Marcos 8 - Kashibo-Kakataibo Biblia

Jesusan cuatro mil uni pán pimia

¹ Usa ꞌain ca ꞌitsa uníxa timëcamëꞌëocë ꞌain a piti ꞌaíma ꞌain, Jesusan aín ꞌunánmicë unicama cuënxun cacëxa:

² —Ënë unicamax ca ënu, rabë́ ꞌimainun achúshi nëtë ꞌëbë ꞌicën. Usa ꞌaish ca a atun piti ñuñuma ꞌicën. Usa ꞌain cana ꞌën atu ꞌitsaira nuibaquin ꞌaquinsa tanin.

³ ꞌËn ñu naracamixunma atun xubunu xucëxbi ca cuaníbi bainuax bëënanti ꞌicën, raírinëx ca ꞌuracëox uaxa.

⁴ Cacëxun ca aín ꞌunánmicë unicaman cacëxa: —Ënëx ca anu uni ꞌicëma me ꞌicën. ¿Uisaxun caranuna ënë unicama pimiti ꞌain?

⁵ Cacëxuan Jesusan —¿uiti pánñu caramina ꞌain? —quixun ñucácëxun ca aín ꞌunánmicë unicaman —ënu ca mëcën achúshi ꞌimainun rabë́ ꞌicë —quixun cacëxa.

⁶ Cacëxun ca Jesusan timëcamëꞌëocë uni menu tsóbunun quixun cacëxa. Usoxun ca páncama bixun Nucën Papa Dios —asábi ca —catancëxun tucapaxun pán, aín ꞌunánmicë unicama, an unicama mëtícanun quixun ꞌináncëxa. ꞌInáncëxun ca atúan pinun anu ꞌicë unicama ꞌináncëxa.

⁷ Usotancëxun ca tsatsa ꞌitsamararibi bixun Jesusan Nucën Papa Dios —asábi ca —catancëxun aribi aín ꞌunánmicë unicama, an unicama mëtícanun quixun ꞌináncëxa.

⁸ Usoquian ꞌináncëx cëñútisa ꞌaíshbi ca a piti cëñúama ꞌicën, a unicaman pucháquin picëxbi. Camáxbia puchácëbëtan ca Jesusan ꞌunánmicë unicaman mëcën achúshi ꞌimainun rabë́ caquí buácaquin piti tëxëcë biacëxa.

⁹ An picë unicamax ca ꞌitsaira ꞌaish cuatro mil unisa ꞌiacëxa. Usoquin pimitancëxun ca Jesusan a unicama —cuanmainun ca cuan —quixun cacëxa.

¹⁰ Cabiani ca Jesúsbë aín ꞌunánmicë unicama manë nuntinu ꞌiruquiani cuanx Dalmanuta cacë me, anu cuancëxa.

Fariseo unicaman uni itsían ꞌacëma ñu ꞌanun quixun Jesús ca

¹¹ Cuanxa bëbacëbë ricuatsinxun ca fariseo unicaman abë cuëbicánanquin, Nucën Papa Diosan cushin caraisa ñu ꞌaia iscatsi quixun, Jesusan aín sinanënbi isa unían iscëma ñu naínua ꞌanun quixun cacëxa.

¹² Cacëxun ca munuma uínquin cacëxa: —¿Uisa cupí caramina ënu bucucë unicama, mitsun Nucën Papa Diosan cushin carana ñu ꞌai iscatsi quixun, ñu itsi ꞌanun quixun ꞌë cain? Asérabi cana mitsu cain, ꞌëmi ñucácëxunbi cana ꞌaiman.

¹³ Usaquin caxun ca atu ëbiani manë nuntinu ꞌiruquiani parúmpapa ꞌucë manan cuancëxa.

Fariseo unicaman bana cuatima bana

¹⁴ ꞌUcë manan cuanquin ca Jesusan ꞌunánmicë unicaman piti ñu manubiancëxa, manuanan ca pán achúshiratsushi buáncëxa.

¹⁵ Usa ꞌain ca Jesusan aín ꞌunánmicë unicama ësaquin ꞌësëacëxa: —Fariseo unibu ꞌimainun Herodesmi sináncë judíos unicamaxa anun pán chamiti ñusa ꞌicësa usaribi ꞌitin rabanan camina bërúancati ꞌain.

¹⁶ Cacëx ca atúxbi canancëxa: —Nunu pán bëcëma cupí ca nu usaquin caia.

¹⁷ Canania ꞌunánquin ca Jesusan cacëxa: —¿Uisa cupí caramina mitsux, pán cananuna bëcëma ꞌai quiax cananin? ¿ꞌËn ñu ꞌaia isunbi caramina ui carana ꞌëx ꞌai quixun ꞌunaniman, upí oquin caramina cuatiman?

¹⁸ ¿Bëruñuxunbi caramina isiman? ¿Anun cuati pabíñuxunbi caramina mitsun nuitunën sinánquin upí oquin cuatiman?

¹⁹ ¿ꞌËn mëcën achúshi pán tucapaxun pimicëxun piquian cinco mil unin tëxëocë caina uiti caquí buácaquin pán bia quixun sinánquinma caina manuan? Usaquian Jesusan cacëxun ca aín ꞌunánmicë unicaman cacëxa: —Mëcën rabë́ ꞌimainun rabë́ caquí buácaquin cananuna bian.

²⁰ Cacëxun ca Jesusan cacëxa: —¿ꞌËn mëcën achúshi ꞌimainun rabë́ pán tucapaxun pimicëxun piquian cuatro mil unin tëxëocë caina uiti caquí buácaquin pán bian? Cacëxun ca cacëxa: —Mëcën achúshi ꞌimainun rabë́ caquí buácaquin cananuna bian.

²¹ Cacëxun ca Jesusan cacëxa: —¿Usoquin ꞌën ꞌaia isúnbi caramina ui carana ꞌëx ꞌai quixun ꞌunaniman?

Bëxuñu unia Jesusan Betsaidanuxun bëpëxcüa

²² Usaquin cabiani cuanx ca Betsaida cacë ëmanu Jesús bëbacëxa. Bëbacëbëtan ca uni raírinën bëxuñu uni achúshi anu bëquin a isa ramënun quixun caquin bënëacëxa.

²³ Usocëxun ca Jesusan bëxuñu uni mëínbianquin ëma ꞌuri buánxun, anuxun tushucaquin cuñunan bëpachiquin aín mëcënan ramëquin —¿caramina ñu isin? —quixun ñucáquin cacëxa.

²⁴ Cacëx bëpëquiquin ca cacëxa: —Cana isin, i sëtë́cësa ꞌaish ca uni chaninabatia.

²⁵ Cacëxun ca amiribishi Jesusan aín mëcënan bëmëtëcëancëxa. Usocëx bëpëquiquin ca upí oquin isacëxa.

²⁶ Usaquin ꞌatancëxun aín xubunu xuquin ca Jesusan cacëxa: —Betsaida ëmanu camina cuantima ꞌain, uibimi catima cupí.

—Jesús ca Cristo ꞌicë —quiáxa Pedro quiá bana

²⁷ Usobiani ca Jesús aín ꞌunánmicë unicama buani Cesárea de Filipo cacë ëma a ꞌurama ꞌicë ëmacamanu cuancëxa. Bain cuanquin ca Jesusan aín ꞌunánmicë unicama ñucáquin ësoquin cacëxa: —¿Ui caraisana ꞌëx ꞌai quiax cara unicama quin?

²⁸ Cacëxun ca aín ꞌunánmicë unicaman cacëxa: Raírinëx ca quia, mix isamina Juan, an uni nashimicë, a ꞌain. Raírinëx ca quia, mix isamina Elías a ꞌain. Raírinëxribi ca quia, mix isamina an Nucën Papa Dios quicë bana unicama ñuixuan uni itsi, a ꞌiti ꞌain.

²⁹ Cacëxun ca Jesusan aín ꞌunánmicë unicama cacëxa: —¿Atúxa usai quimainun caramina mitsux ꞌëx caraisana ui ꞌai quiax quin? Quia ca Pedronën cacëxa: —Mix camina Cristo, axa utinu nun caíncë, a ꞌain.

³⁰ Ësaquian Pedronën cacëxun ca Jesusan uibi Pedro quicë bana ñuixunxunma ꞌanun quixun aín ꞌunánmicë unicama cacëxa.

—ꞌËx cana unin ꞌacëx bamati ꞌai —quiáxa Jesús quiá bana

³¹ Ësaquin catancëxun ca aín bamati ñuiquin Jesusan aín ꞌunánmicë unicama ësaquin cacëxa: —Uni ꞌinux Nucën Papa Diosnuax uá, ꞌëx cana ꞌatimocë ꞌiti ꞌain. ꞌImainun ca caniacëcëcamabë judíos sacerdotenën cushicama ꞌimainun an Moisésnën cuënëo bana ꞌunáncë unicamax ën bana cuaisama tani ꞌëmi nishti ꞌicën. ꞌËmi nishquin ca ꞌë uni itsi ꞌamiti ꞌicën. Usaquian ꞌë ꞌacëx bamatancëx cana rabë́ ꞌimainun achúshi nëtë ꞌicëbë baísquiti ꞌain.

³² Atúan upí oquin cuaisabi oquin ñuixunquin ca Jesusan usaquin cacëxa. Usaría quia oquin ca Pedronën Jesús amo nitsinaxun —usari camina quitima ꞌai —quixun ñu caquin cacëxa.

³³ Cacëx cuainacëquin aín ꞌunánmicë unicama isquin ca Jesusan Pedro ñu caquin cacëxa: —Min camina ñunshin ꞌatimanën ꞌapu, Satanás, an sináncësa oquin sinanin. Usaquin sinánxunma ca ꞌat. ꞌËn Papa Dios cuëëncësabi oi ꞌiaxma ꞌëx ꞌinun quixun sinánquin camina unin sináncësa oquinshi sinanin.

³⁴ Catancëxun ca anu ꞌicë unicamacëñun aín ꞌunánmicë unicamaribi cuënxun Jesusan cacëxa: —Uix cara ꞌën uni ꞌiisa tania an ca a ꞌai bamanuxunbi ꞌëmi catamëti quicë bana ënquinma ꞌati ꞌicën.

³⁵ Uin cara aín cuëëncësa oquin ꞌai, ënë nëtënu upitax tsotishi sinania, ax ca Nucën Papa Diosnan ꞌitima ꞌicën. Usa ꞌaínbi ca uinu ꞌicë unin cara ënë nëtënushi upitax tsóti sinánquinma uisai cara ꞌiquinbi ꞌëmi catamëquin ꞌëx quicësabi oquin ꞌaia, ax Nucën Papa Diosnan ꞌaish aín nëtënu abë ꞌiti ꞌicën.

³⁶ Unix ca ënë nëtënuax ꞌitsaira ñuñu ꞌiti ꞌicën, ꞌaíshbi ca Nucën Papa Diosmi sináncëma ꞌaish abë upíma ꞌianan aín nëtënu abë ꞌitima ꞌicën. Usa ꞌain ca axa bamacëbë aín ñucama ax ñancábia bicë ꞌicën.

³⁷ ¿Nucën Papa Diosbë bamatimoi tsónuxun cara unin añu ñun cupíoti ꞌic? Anun cupíoti ñu ca ꞌaíma ꞌicën.

³⁸ Ui unix cara ꞌënan ꞌicëbia axa ꞌëmi sináncëma unin ꞌusánti sinani ꞌënan ꞌitimi rabíanan ꞌën bana quicësai ꞌitimi rabinia, a uníxa ꞌënan ꞌitimi cana ꞌëxribi rabínti ꞌain, uni ꞌinux anuax uá ꞌaish cuantancëx ꞌën Papa Diosbë ꞌApu ꞌitancëx aín ángelcamabë utëcëni.