Marcos 5 - Kashibo-Kakataibo Biblia

Jesusan ñunshin ꞌatimañu uni pëxcüa

¹ Parúnpapa ꞌucë manan cuantancëx ca Gadara cacë menu bëbacëxa.

² Bëbatancëxa manë nuntinuax ꞌibúquiani cuaniabi ca ñunshin ꞌatimañu uni, anu uni maíncënuax uquin, Jesús mëracëxa.

³ Anu uni maíncë, anu ca a unin ꞌuxti ꞌiacëxa. A uni ca uinu ꞌicë unínbi manë risínbi nëáma ꞌicën.

⁴ Usa ꞌicë unin aín manë risin tanianan mëtanicëxunbi anun nëacë a tëcapacëxa. Axa unin cushisama ꞌicë ca uinu ꞌicë unínbi a nëama ꞌicën.

⁵ Usai ꞌi ca nëtë́nbi, imë́bi anu uni maíncë anu ꞌianan aín bashinuribi nitsi cuëncëni banai, maxaxan axbi rachacacëxa.

⁶ Usa ꞌaish ca ꞌuránxun mërabëtsini, abácuatsianx Jesús tanáin rantin puruni tsóbuacëxa.

^7-8 Usaria ca Jesusan ñunshin ꞌatima cacëxa: —Ñunshin ꞌatima, ënë uninuax ca chiquit. Cacëxun ca munuma cuëncë́nquin Jesús cacëxa: —Dios, naínu ꞌicë, aín Bëchicë Jesús camina mix ꞌain. ¿Uisati caramina ꞌë ubíoin? Diosan cuamainun cana mi cain, ꞌë tëmëramixunma ca ꞌat.

⁹ Cacëxun ca Jesusan ñucácëxa: —¿Uisa cara min anë ꞌic? Quia ca cacëxa: —Nuxnu ꞌitsa ꞌain ca ꞌën anëx ꞌËxcuira ꞌicën.

¹⁰ Caxun ca a menua xuxunma ꞌanun quixun bënë́quin cacëxa.

¹¹ Catancëxun ca ꞌaisamaira cuchi matá manan pushían pi bucucë isquin cacëxa:

¹² —Cuchinu ca anu atsínun nu xut.

¹³ Cacëxun ca Jesusan —ca cuantan —cacëxa. Cacëx ca ñunshin ꞌatima a uninuax chiquíquianx cuchinu atsíancëxa. Atsíncëbë ca cuchicama camáxbi ꞌaisamaira, rabë́ milsa ꞌaish, tsuáquiquiani abáquiani cuanx cuëtúnuax parúmpapanu rëucubuti bacamiqui cëñúacëxa.

¹⁴ Usacëbëtan ca an cuchi bërúancë unicaman abáquiani cuanxun, ëma chanu ꞌicë unicama ꞌimainun ëma chucúmanu ꞌicëcamaribi, xubu itsi, xubu itsinu cuanquin ñuixuancëxa. Ñuixunquian chanioia cuati ca uisai cara a ñucama ꞌiaxa quixun isi riquiancëxa.

¹⁵ Riquianx anua Jesús ꞌicë anu bëbaquin ca a uni anua ꞌaisamaira ñunshin ꞌatima ꞌiá, a an isásama ꞌaish, chupa pañuax sinan mëníñushi ꞌaish tsócë isacëxa. Usa ꞌicë a uni isi ca racuë́cancëxa.

¹⁶ Usa ꞌain ca an iscëcaman, usai ca ꞌiaxa quixun, ñunshin ꞌatimañu unia pëxcucë ꞌimainun cuchinua ñunshin ꞌatima atsíncë, acama axa riquiancë unicama ñuixuancëxa.

¹⁷ Ñuixuncëxun ca camaxunbi bënë́quin atun nëtënuaxa cuantánun quixun Jesús cacëxa.

¹⁸ Cacë́xa manë nuntinu ꞌiruiabi ca Jesús ñunshínñu ꞌicëa pëxcucë uni, an abë cuancatsi quixun cacëxa.

¹⁹ Cacëxunbi ca Jesusan abë cuanxma ꞌinun caquin cacëxa: —Min xubunu ca cuantan. Cuantancëxun camina min aintsicama uisoxun cara Nucën ꞌIbu Diosan mi nuibaquin pëxcüaxa quixun ñuixunti ꞌain.

²⁰ Usaquian cacëx cuanxun ca Decapolis cacë me, anu ꞌicë unicama uisaquin cara Jesusan a ꞌaxa quixun ñuixuancëxa. Ñuixuncëxuan chanioia cuati ca camáxbi ratúacëxa.

Jaironën bëchicë baísquimianan xanu ꞌinsíncë Jesusan pëxcüa

²¹ Usa ꞌain ca ꞌucë manánuax Jesús manë nuntin anuaxa cuanpuncë nëcë manan utëcëancëxa. Utëcëníbi ca ꞌaisamaira uni anu aia isi, Jesús parúnpapa cuëbíbi tiquiacëxa.

²² Anu Jesús ꞌain ca anua judíos unicama timë́ti xubunu ꞌicë ꞌapu achúshi, Jairo cacë, ax uacëxa. Uquin a mërai aín bëmánon rantin puruni

²³ tsóbuquin ca Jesús cacëxa: —ꞌËn ini bëchicë ca bamaia. Usa ꞌain camina min mëcënan ramëquin pëxcuxuni ꞌëbë cuanti ꞌain.

²⁴ Cacë́xa a unibë cuaniabi ca atúxribi a nuibiani cuanquin ꞌaisamaira unin Jesús chacatisaira ocëxa.

²⁵ A unicama nëbë́tsi ca achúshi xanu ꞌinsíncë ꞌiacëxa. Usa ꞌaish ca a xanu mëcën rabë́ ꞌimainun rabë́ baritia imia ꞌaíshbi aín imi nëtë́cëma ꞌiacëxa.

²⁶ A xanux ca ꞌaisamaira rucuturucamanuax pëxcúcasi ro mëëquin paë tënëquin aín ñucama ñancábi cëñuibi pëxcúama ꞌicën.

^27-28 Usa ꞌaish ca a xanu Jesús ñuicania cuabiani —aín chupa ticaishi cana pëxcúti ꞌai —quixun sinánquin unicama nëbë́tsinën, a caxu cuanquin, Jesusan chupa ticacëxa.

²⁹ Ticaíshi ca aín imicë nëtë́acëxa. Usai nëtë́quin ca aín nami chuámarua tancëxa.

³⁰ Usai ꞌicëbë ca Jesús —ꞌën cushin ca uni pëxcúaxa —quixun aín sinanënbi ꞌunani, ꞌitsa uni nëbë́tsinuxun caxu bësuquin isi quiacëxa: —¿Uin cara ꞌën chupa ticax?

³¹ Quia ca aín ꞌunánmicë unicaman cacëxa: —¿Mia unin chacatisaira oia isibi caina, uin cara ꞌën chupa ticaxa quiax quin?

³² Cacëxun ca Jesusan uin cara isa aín chupa ticaxa iscatsi quixun, amo bariaráquin isacëxa.

³³ Iscëbë ca axa pëxcúcë xanu, ax —an ca ꞌë pëcüaxa —quixun ꞌunani racuëti bërërui, anu cuani aín bëmánon rantin puruni tsóbuquin, usai cana ꞌia quixun chiquinaquin Jesús cacëxa.

³⁴ Cacëxun ca Jesusan cacëxa: —ꞌËn cana mi pëxcuti ꞌai quixun asérabi sinani camina pëxcúan. Usai camina ꞌitëcëniman. Chuámashi ꞌaish ca cuantan.

³⁵ Usaquian Jesusan cacëbëtanbi ca aín xubunuax uquin unin anua judíos unicama timë́ti xubunu ꞌicë ꞌapu, Jairo, a cacëxa: —Min bëchicë ca ñuaxa. Ca ꞌaíma ꞌicën. Usa ꞌain ca Jesús ñancábi buánxunma ꞌat.

³⁶ Caia cuaquin ca Jesusan a ꞌapu cacëxa: —Racuë́axma ca ꞌit. ꞌËn cana mi ꞌaquinti ꞌai quixun ca sinan.

³⁷ Usaquin cabiani cuanbaiti a ꞌapun xubunu bëbaquin ca Pedro ꞌimainun Jacobo ꞌimainun Jacobonën xucën Juan, acamaishi abëa cuanun cacëxa.

³⁸ Cabiani cuanx bëbaquian cuacëxbi ca a ꞌapun xubunuax ꞌaisamaira uni shaquiabati rarumabacëxa.

³⁹ Rarumabatiabi ca xubunu atsínquin cacëxa: —¿Uisacatsi caramina masá nuituti rarumati shaquiquin? Xu xanu ca bamacëma ꞌicën, ca ꞌuxaxa.

⁴⁰ Ësaquian cacëxunbi ca ꞌusáncancëxa. ꞌUsáncancëxunbi anu ꞌicë unicama xubu ëman xutancëx ca Jesús xanun papa ꞌimainun aín tita ꞌimainun abë ucë uni, acamaishi buani, anua xu xanu ꞌicënu atsíancëxa.

⁴¹ Atsínxun mëínquin biquin ca xu xanu cacëxa: —“Talíta cumi”. Talíta cumi quicë ax ca: Xu xanu, mi cana cain, ca nirut, qui quicë ꞌicën.

⁴² Usoquian cacëxëshi ca a xu xanu mëcën rabë́ ꞌimainun rabë́ baritiañu ꞌaish nirutancëx niacëxa. Usai nitsia isi ca aín bëmánan pëqui ratúcancëxa.

⁴³ Ratutia ca Jesusan anu ꞌicë unicama cacëxa: —ꞌËn mitsu cacësabi oquin camina mitsúnmi iscë ñu ënë uibi ñuixuntima ꞌain —quixun canan ca —xu xanu ca pimit —quixun cacëxa.