Marcos 9 - Kashibo-Kakataibo Biblia

¹ Jesusan ca ësaquinribi cacëxa: —Asérabi cana mitsu cain, axa ënu ꞌëbë ꞌicë uni raírinën ca bamacëma pain ꞌixun, ꞌëmi catamëtia ainan ꞌimicëxun, Nucën Papa Dios ca asérabi atun cushi ꞌicë quixun isti ꞌicën. Nucën Papa Diosan cushínbi ca usai ꞌiti ꞌicën.

Axbia Jesús bëtsia

² Usaquin aín ꞌunánmicë unicama catancëx ca mëcën achúshi ꞌimainun achúshi nëtë ꞌicëbë aín ꞌunánmicë uni raíri ëbiani, Pedrocëñun Jacobo ꞌimainun Juan, acamaishi buani Jesús matánu cuancëxa. Anu cuantancëx ca acaman ismainunbi Jesús bëtsiacëxa.

³ Bëtsicëbë ca aín chupa uxuira ꞌaish chabachabaquicësa ꞌiacëxa. Usa ꞌaish ca ënë menu ꞌicë unínbia chupa chacaquinbi uxuocësamaira ꞌaish uxuira ꞌiacëxa.

⁴ Usa ꞌicë isanan ca Moisésbëa Elías chiquiracëti Jesúsbë banaia isacëxa.

^5-6 Usai banaia isi ꞌaisamairai racuëti —uisai carana quiti ꞌai —quiax sináncasmaquin ca Pedronën Jesús cacëxa: —Nuxnu ënu ꞌicë ca asábiira ꞌicën. ¿Uisa cara rabë́ ꞌimainun achúshi xubura mi ꞌaxunti ꞌiti ꞌic? Minan achúshi ꞌimainun Moisésnan achúshi ꞌimainun Elíasnanribi achúshi cananuna ꞌati ꞌain.

⁷ Usaquian Pedronën cacëbëtainshia cuinan atu tupë́oncëxun ca Pedro, Jacobo, Juan, acaman cuin mëucüaxa ësai banaia cuacëxa: —Ënëx ca ꞌëx amiira sináncë, ꞌën bacë bëchicë ꞌicën. Aín bana ca cuacan.

⁸ Quia cuati cuainacëquin amocüa iscëxbi ca uíbi ꞌaíma ꞌimainun Jesúsëshi anu ꞌiacëxa.

⁹ Usaquiani matánuax cuanquin ca Jesusan atu cacëxa: —Mitsúnmi iscë ënë ñucama camina uinu ꞌicë unibi ñuixuntima ꞌain. Uni ꞌinux Nucën Papa Diosnuax uá, ꞌëx bamatancëx baísquicëbëtan cuni camina ënë ñucama unicama ñuixunti ꞌain.

¹⁰ Usaquian Jesusan cacësabi oquin a ñucama ui unibi ñuixunímabi ca atúxbi cuni canani quiacëxa: —¿Uisai quicë cara, bamatancëx cana ꞌëx baísquiti ꞌai, quicë ax ꞌic?

¹¹ Ësai canantancëxun ca Jesús ñucáquin cacëxa: —¿Mixmi asérabi Cristo ꞌaínbi cara uisacatsi an Moisésnën cuënëo bana ꞌunáncë unicamax, Elías pain ca uti ꞌicë quin?

¹² Cacëxun ca Jesusan cacëxa: —Elías ax pain ca uti ꞌicë quicë bana ax ca asérabi ꞌicën. Uxun ca unicama Nucën Papa Diosmia sinánun sinánmiti ꞌicën, usai quicë bana ca asérabi ꞌicën. ¿Usa ꞌaínbi cara axa Nucën Papa Diosnuax uni ꞌinux uá a ñuicë bana uisai quin? Ca quia, ax ca unin bëtsi bëtsi ocëx tëmërati ꞌicën.

¹³ Elías ax pain ca uti ꞌicë quicë banax asérabi ꞌaínbi cana mitsu cain, Elías pain ca uaxa. Ucëbi ca judíos unicaman atúxa cuëëncësa oquinshi a ꞌatimoxa, a ñui Nucën Papa Diosan bana cuënëo quicësabi oquin ca ꞌacanxa.

Ñunshin ꞌatimañu tuá Jesusan pëcüa

¹⁴ Aín uni rabë́ ꞌimainun achúshibë matánuax anua aín ꞌunánmicë uni raíri ꞌicë anu cuanquinbi ca Jesusan isacëxa ꞌaisamaira unían aín ꞌunánmicë unicama raíri nëbë́tsioraxun, an Moisésnën cuënëo bana ꞌunáncë unicamabëtan atubë cuëbicanánquin atu cananquinia.

¹⁵ Usai cuëbicanánquinbi Jesús aia isi camáxbi ratuti abáquiani riquianxun ca —¿Caina ain? —quixun cacëxa.

¹⁶ Cacëxun ca cacëxa: —Cana ain. ¿Añu ñui caramina atubë cuëbicanancanin?

¹⁷ Cacëxun ca anu ꞌicë uni achúshinën Jesús cacëxa: —ꞌËn bëchicë cana minu bëan. Ñunshin ꞌatimanën ꞌimicëx ca banañuma ꞌicën.

¹⁸ Uinuxun cara ñunshin ꞌatimanën ꞌimia anuax ca menu nipacëtia. Usai ꞌi aín cuñun bacux bëi cuëtsë́quiquin ca aín xëta ñërë́xcaia, aín namíxbi ca nimëti bërërui saquiquia. Usa ꞌain cana min ꞌunánmicë unicama ꞌëa chiquínxunun can, cacëxunbi ca ꞌacasmaxa.

¹⁹ Quia cuaquin ca Jesusan anu ꞌicë unicama cacëxa: —Mitsun camina Nucën Papa Dios ax ca asérabi cushi ꞌicë quixun sinaniman. ¿Mitsúxmi ꞌëmi catamënun carana uiti nëtën mitsu ꞌunánmiti ꞌain? ¿Uitishi oi carana ꞌëx mitsu cupí masá nuituti ꞌain? ꞌË ca a tuá bëxun.

²⁰ Cacëxuan bëcëbëtan Jesús isquin ca ñunshin ꞌatimanën a tuá aín nami nimë́miquin bërërumiquin menu nipacëmiacëxa. Usocëx ca aín cuñun bacux bëi menu taramëcëacëxa.

²¹ Usaía ꞌia isquin ca Jesusan a tuacën papa ñucácëxa: —¿Uiti barin cara ënë tuá ësai ꞌin? Cacëxun ca cacëxa: —Xuratsu ꞌaíshbi ca usai ꞌiacëxa.

²² Usa ꞌicë ca ñunshin ꞌatimanën bamamicatsi quixun ꞌitsa oquin tsinu ꞌirumianan bacanuribi nipacëmia. Usa ꞌain camina min ꞌaisa ꞌicë nu a pëxcuxunti ꞌain.

²³ Cacëxun ca Jesusan cacëxa: —Minmi ꞌë, ca ꞌaxunti ꞌicë quixun sináncëbëtan cana ꞌati ꞌain. An ꞌëmi catamëquin, ꞌën cana asérabi ꞌaxunti ꞌai quixun sináncë uni a cana uisa ñu cara abi ꞌaxunti ꞌain.

²⁴ Cacëxun ca munuma banaquin a tuacën papan cacëxa: —Min camina camabi ñu ꞌati ꞌai quixun cana ꞌunanin. Usa ꞌaínbi camina, upí oquinra ꞌunánun ꞌë ꞌaquinti ꞌain.

²⁵ Ësoquian cacëbëa ꞌitsa uni anu timëtia isquin ca Jesusan ñunshin ꞌatima cacëxa: —Ñunshin ꞌatima, an uni banañuma ꞌimianan pabë ꞌimicë, mi cana cain, ënë tuánuax ca ashiti chiquit. Chiquítancëx camina amiribishi anu utëcëntima ꞌain.

²⁶ Cacëx ca ñunshin ꞌatima munuma cuëncëni amiribishi a tuá aín nami nimë́miquin bërërumi bamacësa ꞌitánun nipacëmi chiquíacëxa. Usocëxa racácë isi ca —ca bamaxa —quicáncëxa.

²⁷ Quia ratúcancëbëtanbi Jesusan aín mëcënan mëínquin birucëx ca a tuá niruacëxa.

²⁸ Usoquin ꞌabiania xubunu atsíncë ca aín ꞌunánmicë unicaman Jesús cacëxa: —¿Uisa cupí caranuna nun a tuánu ꞌicë ñunshin ꞌatima chiquíncasman?

²⁹ Usaquian cacëxun ca cacëxa: —Nucën Papa Dios pain pima samáquin ñucáquin cuni ca unin ësa ñunshin ꞌatima chiquínti ꞌicën.

Jesúsan —ꞌëx cana unin ꞌacëx bamati ꞌai —quixun catëcëan bana

³⁰ Anuax cuanx, Galilea menu ꞌicë bain cuanquin ca Jesusan ax cuaniama unin ꞌunania quixun atuishi aín bana ñuixunti cupí aín ꞌunánmicë unicama ꞌunánquibiancëxa.

³¹ ꞌUnánquibianquin ca acamaishi buánquin ësaquin cacëxa: —Uni ꞌinux Nucën Papa Diosnuax uá ꞌë ca unin, an raíri uni ꞌaminun uni ꞌinánti ꞌicën. ꞌInáncëxun bixun ca ꞌë ꞌati ꞌicën. ꞌAcëx bamatancëx cana rabë́ ꞌimainun achúshi nëtë ꞌicëbë baísquinuxun ꞌain.

³² Usaía quiabi ca atun cuama ꞌicën. Cuatímabi ca upí oquian ñuixunun Jesús catimi racuë́acëxa.

Uix cara bëtsi unicamasamaira ꞌicë quicë bana

³³ Capernaúm ëmanu bëbatancëx anua ꞌiti xubunu atsíntancëxun ca Jesusan aín ꞌunánmicë unicama cacëxa: —¿Añu ñui caramina bainuax cuëbicananpunin?

³⁴ Cacëxunbi ca bain cuani —uinu ꞌicë nucama achúshinëxira cara nubë sënë́nma ꞌicë —quiax atúxbi ñucacanánpuni rabínquin cáma ꞌicën.

³⁵ Usa ꞌain ca tsóbuxun Jesusan aín ꞌunánmicë unicama cuënxun cacëxa: —Uix cara aín cushi uni ꞌiisa tania an ca cha ꞌiti sinánquinma, camabi uni upitaxa bucunun ñu mëëquinquin ꞌaquinti ꞌicën.

³⁶ Usai quiquin ca Jesusan tuá achúshi bixun atu nëbë́tsi nitsínxun ꞌicúquin atu cacëxa:

³⁷ Uicaman cara ꞌëmi sinánquin ënë tuásaribi ꞌicëa —ñuumara ca —quixun unin sináncë uni a ꞌaquinsa ꞌicë nuibaquin ꞌaquinia, an ca ꞌëribi ꞌaquinia. Usaquin ꞌaquinquin ca ꞌëishima, an ꞌë xuá, aribi ꞌaquinia.

An nu ñuicëma uni, ax ca nubë upí ꞌicë quicë bana

³⁸ Quia ca aín ꞌunánmicë uni, Juan, an Jesús cacëxa: —Nun cananuna uni achúshinëan, Jesús ca ënë uninuaxmi chiquíti cuëënia quixun caquinshi ñunshin ꞌatima uninua chiquinia isan. Isquin cananuna axa nubë nicëma ꞌicë, usoquin ꞌaxunma ꞌanun can.

³⁹ Cacëxun ca Jesusan cacëxa: —Usoquin ꞌaxunma ꞌanun camina catima ꞌain. Uin cara ꞌën cushin uni itsían ꞌacëma ñu ꞌati ꞌicë ax ca ꞌatancëx ꞌë ñui ꞌatimati banatima ꞌicën.

⁴⁰ Axa nu ñui quicëma uni ax ca nubë upí ꞌicën.

⁴¹ Asérabi cana ꞌën mitsu cain, uinu ꞌicë unin cara, Cristonan camina ꞌai quixun sinánquin ꞌumpax mitsu ꞌinania, an ca aín cupí biti ꞌicën.

ꞌUchati rabanan bërúanracati bana

⁴² Ësaquinribi ca Jesusan cacëxa: —An uni ꞌimainun tuá ꞌëmia sinánti ënun quixun ꞌatima ñu ꞌamiquin ꞌuchamicë unix ca aín ꞌucha chaira ꞌicën. Usa ꞌaish ca aín ꞌucha cupíbi ꞌaisamaira oquin castícancë ꞌiti ꞌicën. A unix ca anun ñu rënti maxax ami tëtëcërëcatancëxun parúmpapa nëbë́tsi nicë́xa uni nanë́cësamaira oi ꞌatimaira ocë ꞌiti ꞌicën.

⁴³ Min mëcën anun ꞌaisama ñu ꞌati cuëëncë ꞌixun camina ashiquin manuquin ënti ꞌain. Usoquin ꞌai camina min mëcën tëaxun nicësa ꞌiti ꞌain. Mix mëcën rabë́ñu ꞌaíshmi bënamëtima manë tsinu anuax tëmërai cuantima cupími min mëcën tëaxun niti ca asábi ꞌicën.

⁴⁴ Anuax ca an nami picë xënacama bamaima, manë tsi axribi ca uisa nëtë́nbi bënamëtima.

⁴⁵ Min taë anun ꞌaisama ñu ꞌati cuëëncë ꞌixun camina ashiquin manuquin ënti ꞌain. Usoquin ꞌai camina min taë tëaxun nicësa ꞌiti ꞌain. Mix taë rabë́ñu ꞌaíshmi manë tsinu anuax tëmërai cuantima cupími min taë tëaxun niti ca asábi ꞌicën.

⁴⁶ Anuax ca an nami picë xënacama bamaima, manë tsi axribi ca uisa nëtë́nbi bënamëtima.

⁴⁷ Min bëru anun ñu isi ꞌatima ñu ꞌati cuëëncë ꞌixun camina ashiquin manuquin ënti ꞌain. Usoquin ꞌai camina min bëru achúshi ëchíxun nicësa ꞌiti ꞌain. Mix bëru rabë́ñu ꞌaíshmi manë tsinu anuax tëmërai cuantima cupími min bëru achúshi ëchíxun niti ca asábi ꞌicën.

⁴⁸ Anuax ca an nami picë xënacama bamaima, manë tsi axribi ca uisa nëtë́nbi bënamëtima.

⁴⁹ Nucën Papa Diosan usoquin ꞌacë́xa upí isnun ca judíos unicaman ꞌaracacë ñuina xaronuxun tashíancëxa. Usaribi ꞌicëa Nucën Papa Diosan nu upí isnun cananuna nuxribi upíshi ꞌiti ꞌain.

⁵⁰ Ësa ca. Tashix ca asábi ꞌicën. Asábi ꞌaíshbia aín muca nëtëtia camina uisaxunbi amiribishi mucotëcëntima ꞌain. Mitsúxbi ca tashisa ꞌit. Bëtsibë nishananima ca nuibanani bucucan.