Marcos 16 - Kashibo-Kakataibo Biblia

Jesús baísquia

¹ Anun ñu mëëtima nëtë ñantabucëbëtan ca María Magdalena ꞌimainun Salomé ꞌimainun María itsi, Jacobonën tita, acaman anúan Jesús imë́ishi ꞌaí cuanti, sanu ro maruacëxa.

² Maruonx ca pëcaracëbëa bari urucëma ꞌaínshi anua Jesús mëníoëxancënu cuantëcëancëxa.

³ Cuani ca ësai canancëxa: —¿Uin cara anun quini xëpucë mapara nu racanaxunti ꞌic?

⁴ Usai cananquiani cuanx niracëquinbi ca anun quini xëpuëxancë mapara axa anua naënxancënuma ꞌicë, racanacë isacëxa.

⁵ Usa ꞌain ca quininu atsínquinbi bëná uni achúshia tari uxua pañuax mëqueu tsócë isi ratúcancëxa.

⁶ Ratutiabi ca cacëxa: —Ratúaxma ca ꞌit. Mitsun camina i curúsocënua matásëxancë Jesús, Nazaretnu ꞌicë, a barin. Ca ënuma ꞌicën, ca baísquiaxa. Anua unin racáënxancë ca is.

⁷ Isbiani cuanxun camina Pedrocëñun aín ꞌunánmicë unicamaribi ësaquin cati ꞌain: Ax pain ca Galilea menu cuania. Mitsúnribi camina cuantancëxun anua a isti ꞌain, an mitsu cacësabi oquin. Usaquin camina aín ꞌunánmicë unicama cati ꞌain.

⁸ Usaquian ángelnën cacëxun, asérabi ca Jesús anuma ꞌicë quixun istancëx ratuti bërërui quininuax chiquiti ca abáquiani cuancëxa. Cuanquin ca racuë́quin uibi uisaquinbi cáma ꞌicën.

María Magdalenanëan Jesús isa

⁹ Domingo nëtë pëcaracëbë ca Jesús baísquitancëx María Magdalena anua mëcën achúshi ꞌimainun rabë́ ñunshin ꞌatima chiquían, ami pain chiquiracëacëxa.

¹⁰ Usai ꞌia isbiani ca masá nuitutia bëunan mëscúcë axa Jesúsbë nicë unicama a cai cuancëxa.

¹¹ Cuanxuan —Jesús cana asábi isan —quixun cacëxun cuaquinbi ca a unicaman —usama ca —quixun sináncëxa.

Ami sináncë uni rabë́mia Jesús chiquiracëa

¹² Usai ꞌitancëxa ëmanuax bain cuancëbë ca Jesús a unicama rabë́mi, bëtsi unisa ꞌaish, chiquiracëacëxa.

¹³ Usaía ami chiquiracë́cëxun isbianquian —Jesús cananuna isan —quixun atúnribi cacëxunbi ca raírinën —usama ca —quixun sináncëxa.

Jesusan aín ꞌunánmicë unicama usaquian ñu ꞌanun ca

¹⁴ Usai ꞌitancëx ca Jesús aín ꞌunánmicë unicama mëcën rabë́ ꞌimainun achúshi ami atúxa mesanu bucubuan chiquiracëacëxa. Atumi chiquiracëquin ca Jesusan atu cacëxa: —An ꞌë baísquicë iscëcaman, asérabi ꞌëx baísquicë isun cacëxunbi camina, asérabi ca baísquiaxa quixun ꞌë sinántisama tan.

¹⁵ Usaquin caxun ca atu cacëxa: —Camabi menu cuanquin camina, ꞌëmi catamëti, aín ꞌucha tërë́ncë ꞌaish ca uni Nucën Papa Diosnan ꞌiti ꞌicë quixun camabi unían ꞌunánun, bana ñuixunti ꞌain.

¹⁶ Ñuixuncëxun cuatia ꞌëmi catamëtia nashimicë ax ca Nucën Papa Diosan ainan ꞌinun ië́micë ꞌiti ꞌicën. Usa ꞌaínbi ca axa ꞌëmi catamëisama tancë uni ax aín ꞌucha cupí xënibua ꞌaínbi Nucën Papa Diosbëma ꞌiti ꞌicën.

¹⁷ Axa ꞌëmi catamëcë unicaman ca Nucën Papa Diosan cushin uni itsin ꞌacëma ñu ësoquin ꞌati ꞌicën: ꞌënan ꞌixun ca ꞌën cushin uninua ñunshin ꞌatima chiquínti ꞌicën. Chiquíanan ca bëtsi banan banati ꞌicën.

¹⁸ Usai ꞌianan aín mëcënan bicëxunbi ca runun ꞌatima ꞌicën. ꞌImainun ca muca ñua xëacëxunbi uisabi otima ꞌicën. ꞌImainun ca aín mëcënan ramëcëx uni ñucë pëxcúti ꞌicën.

Jesús naínu cuan

¹⁹ Usaquin aín ꞌunánmicë unicama catancëx ca Nucën ꞌIbu Jesus, aín mëqueu ꞌaish Nucën Papa Diosbë cushi ꞌi, naínu cuancëxa.

²⁰ Usai ꞌian camabi menu cuanquin ca aín ꞌunánmicë unicaman —Nucën ꞌIbu Jesucristomi catamëti aín ꞌucha tërë́ncë ꞌaish ca uni Nucën Papa Diosnan ꞌiti ꞌicë —quixun bana ñuixuancëxa. Usaquin bana ñuixunia ca Nucën ꞌIbu Jesucristonënbi ꞌaquinquin, atúan ñuixuncë banax ca asérabi ꞌicë quixuan unin ꞌunánun, uni itsin ꞌacëma ñu ꞌamiacëxa. Ashi.