Lucas 2 - Kashibo-Kakataibo Biblia

Jesús bacë́an

¹ Ënë menua Jesús uti ca ësai ꞌiacëxa: Romanu ꞌicë ꞌapu, César Augusto, aín bana ca cuacocancëxa, camabi unix ca aín anë quiricanu ꞌai cuanti ꞌicë quixun.

² Cirenio cacë uni axa Siria nëtënu ꞌicë unicaman ꞌapu ꞌain ca a quirica ꞌatabaquin ꞌacancëxa.

³ Usa ꞌain ca camabi unix uinu ꞌicë ëmanuax cara bacë́ancëxa, anuxun aín anë quiricanu ꞌai riquiancëxa.

⁴ Usa ꞌain ca José Galilea menu ꞌicë ëma Nazaret cacë, anuax Belén cacë ëmanu cuancëxa. Belén ax ca Judea menu ꞌicë ëma, anuaxa David bacë́an, a ꞌiacëxa. José, ax David aín rëbúnqui ꞌaish, ca aín anë ꞌai Belénu cuancëxa.

⁵ Cuanquin ca an binuxun ꞌunántiocë xanu, María, tuñu ꞌicë, anribia aín anë ꞌanun buáncëxa.

⁶ Buáncëx cuanx Belénu bëbatancëx ca María aín bacë́nti nëtë sënë́ancëxa.

⁷ Sënë́ncëbë ca anu ꞌiti xubu anu ꞌaínbia ꞌaisamaira ꞌixun unin tsitsiruan anuxun ñuina pimiti ꞌitinuax María bacë́ancëxa. Bacë́nxun ca chupan rabúnxun anuxun ñuina pimiti bunánti anu aín tuá racáncëxa.

Angelcaman an ñuina bërúancë unicama ca

⁸ Usa ꞌain ca Belén ꞌurama ꞌicë pastonu an ñuina bërúancë unicama ꞌiacëxa. ꞌIxun ca imë́ ꞌuxti tëaquin aín ñuina bërúancëxa.

⁹ Anu ꞌixun ca Nucën ꞌIbu Diosan xucëx ángel achúshi atumi chiquiracëtia isacëxa. Iscëbëtan ca Nucën ꞌIbu Diosan pëcacën atu pëcacëxa. Usocëbë ca ratuti racuë́acëxa.

¹⁰ Usariabi ca ángelnën atu cacëxa: —Racuë́axma ca ꞌit. Micama cana upí bana ñuixunin. Ënëx ca camabi unin cuati ꞌicën. Cuati ca chuáma tani cuëënti ꞌicën.

¹¹ Ënë nëtën ca bacë́anxa anuax David bacë́an ëmanuax an camabi uni aín ꞌucha tërë́ncë ꞌaish Nucën Papa Diosnan ꞌinun ië́miti. Ax ca Nucën ꞌIbu Cristo, a ꞌicën.

¹² Ënë isquin camina ꞌën mitsu cacë bana ax ca asérabi ꞌicë quixun ꞌunánti ꞌain, cuanxun camina a Tuá chupan rabúnxuan anuxun ñuina pimitinu racáncë isti ꞌain.

¹³ Quicëbëshi ricuatsini timëti Nucën Papa Dios rabi ca ángelcamax quiacëxa:

¹⁴ —¡Naínu ꞌicë Nucën Papa Dios rabinun ca ꞌat! ¡Ënë nëtënuaxa Nucën Papa Diosbë upí ꞌicë unicamax ca chuámashirua ꞌican!

¹⁵ Usoquin atu catancë́xa ángelcamax naínu riquiancëbë ca an ñuina bërúancë unicamax canancëxa: —Taín isi Belénu cuanun ca cuan, nua Nucën ꞌIbu Diosan camicëxuan aín ángelnën nu cacë ënë isi.

¹⁶ Cananquiani bënëtishi riquianxun ca María ꞌimainun José isanan aín Tuá anuxun ñuina pimitinu racáncë isacëxa.

¹⁷ Isquin ca ángelnëan a Tuá ñuiquin cacë banacama ñuixuancëxa.

¹⁸ Usaquian an ñuina bërúancë unin ñuia cuati ca an cuacë unicama ratúacëxa.

¹⁹ Ratúquinbi ca Maríanën aín nuitu mëúishi ënë ñucama manuquinma sináncëxa.

²⁰ Usa ꞌain ca an ñuina bërúancë unicama an a iscë ñucama ꞌimainun an a cuacë ñucama sinánquin Nucën Papa Dios rabi, pastonu amiribishi riquiancëxa. Riquianquin ca —ángelnëan nu cacësabi oi ca ꞌiaxa —quixun sinánan ax ca upíira ꞌicë quixun sinánquin Nucën Papa Dios rabiacëxa.

Josébëtan Maríanën Jesús anuxun Nucën Papa Dios rabiti xubunu buan

²¹ María bacë́ncë achúshi semana ꞌimainun achúshi nëtë ꞌain ca atúan aín bëchicë ꞌacësabi oquin judíos uni raírinën Maríanën tuá judío ꞌicë ꞌunántiocëxa. ꞌUnántioquin ca María tuutisama pain ꞌaían ángelnën cacësabi oquin Jesús caquin anëacëxa.

²² Moisésnën cuënëo banaxa —bacë́ntancëxun ca camabi judío xanun usoquin aín tuá ꞌati ꞌicë —quicësabi oquin ca Maríanën anúan bacë́ncë ꞌuxë sënë́ncëbëtan aín rëcuën tuá Josébëtan Jerusalénu buáncëxa, ax ca ainan ꞌicë Nucën ꞌIbu Dios canuxun.

²³ Moisésnën cuënëo bana ca ësai quia: “Camabi rëcuën bëbu tuá ax ca Nucën ꞌIbu Diosnanshi ꞌiti ꞌicën”. Usa ꞌain ca a bana quicësabi oquin Josébëtan Maríanën Jerusalénu ꞌicë xubu, anuxun Nucën Papa Dios rabiti, anu Jesús buáncëxa.

²⁴ Moisésnën cuënëo bana ca quia, anúan aín bëbu tuá bacë́ncë ꞌuxë sënë́ncëbëtan ca xanun an ꞌaracacë numacuru rabë́ buánti ꞌicën, numacuru itsi ꞌaíma ꞌain ca an ꞌaracacë paru numacuru buánti ꞌicën. A bana quicësabi oquin ca Maríanën Jesús buánan numacuru rabë́ribi judíos sacerdote ꞌinánuxun buáncëxa.

²⁵ Jerusalénu ꞌicë uni achúshi ax ca Simeón caquin anëcë ꞌiacëxa. A unix ca upí nuituñu ꞌixun a rabianan Nucën ꞌIbu Dios quicësabi oquin ꞌacë ꞌiacëxa. Usa ꞌixun ca an Israel unibu chuámashirua ꞌimiti, axa uti caíancëxa. Usa ꞌain ca abë Nucën Papa Diosan Bëru Ñunshin Upí ꞌiacëxa.

²⁶ An ca Nucën Papa Diosan Bëru Ñunshin Upitan sinánmicëxun ësoquin sinánquin ꞌunáncëxa: Bamacëma pain ꞌixun cana ꞌën axa utia judíos unicaman caíncë, Cristo, a Nucën ꞌIbu Diosan xucë isti ꞌain.

²⁷ Usa ꞌain ca Simeón Nucën Papa Diosan Bëru Ñunshin Upitan sinánmicëx anuxun Nucën Papa Dios rabiti xubunu cuancëxa. Cuanx anu ꞌain ca Josébë María, Moisésnën cuënëo bana quicësabi oquin ꞌanuxun Jesús buanx atsíancëxa.

²⁸ Atsinia isquin a tuá ꞌicúquin biquin ca Simeonën Nucën Papa Dios rabiquin cacëxa:

²⁹ ꞌËn ꞌIbu Dios, a ñuiquinmi ꞌë cacë a cana isan. Usa ꞌain ca ꞌëx bamati asábi ꞌicën.

³⁰ An camabi uni aín ꞌuchacama tërë́nquin minan ꞌinun ië́miti a cana ꞌën bërúnbi isin.

³¹ Ax ca usai ꞌiti ꞌicë quixuan camabi unin ꞌunánun camina aín uti mëníon.

³² An ca Israel unibushima judíosma unicamaribi aín sinan upí ꞌinun ꞌimiti ꞌicën. Minan ꞌinúnmi caísa, Israel unibu, acama achúshi ꞌaish, a cupí ca camabi unin Israel unibu rabiti ꞌicën.

³³ Simeónëxa Jesús ñui quia cuati ca Josébë María uisa ꞌaish cara usai ꞌiti ꞌicë quiax sináncasmacëxa.

³⁴ Sináncasmaiabi ca Simeónën acama Nucën Papa Dios ñucáxuntancëxun Jesusan tita, María, cacëxa: —Ënë tuá cania aín bana cuaisama tani ca ꞌitsaira Israel uni Nucën Papa Diosbë upíma ꞌiti ꞌicën. Usai ꞌicëbëbi ca ꞌitsa uníxribi aín bana cuati abë upíira ꞌiti ꞌicën. Uisai cara Nucën Papa Dios cuëënia quixuan unicaman ꞌunánun xucë ꞌaínbi ca ꞌitsa unix aín bana cuati cuëënima a ñui ꞌatimati banati ꞌicën.

³⁵ Usai ꞌia isquin ca an uisoquin cara aín nuitu mëu sinania quixun Nucën Papa Dios ꞌimainun unicamanribi ꞌunánti ꞌicën. Usaía ꞌimainun camina mixribi, María, a sinánxuni masá nuituirati ꞌain. Usaquin ca Simeonën María cacëxa.

³⁶ Anuribi ca achúshi xanu xëniira, Ana cacë, ꞌiacëxa. Ana ax ca an Nucën Papa Dios quicë bana unicama ñuixuncë xanu ꞌiacëxa. Ax ca Asernën rëbúnqui achúshi, Fanuel cacë, aín bëchicë ꞌiacëxa. Xuntacu ꞌicëa bicëx ca aín bënëbë mëcën achúshi ꞌimainun rabë́ baritia ꞌiacëxa.

³⁷ Mëcën achúshi ꞌimainun rabë́ baritia ꞌicëbë casunamëa ꞌaish ca ochenta y cuatro baritiañu ꞌiacëxa. Usa ꞌixun ca anuxun a rabiti xubunuax camabi nëtën abë banaquin Nucën Papa Dios rabiacëxa. A upí oquin sinánuxun ca bëtsi bëtsi nëtën piama ꞌicën. Nëtë́nbi imë́bi ca usaquin Nucën Papa Dios rabiacëxa.

³⁸ Josébë María a bëi atsíncëbë axribishi anuxun Nucën Papa Dios rabiti xubunu atsínquin ca Anan Jesús isacëxa. Isi cuëënquin ca —asábi ca —caquin Nucën Papa Dios rabiacëxa. Rabiquin ca anu ꞌicë uni an anun Jerusalénu ꞌicëcama ꞌimainun camabi judíos uni chuámarua ꞌinux ië́ti nëtë caíncë unicama, a Jesús ñuiquin —an nu ië́miti a ca ënëx ꞌicë —quixun cacëxa.

Nazaretnu cuantëcëan

³⁹ Usa ꞌain ca Josébëtan Maríanën Nucën ꞌIbu Diosan bana Moisésnën cuënëo ax quicësabi oquin ꞌatancëx Galilea menu cuantëcëni anu atux ꞌicë ëma, Nazaret, anu bëbatëcëancëxa.

⁴⁰ Anu cuanx ca Jesús Nazaret ëmanuax caniacëxa. Cani cushi ꞌixun ca ñu upí oquin ꞌunáncëxa. Usai ꞌia cania ca aín Papa Diosan upí oquin ꞌaquiancëxa.

Anuxun Nucën Papa Dios rabiti xubunua Jesús ꞌia

⁴¹ Usaía Jesús canimainun ca José ꞌimainun María camabi baritian, Pascua anun carnero ꞌati nëtën Jerusalénu ꞌinux cuancëxa. A nëtë ax ca aín raracama Egipto menuax ꞌatimocë ꞌaish bamaibi ië́a, a sinánquin Nucën Papa Dios rabiquin carnero ꞌati nëtë ꞌiacëxa.

⁴² Usai cuanquin ca mëcën rabë́ ꞌimainun rabë́ baritiañu ꞌicë Josébëtan Maríanën Jesús anun carnero ꞌati nëtën Jerusalénu buáncëxa.

⁴³ Anu cuanx anun carnero ꞌati nëtë inúmibiani amiribishi Nazaret ëmanu cuantëcënquin ca Maríanën Josébëtan a ñubi sinanima cuanquin Jesús Jerusalénubi ëbiancëxa.

⁴⁴ Ëbiani ca raíri unicamabë cuancësa sinani Josébë María achúshi nëtë bain cuancëxa. Cuanxun ca aín aintsi ꞌibucamanua barianan an ꞌunáncë unicamanuaribi bariquinbi ꞌaímocëxa.

⁴⁵ ꞌAímobiani ca Josébë María amiribishi Jerusalénua bari cuantëcëancëxa.

⁴⁶ Usa ꞌain ca rabë́ ꞌimainun achúshi nëtë ꞌicëbëtan anuxun Nucën Papa Dios rabiti xubunu tsóxuan, an Moisésnën cuënëo bana uni ꞌunáncë unicaman bana ñuixuncëxun cuaquin anribi atu bana ñucatia mëracëxa.

⁴⁷ Jesusan bana cuati ca a unicama ratúacëxa. Ratuti ca —uisa ꞌixun cara ënë tuacën ënë ñucama ꞌunánan nun ñucácëxunribi upí oquin ñuia —quiax sináncasmacëxa.

⁴⁸ Usaía a unicamabë banai tsócë Jesús mërai ca Josébë María ratúacëxa. Ratúquin ca aín titan cacëxa: —¿Uisa ꞌaish caramina usai ꞌian? Min ꞌunan papabëtan cana mi mëracatsi bënë́quin barin.

⁴⁹ Cacëxunbi ca Jesusan cacëxa: —¿Uisa cupí caina ꞌë barian? ¿ꞌËn Papa quicësabi oquin ꞌën ñu ꞌati caramina ꞌunaniman?

⁵⁰ Cacëxun cuaquinbi ca Josébëtan Maríanën uisoquin caquin cara usoquin caia quixun ꞌunánma ꞌicën.

⁵¹ Usa ꞌain ca José ꞌimainun Maríabë Jesús Nazaretnu cuantëcëancëxa. Cuanx anuax caniquin ca aín ꞌunan papa ꞌimainun aín tita quicësabi oquin ñu ꞌacëxa. Usaía canimainun ca Maríanën Jerusalénuaxa Jesús ꞌicëcama a manuquinma sináncëxa.

⁵² Sinánmainun ca Jesús caniacëxa. Cani aín nami cushi ꞌianan ca ñu upí oquin ꞌunáncëxa. Usa ꞌicë ca —ax ca upí tuá ꞌicë —quixun camabi unin cuëënquin nuibacëxa. Nuibamainun ca Nucën Papa Diosanribi a isi cuëënquin nuibacëxa.