹ Usai ꞌi ca unicama Nucën Papa Diosan me uniotabacë ꞌaían uínsaranbi ꞌiásamairai tëmërati ꞌicën, amiribishi usai tëmëratëcëntimoi.

²² Anúan paë tani nëtë́xa cëñúcëbëma ca usabi ꞌi camabi unix bamati ꞌicën. Usa ꞌaínbi ca Nucën Papa Diosan, ainan ꞌinun an caíscë unicama nuibaquin, atu cupí anúan unin paë tanquin tëmërati nëtëcama sënë́nmiti ꞌicën.

²³ Anúan usoquin unicaman tëmërati nëtë ucëbëtan unin mitsu —ca is, ënu ca Cristo ꞌicë —quixun canan —ca is, unu ca Cristo ꞌicë —quixun cacëxunbi camina —asérabi ca —quixun sinántima ꞌain.

²⁴ Anúan usoquin unicaman tëmërati nëtë ucëbëtan ca unin ax asérabi ama ꞌixunbi —ꞌëx cana Cristo ꞌai —quixun paránti sinánquin unicama canuxun ꞌaia. Usaribiquin ca uni raírinën cëmëquin —ꞌën cana Nucën Papa Dios quicë bana unicama ñuixunin —quixun unicama canuxun ꞌaia. Cana ca unicama paránti sinánquin, uni itsían ꞌacëma ñu ꞌanuxun ꞌaia. ꞌAquin ca Nucën Papa Diosan ainan ꞌinun caíscë unicamaribi paránti sinánuxun ꞌaia.

²⁵ Usai ꞌicëma pan ꞌaínbi ꞌën mitsu cacë ꞌaish camina a ñucamaxa usai ꞌicëbëbi ratútima ꞌain. ꞌIanan camina unínma mitsu parania bërúancati ꞌain.

²⁶ Usa ñucama ꞌicëbëtan unin —Cristo ca uaxa. Ca anu uni ꞌicëma menu ꞌicë —quixun mitsu cacëxbi camina isi cuantima ꞌain. ꞌIanan unin —Cristo ca uaxa, ca xubu mëu ꞌicë —quixun mitsu cacëxunbi camina —asérabi ca —quixun sinántima ꞌain.

²⁷ Mëríquin ca canacan anúan bari urucë ꞌimainun anúan bari cuabúcë, camabi naicamëꞌëo pëcaia. Usaribi ca uni ꞌinux Nucën Papa Diosnuax uá, ꞌëx utëcënti ꞌiti ꞌicën.

²⁸ Unix ca quia —uinu cara ñuina bamacë ꞌicë anu ca xëtë cëñúbuti ꞌicën. Usai ca ꞌiti ꞌicën.

Anun Jesús utëcënti nëtë ñui quicë bana

²⁹ Usoquin canan ca ësaquinribi Jesusan aín ꞌunánmicë unicama cacëxa: —Usaía tëmërai anun uni bënë́ti nëtëcama ꞌicëbë ca bari bëánquinuxun ꞌaia, ꞌuxë́nribi ca pëcanuxunma ꞌaia. ꞌIsparibi ca rëucunuxun ꞌaia, naícamëꞌëo shaíquicëbë ca anua ꞌicë ñucamaxribi shaíquinuxun ꞌaia.

³⁰ Usaía ꞌicëbëtan ca uni ꞌinux Nucën Papa Diosnuax uá, ꞌëx utëcënia isti ꞌicën. Isi ca camabi menu ꞌicë ui unicamax cara Nucën Papa Diosmi sináncëma ꞌicë, acamax masá nuituti bënëti inti ꞌicën. Usai ꞌiquin ca uni ꞌinux Nucën Papa Diosnuax uá, ꞌën nëtë cuin mëúxun ꞌën cushin pëcabëtsinia isnuxun ꞌaia.

³¹ Manë banañu bana ocëbë uquin cana ꞌën ángelcama xuti ꞌain, ꞌënan ꞌinun ꞌën caíscë unicama camabi menua ꞌëbëa ꞌinun ꞌë timëxunun.

³² Ënë ñu camina ꞌunanin, higuera i ax ca baricuatsíncëbë aín pëchi rëucubutancëx amiribishi corutëcënia. Usaria ꞌia isquin camina —ca baritiacuatsinia —quixun ꞌunanin.

³³ Usaribitía ꞌën mitsu ñuixuncë ñucama ꞌia isquin camina ꞌunánti ꞌain, anun ꞌëx utëcënti nëtë ca ꞌurama ꞌicë quixun.

³⁴ Asérabi cana mitsu cain, bëría ënë nëtënu bucucë unicamaxa bamacëma pain ꞌain ca ꞌën mitsu ñuixuncë banacama quicësabi oi ꞌiti ꞌicën.

³⁵ Naí, me, acamax ca cëñúti ꞌicën, ꞌaínbi ca ꞌën banaxa nëtë́imoi usabi ꞌain camabi ñu ꞌëx quicësabi oi asérabi ꞌiti ꞌicën.

³⁶ Añu nëtë́inra carana ꞌëx utëcënti ꞌain, uínsarainra cara usai ꞌiti ꞌicë quixun ca uínbi ꞌunanima. Naínu ꞌicë ángelcamanbi ca ꞌunanima, ꞌëx Nucën Papa Diosan Bëchicë ꞌixunbi cana ꞌënribi ꞌunanima. Nucën Papa Diosan cuni ca ꞌunania.

³⁷ Bëráma Noé ꞌiá nëtë usaribiti ca uni ꞌinux Nucën Papa Diosnuax uá, ꞌëx utëcënti nëtën ꞌiti ꞌicën.

³⁸ Anúan aín nuntinu ꞌiruti nëtë utámainun aín aintsibëtan Noénën anun ië́ti nunti cha ꞌamainun ca unicaman pianan xëanan xanu bianan aín bëchicë bënumianan an ꞌacësabi oquin cuëënquin ñu ꞌacëxa. Ca sinánma ꞌicën, Noenën ñuicësabi oi ca asérabi ꞌiti ꞌicë quixun.

³⁹ ꞌUí ꞌaisamaira ꞌibúcëbë baca ꞌëquian ñucamacëñun unicama buáncëbëtainshi ca —Noenën nu cacë bana ca asérabi ꞌicë —quixun ꞌunáncëxa. Noenën bana cuatíma unicama ꞌiásaribiquin ca unicaman ꞌën bana cuatima ꞌicën. Usai ꞌiquinbi ca ꞌëx anun uti nëtë ꞌicëbëtainshi sinánti ꞌicën.

⁴⁰ ꞌËx ucëbë ca ësaribi ꞌiti ꞌicën: Rabë́ unían aín naënuxun ñu mëëia achúshi ꞌëbëa ꞌinun bimainun ca achúshi anubi ëncë ꞌiti ꞌicën.

⁴¹ Usaribiti ca rabë́ xanúxa ñu rëni tsócë achúshi ꞌëbëa ꞌinun bimainun achúshi anubi ëncë ꞌiti icën.

⁴² Uisa nëtën carana min ꞌIbu ꞌaish ꞌëx utëcënti ꞌai quixun ꞌunánquinmabi camina upí oquin sinánquin —ꞌën ꞌibu ca uti ꞌicë —quixun ꞌunani cuëënquin caínti ꞌain.

⁴³ Camina ꞌunanin, uínsaran cara aia quixun ꞌunáncë ꞌixun ca xubuñu unin ꞌuxquinma an ñu mëcamacë uni caíntsianxa. Caíncëx uáxa ñu mëcamanux atsíntisa taniabi ca ꞌuxcëma ꞌixun xubu ꞌibun atsínmitsianma.

⁴⁴ Usaribi oquin camina mitsúnribi ꞌë binuxun ꞌëx uti caínti ꞌain. Bërí ca utima ꞌicë quixunmi mitsun sináncëbëbi cana uti ꞌain. Usa ꞌain camina camabi nëtën, aia binuxun ꞌë caínti ꞌain.

An uni mëëxuncë uni rabë́, upí ꞌimainun upíma, ñuicë bana

⁴⁵ Anun ꞌëx utëcënti nëtë ca ësaribi ꞌiti ꞌicën. Achúshi unin ca aín xubunu ꞌicëcama upí oquin piminun quixun aín ñu mëëmicë unicama achúshi caísaxa. Caísquin ca —an ca asérabi ꞌën cacësabi oquin ꞌati ꞌicë —quixun sinánxa. Sinánquin usoquian ñu ꞌanun quixun catancëx ca bëtsi menu cuanxa.

⁴⁶ Cuanx anu ꞌitancëx utëcënquin ca an ñu mëëxuncë unin cara an cacësabi oquin ꞌaia quixun isti ꞌicën. Isquinbi an cabiancësabi oquin ꞌaia iscëx ca an a uni ñu mëëxuncë uni ax chuámarua tani cuëënti ꞌicën.

⁴⁷ ꞌËn cana asérabi mitsu cain, an upí oquin ñu ꞌacë ꞌicë ca an ñu mëëmicë unin ësaquin cati ꞌicën: Minmi ꞌën cacësabi oquin upí oquin ꞌacë cupí camina cushi unisa ꞌixun ꞌën ñucama minansa ꞌicë bërúanti ꞌain.

⁴⁸ Usa ꞌaínbi ca an a unix ꞌatima sinánñu ꞌixun —an ꞌë ñu mëëmicë uni ca panatia —quixun sinánquin

⁴⁹ abëtan ñu mëëcë uni raíri mëëanan axa paë́ncë unicamabëtan ñu pianan xëati ꞌicën.

⁵⁰ Usai ꞌiquian, ca uti ꞌicë quixun sináncëbëmabi ca an a ñu mëëmicë uni uti ꞌicën.

⁵¹ Uquin ca usai ꞌia isquin ꞌatimonan anu an uni paráncë unicama ꞌicë anua ꞌinun ꞌimiti ꞌicën. Anuax ca anu ꞌicë unicamax paë tani bënëti inti ꞌicën.