Marcos 4 - Kashibo-Kakataibo Biblia

Bana itsi ñuicësoquin an ñu ꞌapácë uni ñuicë bana

¹ Amiribishi ca Jesusan parúmpapa cuëbíxun unicama ꞌunánmiacëxa. ꞌUnánmicëbëa ꞌaisamaira uni a nëbë́tsiorati timë́cëbë ca Jesús parúmpapa cuëbía bëspúcë manë nuntinu ꞌiruax tsóbuacëxa. Anua tsómainun ca unicama masinu parúmpapa cuëbí bucüacëxa.

² Bucubucë ca Jesusan ꞌitsa bana ꞌunánmiacëxa. ꞌUnánmiquin ca bana itsi ñuicësoquin ñuiquin ësaquin cacëxa:

³ —Ca cuat, ꞌën mitsu ñuixunmainun. An ñu bëru ꞌapácë uni ca aín naënu ꞌapáquin ñu bëru sacai cuanxa.

⁴ Sacacëx ca raírinëx anúan uni nicë me irunu nipacëaxa. Nipacëcë isbëtsini uxun ca ñuina pëchiñunën ꞌeaxa.

⁵ Raírinëx ca maparañu menu nipacëaxa. Nipacëax ca me cëxtúma ꞌain bënëtishi coxa.

⁶ Coóxbi ca uruquian barin xarocëx aín tapun ꞌaíma ꞌain, chushiaxa.

⁷ Raírinëx ca muxañu menu nipacëaxa. Nipacëax coi ca ꞌiruaxa. ꞌIruxunbi ca muxan abë coquin mapurucëxun tuacëma ꞌicën.

⁸ Usa ꞌaínbi ca raíri ñu bëru ax me upínu nipacëaxa. Nipacëax coi canitancëxun ca upí oquin tuaxa. Tuacëx ca raíri aín bimi ꞌitsamashi, treintaishi ꞌiaxa, raírinëxribi ca aín bimi ꞌitsa, sesenta, ꞌiaxa, raírinëxribishi ca aín bimi ꞌitsaira, cien, ꞌiaxa.

⁹ An aín pabitan ënë bana cuacë unin ca aín nuitunënbi sinánquin cuati ꞌicën.

Uisa cupí cara Jesusan bana itsi ñuicësoquin bana ñuiacëxa quicë bana

¹⁰ Usaquin cacë́xa raíri unicama cuancëbë atux bërúxun ca a rapasu ꞌicë unicamabëtan aín ꞌunánmicë unicaman Jesús cacëxa: —Uisa cupí caramina bana itsi ñuicësoquin unicama bana ñuixuni quixun camina nu cati ꞌain.

¹¹ Cacëxun ca Jesusan cacëxa: —Uni itsían ꞌunaniamabi camina mitsun Nucën Papa Diosan sinánmicëxun an ꞌunánmicë ñu ꞌunanin. Usa ꞌaínbi cana uni raíri ꞌëmi sinántisama tancë cupí bana itsi ñuicësoquin bana ñuixunin.

¹² ꞌËn ꞌaia isquinbi ca atun ꞌën cushi Nucën Papa Diosan ꞌë ꞌináncë a sinanima. Atun pabitan ꞌën ñuixuncëxun cuaquinbi ca uisai quicë cara quixun ꞌunanima. Usai ꞌi ca acamax atun ꞌucha tërë́nun Nucën Papa Diosmi sinanatima. Usaía atux ꞌinun cana bana itsi ñuicësoquin bana ñuixunin.

Uisai quicë cara an ñu ꞌapácë uni ñui quicë bana ꞌicë quixuan Jesusan ñuia

¹³ Usaquin catancëxun ca Jesusan ësaquinribi cacëxa: —¿Mitsúnribi caramina an ñu ꞌapácë uni ñui ꞌëx quicë bana, uisai quicë cara quixun cuatiman? ¿ꞌËx bërí quicë bana ënë cuaquinma caramina uisaxun bëtsi banacamaribi ꞌën ñuia cuati ꞌain?

¹⁴ An ñu bëru ꞌapácë uni asaribi ca an Nucën Papa Diosan bana unicama ñuixuncë uni ꞌicën.

¹⁵ Anúan uni nicë me iru anu nipacëcë ñu bëru asaribi ca bëtsi bëtsi uni ꞌicën. Usa ꞌixuan Nucën Papa Diosan bana cuacëbëbi bënëtishi uxun ca ñunshin ꞌatimanën ꞌapu, Satanás, an sinánxma ꞌinun a cuacë banacama a manumia.

¹⁶ Bëtsi bëtsi unix ca maparañu me bëxbá, anu nipacëcë ñu bëru asaribi ꞌicën. Nucën Papa Diosan bana cuati cuëënquin —a bana quicësabi oi cana ꞌiti ꞌai —quixun bënë́nquinshi sinania.

¹⁷ Usaquin sinánquinbi ca maparañu menu nipacëcë ñu bëru tapun ꞌitsañuma usaribi ꞌixun Nucën Papa Diosan bana ꞌitsama nëtë́inshi sinania. Sinánquinbi ca anbi masáquin sinánan Nucën Papa Diosan bana ꞌacëbë ami nishquian unin ꞌatimocëxun a bana manuquin ënia.

¹⁸ Muxañu menua nipacëcë ñu bëru usaribi ca bëtsi bëtsi uni ꞌicën. A unicaman ca Nucën Papa Diosan bana cuaquin,

¹⁹ —a bana quicësabi oi cana ꞌiti ꞌai —quixun sinania. Usaquin sinánquinbi ca atun ënë menu ꞌicë ñuishi sinánan —ꞌitsa ñuñu ꞌaish cana cuëënti ꞌai —quixun sinani ꞌitsa ñuñu ꞌiisa tanan bëtsi ñuribi cuëënia. Usa ꞌaish ca Nucën Papa Diosan bana sináncëxbi ñu bëru ꞌapácëa coiabi chucun mapurucë usaribi ꞌaish bimiñumasa ꞌia.

²⁰ ꞌImainun ca bëtsi bëtsi unix me upínua ñu bëru nipacëcësa usaribi ꞌicën. A unicamax ca Nucën Papa Diosan bana cuaquin —a bana quicësabi oi cana ꞌiti ꞌai —quixun aín nuitunën upí oquin sinánquin a bana quicësabi oi ꞌicë ꞌaish, ñu bërúxa me upínuax upiti coi canitancëx upiti bimicësaribi ꞌicën. Raírinëx ca ꞌitsamashi, treinta, bimiñu ꞌia, ꞌimainun ca raírinëxribi ꞌitsa, sesenta, bimiñu ꞌia, ꞌimainun ca raírinëxribishi ꞌitsaira, cien, bimiñu ꞌia.

Nucën Papa Diosan unix ca lamparínsa ꞌicë quicë bana

²¹ Ësaquinribi ca Jesusan cacëxa: —¿Lamparín bëxun cara unin ñu tëmú an bëpánun nanti ꞌic? ¿Cara anu ꞌuxti tëmú nanti ꞌic? Anu nanquinma ca anu lamparín nanti anu nanti ꞌicën, ¿usa cat?

²² Uni itsin isnunma ꞌacë ñucama ꞌimainun uni itsin cuanunma quicë banacama abi ca ꞌunáncë ꞌiti ꞌicën.

²³ An aín pabitan ënë bana cuacë unin ca aín nuitunënbi sinánquin cuati ꞌicën.

²⁴ Usaquin catancëxun ca ësaquinribi Jesusan cacëxa: —Mitsun cuacë banacama upí oquin cuaquin camina a bana quicësabi oquin ꞌati ꞌain. An ꞌën a ñuixuncë bana uisai quicë cara quixun upí oquin sinánquin axa quicësabi oquin ꞌacë uni a ca ꞌën bana itsiribi Nucën Papa Diosan ꞌunánmiti ꞌicën.

²⁵ An ꞌën bana cuaquin a bana quicësabi oquin ꞌacë uni a ca ꞌën bana itsiribia cuanun Nucën Papa Diosan ꞌunánmiti ꞌicën. Usa ꞌaínbi ca an ꞌën bana cuaquinbi sináncëma uni a, an isa ꞌunánxa quixuan sináncë bana a camabi Nucën Papa Diosan manumiti ꞌicën.

Jesusan ñu bëru corucë ñuia

²⁶ Ësaquinribi ca Jesusan cacëxa: —Nucën Papa Diosan axa ainan ꞌiti unicama aín uni ꞌimiti ax ca ësa ꞌicën. Unían naënu ꞌapácëx,

²⁷ ca ñu bëru an imë́ ꞌuxtancëx bësutancëxun nëtën ñu ꞌamainun coi cania. Usaria ca uisai ꞌi cara usai cania quixun ꞌunaníma.

²⁸ Menuax ca ñu ꞌapácë ꞌiruia. ꞌIrui ca aín rara ax chai cania. Canitancëxun ca tuaia. Tuai ca aín bimi ax xacáñu ꞌaish bëruñu ꞌia.

²⁹ Usa ꞌaísha shaínquibutia ca anun biti nëtën aín ꞌibun aín xacá xucapaquin aín bëru bitsia.

Mostaza bëru ñui quicë bana

³⁰ Amiribishi ñuitëcëni ca Jesús quiacëxa: —¿Nucën Papa Diosan cara ainan ꞌiti unicama uisoquin aín uni ꞌimiti ꞌic? ¿Uisa ñu itsiribi ñui caranuna a ñui quiti ꞌain?

³¹ Ësa ca. Mostaza bëru, menu ꞌapácë, ax ca chamaratsuira ꞌicën, bëtsi ñu bëru chamaratsusamaira ca ax ꞌicën,

³² ꞌaíshbi ca ꞌapácëx bëtsi ñu bëru canicësamaira ꞌia. Usa ꞌaísha cani pëñanacëtiira chacëbë ca manan nuáncë ñuina aín pëían tupë́oncënu na otancëx anu bucuia. Usaribiti ca Nucën Papa Diosan unicama ꞌitsamashi pain ꞌiaxbi ꞌitsaira ꞌitánun uatia.

Uisa cupí cara Jesusan bana itsi ñuicësoquin bana ñuixuancëxa quicë bana

³³ Usoquin ca ꞌitsa oquin Jesusan bana itsi ñuicësoquin anu ꞌicë unicaman cuaisabi oquin bana ñuixuancëxa.

³⁴ Bëtsi banánma ca usoquinshi Jesusan unicama ñuixuancëxa, ꞌixunbi ca aín ꞌunánmicë unicama abëa ꞌicë uisai quicë cara a banacama ꞌicë quixun ꞌunánmiacëxa.

Bëchun ꞌimainun suñúan Jesusan nëtë́mia

³⁵ A nëtën ca bari cuabúcëbëa baquíshcëbëtan manë nuntinu tsóxun Jesusan aín ꞌunánmicë unicama cacëxa: —ꞌUcë manan cuanun ca cuan.

³⁶ Cacëxun ca aín ꞌunánmicë unicaman Jesús manë nuntinua tsócë buáncëxa. Baca cuëbí unicama ëbianía Jesús ampan sicaracëti cuancëbë ca raírinëxribi nuntin sicaracëti cuancëxa.

³⁷ Cuancëbëbi ca suñúan ꞌicuatsíncëbë parúmpapa bëchuni tucánqui ꞌumpax aín nuntinu ꞌiruacëxa.

³⁸ Usai ꞌia oquin ca aín ꞌunánmicë unicaman Jesús manë nunti tsipúnua chupami tëcë́pimëti ꞌuxcë bësúnquin cacëxa: —¿Cananuna bamai quixun caramina sinaniman?

³⁹ Cacëx bësuquinshi ca Jesusan suñúan —ca nëtët —canan parúmpaparibi —ca bucubut —quixun cacëxa. Cacëxëshia suñúan nëtë́ishimainun ca baca bëchúnribi nëtë́acëxa.

⁴⁰ Usoxun ca Jesusan aín ꞌunánmicë unicama cacëxa: —¿Uisacatsi caramina racuëtin? ¿Nucën Papa Diosan ca asérabi nu bërúanquin ꞌaquinia quixun caramina sinaniman?

⁴¹ Cacëx ca ratuti racuëti canancëxa: —¿Uisa uni cara ënëx ꞌic? Suñúnbi, bacánbi ca aín bana cuatia.