Lucas 24 - Kashibo-Kakataibo Biblia

Jesús baísquia

¹ Anun ñu mëëtima nëtë ꞌiónxa pëcaracëbëa bari urucëma ꞌaínshi ca axa Galileanuax Jesúsbë uëxancë xanucama anun sanu oti ro mëníoëxancë a buani raíri xanubë anua Jesús mëníoëxancënu cuantëcëancëxa.

² Buani cuanx anu bëbaquinbi ca mapara, anun quini xëpuëxancë, racanacë isacëxa.

³ Usa ꞌicë istancëx cuani, quininu atsínquianxun isquinbi ca Nucën ꞌIbu Jesús ꞌaímocëxa.

⁴ ꞌAímoi ratuti ca sináncasmacëxa. Usai ratúquian atun iscëxbi ca rabë́ uni, chupa chaba chabaquicë pañucë, a rapasu ꞌiacëxa.

⁵ Usa isi ca xanucamax racuëti meu tëtúbuacëxa. Tëtúbutiabi ca a unin cacëxa: —¿Uisa cupí caramina mitsun anu uni bamacë mëníotinua axa ashiti bamacëma uni barin?

⁶ Ax ca ënuma ꞌicën, ca baísquiaxa. An Galileanuxun mitsu caëxancë bana camina sinánti ꞌain.

⁷ Ësaquin ca mitsu caëxanxa: Uni ꞌinux Nucën Papa Diosnuax uá ꞌicë, ca ꞌë ꞌatima unin, uni itsían ꞌë ꞌaminun ꞌinánti ꞌicën. ꞌInáncëxun ca i curúsocënu bamanun ꞌë matásti ꞌicën. Matáscëx asérabi bamatancëx cana rabë́ ꞌimainun achúshi nëtë ꞌiónxa pëcaratëcëncëbë baísquiti ꞌai quixun.

⁸ Usaquian ángelnën cacëxun ca —asérabi ca Jesusan usaquin nu caëxanxa —quixun xanucaman sináncëxa.

⁹ Usaquin sinánbiani anuax cuanxun ca atun iscëcama ñuianan ángelnën cacëcama ñuiquin, Jesusan ꞌunánmicë unicama mëcën rabë́ ꞌimainun achúshi a ꞌimainun an aín bana cuacë uni raíricamaribi ñuixuancëxa.

¹⁰ Usaquian an Jesusan ꞌunánmicë unicama ñuixuncë xanucama ax ca ꞌiacëxa, María Magdalena ꞌimainun Juana ꞌimainun Jacobonën tita María, ꞌimainun axa atubë ꞌicë xanucamaribi.

¹¹ Usaquian acaman ñuixuncëxunbi ca —cëmëi ca quia —quixun sinánquin —usa ca —quixun sinánma ꞌicën.

¹² Usaía raíri ꞌimainun ca Pedronëxëshi abáquiani a quininu cuancëxa. Cuanx bëbai tëtúbuquin isquinbi ca anun Jesús rabúncë chupa ashi isacëxa. Isbiani ratúquiani uisai cara ꞌiaxa quixun sináncasmai ca aín ꞌicënu cuantëcëancëxa.

Emaús ëmanu bain cuanía usai ꞌiá

¹³ A nëtë́nbi ca an Jesusan bana cuacë uni rabë́ Jerusalénuax, axa mëcën rabë́ ꞌimainun achúshi kilometrosa ꞌain, Emaús cacë ëmanu bain cuancëxa.

¹⁴ Usai bain cuani ca a rabëtax usaía Jerusalénuax Jesús ꞌicë ñui cananquiancëxa.

¹⁵ Usaía cananquiancëbëbi ca Jesús a caxu cuani, atubë biránanquiani cuancëxa.

¹⁶ Cuania isquin ꞌunántisa ꞌixunbi ca —ënëx ca Jesús ꞌicë —quixun ꞌunánma ꞌicën.

¹⁷ ꞌUnáncëxunmabi ca Jesusan atu cacëxa: —¿Añu ñui caramina cananquianin? ¿Uisacatsi caramina masá nuitutin?

¹⁸ Cacëx niracëquin ca axa bain cuancë uni rabë́, achúshi, Cleofas cacë, an Jesús cacëxa: —¿Amanuax Jerusalénu ucë ꞌixunbia uisa ñucama cara anu ꞌiaxa quixun ñuicania ꞌitsa unin cuanbi caramina mínshi cuacëma ꞌain?

¹⁹ Quixuan cacëxun ca Jesusan cacëxa: —¿Añu ñui cara quicanx? Quia ca cacëxa: —Nazaretnu ꞌicë Jesús, a ñui ca quicanxa. An ca Nucën Papa Dios ꞌimainun unicamanribi iscëxun upí oquin Nucën Papa Dios quicë bana uni ñuixuanan aín cushínbi uni itsin ꞌacëma ñu ꞌaxa.

²⁰ Usa ꞌicëbi ca nun sacerdotenën cushicamabëtan nun cushi raíricamanribi a Piláto ꞌinánxa, ax isa i curúsocënu matáscëx bamanun quixun.

²¹ Nun cananuna Romanu ꞌicë unían, nux Israel unibu ꞌicë, nu ꞌimainun nun nëtëcamaribi ꞌibuacë ꞌaínbia nunainshi nun nëtë ꞌinun, an nu mëníoxunti sinan, ꞌaínbi ca bamaëxanxa.

²² Usa ꞌaínbi ca nuxnu ꞌicësaribitía ami sináncë xanu raírinën anu Jesús mëníoëxancënu pëcaracëma ꞌaínshi cuanxun isbëtsini uxun ñuixunquin nu ratupunia.

²³ Cuanxunbi ca Jesús ꞌaímopunia. ꞌAímobëtsini uxun ca nu capunia, ángel rabëtainsa iscëxun atu, Jesús ca bamacëma ꞌicë, ca baísquiaxa, caxa quixun.

²⁴ Usaquin cacëx anua Jesús mëníoëxancënu cuanxunbi ca nubëa ꞌicë uni raírinën xanúan cacësabi oquin isquinbi Jesús mëraima ꞌipunia.

²⁵ Usaquian cacëxun ca Jesusan cacëxa: —Upí oquin camina sinaniman. An Nucën Papa Dios quicë bana uni ñuixuncë unin cuënëo banax ca asérabi ꞌicë quixun camina sináncëma ꞌain.

²⁶ ¿A bana quicësabi oi cara Cristo, ax aín Papabë ꞌApu ꞌi cuancëma pan ꞌaish, paë tani tëmërati ꞌiax?

²⁷ Caxun ca Moisésnëan cuënëo bana ꞌimainun an Nucën Papa Dios quicë bana uni ñuixuncë unicamanribia cuënëo bana, uisa banacama cara a ñui quicë ꞌicë, a banaxa quicësabi oi ca ꞌiaxa quixun a uni rabë́ ñuixuancëxa.

²⁸ Atu bana ñuixunbiancëx anua cuancë Emaús ëmanu abë bëbaquinbi ca a rabëtan, Jesús sapi ca cuanshitia quixun isacëxa.

²⁹ Isquin ca cacëxa: —Bari ca xupíbutia, ca baquishia, usa ꞌain camina nun xubunu nubë ꞌi cuanti ꞌain. Cacëx ca atubë cuanx aín xubunu ꞌi Jesús atsíancëxa.

³⁰ Atsíntancëx mesanu a uni rabë́bë tsóbuxun ca pán bixun —asábi ca —Nucën Papa Dios catancëxun, tucapaquin atu ꞌináncëxa.

³¹ Usa ꞌain ca, ënëx ca Jesús ꞌicë quixun ꞌunántancëxunmabi pán tucapaxun ꞌináncëxun pain —Jesús ca ënëx ꞌicë —quixun ꞌunáncëxa. ꞌUnania ratúcëbëishi ca Jesús nëtë́acëxa.

³² Nëtë́cëbë ca canancëxa: —An nubë banaquin cuënëo banacama nu ñuixuncëxun cananuna nun nuitu cuëëni shimëniocacësa tanpunin, ¿usa cat?

³³ Usaquin sinani bënëtishi cuanx ca Jerusalénu cuantëcëancëxa. Cuanx bëbaquin ca Jesusan ꞌunánmicë uni mëcën rabë́ ꞌimainun achúshi, acamabëa Jesusan bana cuacë raíri unicamaribi timë́cë mëracëxa.

³⁴ Mëracëxun ca axa timë́cë unicaman cacëxa: —Nucën ꞌIbu Jesús ca asérabi baísquitëcëanxa. Usa ꞌicë ca Simonan ispunia.

³⁵ Usaquian cacëxun cuaquin ca Emaúsnuax ucë uni rabëtan, usai ca bainuax nubë ꞌipunia quixun canan —nua pán mëtícaquin ꞌináncëxuinshi cananuna ax ca asérabi Jesús ꞌicë quixun ꞌunánpuni —quixun cacëxa.

Aín ꞌunánmicë uni mëcën rabë́ ꞌimainun achúshi an Jesús isa

³⁶ Usaquin atu ñuixunía sënë́ncëma pain ꞌaínbi axbi chiquiracëti atu nëbë́tsi niracëquin ca Jesusan atu cacëxa: —Chuámashirua ca ꞌican.

³⁷ Usoquian atu cacëx racuëti ratúquin ca —ñunshin ca —quixun sináncëxa.

³⁸ Usai ꞌi ami racuëtia isquin ca Jesusan cacëxa: —¿Uisacatsi caramina racuëtin? ¿Uisa cupí caramina ꞌëx cana asérabi Jesús ꞌai quixun sinaniman?

³⁹ ꞌËn mëcën ꞌimainun ca ꞌën taë is. Isquin ca, ꞌëx cana Jesús ꞌai quixun ꞌunan. Uisa cara ꞌën nami ꞌimainun ꞌën xo ꞌicë quixunmi ꞌunánun ca ꞌë ramët. Ñunshinax ca xoñuma ꞌianan namiñuma ꞌicën.

⁴⁰ Usaquin caquin ca mëshpáquin aín mëcën ismianan aín taëribi ismiacëxa.

⁴¹ Usoquian ismicëxbi ca —ënëx ca Jesús ꞌicë —quiax cuëënibi sináncasmai ratúacëxa. Ratutia isquin ca Jesusan —¿mitsun a piti ñu cara ꞌaíma ꞌic? —quixun cacëxa.

⁴² Cacëxun ca tsatsa xuicë paná ꞌimainun buna rëpa tëxëra ꞌináncëxa.

⁴³ ꞌInáncëxun biquin ca atun ismainunbi Jesusan piacëxa.

⁴⁴ Pitancëx sënë́nxun ca Jesusan atu cacëxa: —ꞌËx bamacëma pain ꞌixun ꞌën mitsu cacësabi oi ca ꞌiaxa. ꞌË ñuiquin cuënëo banacama Moisésnën ꞌa, ꞌimainun an Nucën Papa Dios quicë bana uni ñuixuncë unicaman cuënëo banacama, ꞌimainun Salmosribi, acamaxa ꞌë ñui quicë bana axa quicësabi oi ca ꞌiti ꞌicë quixun ꞌën mitsu cacësabi oi cana ꞌian.

⁴⁵ Usaquin caxun ca a ñuiquian cuënëo banacama upí oquian cuanun ñuixunquin anu timë́cë unicama ꞌunánmiacëxa.

⁴⁶ ꞌUnánmiquin ca ësaquin cacëxa: —Ësai ca a bana quia, Cristo ca bamatancëx rabë́ ꞌiónxa pëcaratëcëncëbë baísquiti ꞌicën.

⁴⁷ Usa ꞌain ca aín unicaman Jerusalénuxun pain aín bana ñuitancëxun camabi menu cuanquin ësoquin caquin unicama ñuixunti ꞌicën, Nucën Papa Diosan atun ꞌatima ñu ꞌacëcama tërë́ncë ꞌinuxun ca sinanaquin bëtsi oquin sinánti ꞌicë quixun. Ësaía a ñui cuënëo bana quicë a ñuixuntancëxun ca Jesusan atu cacëxa:

⁴⁸ Mitsun camina ꞌëx ꞌia iscë ꞌixun, uisai carana ꞌë ñuiquin cuënëo banacama quicësabi oi ꞌia quixun unicama ñuixunti ꞌain.

⁴⁹ Axa uti ñuiquian ꞌën Papa Diosan ꞌë cacë, a cana mitsunu unun xuti ꞌain. Usa ꞌain camina Nucën Papa Diosan aín cushi mitsu ꞌinánun Jerusalénu bërúxun caínti ꞌain.

Jesús naínu cuan

⁵⁰ Usa ꞌain ca Jesusan Jerusalénuax cuanquin Betania ëma ꞌurama, aín unicama buáncëxa. Buántancëxun aín mëcën rabë́ manámi oquin ca Nucën Papa Dios atu ñucáxuancëxa.

⁵¹ Usaquin ñucáxuntancëxun acama ëbiani ca anua Nucën Papa Dios ꞌicë anu cuancëxa.

⁵² Cuania rabitancëx ca chuámashi tani cuëënquiani Jerusalénu cuantëcëancëxa.

⁵³ Cuantancëxun ca nëtë camabi anuxun Nucën Papa Dios rabiti xubunu cuanxun cuanxun, a rabiacëxa. Ashi.