Marcos 11 - Kashibo-Kakataibo Biblia

II. JERUSALENUXUAN JESUSAN BANA ÑUIXUANAN ÑU ꞌA (11-13) Jerusalénu cuania unicaman Jesús rabia

¹ Jerusalénu cuani Betfagé ꞌimainun Betania ëma rabë́ a ꞌurama ꞌixun ca Olivos cacë matá anuxun aín ꞌunánmicë uni rabë́ xuquin Jesusan cacëxa:

² —Aminu bësucë ëma anu ca cuantan. Cuanx anu bëbaxun camina burro, anua uni tsócëma pain, a anua tëcërëcacë mërati ꞌain. Mëraquin camina tububëtsinquin bëti ꞌain.

³ Mitsúnmi tubuia isquian bëtsi unin: ¿Uisoti caramina tubuin? —cacëxun camina cati ꞌain: Nucën ꞌIbun ca ënë a buánxunun quixun nu caxa. Bëríbi ca bëmitëcënti ꞌicën.

⁴ Usaquin caxuan xucëx cuanxun ca burro, bai amo xubu xëcuë tanáin, tëcërëcacë mëracëxa.

⁵ Mëraquian tubuia isquin ca anu ꞌicë unicaman cacëxa: —¿Añu caina ꞌain? ¿Uisati caramina burro tubuin?

⁶ Cacëxun ca usaquin canun quixuan Jesusan cacësabi oquin cacëxa. Cacëxun ca —ca buántan —cacëxa.

⁷ Cacëxun buántancëxuan chupan catátacaquin burro camápucëbë ca anu ꞌiruax tsotax Jesús Jerusalénu cuancëxa.

⁸ Usaía burron cuancëbëtan ca ꞌaisamaira unin anun Jesús cuanti bainu, anúan mapúcë chupabi ꞌapámainun bëtsi bëtsi unin naë rësúnua i pëchi chuíshcaxun anúan Jesús cuantinu ꞌapácëxa.

⁹ Usobiani ca sharáquiani unicama cuancëxa. Raírinëxa rëcuë́nmainun ca raírinëxribi Jesús caxu cuani a rabi cuëëni quicancëxa: —Ënë unix ca upíira ꞌicën. Nucën ꞌIbu Diosan xucëx ca ënëx bërí aia. A ca camabi unin rabiti ꞌicën. Nun a rabinun ca ꞌacan.

¹⁰ Nucën rara Davitan rëbúnqui, ami sinania Nucën Papa Diosan ainan nu ꞌimiti, a ca ënëx ꞌicën. Nucën Papa Dios naínu ꞌicë, aribi cuëënquin rabinun ca ꞌacan.

¹¹ Usaía unicamax sharáquiamainun cuanx ca Jesús Jerusalénu bëbacëxa. Bëbaxun ca anuxun Nucën Papa Dios rabiti xubunu atsínxun, camabi ñu istancëx bari cuabúcëbë Betania ëmanu ꞌi cuancëxa. Cuancëbë ca abë aín ꞌunánmicë unicamaxribi cuancëxa.

Jesusan higuera cacë i bimiñuma ꞌinun ca

¹² Betanianu ꞌinëti Jerusalénu cuantëcëni ca Jesús panancëxa.

¹³ Pananquiani cuani ca ꞌuraxun higuera nicë isbiani, bimiñu cara quixun isi cuancëxa. Cuanquin isquinbi ca tuáñuma ñancáishi ꞌaísha aín pëchishi ocëxa, higueranën, tuatisama pan ꞌain.

¹⁴ Usa ꞌicë isquin ca Jesusan cacëxa: —Min camina tuatëcëniman. Achúshira unínbi ca min tuá cutëcënima. Quixuan caia ca aín ꞌunánmicë unicaman cuacëxa.

Anuxun Nucën Papa Dios rabiti xubunua Jesusan an ñu marucë unicama chiquían

¹⁵ Usaquiani cuanx Jerusalénu bëbax anuxun Nucën Papa Dios rabiti xubunu atsínxun ca Jesusan anuxun an ñu marucë unicama chiquíanan an curíqui cambioquin bicë unicaman mesacama chashcaquin an numacuru marucë unicamaxa anu tsócë aribi chashcacëxa, anu tsóxma ꞌinun quixun.

¹⁶ Usonan ca uíxbia ñu buani anuxun Nucën Papa Dios rabiti xubunu atsínquianxma ꞌinun quixun atu cacëxa.

¹⁷ Usaquin ꞌaquin ca unicama ꞌunánmiquin cacëxa: —Nucën Papa Diosan bana cuënëo ca quia: “Anuxun ꞌë rabiti xubu ax ca anuaxa camabi uni ꞌëbë banati xubu ꞌiti ꞌicën”. Usaía cuënëo bana quicë ꞌaínbi camina mitsun anuxun ñu maruquin uni paránquin mëcamati xubusa ꞌinun ënuxun ñu maruin.

¹⁸ Usaía quicëbë camabi unían aín bana cuati rabanan racuëti ca judíos sacerdotenën cushicamabë an Moisésnën cuënëo bana ꞌunáncë unicamax Jesús ꞌacatsi quiax ꞌësë́nancëxa.

¹⁹ Usa ꞌain ca ñantabucëbë Jesúsbë aín ꞌunánmicë unicama Jerusalénuax cuancëxa.

Higuera chushi xanan

²⁰ ꞌUxnëti pëcaracëbë Jerusalénu cuantëcënquin ca higuera an isóncësama ꞌicë aín tapúnmiaxbia chushicë isacëxa.

²¹ Usa isquin ca Pedronën a higuera caia conxun Jesús cacëxa: —Ca is. Minmi ñu concë higuera ca xanánxa.

²² Cacëxun ca Jesusan cacëxa: —Ax cushiira ꞌixun ca Nucën Papa Diosan ax quicësabi oquin ꞌaia quixun sinani ca ami catamët.

²³ Asérabi cana mitsu cain, unían —sapi ca ꞌatima ꞌicë —quixun sinánquinma —asérabi ca Nucën Papa Diosan ꞌati ꞌicë —quixun sinánquin, ënë matá —ënuax ca parúmpapanu racati cuantan —quixun cacëx ca usai ꞌiti ꞌicën.

²⁴ Usa ꞌain cana mitsu cain, —asérabi ca Nucën Papa Diosan ꞌën cacëxun ꞌë ꞌaxunti ꞌicë —quixun sinania ca an mitsúnmi ñucácësabi oquin mitsu ꞌaxunti ꞌicën.

²⁵ Unibë ꞌaisama ꞌaish Nucën Papa Dios naínu ꞌicë abë banaquin camina axa mimi ꞌuchacë uni cupiti sinánquinma a pain manuti ꞌain, usaribi oquian Nucën Papa Diosan min ꞌucha tërë́nquin manunun.

²⁶ Usa ꞌaínbi ca mitsúxmi uni itsimi nishcë a manutisama tania Nucën Papa Dios naínu ꞌicë, an mitsun ñu ꞌatima ꞌacë a tërë́nxunquin manutima ꞌicën.

Jesusan cushi ñuicë bana

²⁷ Jerusalénu cuantëcëanx ca anuxun Nucën Papa Dios rabiti xubunu Jesús cuantëcëancëxa. Cuanx atsíntancëxa anu ꞌicë isquin ca judíos sacerdotenën cushicama, ꞌimainun an Moisésnën cuënëo bana ꞌunáncë unicama, ꞌimainun ampan caniacëcë unicama anu cuanxun

²⁸ ñucáquin Jesús cacëxa: —¿Uin banan caramina an ñu marucë unicama chiquíon? ¿Uin cara usoquinmi ñu ꞌanun mi cax?

²⁹ Cacëxun ca Jesusan cacëxa: —ꞌËnribi cana mitsu bana itsi ñucatin. Ñucácëxunmi mitsun ꞌë ñuixuncëxun cana ꞌënribi mitsu cati ꞌain, uin banan carana ësaquin ꞌai quixun.

³⁰ ¿Uin cara Juan unicama nashiminun cacëx? ¿Nucën Papa Diosan cara cacëx? ¿Unin cara usaquian ꞌanun cacëx? Ca ꞌë ñuixun.

³¹ Usaquian Jesusan cacëxbi ca uisaquin caranuna cati ꞌai quixun sinani ñucacanancëxa: —¿Uisaquin caranuna cati ꞌain? Nun nu Nucën Papa Dios naínu ꞌicë an ca cacëxa quixun cati ꞌaínbi ca usaquin nun cacëxun nu —¿usa ꞌain caramina uisa cupí aín bana cuama ꞌai? —quixun nu cati ꞌicën.

³² ¿Caranuna —unían ꞌimicëxun ca Juanën unicama nashimiacëxa —quixun cati ꞌain? Usaquin cati ꞌaínbi ca camabi unin aín bana cuaquin —Nucën Papa Diosan ca asérabi aín bana unicama ñuixunun quixun Juan xuacëxa —quixun sinania. Usaquin sinani ca a ꞌapucamax ꞌapuma unicamami racuë́acëxa.

³³ Usai canantancëxun ca Jesús cacëxa: —Uin xucë cara ꞌiacëxa quixun cananuna ꞌunaniman. Cacëxun ca Jesusan cacëxa: —Mitsúnmi ꞌën ñucácëxun ꞌë ñuixuncëxunma cana ꞌënribi uin banan carana ësaquin ñu ꞌai quixun mitsu caiman.