Mateo 16 - Kashibo-Kakataibo Biblia

Fariseo unicamabëtan saduceo unicaman uni itsían ꞌacëma ñu ꞌanun quixun Jesús ca

¹ Fariseo unicama ꞌimainun saduceo unicaman ca anu cuanxun Nucën Papa Diosan cushin caraisa ñu ꞌaia iscatsi quixun, Jesús aín sinanënbi isa unían iscëma ñu naínua ꞌanun quixun cacëxa.

² Cacëxun ca Jesusan cacëxa: —Ca ësa ꞌicën. Bari cuabúcëbëtan naí isi camina quin: “Nëtë ca upí cuabutia, imë́ishi ca nëtë upí pëcarati ꞌicën”.

³ Bëtsi nëtën camina bësuquin naí isi quin: “Nëtë ca bëitia, ꞌuí ca ꞌitsa ꞌibúti ꞌicën”. Naí isquin camina uisai cara nëtë ꞌiti ꞌicë quixun ꞌunanin. Usa ñu ꞌunáncë ꞌixunbi camina ꞌën bana ñuixunia cuanan ꞌën ꞌaia isquinshi ꞌunántisa ꞌixunbi ꞌunaniman, ꞌëx cana asérabi Nucën Papa Diosnuax ucë ꞌai quixun.

⁴ Ënë unicama Nucën Papa Diosmi sináncëma ꞌixun ca atun isnun uni itsin ꞌacëma ñu ꞌanun quixun ꞌë caia. Usa ꞌaínbi cana, ꞌëx cana asérabi Nucën Papa Diosnuax uá ꞌai quixun atun ꞌunánun, bëtsi ñuribi atúan ñucácëxunbi ꞌaiman. Ënëishi cana mitsu cain, Jonás ꞌiásaribiti cana ꞌëx ꞌiti ꞌain. Usoquin cabiani ca Jesús anu ꞌicë unicama ëbiani cuancëxa.

Anun pán chamiti ñusa ꞌicë fariseo unibunën bana cuatima quicë bana

⁵ Parúmpapa ꞌucë manan cuanquinbi ca Jesusan ꞌunánmicë unicaman atun piti ñu buánquinma manuacëxa.

⁶ Manubiancëbë ca Jesusan cacëxa: —Fariseo unibu ꞌimainun saduceo unibunëxa anua pán chamiti ñusa ꞌicë ax ꞌicësa usaribi ꞌitin rabanan camina bërúancati ꞌain.

⁷ Cacëx ca —nunu pán bëcëma cupí ca nu usaquin caia —quiax aín ꞌunánmicë unicamax canancëxa.

⁸ Canania ꞌunánquin ca Jesusan cacëxa: —¿Uisa cupí caramina mitsux, pán cananuna bëcëma ꞌai quiax cananin? Mitsux camina ꞌëmi catamëcëmasa ꞌain.

⁹ ¿ꞌËn ñu ꞌaia isúnbi caramina ui carana ꞌëx ꞌai quixun ꞌunaniman? ¿Caramina ꞌën unicama pimiami iscancë a manuan? ¿Ën mëcën achúshi pán pimicëxuan cinco mil unin tëxëocë, mëcën rabë́ ꞌimainun rabë́ caquí buácaquin bixunbi caramina sinaniman?

¹⁰ ¿Bëtsi nëtë́nribi ꞌën mëcën achúshi ꞌimainun rabë́ pán pimicëxuan cuatro mil unin tëxëocë a mëcën achúshi ꞌimainun rabë́ caquí buácaquin bixunbi caramina sinaniman?

¹¹ ꞌËn cana fariseo unibu ꞌimainun saduceo unibunëxa anun pán chamiti ñusa ꞌicësa usaribi ꞌitin rabananmi bërúancanun quixun mitsu can. Caíbi cana pán ñuiira quicëma ꞌain. ¿Usaquin ꞌën cacëxun caramina cuacëma ꞌain?

¹² Cacëxun ca aín ꞌunánmicë unicaman —Jesusan ca anun pán chamiti ñu ñuiquin caquinbi fariseo unibu ꞌimainun saduceo unibunëan ꞌunánmicë banacama ca asérabi ꞌicë quixun sinánquin a cuatin rabanan bërúancanun nu caxa —quixun ꞌunáncëxa.

Jesús ax ca asérabi Cristo ꞌicë quiáxa Pedro quia

¹³ Usotancëx anu Cesárea de Filipo cacë ëma ꞌicë me anu cuanx riquianquin ca aín ꞌunánmicë unicama Jesusan ñucáquin cacëxa: —¿Uni ꞌinux Nucën Papa Diosnuax uá ꞌaish carana ꞌëx ui ꞌai quiax cara unicama quin?

¹⁴ Cacëxun ca atun cacëxa: —Raírinëx ca quia, mix ismina Juan, an uni nashimicë, a ꞌain. Raírinëx ca quia, mix ismina Elías a ꞌain. Raírinëxribi ca quia, mix sapi ismina Jeremías a ꞌain, ama ꞌaish ismina an Nucën Papa Dios quicë bana unicama ñuixuan uni itsi a ꞌiti ꞌain.

¹⁵ Cacëxun ca ain ꞌunánmicë unicama Jesusan cacëxa: —¿Atúxa usai quimainun caramina mitsux ꞌëx caraisana ui ꞌai quin?

¹⁶ Quia ca Simón Pedronën cacëxa: —Mix camina axa bamatimoi tsócë Nucën Papa Dios aín Bëchicë, Cristo, axa utinu nun caíncë, a ꞌain.

¹⁷ Cacëxun ca Jesusan cacëxa: —Simón, Jonasan bëchicë, cana mi cain, unin ca usaquin mi sinánmicëma ꞌicën. ꞌËn Papa naínu ꞌicë an ca mi sinánxunquin usoquinmi sinánun mi sinánmiaxa. An ca mi sinánmiaxa quixun ꞌunani camina cuëënti ꞌain.

¹⁸ Caxun ca mapara, griego banan “petra” cacë, a sinánquin Jesusan Simón cacëxa: —ꞌËn cana mi cain, mix camina Pedro caquin anëcë ꞌiti ꞌain. Minmi ꞌëmi bërí cacë bana sináncë usaribi oquin sináncë ca axa ꞌëmi catamëcë unicamax ꞌiti ꞌicën. Bamatancëxbi cëñútimoi ca a unicamax ꞌënan ꞌiti ꞌicën.

¹⁹ ꞌËn cana ꞌën cushi mi ꞌinánti ꞌain, ami cushixunmi ꞌë ñuiquin bana unicama ñuixunun. An minmi ꞌë ñuiquin bana ñuixuncëxun cuacë unicamax ca ꞌën Papa Diosan uni ꞌiti ꞌicën. A cushínbi Nucën Papa Diosan sináncësaribi oquin sinánquin, aín unicamax ca usai ꞌiti ꞌicë quixun caquin, ësa ñu ca ꞌati ꞌicë quixun canan, ësa ñu ca ꞌatima ꞌicë quixun cacëbëtan ca Nucën Papa Dios naínu ꞌicë an, —usa ca —quixun sinánti ꞌicën.

²⁰ Usaquin Pedro catancëxun ca aín ꞌunánmicë unicama Jesusan cacëxa: —ꞌËx cana ax utia judíos unibunën caíncë Cristo a ꞌai quixun camina uinu ꞌicë unibi catima ꞌain.

—ꞌËx cana unin ꞌacëx bamati ꞌai —quiáxa Jesús quia

²¹ Ësaquin caquin sënë́ontancëxun ca aín bamati ñuixuntabaquin Jesusan aín ꞌunánmicë unicama ësaquin cacëxa: —ꞌËn Papa Dios cuëëncësabi oi cana Jerusalénu cuanin. Cuanx bëbacë ca anu ꞌicë uni apáncamabë judíos sacerdotenën cushicama ꞌimainun an Moisésnën cuënëo bana ꞌunáncë unicamax ꞌën bana cuaisama tani ꞌëmi nishti ꞌicën. ꞌËmi nishquin ca ꞌë uni itsi ꞌamiti ꞌicën. Usaquian ꞌë ꞌacëx bamatancëx cana rabë́ nëtë ꞌiónxa pëcaracëbë baísquiti ꞌain.

²² Usaria quia oquin ca Pedronën Jesús amo nitsinaxun ñu caquin cacëxa: —Usai camina ꞌitima ꞌain, Nucën Papa Diosax ca mixmi usai ꞌiti cuëëntima ꞌicën.

²³ Usaquin cacëx cuainacëquin ca Jesusan Pedro ñu caquin cacëxa: —Min camina ñunshin ꞌatimanën ꞌapu, Satanás, an sináncësa oquin sinanin. Usaquin sinánxunma ca ꞌat. Min camina ꞌë ñu ꞌatima ꞌamitisa tanin. ꞌËn Papa Dios cuëëncësabi oi ꞌiáxma ꞌëx ꞌinun quixun sinánquin camina unin sináncësa oquinshi sinanin.

²⁴ Catancëxun ca aín ꞌunánmicë unicama ësaquin Jesusan cacëxa: —Uix cara ꞌën uni ꞌiisa tania an ca a ꞌai bamanuxunbi ꞌëmi catamëti quicë bana ënquinma ꞌati ꞌicën.

²⁵ Uin cara aín cuëëncësa oquin ꞌai, ënë nëtënu upitax tsótishi sinania, ax ca Nucën Papa Diosnan ꞌitima ꞌicën. Usa ꞌaínbi ca uinu ꞌicë unin cara ënë nëtënushi upitax tsóti sinánquinma ꞌëmi catamëquin ꞌëx quicësabi oquin ꞌaia, ax Nucën Papa Diosnan ꞌaish aín nëtënu abë ꞌiti ꞌicën.

²⁶ Unix ca ënë nëtënuax ꞌitsaira ñuñu ꞌiti ꞌicën, ꞌaíshbi ca Nucën Papa Diosmi sináncëma ꞌaish abë upíma ꞌianan aín nëtënu abë ꞌitima ꞌicën. Usa ꞌain ca axa bamacëbë aín ñucama ax ñancábia bicë ꞌicën. ¿Nucën Papa Diosbë bamatimoi tsónuxun cara unin añu ñun cupíoti ꞌic? Anun cupíoti ñu ca ꞌaíma ꞌicën.

²⁷ ꞌËx cana ꞌën Papa Diosan nëtënu cuantancëx anu abë ꞌApu ꞌiti ꞌain. ꞌËx ꞌApu ꞌaish utëcëncëbë ca ꞌën ángelcamaribi uti ꞌicën. Uxun cana unicama achúshi achúshi atun nuitu ꞌunánquin an ñu ꞌatima ꞌacë unicama a ꞌatimonan an upí ñu ꞌacë unicama ꞌëbë ꞌinúxa cuëënun ꞌimiti ꞌain.

²⁸ ꞌËn cana asérabi mitsu cain, axa ënu ꞌëbë ꞌicë uni raírinën ca bamacëma pain ꞌixun, uni ꞌinux Nucën Papa Diosnuax uá ꞌicë, ꞌëx cana asérabi ꞌën unicaman cushi ꞌai quixun isti ꞌicën.