Marcos 7 - Kashibo-Kakataibo Biblia

Aín nuitu upíma cupía unin ꞌatima ñu ꞌacë bana

¹ An Moisésnën cuënëo bana ꞌunáncë unicamax Jerusalénuaxa ucë, abë ca fariseo unicamax Jesúsnu ai timë́acëxa.

² Timë́xun ca Jesusan ꞌunánmicë unicama raírinën aín rara quiásabi oi ꞌiquinma, mëchucaxunmashi piia isacëxa.

³ Isquin ca sináncëxa: Nun cananuna nucën chaitiocë quiá bana a tani usabi ꞌicë ꞌixun Nucën Papa Diosan iscëx upí ꞌiti sinánquin nun mëcën upíira upiti mëchucaxunma pán piman,

⁴ anua ñu marutinuax uxun cananuna nashixunma piman. Nun chaitiocëcaman ꞌásabi oquin cananuna nun manë xampa, nun ꞌó ñutë, nun manë ñutë, a ꞌimainun nun ꞌuxtiribi chucaian. Usonan cananuna ñu raíriribi nun chaitiocëcaman ꞌásabi oquin ꞌain.

⁵ Usaquin sinánquin ca fariseo unibu ꞌimainun an Moisésnën cuënëo bana ꞌunáncë unicaman Jesús cacëxa: —¿Uisacasquin cara min ꞌunánmicë unicaman nucën chaitiocëcama quiá bana tanimin? Ca mëchucaxunmashi piia.

⁶ Cacëxun ca Jesusan ësaquin atu cacëxa: —Mitsúxmi cëmë ꞌicë mitsu ñuiquian Isaíasnën cuënëo bana ca ësai quia: Ënë unicaman ca aín cuëbitanshi ꞌë rabia, ꞌixunbi ca aín nuitu mëu ꞌë sinanima.

⁷ Nucën Papa Diosan bana isa quixun ca unínbi ñuicë banaishi unicama ñuixunia. Usa ꞌixun ca ñancábi ꞌë rabia. Isaíasnën cuënëo bana quicësabi oi camina mitsux ꞌin.

⁸ Mitsun camina Nucën Papa Diosan bana quicësabi oquin ꞌati a ënquin mitsun chaitiocëcaman sinan bana a tanquin axa quicësabi oquin ꞌain, mëchucanan ñutë chucati, acama.

⁹ Usai quiquin ca Jesusan ësaquinribi atu cacëxa: —Mitsun chaitiocëcaman ñuia banaishi cuati cupí camina Nucën Papa Diosan bana ënquin a sinaniman.

¹⁰ Moisés ca quiacëxa: “Min papa, min titan cacëxun ca aín bana cuat” quianan ca “an aín papa aín tita ꞌatimaquin ñuicë uni, a camina asérabi bamamiti ꞌain”.

¹¹ Usa ꞌaínbi camina mitsux ësa quin: Unin ca aín papa, aín tita cati ꞌicën, ñu mi ꞌinánti ꞌixunbi cana mi ꞌinaniman, ca Corbán ꞌicën, ca Nucën Papa Dios ꞌinánti ꞌicën, Nucën Papa Dios usai quiá ꞌaínmabi.

¹² Usai qui camina mitsux quin: Usai quicë unían aín papa, aín tita ꞌaquinima ꞌianan ñu ꞌinántima ca asábi ꞌicë quiax.

¹³ Usa ꞌixun camina mitsúxmi quicë bana ashi ꞌunánmianan mitsun chaitiocëcama ꞌiáishi ꞌunánmiquin unicama Nucën Papa Dios axa quiá bana ënun quixun sinánmin. Usaribi oquin camina ꞌitsa ñu ꞌunánmiquin unicama Nucën Papa Dios quiá bana ënun quixun sinánmin. Usaquin ca Jesusan fariseo unicama ꞌimainun an Moisésnën cuënëo bana ꞌunáncë unicama cacëxa.

¹⁴ Catancëxun ca ësaquinribi Jesusan cuënxun unicama cacëxa: —Camaxunbi ca ꞌën bana ñuimainun upí oquin cuat.

¹⁵ An ñu aín cuëbitan picë cupí ca Nucën Papa Diosan uni upíma isima. Ama. Aín nuitu ꞌatima ꞌixun ꞌatima ñu ꞌanan ꞌatimati banacë, a cupí ca Nucën Papa Diosan uni upíma isia.

¹⁶ An aín pabitan ënë bana cuacë unin ca aín nuitunënbi sinánquin cuati ꞌicën.

¹⁷ Ësaquin catancëxun unicama ëbiani cuanxa aín ꞌicënu atsíncë ca aín ꞌunánmicë unicaman Jesús ñucáquin cacëxa: —Unían picë ñu ñui quicë bana ax cara uisai quicë ꞌicë ca nu ñuixun.

^18-19 Cacëxun ca Jesusan cacëxa: —¿Mitsúnribi caramina ꞌën cacëxun ꞌën bana cuatiman? Piti, ax ca unin nuitunu atsinima. Picëx ca aín pucunuishi atsíntancëx amiribishi chiquitia. ¿Usa cat? Usa ꞌain ca Nucën Papa Diosan aín cuëbitan ñu picë a cupí uni upíma isima. Ësai qui ca Jesús, camabi ñu ca piti asábi ꞌicë, quiacëxa.

²⁰ Catancëxun ca Jesusan ësaquinribi cacëxa: —Aín nuitunën ꞌatimaquin sinánquian ñu ꞌacë cupíshi ca Nucën Papa Diosan uni upíma isia.

²¹ Aín nuitu mëu ca unin ꞌatima ñu ꞌati sinania, xanu cuaioti, uni itsin ñu mëcamati, uni ꞌati, aín xanuma ꞌaínbi xanubë ꞌiti,

²² uni itsin ñu cuëënti, ꞌatima nuituñu ꞌiti, uni paránti, ꞌatima ꞌicëbi tënëquinma ñu ꞌati, nutsiti cëmëquin uni ñuiti, rabíti, nuituñuma ꞌiti, acama.

²³ Aín nuitunën sinánquian a ñucama ꞌacë unicamax ca Nucën Papa Diosan iscëx upíma ꞌicën. Usaquin ca Jesusan unicama cacëxa.

Judíosma xanu Jesúsmi catamëa

²⁴ Anuax cuanx ca Jesús anua Tiro ꞌimainun Sidón ꞌicë menu bëbacëxa. Bëbatancëx ca, ꞌëx cana ënu ꞌai quixunma unin ꞌunania quixun sinani achúshi xubunu atsíancëxa. Usaquian sinaniabi ca unicaman ꞌunáncëxa.

²⁵ Usa ꞌain ca —anu ca —quixun cuabëtsini ñunshin ꞌatimañu xanu tuacën titax uax Jesús tanáin rantin puruni tsóbuacëxa.

²⁶ A xanux ca judíosma, Sirofenicia menu ꞌicë ꞌiacëxa. Usa ꞌixun ca aín tuánua isa ñunshin ꞌatima chiquínun quixun Jesús cacëxa.

²⁷ Cacëxunbi ca —judíos unicama pain ꞌaquini cana uacën —quixun sinánquin Jesusan ësaquin cacëxa: —Tuá xura pimiti bixunbi camun pimiti ca ꞌaisama ꞌicën. Tuá xuratsucun pain ca piti ꞌicën.

²⁸ Cacëxun ca a xanun cacëxa: —Usa ca. Usa ꞌaínbi ca cuënan tëmúxun tuá xuan rëupatia piti sani camunan piia.

²⁹ Cacëxun ca Jesusan cacëxa: —Upiti camina quian. Usa ꞌain ca min tuánuax ñunshin ꞌatima chiquíaxa, camina cuanti ꞌain.

³⁰ Cacëx cuanx aín xubunu bëbaquin ca aín tuá anuaxa ñunshin ꞌatima chiquícë ꞌain, anua ꞌuxcënu, mëní sinan ꞌaish, racácë mëracëxa.

Pabë ꞌaish banañuma uni Jesusan pëxcüa

³¹ Usaquiani anua Tiro ëma ꞌicë menuax cuanx ca Jesús Sidón ëma ꞌimainun Decapolis cacë me aribi rëxcëbiani, parúmpapa Galileanu cuantëcëancëxa.

³² Cuanía bëbacëbëtan ca pabë ꞌaish banaibi upitiira banacëma uni bëxun unicaman Jesús aín mëcënan isa ramënun quixun cacëxa.

³³ Cacëxun ca Jesusan unicama ꞌuri amo nitsinaxun aín pabínu, aín mëcën rëbu atsínmianan tushuquixun cuñunan aín mëcën rëbu chabóxun, aín ana mëëacëxa.

³⁴ Usoquin mëëi manámi bësuquin isi munuma uínquin ca cacëxa: —“Efata”. Efata quicë ax ca —ca asábi ꞌit —qui quicë ꞌicën.

³⁵ Usocëxuinshi pabë ꞌixunbi bana cuanan ca upitiira banacëma ꞌaíshbi upiti banacëxa.

³⁶ Usoquin a uni pëxcutancëxun ca Jesusan anu ꞌicë unicama uinu ꞌicë unibi ñuixunxunma ꞌanun quixun cacëxa. Usaquin cacëxunbi ca ñuiacëxa. Ñuia asérabi ñuixunxunma ꞌanun Jesusan catëcëncëxunbi ca a unicaman usai ca a uni pëxcúaxa quixun ñuiaraishiacëxa.

³⁷ Ñuiquian chanioia cuati ca unicamax ratuti quiacëxa: —Camabi ñu ca an upí oquin ꞌaia, pabë unínbi ca an pëxcucëxun cuatia, banañuma uníxbi ca an pëxcucëx banaia.