Marcos 3 - Kashibo-Kakataibo Biblia

Jesusan anun ñu mëëtima nëtën aín mëcën bamacë uni pëxcüa

¹ Anua judíos unicama timë́ti xubunu cuantëcëni ca Jesús anu atsíancëxa. Anu atsíncëbë ca uni achúshi aín mëcën amo ꞌicë bamacë anu ꞌiacëxa.

² Usa ꞌicë ca anu ꞌicë fariseo unicaman anun ñu mëëtima nëtën caraisa uni pëxcuia quixun ami manánuxun iscatsi quixun Jesús bërúancëxa.

³ Bërúancëxunbi ca aín mëcën bamacë uni Jesusan cacëxa: —Nirucuatsini ca nëri ut.

⁴ Cacëxa ucëbëtan ca Jesusan fariseo unicama cacëxa: —¿Anun ñu mëëtima nëtën cara unin ñu upí ꞌati ꞌic? ¿Cara ñu upíma ꞌati ꞌic? ¿Anun ñu mëëtima nëtën cara unin uni itsi ꞌinsíncë ꞌaquinti ꞌic? ¿Cara bamatanun isëshiti ꞌic? Quixuan cacëxbi ca quiáma ꞌicën.

⁵ Quiáma atu ñachai nishi masá nuituquin ca Jesusan —uisa cupí cara ënë unicama axa ꞌinsíncë uni ënëmi sinanima —quixun sinánquin aín mëcën ñucë uni cacëxa: —Ca mëshpat. Cacëx mëshpatishi ca mëpëxcüacëxa.

⁶ Usocëbë chiquíquiani cuanx ca fariseo unicama axa Herodesmi sináncë unicamabëtan Jesús ñui, uisoxun ꞌati cara quiax ꞌësë́nancëxa.

Baca cuëbí unicama timëcamëꞌëo

⁷ Usacëbë ca Jesús parúmpapanu cuancëxa, cuancëbë ca aín ꞌunánmicë unicamaxribi abë cuancëxa. ꞌImainun ca ꞌaisamaira uni Galilea mecamanuaxa ucë acamax a nuibiani anu Jesús ꞌicë anu timë́acëxa.

⁸ ꞌImainun ca Jesusan ñu ꞌaia ñuiquin chanioia cuacë ꞌaish amanuax amanuax timë́cuatsini ai, Judea me, Jerusalén ëma, Idumea me, Jordán baca ꞌucë manan ꞌicë me, ꞌimainun Tiro, Sidón a ëma rabë́ ꞌurama ꞌicë mecamanuaxribi, camáxbi anu timëcamëꞌëocëxa.

⁹ Usa ꞌain ca Jesusan aín ꞌunánmicë unicama cacëxa, ꞌaisamaira uni tsitsíruquin chacati rabanan manë nunti mëníoxunun quixun.

¹⁰ An ꞌitsa uni pëxcucë cupía —ꞌën ticacëxuinshi ca ꞌëribi pëxcuti ꞌicë —quixun sinani, ꞌinsíncë unicamax anuxun a ticanux tsitsírucëbëtan ca usaquin Jesusan aín ꞌunánmicë unicama cacëxa. Cacëxun ca ꞌaxúancëxa.

¹¹ Usaria isi aín bëmánon cuani rantin puruni tsóbuti munuma banaquin ca ñunshin ꞌatimanën ꞌibuacë unicaman ñunshin ꞌatimanën quimicëxun Jesús cacëxa: —Mix camina Diosan Bëchicë ꞌain.

¹² Cacëxun ca Jesusan cacëxa: —ꞌËx cana Diosan Bëchicë ꞌai quixun asérabi uibi caxunma ca ꞌat.

Aín ꞌunánmicë uni ꞌinúan Jesusan mëcën rabë́ ꞌimainun rabë́ uni caísa

¹³ Usaquin cabiani matánu cuanxuan, anuxun ainan ꞌinun uni caísquin, achúshi achúshi cuëncëx ca abë ꞌinux Jesúsnu cuancancëxa.

¹⁴ Usaquin ca Jesusan mëcën rabë́ ꞌimainun rabë́ uni caísacëxa, abë ꞌiti ꞌimainun unia Nucën Papa Diosan bana ñuixuntanun xuti.

¹⁵ Caístancëxun ca atu anun uni ñucë pëxcüanan ñunshin ꞌatimacamaribi uninua chiquínun aín cushi ꞌináncëxa.

¹⁶ Usa ꞌain ca Jesusan mëcën achúshi ꞌimainun rabë́ uni caísacëxa. A caíscë unicama ax ca ꞌiacëxa achúshinëx Simón cacë ꞌicëbia Jesusan Pedro caquin anëcë.

¹⁷ ꞌImainun ca Zebedeonën bëchicë Jacobobë aín xucën Juan ꞌiacëxa. A uni rabë́ ca Jesusan Boanerges caquin anëacëxa. Boanerges quicë banax ca caná banacësari banacë quicë ꞌicën.

¹⁸ Raírinëx ca Andrés, Felipe, Bartolomé, Mateo, Tomás acama ꞌiacëxa. Bëtsix ca Alfeonën bëchicë, Jacobo, ꞌiacëxa. Raírinëx ca Tadeo ꞌimainun Simón, axa judíos unibun rabanan nëëti banacë, aribi ꞌiacëxa.

¹⁹ Bëtsix ca Judas Iscariote, an Jesús uni ꞌinan, a ꞌiacëxa. Usaquin abë niti unicama caísbianquin buani ca Jesús anua ꞌicë xubunu cuantëcëancëxa.

Ñunshin ꞌatimanën cushínsa Jesusan ñu ꞌaia quiáxa uni quia

²⁰ Cuanbia ꞌaisamaira uni amiribishi timë́tëcëan ca atubë banaquin Jesúsbëtan aín ꞌunánmicë unicaman piama ꞌicën.

²¹ Usai ꞌia cuabiani ca aín aintsi ꞌibu ax —sapi ca ñunshíanxa —quiquiani Jesús bitsi cuancëxa.

²² Usa ꞌain ca Jerusalénuax ucë an Moisésnën cuënëo bana ꞌunáncë unicama quiacëxa: —Ënë unibë ca ñunshin ꞌatimanën ꞌapu, Beelzebú ꞌicën. Usa ꞌixun ca Beelzebúnën ꞌamicëxun ñunshin ꞌatima uninua chiquinia.

²³ Ax ca ñunshin ꞌatimañu ꞌicë quiáxa Jerusalénuax ucë unicama quia cuaxun ca Jesusan cuënxun cacëxa: —¿Uisa ꞌaish cara Satanás axbi: Ca chiquit, quiti ꞌic?

²⁴ Ësa ca. Achúshi menuxuan an ꞌapu ꞌimicë unibunën cushicaman bëtsi bëtsi oquin sináncë ꞌain ca a menu bucucë unicama ꞌitsa ꞌaíshbi upitax bucui bëtsibë bëtsibë nuibananíma ꞌacánani cëñutia.

²⁵ Usaribiti ca unicamax aín aintsibë nuibananíma mëëanani tsuáqui nëtëtia.

²⁶ Mitsux camina quin, ñunshin ꞌatimanën ꞌapu Satanás, Beelzebúribi cacë, an ꞌamicëxun isana ñunshin ꞌatima chiquinin. Usaími mitsux ꞌë ñui quicë ꞌaínbi ca ñunshin ꞌatimanën ꞌapúan ñunshin ꞌatima raíri chiquíncëbë an ꞌamicëxuan ñu ꞌati ñunshin ꞌatima ꞌaíma ꞌiti ꞌicën. Usa ꞌain ca ñunshin ꞌatimanën abë ñunshin ꞌatima chiquinima.

²⁷ Ësa ca. Ui unínbi ca cushi uni, aín xubunu atsínxun aín ñu bicuanima. Aín ꞌibu a pain nëaxun cuni ca aín ñu bicuanti ꞌicën. Usaribi oquin cana ꞌën aín ꞌapusama cushiira ꞌixun ñunshin ꞌatima chiquinin.

²⁸ Asérabi cana mitsu cain, Nucën Papa Diosan ca unin ꞌatima ñu ꞌacë camabi tërë́nti ꞌicën, amia ꞌatimati banacëribi.

²⁹ Usa ꞌaínbi ca axa aín Bëru Ñunshin Upí ñui ꞌatimati banacë uni aín ꞌucha Nucën Papa Diosan tërënima, ax ca usabi tërë́ntimoi ꞌia.

³⁰ —Ax ca ñunshin ꞌatimañu ꞌicë —quiáxa quicë cupí ca Jesusan usaquin cacëxa.

Jesusan ca amia sináncë unicama aintsioia quicë bana

³¹ Usa ꞌain ca unia bana ñuixuncëbë uquin aín titabëtan aín xucë́antun ëmánxun Jesús isa unun quixun anu ꞌicë uni camiacëxa.

³² Camicëxun ca a nëbë́tsioratia tsócë unicaman Jesús cacëxa: —Min titabë ca min xucë́antu ëman ꞌicën. Ca mi istisa tania.

³³ Cacëxun ca Jesusan cacëxa: —¿Uicamax cara ꞌën tita ꞌimainun ꞌën xucë́antu ꞌic?

³⁴ Usai quiquin bariaráquin isquin ca a rapasu tsócëcama cacëxa: —Axa ꞌëbë tsócëcama, ënëx ca ꞌën tita ꞌimainun ꞌën xucë́antu ꞌicën.

³⁵ Uicaman cara Nucën Papa Dios cuëëncësabi oquin ꞌaia, acamax ca ꞌën xucën ꞌimainun ꞌën chirabacë ꞌimainun ꞌën tita ꞌicën.