Mateo 22 - Kashibo-Kakataibo Biblia

Unían aín bëchicë xanu biminuxun unicama camia bana

¹ Anuxun Nucën Papa Dios rabiti xubunuxun ca Jesusan judíos sacerdotenën cushicama ꞌimainun fariseo unicama bana itsi ñuicësa oquin ënë banaribi ñuiquin cacëxa:

² —Nucën Papa Diosnan ꞌiti ax ca ësa ꞌicën. Achúshi ꞌapun ca aín bëchicë xanu ꞌinánuxun an ñu mëëmicë uni piti ꞌamiquin aín aintsicamaxa pi unun quixun camiti sinánxa.

³ Sinánxun ca piti ꞌitsaira ꞌamimainuan camabi unin pi unun catánun quixun aín uni raíri xuaxa. Xucëx cuanxuan cacëxbi ca a cacë unicama uinu ꞌicë uníxbi uisama tanxa.

⁴ Usaquin camicëxbia ucëbëtanma ca amiribishi aín ñu mëëmicë uni raíriribi xuquin a cacë unicama ësoquin caxuntanun quixun caxa: Bëráma cana a piti ñucama mëníomian. Usonan cana ꞌën vaca ꞌaracacë rëmianan ꞌën ñuina rëracacëribi rëmian. Camabi ca mëníocë ꞌicën. Usa ꞌaían camáxbi ꞌën xubunu ꞌën bëchicënëan xanu bicëbëtan, nubëtan pi unun camina cati ꞌain.

⁵ Usaquian ꞌapun camicëxbi ca a camicë unicamax cuainsama tanxa. Cuainsama tanía bëtsix aín naënu cuantamainun ca bëtsix anuxuan ñu marucë xubunu cuanxa.

⁶ Raírinën ca ꞌapúan ñu mëëmicë uni cuaniabi bixun mëëquin tënánquin rëaxa.

⁷ Usoquian ꞌacëbë ca ꞌapu xuamati nishaxa. Nishquin ca an aín ñu mëëmicë unicama ꞌacë unicama ꞌanan aín ëma nëënun quixun aín suntárucama xuaxa. Cacëx cuanxun ca ꞌapun cacëabi oquin ꞌaxa.

⁸ Usoquian ꞌanun ꞌamitancëxun ca ꞌapun aín ñu mëëmicë unicama caxa: Piti ca mëníocë ꞌicën. Usa ꞌaínbi ca a ꞌën camicë unicamax utima nuituñu ꞌaish utima ꞌicën.

⁹ Usa ꞌain camina amiribishi cuantancëxun mitsúnmi bainua mëracë unicamaishi pi unun quixun cati ꞌain.

¹⁰ Usoquian ꞌapun cacëx cuantëcënquin ca an ñu mëëxuncë unicaman bainua mëraquin upíma unicamacëñunbi upí unicama timëbëtsinquin bëaxa. Bëcëxun ca xanu bicëbëtan pañuti chupa pañucanxa. Pañutancëx atsini ca ꞌaisamaira ꞌaish a xubunuax tsitsiruaxa.

¹¹ Usai ꞌicëbë atsínquian ꞌapun iscëxbi ca anu achúshi uni xanu bicëbëtan pañuti chupa pañucëma ꞌiaxa.

¹² Usa ꞌicë isquin ca ꞌapun a uni caxa: ¿Uisa ꞌaish caramina mix ënu atsínuxun pañuti chupa pañuaxmabi ënu atsían? Cacëxbi ca a uni banaima tsóaxa.

¹³ Usa isquin ca ꞌapun an mesanu piti nancë unicama caxa: Ënë uni camina mëtanianan tatanitancëxun ëman bëánquibucënu buántancëxun niti ꞌain. Nicëx ca anuax anu ꞌicë unicamabë tëmërai bënëti inti ꞌicën.

¹⁴ ꞌËn mitsu bërí ñuixuncë bana a sinánquin camina ꞌunánti ꞌain, ꞌaisamaira uníxa ainan ꞌinux ꞌëmi catamënun Nucën Papa Diosan sinánmicëxbi ꞌicëbëma ca axa ꞌëmi catamëcë unicama axëshi ainan ꞌia.

Unían César curíqui ꞌinánuxun sinan bana

¹⁵ Jesusan bana ñuixunia cuatancëx, ꞌuri cuanquin ca fariseo unicama ami manáncatsi quixun sinánquin, uisai cara quia cuanuxuan an Jesús ñucáti uni xuti sináncëxa.

¹⁶ Sinántancëxun ca aín uni raíri ꞌimainun axa Herodesmi sináncë unibu Jesús ñucánun quixun xuacëxa. Xucëx cuanxun ca a unicaman Jesús cacëxa: —Cananuna ꞌunanin, min banax ca asérabi ꞌicën. Uisai cara Nucën Papa Diosan uni ꞌiti ꞌicë quixun camina cëmëquinma asérabi ñuin, unían min a bana ñuia cuati cuëëncëbëtanmabi. Min sináncëx ca camabi uni bëtsibëtan sënën ꞌicën. Usaquin sinánquin camina camabi ñuñu ꞌimainun ñuñuma unicama ꞌimainun ꞌapuburibi uisai cara Nucën Papa Diosan uni ꞌiti ꞌicë quixun ñuixunin.

¹⁷ Usa ꞌixun camina nu cati ꞌain, ¿Nucën Papa Diosax asérabi nun cushi ꞌain cara min sináncëx Romanu ꞌicë ꞌapu, César, a curíqui buánmiti asábi ꞌic? ¿Cara asábima ꞌic? ¿Uisa caramina sinanin?

¹⁸ Cacëxun ca Jesusan, —uisai caraisna qui quixun ꞌëmi manánuxun cuacatsi quixun ca ꞌë ñucatia —quixun ꞌunánquin cacëxa: —ꞌËmi manánuxun ꞌëx caraisna uisai qui cuacatsi quixun camina ꞌë usoquin cain.

¹⁹ Uisa cara isnun ca a César buánmiti manë curíqui achúshi ꞌë bëxun. Cacëxun ca bëacëxa.

²⁰ Bëia isquin ca Jesusan cacëxa: —¿Uin bëmánan tanquin ꞌacë cara ënëx ꞌic? ¿Uin anë cara cuënëocë ënëx ꞌic?

²¹ Cacëxun ca atun cacëxa: —Ax ca Césarnën bëmánan tanquian ꞌacë ꞌimainun Césarnën anë ꞌicën. Usaquin cacëxun ca Jesusan cacëxa: —Ami mitsun ꞌatia César cuëëncë a ñu camina ꞌati ꞌain, axa mitsun ꞌapu ꞌain. ꞌAnan camina ami mitsun ꞌatia Nucën Papa Dios cuëëncë a ñu ꞌati ꞌain, axa mitsun Papa Dios ꞌain.

²² Cacëxun cuati ratuti ca —¿uisa uni cara ënëx ꞌicë? —quixun sinani a ñui ami manánti bana ꞌaíma ꞌain Jesús ëbiani cuancëxa.

Unix cara bama ꞌaish baísquiti ꞌicë quicë bana

²³ A nëtë́nbi ca Jesúsnu saduceo unicamax cuancëxa. Saduceo unicaman ca —bama ꞌaish ca uni baísquitima ꞌicë —quixun sináncëxa. Usaquin sináncë ꞌaish anu cuanxun ca Jesús ñucáquin cacëxa:

²⁴ —Nun cananuna ꞌunanin, Moisés ca quiacëxa: “Uni achúshi bëchicëñuma ꞌaish bamacëbëtan ca aín xucënan an casunancë xanu bixun ami bacë bëchiti ꞌicën. Usoquian ꞌacëx ca aín bëchicë ax aín xucënan bëchicësa ꞌiti ꞌicën”.

²⁵ Usa ꞌain cananuna mi ñucatin. Nubë ca uni achúshi, mëcën achúshi ꞌimainun achúshi ꞌanácañu ꞌiacëxa. Usa ꞌixun ca atun apan an xanu biacëxa. Biáxbi ca bacë bëchiaxmabi bamacëxa.

²⁶ Baman aín xucënan casunancë xanu biáxbi ca aín xucënaxribi bacë bëchiaxmabi bamacëxa. Usaribiti ca a xanu biáxbi aín xucën bëtsíxribishi bamacëxa. Usa ꞌain ca a xucën camáxbi a xanu biáxbi bacë bëchicëñuma ꞌinun bamacëxa.

²⁷ Acamaxa bamai cëñúan ca a xanúxribi bamacëxa.

²⁸ Camaxunbi ca a xanu biacëxa. ¿Usa ꞌain cara anun unicamax baísquiti nëtën acama uinu ꞌicë́xira aín bënë ꞌiti ꞌic?

²⁹ Cacëxun ca Jesusan cacëxa: —Usama ca. Mitsun Nucën Papa Diosan bana cara uisaira quia quixun cuanan aín cushiribi ꞌunánquinma camina usaquin ꞌë ñucatin.

³⁰ Bama ꞌaish baísquiquin ca unin xanu bitima ꞌicën, aín ini bëchicëribi ca unin bënumitima ꞌicën. Usaribi ca naínu ꞌicë ángelcamaxribi ꞌicën.

³¹ Mitsúnmi —bama ꞌaish ca uni baísquitima ꞌicë —quixun sinania cana mitsu ñucatin, ¿Nucën Papa Diosan Moisés cuënëomia bana, ësaia quicë, a caramina iscëma ꞌain? A banax ca ësai quia:

³² “ꞌËx cana Abraham, Isaac, Jacob acaman rabicë Dios a ꞌain”. A bana cuënëo isquin cananuna ꞌunanin, Nucën Papa Dios ax ca bama ꞌaísha baísquitima unicaman Diosma ꞌicën. Ax ca camabi aín unicaman rabicë Dios a ꞌicën.

³³ Usaquian Jesusan bëtsi unin ꞌacësamaira oquin uni bana ñuixunia cuati ca anu ꞌicë unicamax —ësa bana cananuna cuama ꞌai —quixun sinani ratúacëxa.

Nucën Papa Diosan bana raíri banasamaira axa quicësabi oi ꞌiti Jesusan ñuia

³⁴ Atun —uni bamacëcamax ca baísquitima ꞌicë —quixun sináncë ꞌicëbia —ca usama ꞌicë —quixun upí oquin ñuixuncëxun ca saduceo unibunën Jesús ñucáquin catëcëanma ꞌicën. —Upí oquin ca ñuixuanxa —quixun sinánquin ca fariseo unicaman Jesús nëbë́tsioracëxa.

³⁵ Nëbë́tsioraquin ca an Moisésnën cuënëo bana ꞌunáncë uni achúshinën —uisaquin cara ꞌë cati ꞌicë —quixun sinánquin Jesús ësaquin ñucácëxa:

³⁶ —¿Uinu ꞌicë Nucën Papa Diosan bana cuënëo quicësa oíira caranuna ꞌiti ꞌain?

³⁷ Quixuan cacëxun ca Jesusan ësaquin cacëxa: —Axa quicësabi oíira ꞌiti bana ax ca ësai quia: “Min ꞌIbu Diosmi camina asérabi cuëëni cëmëima sinánti ꞌain. Usa ꞌaish camina ami catamëti ax cuëëncësabi oíshi ꞌiti ꞌain”.

³⁸ Ënëx ca axa quicësabi oíira ꞌiti bana a ꞌicën.

³⁹ Bëtsi bana asaribi ca ënëx ꞌicën: “Mixmi bërúancacësaribi oquin camina min aintsicama nuibanan axa ꞌaquinsa ꞌicë ꞌaquinti ꞌain”.

⁴⁰ Ënë rabë́ bana quicësabi oquian camabi unin ꞌanun ca Moisés ꞌimainun ax quicë bana an uni ñuixuncë unicama Nucën Papa Diosan cuënëomiacëxa. Uisa bana cara cuënëo ꞌicë a ca Nucën Papa Diosmi sinánan uni raíriribi nuibacë ꞌixun unin tania.

Uin rëbúnqui cara Cristo ꞌicë quicë bana

⁴¹ Fariseo unicamaxa abë timë́cë ꞌicë ca Jesusan ñucáquin ësaquin cacëxa:

⁴² —¿Mitsun sináncëx cara Cristo, axa ꞌapu ꞌitia judíos unibunën caíncë, ax uisa uni ꞌic? ¿Uin rëbúnqui cara ax ꞌiti ꞌic? Cacëxun ca cacëxa: —Ax ca Davitan rëbúnqui ꞌiti ꞌicën. Usa ꞌaish ca Davidbë sënën ꞌiti ꞌicën.

^43-44 Cacëxun ca Jesusan cacëxa: —Davitax ca ësai quiacëxa: Nucën ꞌIbu Diosan ca ꞌën ꞌIbu Cristo caxa: Axa mimi nishcë unicama ꞌën mi ꞌibuamimainun camina mix ꞌëbë ꞌApu ꞌaish ꞌën mëqueu ꞌiti ꞌain. Axa aín rëbúnquin ꞌaínbi ca Cristo ñui David Nucën Papa Diosan Bëru Ñunshin Upitan sinánmicëx —Cristo ax ca ꞌën ꞌIbu ꞌicë —quiax quiacëxa. ¿Uisa ꞌaish cara David usai quiacëx?

⁴⁵ ¿Usaria David, Cristo ax ca ꞌën ꞌIbu ꞌicë quiax quicë ꞌain, cara Cristo ax uisari Davitan rëbúnqui ꞌiti ꞌic?

⁴⁶ Usaquian fariseo unicama ñucatia ca uínbi —usa ca a bana ꞌicë —quixun Jesús ñuixuanma ꞌicën. Usa ꞌixun ca atun iscë́xa bëtsi unin sinánsama ꞌaish usai quia oxun a unicama amiribishi ñucátëcëanma ꞌicën.