Levítico 23 - Kashibo-Kakataibo Biblia

Anun a rabiti nëtë ꞌikëbëtan rabiti ñui Dios kia bana

¹ Usa ꞌain ka Nukën ꞌIbun achúshi nëtë ꞌikëbëtan Moisés kakëxa:

² Ësakin kamina Israel unikama kati ꞌain: Ënë nëtëkamax ka anun Nukën ꞌIbu rabi timë́ti nëtë ꞌiti ꞌikën, a kamina mitsun upí nëtë kakin anëti ꞌain.

³ Mapai achúshi ꞌimainun achúshi nëtë anun kamina mitsun ñu mëëti ꞌati ꞌain, ꞌaínbi kamina a ꞌiónxa pë́karakë anun uisa ñu mëëtibi ꞌatima ꞌain; ax ka anun ñu mëëtima upí nëtë ꞌiti ꞌikën. Anun kamina uinu karamina tsotin anuxunbi timë́xun min ꞌIbu rabikanti ꞌain.

⁴ A nëtëkamax ka anunmi timë́xun min ꞌIbu anë rabikanti nëtë ꞌikën, usa ꞌain kamina a nëtë ꞌikëbë upí ꞌinun timë́kanti ꞌain.

⁵ ꞌUxë isítabakë anúan mapai rabë́ ꞌitankëx rabë́ ꞌimainun rabë́ nëtë ñantabukë anun kamina Pascua nëtë inúkin ꞌë rabinux timë́kanti ꞌain.

⁶ A nëtë ꞌiónxa mapai rabë́ ꞌimainun mapai achúshi nëtë ꞌikë anun kamina anun chamiti ñu këñuma akë pán pikin fiesta min ꞌIbu Diosmi sinánkin ꞌati ꞌain. ꞌAkin kamina mapai achúshi ꞌimainun rabë́ nëtë inumikin anun chamiti ñukëñunma ꞌakë pán piti ꞌain.

⁷ A nëtë ꞌirutabakë axa upíira nëtë ꞌain kamina anun timë́kanti ꞌain. A nëtëkaman kamina uisa ñu mëëtibi ꞌai tëkantima ꞌain.

⁸ ꞌIanan kamina mapai achúshi ꞌimainun rabë́ nëtë ꞌimikin anun timë́xun pán pianan anun upiti timë́xun min ꞌIbu rabikin ñuina xaroti ꞌain. A nëtën kamina uisa ñu mëëtibi ꞌakantima ꞌain.

Anun ñu ꞌapákë tuatabakë bikin usakin fiesta ꞌati ñuikin Diosan ka bana

⁹ Nukën ꞌIbun ka Moisés amiribishi katëkëankëxa:

¹⁰ Israel unikama kamina ësokin kati ꞌain: Uínsaran kaina ꞌën mitsu ꞌinánuxun ka me anu bëbai kuani, anun kamina mitsun ꞌapákë trigo ax pain tuatabakë a nëakin bixun kamina sacerdote unikama ꞌinánti ꞌain.

¹¹ Anun tantiti nëtë ꞌiónxa pëkarakëbëtan ka sacerdote unikaman trigo bimi upíirabu ꞌë ꞌinaishiti bikë a bëxunkëx ka asábi ꞌiti ꞌikën.

¹² ꞌImainun ka a nëtë́an trigo bimi nëakë bëkë a nëtënbi, mitsun ꞌarakakë ñuinanën tuá achúshi baritiañu uisaibi ꞌikëma aribi ꞌë xaroxunti bëti ꞌikën.

¹³ Bëanan ka rabë́ ꞌimainun rabë́ okin tupunkë këñun aín chukúmashi trigo putuakë aín upí xënin chabóxun mamuakë aribi bëti ꞌikën, ax ka ñuina nanxuinshiti xarokë sanuira ro a xëkë usaribi ꞌiti ꞌikë. ꞌImainun ka achúshi litro uvas baka bikë ꞌë nanxuinshiti bikë aribi ami anpënkati nanti ꞌikën.

¹⁴ Usakin anun ꞌë nanxunti nëtë ꞌitamainun kamina mitsun pán këñun trigo tutushokë akëñun aín paxabi nankë anua bixun pitima ꞌain. Ënë banax ka uínsaranbi ënkinmami ax kikësabiokin ꞌati ꞌikën, usa ꞌikë ka aín papan tan ꞌikë aín bakë bëchikë kamanribi uinu ꞌikë menu kara tsotia anuxunbi ënë bana tankin ꞌati ꞌikën.

¹⁵ A nëtën mitsun trigo bimi nëakë aín upíirabu ꞌë nanxunti buánkë, a nëtë pë́karakë ax ka anun tantiti nëtë ꞌiti ꞌikën, anuxun kamina mapai achúshi ꞌimainun rabë́ semana sënë́nmikin tupúnti ꞌain.

¹⁶ ꞌImainun ka mapai achúshi ꞌimainun rabë́ nëtë anun tantiti nëtë ꞌiónxa pë́karakë anun cincuenta nëtë sënë́nkë ꞌiti ꞌikën. Usa ꞌain kamina a nëtë sënë́nkë anun, ꞌë nanxunti bërí bitëkënkë trigo anu nanti ꞌakë anu ꞌë naxunti ꞌain,

¹⁷ ꞌimainun kamina mitsun trigo putuakë aín upí anun chamiti ñukëñun ꞌakë pán rabë́ aribi buánti ꞌain, ax ka rabë́ ꞌimainun rabë́ kilosa harina achúshi achúshi ꞌakë ꞌiti ꞌikën, ax ka a painmi mitsun ꞌapákë trigo aín bimi ꞌë ꞌinánti bikë a ꞌiti ꞌikën.

¹⁸ A pánkama këñunbi kamina mapai achúshi ꞌimainun rabë́ carnero aín upíira uisaibi ꞌikëma achúshi baritiañu, ꞌimainun achúshi vaca bëna këñun rabë́ carnero, akamabi timëtankëxun ꞌë ꞌaxunkin xaroxunkë ax ka sanuira ro xëkësa ꞌinun ꞌë ꞌaxúnti ꞌikën, ꞌimainun kamina mitsun ñu ꞌapákë akëñun uvas baka vino ꞌakë aribi ꞌë nanxunti ꞌain.

¹⁹ ꞌAnan kamina achúshi chibu mitsun ꞌucha kupín xarokë ꞌitánun ꞌinánti ꞌain, ꞌimainun kamina rabë́ carnero achúshi baritiañu mitsun ñu ꞌatima ꞌakëkama mëníonani timë́xun Diosan istisabi oi kuëënkin pikanti nanti ꞌain.

²⁰ Nania ka sacerdotenën ñuinakama nanxunkë a këñunbi trigo aín bimi pán ꞌakë a ꞌimainun carnero rabë́ a ꞌë ꞌaxunkin xaroti ꞌikën. Ax ka ꞌënan upíira ꞌianan sacerdote kamananribi upí ꞌiti ꞌikën.

²¹ A nëtënbi kamina ꞌë rabinux timë́kanti ꞌain, ꞌimainun kamina anun uisa ñu mëëti chabi ꞌatima ꞌain. Ënë banax ka uínsaranbi ënkinma ax kikësabiokin ꞌati a ꞌikën, usa ꞌikë ka aín papan tan ꞌikë aín bakë bëchikë kamanribi uinu kara tsotia anuxunbi ënë bana tanti ꞌikën.

²² Anun mitsun ñu ꞌapákë bikë nëtë ꞌikëbëtan sënë́onkin bixun kamina bikin ënkë a kamaira baritëkënbiankin bitima ꞌain. Ax ka uni ñuñuma ꞌimainun bëtsi menu ꞌikë uni mitsubë tsókë unikaman binun ënkë ꞌikën. ꞌËx kana Dios ꞌaish mikaman Dios a ꞌain.

Anun timë́ti pakon banoti nëtë ñuikë bana

²³ Usa ꞌain ka amiribishi Nukën ꞌIbun Moisés kakëxa:

²⁴ Ësokin kamina Israel unikama kati ꞌain: Mapai achúshi ꞌimainun rabë́ ꞌuxë ꞌikë anúan achúshi nëtë ꞌirutabakë anun kamina mitsux achúshi nëtë tantiti ꞌain, ꞌimainun kamina a nëtë upiti timë́xun a sinánkin pakon banoti ꞌain.

²⁵ ꞌAnan ka ꞌë nanxunkë ñu aribi anuxunbi ꞌati ꞌakë anuxun xaroti ꞌikën, ꞌanan ka uisa ñu mëëti chabi ꞌatima ꞌikën.

A nëtë́an Diosan Israel unikaman ꞌucha mënio ñuikë bana

²⁶ Usa ꞌain ka Nukën Ibun amiribishi Moisés kakëxa:

²⁷ Mapai achúshi ꞌimainun rabë́ ꞌuxë ꞌirutankëxa mapai rabë́ nëtë ꞌirukë anun ka mitsun ñu ꞌatima ꞌakëkama tërënti nëtë ꞌiti ꞌikën. A nëtë ꞌikëbëtan kamina añu ñubi piima upiti samáti timë́xun ꞌë nanxunkë ñukama anuxunbi ꞌati ꞌakë anuxun xaroti ꞌain.

²⁸ ꞌAnan ka a nëtën uisa ñu mëëtibi ꞌatima ꞌikën, ax ka anun ñu ꞌatima ꞌakëkama mëníoti nëtë ꞌiti ꞌikën, a nëtën kana ꞌën mitsun ꞌuchakama tërënti ꞌain.

²⁹ Uix kara a nëtën pikë mëëti samátisama tania akamina, uisa uni kara ꞌiti ꞌikë abi mitsun ëmanua chikínti ꞌain.

³⁰ ꞌImainun kana uin kara a nëtën ain ñu mëëti ꞌaia a uni, uisa uni kara ꞌiti ꞌikë usa ꞌikëbi, a ëmanua chikínti ꞌain.

³¹ Anun kamina uisa ñu mëëtibi ꞌatima ꞌain. A banax ka uínsaranbi ënkinma ax kikësabiokin ꞌati ꞌikën, usa ꞌikë ka ain papan tan ꞌikë ain bakë bëchikë kamanribi uinu ꞌikë menu kara tsotia anuxunbi tanti ꞌikën.

³² Ax ka achúshi nëtë anun mitsux tantianan pima samáti nëtë ꞌiti ꞌikën, usa ꞌain ka mapai achúshi ꞌimainun rabë́ këñun rabë́ nëtë ꞌikë a xupibukëbëtan onxun a pë́karakë a xupibutëkënkëbëtan anun sënë́onti ꞌikën.

Anun timë́ax ꞌutanu ꞌiti ñuikë bana

³³ Amiribishi ka Nukën ꞌIbun Moisés katëkëankëxa:

³⁴ Ësokin kamina Israel unikama kati ꞌain: Mapai achúshi ꞌimainun rabë́ ꞌuxë ꞌitankëxa anun mapai rabë́ ꞌimainun mapai achúshi nëtë ꞌikëbëtan ka anun ꞌuta ꞌatankëxun anu timë́xun mapai achúshi ꞌimainun rabë́ nëtë ꞌimikin ꞌë rabikanti ꞌain,

³⁵ a nëtë ꞌirutabakë anun kamina upiti timëkamë ꞌëoti ꞌain. A nëtën kamina uisa ñu mëëtibi ꞌakantima ꞌain.

³⁶ A nëtë kaman ka mapai achúshi ꞌimainun rabë́ nëtë timë́xun ꞌë nanxunkë ñukama xaroti ꞌikën, ꞌimainun ka a pëkarakëbë upiti timëanan ꞌë nanxunkë ñukama a xaroti ꞌikën. Ax ka achúshi nëtë anun timëanan uisa ñu mëëti chabi atima nëtë ꞌikën.

³⁷ Ënëx ka a nëtëkama ꞌikëbëmi anun ꞌë rabi timë́kanti nëtë ꞌikën, usa ꞌikë kamina mitsun a nëtëkama anun upiti timë́ti nëtë kakin anëti ꞌain, anun kamina ꞌë nanxunkë ñukama xaroxuanan ꞌaímai këñutia chimapushi ꞌitánun raíriribi xaronan, mitsun ñu ꞌapákë aín bimi upíbu bikë aribi xaroti ꞌain, ꞌanan ka uvas baka vino, ꞌakë aribi anun ꞌati nëtë ꞌikëbë ꞌikëbëtan ꞌati ꞌikën,

³⁸ ꞌanan ka ñu mëëtima nëtë anun ꞌatankëxun bëtsi nëtën ꞌë ꞌinaishiti nankë ꞌimainun ꞌë nanxunti sinánxun nankë aribi uix kara kuëënia an nanti ꞌikën.

³⁹ Mapai achúshi ꞌimainun rabë́ ꞌuxë ꞌikë anua mapai rabë́ ꞌimainun mapai achúshi nëtë, anun mitsun ñu ꞌapákë bikin sënë́onkë ꞌain kamina, achúshi fiesta ꞌakin ꞌë rabi mapai achúshi ꞌimainun rabë́ nëtë ꞌimi timë́kanti ꞌain, a pëkarakëbë ka anun tantiti nëtëribi ꞌiti ꞌikën.

⁴⁰ Nëtë ꞌirutabakë anun kamina mitsun ñu ꞌapákë aín bimi upíirabu tsasikin bianan, xëbin pëchi ꞌimainun i pëi ꞌaisamaira këñun áloma kakë i, baka kuëbí kookë aín pëi akama bitankëxun mitsun ꞌuta anu mi ꞌiti ꞌati ꞌain, ꞌatankëx kamina anuax mapai achúshi ꞌimainun rabë́ nëtë ꞌimi ꞌë rabi kuëënkanti ꞌain.

⁴¹ Kamabi baritia anúan mapai achúshi ꞌimainun rabë́ ꞌuxë ꞌirukë, anun kamina mapai achúshi ꞌimainun rabë́ nëtë inúkin ꞌë rabikin achúshi fiesta ꞌai timë́kanti ꞌain. Ax ka usaibi ꞌikanti achúshi bana ꞌikën, usa ꞌikë ka aín papan tan ꞌikë ain bëchikë kamanribi tanti ꞌikën.

⁴² Anúan mapai achúshi ꞌimainun rabë́ nëtë ꞌikë anun ka kamabi israel unikaman, bakë bëchikëkama anuabi bakë́an atux, ꞌuta ꞌatankëx anu ꞌiti ꞌikën,

⁴³ usai ꞌiá ꞌikë ka kamabi mitsun rëbúnkikaman ꞌunánti ꞌikën, Egipto menua ꞌën chikínbëtsinkin bëkëx ka Israel unikamax ꞌuta ꞌatankëx anu ꞌiakëxa kixun. ꞌËx kana mitsun ꞌIbu Dios ꞌain.

⁴⁴ Ësokin ka Moisésnën ënë banakama ñuikin Israel unikama a nëtë ꞌikëbëtan Nukën ꞌIbu rabiti nëtë ñuixunkin kakëxa.