Marcos 1 - Kashibo-Kakataibo Biblia

I. GALILEA MENUXUAN JESUSAN BANA ÑUIXUAN (1-10) Juan, an uni nashimicë, an anu uni ꞌicëma menuxun bana ñuixuan

¹ Ënëx ca upí bana, Nucën Papa Diosan Bëchicë, Jesucristo, a ñui uisai cara axa uti ꞌiacëxa quiax quicë ꞌicën.

² An Nucën Papa Dios quicë bana unicama ñuixuncë uni, Isaías cacë, an ca Jesucristo ënë menu uti sinánquin Nucën Papa Diosan sinánmicëxun ësaquin cuënëocëxa: A caxu mi cuanun cana uni xutin. Ax pain cuanquin ca anun cuanti bai mëníoquin racanacësaribi oquin, camabi unían min bana cuanun atun nuitua upí ꞌinun sinanamiti ꞌicën.

³ Anu uni ꞌicëma menuxun munuma bana ñui ca a unix ësai quia: Nucën ꞌIbu ca aia, camina axa anun uti bai mëníoquin racanacësaribi oi aín bana cuanux sinanati ꞌain.

⁴ Isaíasnëan cuënëosabi oi ca Juan anu uni ꞌicëma menuxun, anu cuancë unicama nashimianan bana ñuixuni ësai quiacëxa: —Sinanaquin mitsun ꞌuchacama ëni Nucën Papa Diosmi sinani camina nashimicë ꞌiti ꞌain, mitsun ñu ꞌatima ꞌacëcama tërë́ncë ꞌinun.

⁵ Usa ꞌain ca Judea menu ꞌicë unicama ꞌimainun Jerusalénu ꞌicë unicamaxribi Juanën bana ñuixunia cuati cuancëxa. Cuanxuan atun ꞌuchacama chiquinatia ca Juanën Jordán cacë bana anuxun nashimiacëxa.

⁶ Juanëx ca camello rani ꞌacë chupa pañuanan ñuina xacábia ꞌacë anun tsitëcërëquicë ꞌiacëxa. Aín piti ca curuchinti ꞌimainun buna rëpa ꞌiacëxa.

⁷ Usa ꞌixun ca bana ñuixunquin Juanën unicama cacëxa: —ꞌË caxu ca ꞌësamaira uni aia. Axa upíira ꞌaish cushiira ꞌain cana ꞌëx asaribima ꞌaish ami rabini a ꞌurama ꞌitima ꞌain. Usai ꞌiquin cana a tanáin rantin purúnxun aín taxacabi tubuxuntima ꞌain.

⁸ ꞌËn cana mitsu ꞌumpaxan nashimin, ꞌaínbi ca axira uquin uni aín Bëru Ñunshin Upíñu ꞌinun ꞌimiti ꞌicën.

Juanëan Jesús nashimia

⁹ Juanëan unicama nashimianan bana ñuixunmainun ca Jesús Galilea menu ꞌicë ëma, Nazaret, anuax Judea menu cuanx anua Juan ꞌicë anu bëbacëxa. Bëbacë ca Juanën Jordán bacanuxun Jesús nashimiacëxa.

¹⁰ Usoquin Juanën nashimicëx, bacanuax ꞌiruquian Jesusan iscëxbi ca naí panárabëacëxa. Usacëbëtan ca ñumacuru tinax uaxa Nucën Papa Diosan Bëru Ñunshin Upí anu ꞌiruia isacëxa.

¹¹ Usaía ꞌicëbëtan ca Jesusan naínuaxa banaia cuacëxa, ësai qui: —Mix camina ꞌëx amiira sináncë bacë bëchicë ꞌain. Mimi sinani cana chuámarua tani cuëënin.

Ñunshin ꞌatimanën ꞌapun Jesús ñu ꞌaisama ꞌamitisa tan

¹² Usaía ꞌicë ca Nucën Papa Diosan Bëru Ñunshin Upitanbi anu uni ꞌicëma menu cuanti Jesús sinánmiacëxa.

¹³ Sinánmicëx cuanx ca cuarenta nëtën anua pianancë ñuina ꞌicë menu ꞌiacëxa. Anua cuarenta nëtë ꞌicë ca ñunshin ꞌatimanën ꞌapu Satanasnën ñu ꞌaisama ꞌamicatsi quixun caraishiacëxa. Usoiabi ca an Nucën Papa Dios ꞌaquincë aín ángelcaman anu uxun Jesús ꞌaquiancëxa.

Galilea menuxuan ꞌatabaquin Jesusan unicama bana ñuixuan

¹⁴ Juan, an uni nashimicë, a sipuacë ꞌain ca Jesusan Galilea menu cuantëcënquin —aín ꞌucha tërë́ncë ꞌaish ca uni Nucën Papa Diosnan ꞌiti ꞌicë —quixun upí bana ñuibiancëxa.

¹⁵ Ñuibiani cuani ca ësai quiacëxa: —Anun Nucën Papa Diosan ainan ꞌiti unicama aín uni ꞌimiti nëtë ca ꞌurama ꞌicën. Mitsux ami sináncë ꞌixunmabi sinanati ca anun aín uni ꞌinux ië́ti bana sinan.

Jesusan rabë́ ꞌimainun rabë́ uni abë cuanun ca

¹⁶ Parúmpapa Galilea cuëtani cuanquínbi ca Jesusan Simón ꞌimainun aín xucën, Andrés, an tsatsa bicë uni ꞌixuan tsatsa ricania mëracëxa.

¹⁷ Mëraquin ca cacëxa: —ꞌËn mi ꞌunánminun ca ꞌëbë cuani ut. An tsatsa bicë uni ꞌicëbi cana ꞌëmi catamënunmi uni sinánminun mitsu ꞌimiti ꞌain.

¹⁸ Usaquian Jesusan cacëxunshi aín rica ëbiani ca abë cuancëxa.

¹⁹ A uni rabë́ bibiani cuanquinbi ca Jesusan Zebedeonën bëchicë Jacobo ꞌimainun aín xucën Juan, nuntinuxuan rica mëníoia mëracëxa.

²⁰ Mëraquian cuënquin Jesusan abëa cuanun cacëxëshi ca nuntinubi aín papa Zebedeocëñun aín papan ñu mëëmicë uni ëbiani Jesúsbë cuancëxa.

Uni achúshi ñunshin ꞌatimañu Jesusan pëxcüa

²¹ Cuanx ca abëa nicë unicamabë Jesús Capernaúm ëmanu bëbacëxa. Bëbaxun ca anun ñu mëëtima nëtë ꞌain anua judíos unicama timë́ti xubunu atsínxun, anu ꞌicë unicama bana ꞌunánmiacëxa.

²² An xuá ꞌixun ca Jesusan Nucën Papa Diosan cushínbi bana ñuixuancëxa. An Moisésnën cuënëo bana ꞌunáncë unicaman banasamaira ca aín bana ꞌiacëxa. Usaquian Jesusan ñuia cuati ca a xubu anuxun Nucën Papa Dios rabiti, anu ꞌicë unicamax ratuti quiacëxa: —Usa bana cuacëma cananuna ꞌain.

²³ Anu ca uni achúshi ñunshin ꞌatimañu axribi ꞌiacëxa. A unin ca munuma cuëncë́nquin Jesús cacëxa:

²⁴ —Jesús, Nazaretnu ꞌicë, min caina nu uisa oti ꞌain? ¿Mix caramina nu cëñui uan? ꞌËn cana mi ꞌunan. Mix camina ainan ꞌaish Diosnuax ucë a ꞌain.

²⁵ Quia ca Jesusan cacëxa: —Ca nëtët. Ënë uninuax ca chiquit.

²⁶ Usaquian cacëxëshi ca saquiquimiquin bërërumi munuma cuëncëni ñunshin ꞌatima a uninuax chiquíacëxa.

²⁷ Usoia isi ca anu ꞌicë unicama ratúacëxa. Ratuti ca atúxbi canani quiacëxa: —¿Uisa bana cara ënëx ꞌic? Ënëx ca nun cuacëma bana ꞌicën. Ënë uni ca ñunshin ꞌatimanënbi aín bana cuatia. Uninuax —ca chiquit —quixuan cacëx ca chiquitia.

²⁸ Usoquian Jesusan ꞌacë ñucama ñuiquin ca Capernaúmnu ꞌicë unicamainshima a ꞌurama ꞌicë Galilea menua ꞌicë ëmacamanuxunribi camaxunbi chaniocëxa.

Pedronën nachia Jesusan pëxcüa

²⁹ Anua judíos unicama timë́ti xubunuax cuanx ca Jesúsbë Santiago ꞌimainun Juan a rabëtaxribi Simón ꞌimainun Andrésnën xubunu bëbai anu atsíancëxa.

³⁰ Atsinia ca Simonan nachia ꞌitsisan ꞌi ꞌinsíanx racatan anu ꞌicë unicaman Jesús —Simonan nachi ca ꞌinsíanxa —quixun cacëxa.

³¹ Cacëx anua racácë anu cuanquin ca Jesusan mëínquin biruacëxa. Birucëxëshi ca aín ꞌitsis nëtë́quin atu pimiacëxa.

ꞌItsa uni ñucë Jesusan pëxcüa

³² A nëtë́nbi ca bari cuabúcëbëa bëbáquishbucëbëtan a ëmanu ꞌicë unicaman, uni ꞌinsíncëcamacëñun uni ñunshin ꞌatimañu acama an pëxcunun Jesúsnu bëacëxa.

³³ Bëcëbë ca a ëmanu ꞌicë unicamax anua Jesús ꞌicë xubun xëcuënu timë́acëxa.

³⁴ Usaria ca Jesusan bëtsi bëtsi ꞌinsínñu unicama pëxcüacëxa, pëxcüanan ca ꞌitsa uninua ñunshin ꞌatima chiquíancëxa. Chiquíncëxuan ui cara ax ꞌicë quixun ꞌunáncëxun ca Jesusan uisaíbia a ñui banati cuëënquinma ñunshin ꞌatima banamiama ꞌicën.

Galilea menuxun Jesusan bana ñuixuan

³⁵ Usoquin ꞌoonx ca pëcaracëma ꞌaínshi niruquiani anua uni ꞌicëmanu cuanx Jesús Nucën Papa Diosbë banacëxa.

³⁶ Axa cuancë caxu ca Simón abëa ꞌicëcamabë Jesús bari cuancëxa.

³⁷ Cuanxun mëraquin ca cacëxa: —Camaxunbi ca mi baria.

³⁸ Cacëxunbi ca Jesusan atu cacëxa: —ꞌUrama ꞌicë ëmacamanuxunribi uni bana ñuixuni cuanun ca cuan. Usoquin ꞌanux cana Capernaúmnuax upunin.

³⁹ Usaquin cabiani cuanxun ca Galileanu ꞌicë ëmacamanu ꞌicë anua judíos unicama timë́ti xubucamanuxun bana ñuixuancëxa, ñuixuanan ca ñunshin ꞌatimacama uninua chiquíancëxa.

Jesusan an aín nami chëquimicë ꞌinsínñu uni pëxcüa

⁴⁰ Usa ꞌain ca an nami chëquimicë ꞌinsínñu unin cuanx a tanáin rantin puruni tsóbuquin Jesús cacëxa: —Mix cushi ꞌixun camina ꞌaisa tanquin ꞌë pëxcuti ꞌain.

⁴¹ Cacëxun ca nuibaquin, aín mëcënan ramëquin Jesusan a uni cacëxa: —Cana mi ꞌati ꞌain. Min nami ca upí ꞌitëcëni motia.

⁴² Usaquian cacëxëshi aín ñucë nëtëti moquin ca ꞌinsíncë uni an chuáma tancëxa.

⁴³ Chuáma tania ca Jesusan a uni xuquin ꞌësëquin cacëxa:

⁴⁴ —ꞌËn mi pëxcucë ñuiquin camina uinu ꞌicë unibi catima ꞌain. Caquinmabi camina cuanxun min nami pëxcúcë judíos sacerdote ismiti ꞌain. Ismianan camina Nucën Papa Dios rabiquin Moisés quiásabi oquin a ñu ꞌinánti ꞌain, camina asérabi pëxcúa quixuan camabi unin ꞌunánun.

⁴⁵ Jesusan —ꞌën mi pëxcucë ënë ñuiquin uni caxunma ca ꞌatan —cacëx cuanquinbia aín nami pëxcúcë ñuiquin chaniocëbë ca Jesús, anu uni riquianti rabanan, uinu ꞌicë ëmanubi cuánma ꞌicën. Cuaníma anu uni ꞌicëma menu cuni ꞌicëbëbi ca camabi menuax cuanx uinu cara cuania anubi timë́cancëxa.