Levítico 19 - Kashibo-Kakataibo Biblia

Diosan a tanti bana kikësoi ꞌianan ꞌuchaima ꞌinun ka bana

¹ Usa ꞌain ka Nukën ꞌIbun Moisés amiribishi katëkëankëxa:

² Kamabi Israel unikama kamina ësokin kati ꞌain: mitsux kamina upí ꞌiti ꞌain, ꞌëx kana mitsun Dios ꞌaish uisa ꞌuchañumabi ꞌain, usa ꞌain kamina mitsúxribi upí ꞌinuxun uisa ꞌuchabi ꞌatima ꞌain.

³ Mitsun kamina min papa bana kuanan min titan banaribi kuati ꞌain. ꞌImainun kamina anun ñu mëëtima nëtë ꞌikëbë anun tantiti ꞌain. ꞌËx kana mitsun Dios ꞌain.

⁴ Usa ꞌain kamina a rabinuxun bëtsi ñu uniotima ꞌain, ꞌimainun kamina dios isa kixun a rabinuxun manë charoxun uniotima ꞌain. ꞌËx kana mitsun Dios ꞌain.

⁵ Uínsaran kaina mitsun a ñukama ꞌë ꞌaxunkin ñuina anun mëníonanti ꞌakin xaroin, anun kamina ꞌëx kuëëntisabi okin ꞌanan unikama kuëëntisabi okin ꞌakánti ꞌain.

⁶ Ñuina ꞌë xaroxunti rëxun kamina a nëtënbi piti ꞌain, ꞌanan ka tëxëia noonkë aribi pëkarakëbëtan piti ꞌain, ꞌaínbi ka tëxëtëkënkë a pëkaratëkënkë anun xarokë ꞌiti ꞌikën.

⁷ Uin kara ꞌë ꞌaxunkin xarokë ñuina nami a rabë́ ꞌimainun achúshi nëtë ꞌinúkë ꞌaínbi pia, ax ka upíokin iskëma ꞌiti ꞌikën, usa ꞌikë ka Diosanribi kuëntima ꞌikën;

⁸ uin kara a nami pia ax ka an usokin ꞌai ꞌuchakë kupí tëmërati ꞌikën, usa ꞌikë kamina mitsux anu ꞌikë anua a chikínti ꞌain, an Nukën ꞌIbu ꞌaxunkë ñu upíira ꞌikëbi usakin ꞌakë ꞌikë.

⁹ Anúan mitsun ñu ꞌapákë biti nëtë ꞌikëbëtan bikin kamina, kamaira këñukin bitima ꞌain, ꞌimainun kamina baritëkënkin bikinmi tëxëokë a bitima ꞌain.

¹⁰ ꞌAínbi kamina anu uvas ꞌapákë naë anua aín bimi bikin kamaira bitima ꞌain, ꞌimainun kamina menu pakëkë abi baritëkënbiankin bikinma ënti aín; a kamina uni ñuñumakama ꞌimainun bëtsi menu ꞌikë mibë tsókë unikaman binun ënti ꞌain. ꞌËx kana mikaman ꞌIbu Dios ꞌain.

¹¹ Bëtsi unin ñu kamina mëkamakantima ꞌain. ꞌIanan kamina këmëi bananan bëtsi unikamabë paránantima ꞌain.

¹² Unin asérabi ka kixun sinánun kamina ñu ꞌanuxma ꞌën anë ñui banatima ꞌain, usai banakin kamina ꞌëmi uni bananun ꞌimitima ꞌain, usai banakin kamina ꞌën anë ꞌatima oti ꞌain, ꞌëx kana min ꞌIbu ꞌain.

¹³ Mi rapasu ꞌikë uni kamina ꞌatima okin mëëxun ꞌain ñu bikuantima ꞌain. ꞌIanan kamina an mi ñu mëëxunkë uni pëkarakëbëtan kupíoxun kakinma a nëtënbi kupíoti ꞌain.

¹⁴ ꞌImainun kamina pabë unikamami ꞌatimati banai ami kuaitima ꞌain. ꞌIanan kamina anúan uni bënxuñu niti aín bainu ami tuaxkia pakëtisa okin ñu nantima ꞌain. Usakin ꞌakinma kamina ꞌën bana kikësabiokin ꞌakánti ꞌain. ꞌËx kana min ꞌIbu ꞌain.

¹⁵ Unin mix ꞌapu aín bëtsi unibëtan bana mëníoxun kakëxun kamina kana ꞌaima kakinma an ñu ꞌakë ëanan, an ñu ꞌakëma a tëmëratanun ꞌatima otima ꞌain, uisa ñu kara ꞌaxa kixun pain istankëxun kamina a rabë́bi tëmëramiti ꞌain.

¹⁶ Manan bëkinkin kamina abëmi ꞌikë unikama ñuitima ꞌain. Min ꞌunánkë unían bëtsi uni ꞌai kuankëbë kamina abë kuantima ꞌain. ꞌËx kana min ꞌIbu ꞌain.

¹⁷ Mix abë ꞌikë unimi ꞌatimakin sinani kamina ami nishtima ꞌain. Min ꞌunánkë unían ꞌatima ñu ꞌaisatania ꞌunánkin kamina ꞌaxunma ꞌanun kati ꞌain. Usakin ñu ꞌaia iskinbi min ꞌunánkë uni kakëma ꞌaish kamina abëbi ꞌuchakë ꞌiti ꞌain.

¹⁸ Axa mimi nishkë uni nuibatima ami nishanan kamina axa mibë nuibanankë unikamaishi nuibatima ꞌain. Min ꞌunánkë uni kamina mixmi bërúankakësaribi okin bëruánti ꞌain. ꞌËx kana mitsun ꞌIbu ꞌain.

¹⁹ A tanti bana ꞌën mi kakë ënëx kikësabiokin kamina ꞌati ꞌain. Mitsun ꞌarakakë vacamia ñuina itsin bëchinun kamina ꞌamitima ꞌain. Min naënu ñu ꞌapákin kamina mëskukin ñu bërukama ꞌapátima ꞌain. ꞌAnan kamina bëtsi bëtsi ñumanën mëskukin ꞌakë chupa pañutima ꞌain.

²⁰ Uix kara an ñu ꞌaxunkë xanu bëtsi unin binuxun kakë ꞌaínbi abë ꞌiaxa, an ka a xanuxa marukëma ꞌianan axia ꞌinun ënkëmapain ꞌikëbi, usakin akë kupín an binuxun kakë uni a kupíoti ꞌikën; ꞌaínbi ka uni ꞌimainun xanux uisabi okinma ënkë ꞌiti ꞌikën.

²¹ Usakin ꞌakë ꞌixun ka unin achúshi carnero anuxun ꞌë rabiti xubusa okin ꞌakë aín xëkuë anu buánti ꞌikën.

²² Buánxun ꞌinánkëxun ka sacerdotekaman carnero xarokin aín ꞌucha tërënxunun ñukáxunkëxun kana, ꞌën unin ꞌuchakë ꞌën tërënti ꞌain.

²³ Uínsaran kaina anumi tsóti me anu atsini kuani anuxun ñu ꞌapátankëxun, kamina koia aín pëñan tëaima ꞌianan, aín bimiribi rabë́ ꞌimainun achúshi baritia sënë́nmikin pitima ꞌain.

²⁴ Anun rabë́ ꞌimainun rabë́ baritia sënë́nkëbëtan mitsun ñu ꞌapákë kamabi aín bimi bitankëxun achúshi fiesta ꞌakin ꞌë nanxunti ꞌain,

²⁵ ꞌimainun kamina mapai achúshi bari ꞌikëbëtan bixun mitsun ñu ꞌapákë aín bimi piti ꞌain. Usokin ꞌakëbë ka mitsun ñu ꞌapákë aín bimi ꞌaisamaira ꞌinun bimiti ꞌikën. ꞌËx kana mitsun ꞌIbu Dios a ꞌain.

²⁶ ꞌImainun kamina uisa ñuina namibi aín imi këñun pitima ꞌain. ꞌIanan kamina uisa ñu kara ꞌiti ꞌikë kiax sinani kiti a unántima ꞌain, ꞌimainun kamina uisa ñu kara ꞌinuxun ꞌaia kixun sinani kitima ꞌain.

²⁷ Mitsun bu buinarakin tëanan kamina min kuëëni rëbu rëmëniokin tëakantima ꞌain.

²⁸ ꞌImainun kamina uni ñukë ꞌain, anun rabanan mitsun nami tëatima ꞌain. Usai ꞌima ꞌianan kamina uisa ñubi tankin mitsun naminu kuënëotima ꞌain. ꞌËx kana mintsun ꞌIbu ꞌain.

²⁹ Mitsun ꞌini bëchikë kamina bëtsi bëtsi unibë ꞌikë xanukama ꞌikësai ꞌinun ꞌimitima ꞌain. Usai ꞌinun ënkëxun ꞌaisama ñu ꞌai axbi ꞌatima orakanan, ka mitsun ëmanu ꞌikë unikamaribi an ꞌatima ꞌimiti ꞌikën.

³⁰ ꞌAnun ꞌë rabiti nëtë ꞌikëbë kamina anun tantiti ꞌain. ꞌImainun kamina anuxun ꞌë rabiti xubusa okin ꞌakë anuxunribi uisa ꞌatima ñubi ꞌatima ꞌain. ꞌËx kana mitsun ꞌIbu a ꞌain.

³¹ Uni an ñunshinan ꞌamikëxun ñu ꞌakë ꞌimainun an ñu tankë uni kamanu kamina kuankantima ꞌain. Usai abë banakin kamina mitsúnbi ꞌaisama ñu ꞌati ꞌain. ꞌËx kana mitsun ꞌIbu Dios a ꞌain.

³² Uni apankama mi rapasu ukëbë kamina ax kuaintamainun niruti ꞌain. Usai ꞌi kamina ꞌëx kikësabi oi ꞌiti ꞌain. ꞌËx kana mitsun ꞌIbu a ꞌain.

³³ Bëtsi menu ꞌikë unikama axa mitsubë tsókë akama kamina ubiotima ꞌain.

³⁴ Mitsúxmi nuibanankësaribi okin kamina aturibi nuibati ꞌain, atux ka mitsusaribi ꞌikën. Mitsux pain kamina atux ꞌikësaribiti Egipto menu ꞌikë uni ꞌaímabi tsóakën. ꞌËx kana mitsun Dios a ꞌain.

³⁵ Mitsun ñu tupunkin kamina ꞌain chaxkë́ ꞌimainun ꞌain naxba anuira tupúnxumabi bëtsi parántima ꞌain, ꞌimainun kamina aín ꞌië anuira sënën tupúnxumabi bëtsi uni parántima ꞌain.

³⁶ Mitsun anun ñu tupúnti anun tupunkin kamina anu sënën tupuntia ꞌakë anubia aín xumúx ꞌitánun tupúnti ꞌain. ꞌËx kana mitsun Dios an Egipto menua mitsu chikían a ꞌain.

³⁷ Usa ꞌain kamina a tanti bana ꞌëx kikë usakinbi ꞌati ꞌain; a bana kamina tanti ꞌain. ꞌËx kana min ꞌIbu a ꞌain.