Mateo 11 - Kashibo-Kakataibo Biblia

Juan an unicama nashimicë an aín ꞌunánmicë uni Jesús isnun xua

¹ Aín ꞌunánmicë unicama an ñuixuncë bana unicama ñuixuntanun catancëx ca Jesús anribi Galilea menu ꞌicë ëmacamanuxun bana ñuixunux cuancëxa.

² Usai ꞌimainun ca sipunu ꞌixun Juan, an uni nashimicë, an Jesusan ñu ꞌaia ñuicania cuacëxa. Cuaquin ca aín uni raíri Jesús istánun quixun xuacëxa, asérabi cara ax utia judíos unibunën caíncë a ꞌicë quixuan isnun.

³ Xucëx cuanxun ca Juanën cacësabi oquin ñucáquin Jesús cacëxa: —¿Mix caramina asérabi axa uti nun caíncë a ꞌain? ¿Mixmi ama ꞌain caranuna bëtsi uníxa uti nun caínti ꞌain?

⁴ Cacëxun ca Jesusan cacëxa: —Camina ꞌën unicama ñuixuniami cuacë banacama ñuixuanan ꞌën ñu ꞌaiami iscëcama ñuixunquin Juan cai cuanti ꞌain.

⁵ Cuanxun camina cati ꞌain: Bëxuñu unínbi ca bërí isia, aín niti bëtsicë uníxribi ca bërí upiti nitsia, an aín nami chëquímicë ꞌinsínñu unix ca pëxcutia, pabë unin ca bana cuatia, bamacë uníxbi ca baísquia, ñuñuma unínribi ca anun Nucën Papa Diosnan ꞌinux ië́ti bana cuatia.

⁶ Usaquin canan camina, ꞌë ñui Nucën Papa Diosan xucëma ca ax ꞌicë quima, ax ꞌëmi sináncë unicamax ca chuámarua ꞌi cuëënia quixunribi Juan cai cuanti ꞌai —quixun ca Jesusan Juanën xucë unicama cacëxa.

⁷ Juan, an unicama nashimicë, aín unicama cuancëbëtan ca Jesusan anu ꞌicë unicama ꞌaisamaira ꞌicë Juan ñuiquin ësaquin cacëxa: —¿Uisa uni isi caramina mitsux anu uni ꞌicëma menu cuancën? Bëtsi bëtsi oquin sináncë uni ax ca tutísha suñun bëcacësa ꞌicën. ¿Usa uni isi caramina cuancën?

⁸ ¿Ax usama ꞌain caina añu isi cuancën? ¿Upíira ꞌaísha cupíira chupa pañucë uni isi caramina cuancën? Usama ca. Camina ꞌunanin, upíira ꞌaísha cupíira chupa pañucë unix ca anu ꞌapu ꞌicë xubunushi ꞌia.

⁹ ¿Usa uni isi cuanima caramina añu isi cuancën? An Nucën Papa Dios quicë bana uni ñuixuncë uni a isi camina cuancën, ¿usa cat? Asérabi cana ꞌën mitsu cain, an Nucën Papa Dios quicë bana unicama ñuixuncë unicaman ñuixuan bana ꞌiásamaira ca Juanën uni ñuixuncë bana ꞌicën.

¹⁰ Juan ñuiquian ënë menu ucëma pan ꞌicë ꞌë cacë bana a ca Nucën Papa Diosan Isaías cuënëomiacëxa, ësai quicë: A caxumi cuanun cana ꞌën uni xutin. Ax pain cuanquin ca anun cuanti bai mëníoquin racanacësaribi oquin camabi unían min bana cuanun atun nuitua upí ꞌinun sinanamiti ꞌicën.

¹¹ Usaquin cuënëo bana ñuitancëxun ca Jesusan anu ꞌicë unicama cacëxa: —Asérabi cana ꞌën mitsu cain, an Nucën Papa Dios quicë bana uni ñuixuncë unicaman ñuixuncë bana ꞌiásamaira ca Juanën ꞌë ñuicë bana ꞌiaxa. Usa ꞌain ca a unicamax ꞌiásamaira Juan ꞌicën. Usa ꞌaínbi ca axa Nucën Papa Diosan nëtënu ꞌiti ꞌën unicamax, unían ñuumara iscë ꞌaíshbi Juan ꞌiásamaira ꞌicën.

^12-13 Juan ucëma pan ꞌain ca Moisés ꞌimainun an Nucën Papa Dios quicë bana uni ñuixuncë unicaman ꞌë ñuiquin unicama ñuixuancëxa. A unicama caxu uquin ca Juanën ꞌë ñuiquin, axa utia judíos unicaman caíncë ax ca uaxa quiax quiquin unicama ñuixuanxa. Usa ꞌain ca ꞌënribi, ꞌëmi catamëcë unicama ca Nucën Papa Diosnan ꞌiti ꞌicë quixun ñuixunia cuanan ꞌën ñu ꞌaia isi ꞌaisamaira unix Nucën Papa Diosnan ꞌiti sinania.

¹⁴ Mitsun asérabi cuaisa tanquin camina ꞌunánti ꞌain, Elías ca uti ꞌicë quicë bana ax ca Juan ñui quiá ꞌicën. A bana quiásabi oi ca Juan, an unicama nashimicë, ax Nucën Papa Diosan mëníosabi oi uaxa.

¹⁵ An aín pabitan ënë bana cuacë unin ca aín nuitunënbi sinánquin cuati ꞌicën.

¹⁶ Ësaquinribi ca Jesusan anu ꞌicë unicama cacëxa: —Ënë nëtënua bërí bucucë unicamax cara uisa ꞌicë quixun cana mitsu cati ꞌain. Ca tuáratsucuxa cuaicësaribi ꞌicën. Cuainux timë́cë ꞌaíshbia cuaitisa tantancëx camáxbi tsotan ca raírinën raíri ësaquin caia:

¹⁷ “Cuai chirini cuëënun nun paca bana ocëbëbi camina masá sinani cuaitisama tan. Cuaitisama tancëbë nux —anpan caniacëcë unicama ꞌicësaribiti cananuna ini rarumati ꞌai —quicëbëbi camina masá sinani usairibi ꞌiisama tan”.

¹⁸ Usaribi ca ënë nëtënua bucucë unicamax ꞌicën. Juanëx ca ñu mëscú picëma ꞌianan ñu xëacëma ꞌicën. Usa ꞌicë ca unicaman —a unix ca ñunshin ꞌatimañu ꞌicë —quixun caxa.

¹⁹ Usoquian Juanën ꞌacësoquin ꞌaquinma ꞌën camabi ñu pianan xëaia isquin ca unicaman ësaquin ꞌë ñuia: A unix ca picën tapun ꞌianan xëairacë uni ꞌicën. Ax ca an ꞌapu buánmiti curíqui bicë unicama ꞌimainun ꞌuchañu unicamabë nuibanania —quixun. Usaquian Juancëñun unin ꞌë ñuicëbëbi ca Nucën Papa Dios, an ënë menu unun ꞌë xua, an ꞌacë ñucamax asábi ꞌicën. Usa ca quixun ca axa ami sináncë unicaman ꞌunania.

Axa bëtsi bëtsi ëmanuax ami sinántisama tancë unicama Jesusan ca

²⁰ Usaquin catancëxun ca Corazín ꞌimainun Betsaida ꞌimainun Capernaúm a ëmacamanuax ucë unicama, atun ëmanuxun bana ñuixuanan uni itsin ꞌacëma ñu ꞌacëbëbia aín bana cuati ami sinanacëma, a unicama ësaquin Jesusan cacëxa:

²¹ —Corazín ëmanuax ucë unicama ꞌimainun Betsaidanuax ucë unicama, mitsu cana asérabi cain, mitsun ëmanuxun ꞌën cushínbi ꞌën ñu ꞌacësaribi oquin Tiro ꞌimainun Sidón anuxun ꞌën ꞌá ꞌain ca anu ꞌicë unicama aín ꞌuchacama ëni ꞌëmi sinan ꞌitsíanxa. Aín ꞌucha cupí masá nuituti sinanati ca chupa chëquicë pañuanan chimaputan mashiquia ꞌitsíanxa.

²² Usa ꞌain cana mitsu cain, anúan an camabi uni aín ñu ꞌacë isti nëtën ca Tiro ꞌimainun Sidónu ꞌicë unicama ꞌacësamaira oquin Nucën Papa Diosan mitsu ꞌuchoquin castícanti ꞌicën.

²³ Capernaúmnuax ucë unicama, ¿mitsun caramina sinanin, camina Nucën Papa Diosan nëtënu ꞌiti ꞌai quixun? Camina anuma, anua uni ꞌaisamacama bamatancëx cuancë, anu ꞌiti ꞌain. Mitsun ëmanuxun ꞌën cushínbi ꞌën ñu ꞌacësaribi oquian Sodomanuxunribi ꞌacë ꞌain ca aín ꞌuchacama ëni anu ꞌicë unicama nëëncëma ꞌiá ꞌitsíanxa.

²⁴ Usa ꞌain ca anúan camabi uni aín ñu ꞌacë isti nëtën Sodomanu ꞌicë unicama ꞌásamaira oquin Nucën Papa Diosan mitsu ꞌuchoti ꞌicën. ꞌUchoquin ca a ëmanu ꞌicë unicama ꞌacësamaira oquin mitsu ꞌati ꞌicën.

—Chuámarua tani cuëënux camina ꞌëmi catamëti ꞌai —quixun Jesusan ca

²⁵ Catancëxun ca Jesusan Nucën Papa Dios cacëxa: —ꞌËn Papa Dios, mixmi naí ꞌimainun menu ꞌicë ñucaman ꞌIbu ꞌicë cana mi rabin. Ami uni ꞌunánmiti ñu a camina an ñu ꞌunáncë unicama ꞌunánmiquinma an ñu ꞌunáinracëma unicama ꞌunánmian. Usaquinmi ꞌacë cupí cana mi rabin. Usaquin ꞌati camina mix cuëëan.

²⁶ —Ñu ꞌunánma ca —quixuan unin sináncë unicaman min ꞌimicëxun ꞌën bana cuati camina cuëëan.

²⁷ Usaquin aín Papa Dios catancëxun ca Jesusan anu ꞌicë unicama amiribishi cacëxa: —ꞌËn Papa Diosan ca camabi aín sinan ꞌë ꞌunánmiaxa. Uinu ꞌicë unínbi ca uisa uni ꞌianan añu ꞌai carana ꞌëx uacën quixun ꞌunanima. ꞌËn Papa Diosan cuni ca ꞌunania. Usaribi oquin ca uinu ꞌicë unínbi, uisa cara Nucën Papa Dios ꞌicë quixun ꞌunanima. Aín Bëchicë, ꞌën cuni cana ꞌunanin, ꞌimainun ca a ꞌën uisaira cara ax ꞌicë quixun ꞌunánmisa tancë unicama anribi ꞌunania.

²⁸ Nucën Papa Diosan mi upí isnun quixun ꞌaisamaira ñu ꞌanan unin cacë ñuribi ꞌai bënëti atsáncë ꞌixun camina ꞌëmi catamëquin ꞌën mi ꞌaquinun ꞌë cati ꞌain. Cacëxun cana a ñucama mëníoquin ꞌënan ꞌaíshmi tanti ꞌicësaribitimi upí oquin sinani cuëënun mitsu ꞌimiti ꞌain.

²⁹ Mitsúxmi cuëënia cana uisari caramina upí ꞌiti ꞌai quixun mitsu ꞌunánmiti ꞌain. Ñu caquinma cana tëmëraquinmami ꞌati sënë́inshi ꞌëx cuëëncësabi oi ꞌinun mitsu ꞌimiti ꞌain. ꞌImixun ꞌën ꞌaquincëx camina upí oquin sinani chuámashirua tani cuëënti ꞌain.

³⁰ Mitsúxmi ꞌënan ꞌain ca ꞌën mitsu ꞌaquincëx mitsun ꞌati ñux ꞌaisa ꞌicën.