Mateo 14 - Kashibo-Kakataibo Biblia

Juan, an uni nashimicë, ax bama

¹ Usa ꞌain ca unicaman Jesús ñuiquin chanioia Galileanu ꞌicë unicaman ꞌapu, Herodes, an cuacëxa.

² Cuaquin ca Herodesnën ratúquin, an ñu mëëmicë unicama cacëxa: —Jesús, ax ca Juan, an uni nashimicë, a ꞌicën. Bamaxbi ca baísquiaxa. Usa ꞌixun ca uni itsían ꞌacëma ñu ꞌaia.

^3-4 An Juan aín uni tëbíscamia ꞌaish ca usai Herodes quiacëxa. Ësai ca ꞌiacëxa: Herodes, an ca aín xucën Felipenën aín xanu, Herodías, a biacëxa. Usa ꞌain ca —minmi a xanu biti ca ꞌaisama ꞌicë —quixun Juanën Herodes cacëxa. Cacëxun ca Herodesnën aín unicama Juan bimiacëxa. Bimixun ca nëamixun sipuamiacëxa.

⁵ Aín unicaman Juan ꞌanun ꞌamitisa tanquinbi ca camabi unían —Juan an ca Nucën Papa Dios quicë bana nu ñuixunia —quixun sináncë ꞌain —ꞌëmima nishcania —quixun sinánquin ꞌamiama ꞌicën.

⁶ Usa ꞌaínbi ca anúan bacë́an nëtën Heródesnën camicëx uxúan unicaman pimainun, Herodíasnën tuá xanu xuntacu ax upiti bairani ransacëxa. Usai ꞌia isi ca Herodes chuáma tani cuëëancëxa.

⁷ Cuëënquin ca xanu xuntacu cacëxa: —Añu ñu caramina mi ꞌinánun ꞌë ñucati a cana asérabi mi ꞌinánti ꞌain. Sinanatëcëntimoquin cana ashiquin mi cain.

⁸ Cacëxun aín tita pain ñucátancëxun ca aín titaxa quicësabi oquin cacëxa: —Juan, an uni nashimicë, a tëbíscamixun camina ꞌë aín maxcá manë xampami ꞌinánti ꞌain.

⁹ Usaquian cacëxun cuaquin masá nuituiraquin ca Herodesnën ꞌaisama tancëxa. ꞌAisama tanquinbi ca —sinanatëcëntimoquin cana mi cain —quixuan cacë sinánan anu ꞌicë unicamanribia cuacë cupí usoquian xanu xuntacu ꞌinánun aín uni cacëxa.

¹⁰ Caquin ca sipunuabia Juan tëbíscanun quixun aín unicama xuacëxa.

¹¹ Xucëx cuanxun tëbíscabëtsinquin bëxun ca aín maxcá manë xampami xanu xuntacu ꞌináncëxa. ꞌInáncëxun buánxun ca aín tita ꞌináncëxa.

¹² Usoquian tëbíscacë bixun maínbiani cuanxun ca Juanën ꞌunánmicë unicaman Jesús ñuixuancëxa.

Jesusan ꞌaisamaira ꞌaish, cinco mil uni pán pimia

¹³ Usaquian Juan ꞌacëa aín unicaman ñuixuncëx ca Jesús anuax nuntin cuanx anua uni ꞌicëma menu cuancëxa. Usa ꞌain ca —anu ca Jesús ꞌicë —quixuan chanioia cuabiani bëtsi bëtsi ëmanu ꞌicë unicamax men anua Jesús ꞌicë anu cuancëxa.

¹⁴ Usaía ꞌitsa unia riquiancëbë manë nuntinuax ꞌibúquianquin ca unicama timë́cë isquin Jesusan atu nuibacëxa. Nuibaquin ca ꞌinsíncë unicama pëxcüacëxa.

¹⁵ Usaquin ꞌacëbëa bari xupíbucëbëtan ca aín ꞌunánmicë unicaman anu cuanxun Jesús cacëxa: —Bari ca xupíbutia, ënë mex ca anu uni ꞌicëma me ꞌicën. Ënu ꞌiaxma unicama cuantánun camina cati ꞌain. Cuanxuan ꞌuri ꞌicë ëmacamanua atun piti bitánun camina xuti ꞌain.

¹⁶ Cacëxun ca Jesusan cacëxa: —Ca cuantima ꞌicën. Mitsun ca piti ꞌinan.

¹⁷ Cacëxun ca aín ꞌunánmicë unicaman cacëxa: —Nun piti ñura ca mëcën achúshi pán ꞌimainun tsatsa rabë́ishi ꞌicën.

¹⁸ Quia ca Jesusan cacëxa: —Ënu ca ꞌë bëxun.

¹⁹ Cacëxuan bëcëbëtan ca Jesusan basinua bucubunun quixun unicama cacëxa. Cacë́xa bucubucëbëtan ca Jesusan mëcën achúshi páncëñun tsatsa rabë́ bixun manámi bësuquin isquin Nucën Papa Dios —asábi ca —catancëxun pán tucapaxun aín ꞌunánmicë unicama ꞌináncëxa. ꞌInáncëxun ca anu ꞌicë unicama pán mëtícaquin ꞌináncëxa.

²⁰ ꞌInáncëxun biquin ca unicama camaxunbi pucháquin piacëxa. Pucháquin pia sënë́an ca usai ꞌiisa ꞌaímabia tëxëcë piti aín ꞌunánmicë unicaman mëcën rabë́ ꞌimainun rabë́ caquí buácaquin biacëxa.

²¹ An pucháquin picë nucë bënëcamax ca ꞌaisamaira ꞌaish, cinco mil uni ꞌiacëxa. Atúinshima xanu ꞌimainun xucamanribi ca pucháquin piacëxa.

Jesús parúmpapa camánanën niquiani cuan

²² Usotancëxun ca an tsiánquianquin unicama cabianmainuan, atux pain manë nuntinu cëñúruquiani ꞌucë manan cuanun quixun Jesusan aín ꞌunánmicë unicama xuacëxa.

²³ Xutancëxun anu ꞌicë unicama cabiani ca Jesús axëshi matánu Nucën Papa Diosbë banai cuancëxa. Nucën Papa Diosbëa banamainun ca bari cuabuacëxa. Bari atsíncëbëa baquíshcëbë Jesús axëshi anu ꞌimainuan

²⁴ aín ꞌunánmicë unicama manë nuntinu ꞌiruquiani parúmpapa nëbë́tsi cuania ca suñúonpitan cuaínsamoquin bëcacëxa. Bëcaia ca bëchunanribi tucáncaquin manë nuntinua rëútisoquin ꞌacëxa.

²⁵ Usomainuan pëcaracëbë ca parúmpapa camánanën niquiani Jesús atunu cuancëxa.

²⁶ Parúmpapa camánanën niquiania Jesús cuania isi ca atun bëmánan pëqui racuëti —ñunshin sapi ca —quiax ratuti sharárui quiacëxa.

²⁷ Usai quia ca Jesusan atu cacëxa: —Camina cushicanti ꞌain. Racuëaxma ca ꞌit, ꞌë cana ꞌain.

²⁸ Cacëxun ca Pedronën cacëxa: —Mix camina asérabi Nucën ꞌIbu ꞌain. Usa ꞌixun ca ꞌëx parúmpapa camánanën niquiani minu cuanun ꞌë cat.

²⁹ Cacëxun ca Jesusan cacëxa: —Ca ut. Cacëx ca Pedro manë nuntinuax ꞌibúquiani parúmpapa camánanën niquiani Jesúsnu cuancëxa.

³⁰ Cuanibi ca suñúan upitan parúmpapa bëchúaian isi racuëti nanë́buti cuëncëni quiacëxa: —Cana bacamiquin, ꞌë ca bitsi ut.

³¹ Cuëncë́nquia cacëxun biquin ca Jesusan cacëxa: —¿Uisacatsi caramina ꞌën mi parúmpapa camánanën nicuatsinimi ꞌënu unun ꞌimicëxbi ꞌëmi catamëtiman? Camina ꞌëmi sináncëmasa ꞌain.

³² Jesúsbëa Pedro manë nuntinu ꞌirucëbë ca suñúan nëtë́acëxa.

³³ Nëtë́cëbëtan ca manë nuntinu ꞌicë unicaman a tanáin rantin puruni tsóbuti ami sinánquin Jesús cacëxa: —Mix camina asérabi Nucën Papa Diosan Bëchicë a ꞌain.

Genesaret menuxuan Jesusan ꞌinsíncë unicama pëxcüa

³⁴ Parúmpapa ꞌucë manan cuanx ca Genesaret cacë menu bëbacëxa.

³⁵ Bëbaia isquin ca a menu ꞌicë unicaman —axa ucë ux ca Jesús ꞌicë —quixun ꞌunánquin a menu ꞌicë unicaman ꞌunánun chaniocëxa. Chaniocëbëtan ca uni ꞌinsíncëcama Jesúsnu bëacëxa.

³⁶ Bëcëxun ca ñucë unicaman Jesús cacëxa: —Min chupa cuëbíshi ca nu ticamit. Ësaquin caquin ticaíshi ca ꞌinsíncë unicamax pëxcúacëxa.