Lucas 1 - Kashibo-Kakataibo Biblia

I. JESUS XURATSU PAIN ꞌAISH ꞌIA BANA (1-2)

^1-2 Teófilo ꞌën cana mi cain, an Jesús isanan aín bana ñuixuncë unicaman ca atun iscësabi oquin Jesusan ñu ꞌacëcama ꞌimainun an unicama ꞌunánmicë ñucamaribi ñuiaxa. A unicaman ñuia cuaxun ca ꞌitsa unin upí oquin mëníoquin a banacama cuënëoxa.

^3-4 Teófilo, minribi camina a ñucama mi ñuixuncancëxun cuan. Minmi asérabi cara a bana ꞌicë quixun ꞌunánun cana ꞌënribi upí oquin an a ñucama ꞌunáncë unicama ñucáquin, uisaira cara ꞌiaxa quixun cuatancëxun, cuënëoxunquin mi ñuixunin.

Angelnëan an uni nashimiti uni, Juan, axa bacë́nti ñuia

⁵ Herodes Judea cacë menu ꞌapu ꞌain ca Zacarías cacë uni judíos sacerdote achúshi ꞌiacëxa. An mëníosabi oquin ca anuxun a rabiti xubunuxun, Abíasnën unicamabëtan Zacaríasnën Nucën Papa Dios rabiquin ñu ꞌaxuancëxa. Zacaríasnën xanu ax ca Aaronën rëbúnqui, Elisabet cacë, ꞌiacëxa.

⁶ Zacarías ꞌimainun Elisabet a rabëtax ca Nucën Papa Diosan iscëx aín nuitu upí ꞌiacëxa. Upí ꞌixun ca Nucën ꞌIbu Diosan banacama cuaquin an cacësabi oquin upí oquin ꞌacëxa. Usa ꞌain ca uinu ꞌicë uníxbi a ꞌatimaquin ñui ami manánma ꞌicën.

⁷ Usa ꞌain ca Elisabet tuáñuma xanu ꞌianan a rabëtaxbi xëniira ꞌiacëxa.

⁸ Usabi oquin ꞌacë ꞌixun ca achúshi nëtën Abíasnën unicaman anuxun Nucën Papa Dios rabiti xubu anuxun atun ꞌati ñu ꞌaquin,

⁹ uin cara anu Nucën Papa Diosan caíscë uníxëshi atsínti anu atsínquin tsëpasa ñu xaroti ꞌicë quixun ꞌunánuxun Nucën Papa Dios ñucátancëxun tancëxa, judíos sacerdotecaman ꞌacësabi oquin. Tancëxbi ca Zacarías ꞌiacëxa.

¹⁰ Usa ꞌain ca Zacaríasnën tsëpasa ñu xaromainun judíos unicaman ëmánxun Nucën Papa Dios abë banaquin rabiacëxa.

¹¹ Tsëpasa ñu xaroquinbi ca Zacaríasnën anuxun tsëpasa ñu xaroti a mëqueucüa an Nucën Papa Dios ꞌaquincë aín ángelcama achúshi ami chiquiracëtia mëracëxa.

¹² Mërai sináncasmai ca ratuti racuë́iracëxa.

¹³ Usai ami racuëtiabi ca ángelnën cacëxa: —Racuë́axma ca ꞌit, Zacarías. Nucën Papa Diosan ca minmi a cacë banacama cuaxa. Usa ꞌain ca min xanu Elisabet an tuáñu ꞌiti ꞌicën. A tuá camina Juan caquin anëti ꞌain.

¹⁴ A tuá aín tita bacë́ncëx canicëbë camina ꞌitsaira cuëënti ꞌain. Usaribiti ca ꞌitsaira unix cuëënti ꞌicën, a uni cupí.

¹⁵ Ax ca Nucën Papa Diosan iscëx uni itsisama ꞌiti ꞌicën. ꞌIanan ca an vino ꞌimainun ñu cachacë xëatima ꞌicën. Aín titaxa bacë́ncëma pain ꞌaíshbi ca Nucën Papa Diosan Bëru Ñunshin Upíñu ꞌiti ꞌicën, usabi ꞌinux.

¹⁶ Juan an ca amia manúcë ꞌicëbi Israel unicama upí oquin atun ꞌIbu Diosmi sinántëcënquian a rabinun ꞌunánmiti ꞌicën.

¹⁷ Juan ax ca Nucën ꞌIbu Jesúsa unun ax pain rëcuë́ncuatsini uti ꞌicën. Ax ca Elías ꞌiásaribiti Nucën Papa Diosan cushiñu ꞌixun unicaman upí oquin sináncësaribi oquin aín bëchicë sinánun sinánmiti ꞌicën. Sinánmianan ca an aín bana cuaisama tancë unicama sinanamiquin, Nucën Papa Diosmi sinánun ꞌimiti ꞌicën. Usoquian ꞌimicëxun ca axa Nucën ꞌIbu Diosan xucëx ucëbëtan, Israel unibunën upí oquin aín bana cuati ꞌicën.

¹⁸ Angelnën cacëxun ca Zacaríasnën cacëxa: —ꞌËx cana xëniira ꞌain, ꞌën xanuribi ca xëniira ꞌicën. ¿Usa ꞌain carana uisaxun ꞌunánti ꞌain, min ꞌë cacësabi oi ca asérabi ꞌiti ꞌicë quixun?

¹⁹ Cacëxun ca ángelnën cacëxa: —ꞌËx cana abë ꞌixuan an cacësabi oquin Nucën Papa Dios ñu ꞌaxuncë ángel, Gabriel, a ꞌain. Usa ꞌicë ca an upí bana ënë ñuiquin mi canun quixun ꞌë xuaxa.

²⁰ ꞌËn mi cacëxunbimi usai ca ꞌiti ꞌicë quixun sináncëma cupí camina banañuma ꞌinuxun ꞌain. Usa ꞌain camina a ñucama sënë́ncëbëishi banatëcënti ꞌain. Min sináncëbëmabi ca ꞌën mi cacë ñu asérabi ꞌiti ꞌicën, anun usai ꞌiti nëtëa sënë́ncëbë.

²¹ Angelbë Zacarías banamainun ca an ëmánxun chiquitia caíncë unicaman, uisacatsi cara panatia quixun sináncëxa.

²² Usaquin sinánquian caíncëx chiquíquin ca Zacaríasnën banacasmaquin aín mëcënanshi sanánquin tanxuancëxa. Usaía ꞌicëbëtan ca unicaman —Nucën Papa Diosan ismicëxun ca anuxun a rabiti xubunuxun ñu isaxa —quixun sináncëxa.

²³ A nëtëcama anun anuxun Nucën Papa Dios rabiti xubunuxun ñu ꞌati sënë́ncëbë ca Zacarías aín xubunu cuantëcëancëxa.

²⁴ Usa ꞌain ca Zacarías cuantëcëan aín xanu Elisabet tuuacëxa. Tuui ca chiquitima mëcën achúshi ꞌuxë aín xubu mëúishi ꞌiacëxa. Usai ꞌiquin ca sináncëxa:

²⁵ Nucën ꞌIbu Diosan ca ꞌë sinánxunquin unicaman ꞌë ꞌatimaquin ñuitëcënxunma ꞌanun ꞌëx tuáñu ꞌinun mëníoxa quixun.

An Jesús tuuati ñuiquian ángelnën María ca

²⁶ Elisabet mëcën achúshi ꞌimainun achúshi ꞌuxë sënëni natubëncëbëtan ca Nucën Papa Diosan aín ángel, Gabriel, a Galilea menu ꞌicë ëma, Nazaret, anu cuanxuan

²⁷ unibë ꞌicëma pan xanu, María cacë, a istánun xuacëxa. A xanux ca Davitan rëbúnqui, José cacë uni, an binuxun cacë ꞌiacëxa.

²⁸ Usa ꞌain ca xucëx cuanx anua ꞌicënu atsínquin María cacëxa: —Chuámashi ca ꞌit. Mi ca Nucën ꞌIbu Diosan upí oquin sinánxunia, xanu raíri ꞌacësamaira oquin. Ax ca mibë ꞌicën.

²⁹ Usaquin cacëxun cuaquinshi isquin ca Maríanën ratúquin sináncëxa —¿uisoti cara ꞌë usaquin cain? —quixun.

³⁰ Usaquin sinaniabi ca ángelnën cacëxa: —Racuë́axma ca ꞌit, María. Mi ca Nucën Papa Diosan upí oquin sinánxunia.

³¹ Mix camina tuunuxun ꞌain. Tuutancëx camina bëbu tuá bacë́nti ꞌain. A camina Jesús caquin anëti ꞌain.

³² Ax ca uni itsisama ꞌiti ꞌicën. A ñui ca —Nucën Papa Dios manámi ꞌicë aín Bëchicë ca ax ꞌicë —quiax uni quiti ꞌicën. Nucën Papa Diosan ꞌimicëx ca aín rara David ꞌiásaribiti ax ꞌapu ꞌiti ꞌicën.

³³ ꞌApu ꞌaish ca Israelnën rëbúnquinën ꞌapu nëtë́timoi ꞌiti ꞌicën. Ax ca cëñútimoi ꞌapu ꞌinuxun ꞌaia.

³⁴ Cacëxun ca Maríanën ángel cacëxa: —ꞌËx cana unibë ꞌicëma pan ꞌain. ¿Usa ꞌaish carana uisax usai ꞌiti ꞌain?

³⁵ Cacëxun ca ángelnën cacëxa: —Nucën Papa Diosan Bëru Ñunshin Upí ca minu uti ꞌicën. Manámi ꞌicë Nucën Papa Diosan sinanën camina tuñu ꞌiti ꞌain. Usaquian sinánxuncëxunmi tuacëx ca ax Nucën Papa Diosan iscëx upíira ꞌiti ꞌicën, —ax ca Nucën Papa Diosan Bëchicë ꞌicë —quiax ca unicamax a ñui quiti ꞌicën.

³⁶ Min xucën, Elisabet, anribi ca caniacëquinbi bëbu oquin tuaia. Ca tuaíma quicancëbëbi ca aín tuá mëcën achúshi ꞌimainun achúshi ꞌuxë́inshi chaia.

³⁷ ꞌAíma ca Nucën Papa Diosan ꞌacasmati ñu ꞌicën.

³⁸ Cacëx ca María quiacëxa: —Ënu cana ꞌain, a Nucën ꞌIbu cuëëncë ñu ꞌaxunti. Min cacësabi oi ca ꞌiti ꞌicën. Usaquian cacëx ca ángel cuancëxa.

María Elisabet isi cuan

³⁹ ꞌItsama nëtë ꞌicëbë ca María bënëtishi Judea menu ꞌicë ëma achúshi, matánu ꞌicë, anu Elisabet isi cuancëxa.

⁴⁰ Cuanx bëbai Zacaríasnën xubunu atsínquin ca Maríanën Elisabet —¿ënu caina ꞌain? —quixun cacëxa.

⁴¹ Usaquin Marianën cacëxuan Elisabetnën cuacëbëshi ca aín pucunuax aín tuá ubíacëxa. Usai ꞌicëbëtan ca Nucën Papa Diosan Bëru Ñunshin Upitan upí oquin Elisabet sinánmiacëxa.

⁴² Sinánmicëx cuëënquin ca Elisabetnën munuma María cacëxa: —Nucën Papa Diosan mi sinánxuanxa, xanu raíri ꞌacësamaira oquin. Min tuáribi ca an upí oquin sinánxunia.

⁴³ Mixmi Nucën ꞌIbu ax uti nun caincë aín tita ꞌaish ꞌë isi ucëbë cana cuëënibi rabinin.

⁴⁴ ꞌËn minmi cacëxun cuacëbëshi ca ꞌën pucunu ꞌicë tuá cuëëni ubíaxa.

⁴⁵ Nucën ꞌIbu Dios quicësabi oi ca asérabi ꞌiti ꞌicën. Ca usai ꞌiti ꞌicë quixun sinani camina cuëëinra cuëënti ꞌain.

⁴⁶ Elisabetnëan usaquin cacëxun ca Maríanën cacëxa: ꞌËn cana Nucën ꞌIbu Dios cuëënquin rabin.

⁴⁷ ꞌËn ꞌIbu Dios an ainan ꞌinun ꞌë ië́micë, a sinani cana cuëëinra cuëënin.

⁴⁸ ꞌËx ñuñuma ꞌaíshbi ami sináncë ꞌicë ca Nucën ꞌIbu Diosan ꞌë sinánxuanxa. Usoquin sinánxuncë ꞌëx ꞌain ca camabi unix ꞌë ñui —a ca Nucën Papa Diosan upí oquin sinánxuanxa —quiti ꞌicën. Axa ënë nëtënu bucucë unicaman rëbúnquinëxribi ca usai ꞌë ñui quiti ꞌicën.

⁴⁹ Nucën Papa Dios ax cushiira ꞌixun ca ꞌën sináncëma ñu upíira upía ꞌë canun quixun aín ángel xuaxa. An ca aín sinan upíira ꞌaish uisa ñu ꞌatimabi ꞌati sinanima.

⁵⁰ Usabi oquin ca uicaman cara ami racuë́anan aín bana cuatia acama nuibaquin ꞌaquinia.

⁵¹ Cushiira ꞌixun ca an unin ꞌacëma ñu ꞌaxa. Axa —ꞌëx cana uni itsisamaira ꞌai —quixun sinani rabícë unicama ca an ñuuma ꞌimiaxa.

⁵² ꞌImianan ca ꞌapucamaribi ꞌapuma ꞌinun meu onan axa meu ꞌicë unicamaribi meuma ꞌinun ꞌimiaxa.

⁵³ Panancë unicama ca pimiaxa. Pimianan ca ñuñu unicama ñu ꞌinántëcënquinma ñancáishi cuantánun xuaxa.

⁵⁴ Israelnën rëbúnquicama ainan ꞌinúan caíscë acama ca nuibaquin manuquinma ꞌaquianxa.

⁵⁵ Usai ca xënibua ꞌaínbi ꞌiti ꞌicë quixun ca aín rëbúnquicama ñuiquin Nucën Papa Diosan nucën rara Abraham cacëxa.

⁵⁶ Ësai qui sënë́ntancëx rabë́ ꞌimainun achúshi ꞌuxë Elisabetbë ꞌitancëx ca María aín xubunu cuantëcëancëxa.

An uni nashimicë, Juan, bacë́an

⁵⁷ Usa ꞌain ca Elisabet aín bacë́nti nëtë sënë́ncëbë, nucë bënë tuá bacë́ancëxa.

⁵⁸ Bacë́ncë —a ca Nucën ꞌIbu Diosan nuibaquin tuáñu ꞌinun ꞌimiaxa —quixun ꞌunánbiani a ꞌurama ꞌicëcama ꞌimainun aín aintsi ꞌibucamaxribi Elisabet isi cuanx ca abë banai cuëëancëxa.

⁵⁹ Usai ꞌitancëx ca Elisabet bacë́ncë achúshi semana ꞌimainun achúshi nëtë ꞌain, judíos unibunëan ꞌacësoquin, a tuá judío ꞌicë ꞌunánti oi anu timë́acëxa. Timë́ax ca aín papan anë́nbi anëcatsi quiax quicancëxa.

⁶⁰ Quicëbëbi ca aín titax: —Usama ca. Aín anëx ca Juan cacë ꞌiti ꞌicë —quiax quiacëxa.

⁶¹ Quia ca cacancëxa: —¿Uisa cupí cara Juan caquin anëcë ꞌiti ꞌic? Uinu ꞌicë min aintsi ꞌibúxbi ca usaquin anëcë ꞌaíma ꞌicën.

⁶² Usaquin catancëxun ca aín papa uisaquin anëti cara cuëënia quixun ñucáquin mëcënan ꞌunánti oquin sanánquin cacancëxa.

⁶³ Usoquian cacancëxun ca aín papan anu cuënëoti ñua ꞌinánun quixun aín mëcënan tanquin cacëxa. Cacëxun ꞌináncëxun ca —aín anë ca Juan ꞌicën —quixun cuënëocëxa. Usaquian cuënëocë isi ca uisa cupí cara usaquin anëia quiax sináncasmacancëxa.

⁶⁴ Usaquian cuënëocëbëa sináncasmacancëbëshi ca Zacarías banatëcëancëxa. Banatëcënquin ca Nucën Papa Dios rabiacëxa.

⁶⁵ Usai ꞌicëbë ca anu ꞌicë unicama sináncasmai ratúacëxa. ꞌImainun ca Zacaríasbëa aín bëchicë usai ꞌicë banacama Judea menu ꞌicë matácamanu ꞌicë unicaman chanioia cuacëxa.

⁶⁶ Chanioia cuax ca a tuá ñuiquian ñuicë banacama atun nuitu mëúishi sinánan, Nucën Papa Diosan ca abë ꞌixun asérabi a sinánxunia quixun ꞌunani, —¿ënë tuáratsu cara canitancëx uisa uni ꞌiti ꞌic? —quiax canancëxa.

Zacarías canta

⁶⁷ Usai quimainun ca a tuacën papa, Zacarías, ax aín Bëru Ñunshin Upíñu ꞌaish, Nucën Papa Diosan sinánmicëx cuëëni quiacëxa:

⁶⁸ —Nucën ꞌIbu Dios, a Israel ꞌimainun aín rëbúnquicaman rabicë, a ca camabi unin rabiti ꞌicën. An ca aín unicama ꞌicë nu nuibaquin, an nuxnu ami sinánun nu sinánmiti a xuaxa.

⁶⁹ An ca cushiira ꞌixuan an nu ië́miti axa unun mëníoxa. Ax ca an Nucën Papa Dios rabia David, aín rëbúnqui ꞌiti ꞌicën.

⁷⁰ Nucën Papa Diosan ca bëráma an ax quicë bana uni ñuixuncë uni upícaman —usai ca ꞌiti ꞌicë —quixun canun camiacëxa, ësaquin,

⁷¹ an ca an nu nuibacëma unicaman ubíotima oquin nu ië́mianan axa numi nishcë unicaman bëtsi bëtsi otima oquin nu ië́miti ꞌicën.

⁷² Usaquin nu nuibaquin ꞌaquinquin ca Nucën Papa Diosan nucën raracama cásabi oquin nu ñu ꞌaxunti ꞌicën. A bana, nucën raracaman rëbúnquinëx ca aín unibu ꞌiti ꞌicë quiax quicë, a ca manucëma ꞌicën.

⁷³ Nucën Papa Diosan ca sinanatëcënuxunma nucën rara Abraham cá banax ca ësai quicë ꞌicën:

⁷⁴ Abrahamnën rëbúnqui nun nu racuë́quinma a rabinun ca axa numi nishcë unicaman ubíotima oquin an nu ië́miti ꞌicën.

⁷⁵ Usaquian ië́micëxun cananuna an iscë nun nuitu upí ꞌixun, ax cuëëncësabi oquin ꞌaquin, camabi nëtë nun bamati nëtë utámainun a rabiti ꞌain.

⁷⁶ Usa ꞌain cana mixmi ꞌën bëchicëratsu ꞌicë, mi cain, mi ñui ca unicamax, Nucën Papa Dios manámi ꞌicë an aín bana unicama ñuixunun xucë camina mix ꞌai quiax quiti ꞌicën. Min camina, a Nucën ꞌIbu Diosan xuti ax ucëma pan ꞌain, mix pain rëcuë́ncuatsincë ꞌixun, aín bana cuanun quixun Israel unicama sinánmiti ꞌain.

⁷⁷ Min sinánmicëxun ca ꞌunánti ꞌicën, a cupí ca atun ꞌuchacama tërë́ncë ꞌaish Nucën Papa Diosnan ꞌinun ië́micë ꞌiti ꞌicë quixun.

⁷⁸ Usoquin ꞌiminuxun ca Nucën Papa Diosan nu nuibaquin, an nu ië́miti, a aín nëtënu ꞌicëbi ënë menu nubë ꞌinun xuti ꞌicën.

⁷⁹ Xucëxun uquin ca axa aín ꞌucha cupí Nucën Papa Diosbë upíma ꞌianan —ꞌën bamati ca ꞌurama ꞌicë —quixun sinani racuëti masá nuituti bëánquibucënu ꞌicësa unicama atun ꞌuchacama tërë́nquin Nucën Papa Diosnan ꞌinun ꞌimianan nuxnu Nucën Papa Diosbë upí ꞌaish ax cuëëncësabi oi ꞌinun nu ꞌimiti ꞌicën. Usai ca Zacarías Nucën Papa Diosan Bëru Ñunshin Upitan sinánmicëx quiacëxa.

⁸⁰ Usa ꞌaish ca cani a tuá aín sinan upí ꞌiacëxa. Usa ꞌaish ca anúan Israel unicama bana ñuixunti nëtëa sënë́ntamainun anu uni ꞌicëma menu ꞌiacëxa.