Malaquías 4 - Kashibo-Kakataibo Biblia

Anuan Diosan uisa kara okatsia usakin aín unikama ꞌati nëtë ñuikë bana

¹ Dios kamabi kushiñuira ax ka ësai kia: “Kamina kuakanti ꞌain: ënuax basimashi ka kininuaxa tsi ërë́rukë usa nëtë ꞌiti ꞌikën, an ka axa rabiakakë unikama ꞌimainun an ñu ꞌatima ꞌakë akama basi chushikë nëmëkë usai ꞌitánun ꞌati ꞌikën. Usa ꞌain axa uti nëtë ax ukin ka kamabi ñu këñuti ꞌikën, usakin ꞌakëx atunan añu ñubi ꞌaíma ꞌiti ꞌikën.

² ꞌAínbi ka an ꞌëx kikësabiokin ꞌakë unikama mitsunan, ꞌën ꞌakë ñu upíkama ax. Barin urukin pë́kabëtsinkësa usaribi ꞌiti ꞌikën, an ka mitsu ië́miti ꞌikën. Usakin ꞌakëx kamina kuëëni vaca bakëkama anuxun pimikë xubunuax chikiti chirinkë usairibi ꞌikanti ꞌain.

³ A nëtë usakin ꞌati ꞌën mëníokë nëtë anun kamina mitsun an ñu ꞌatima ꞌakë unikama chimapu amákësa okin chakati ꞌain.

⁴ ꞌËn uni Moisés aín bashi Horeb kakë anuxun usai ꞌiti ꞌën bana ꞌinan a kamina sinánkanti ꞌain. ¡Ax ka kamabi Israel unikaman ax kikësabiokin ꞌati ꞌiakëxa!

⁵ Mitsun kamina ꞌunánti ꞌain: ꞌËn kana an ꞌën bana ñuikë Elías ꞌëx anun uti nëtë ꞌikëmapan ꞌain xuti ꞌain, a nëtëx ka achúshi nëtë chaiira ꞌaish ami rakuë́ti ꞌiti ꞌikën.”

⁶ ꞌImainun ka aín papakama ꞌimainun aín bëchikëkamaribi upiti mëníonanti ꞌikën. Usai ꞌikëbëtama kana ukin a unikama atun me ꞌatima okin këñuti ꞌain. Usai ka Dios kiakëxa.