Jueces 9 - Kashibo-Kakataibo Biblia

Usaia Abimélec kakë uni ꞌiá bana

¹ Abimélec Jerubaal kakë uni aín bëchikë ax ka anua ain titan aintsikama ꞌikë Siquem kakë ëma anuax atubë banai kuankëxa kuanxun ka. Ësokin kakëxa:

² —Nux kananuna aín aintsi ꞌibu ꞌain usa ꞌain kamina Siquem ënu ꞌikë unikama ësokin kakin sinanamiti ꞌain, usa ꞌain ka achúshi unixëshia ꞌapu ꞌimainun ka setenta Jerubaalnën bakë bëchikëkama ax achúshirabi ꞌapu ꞌitima ꞌikën.

³ ꞌImainun ka Abimélecnën axribi atun aintsi ꞌixun anu ꞌikë unikama anu kuanxun a isa ꞌakinun kixun sinanamikin Siquemnu ꞌikë unikamaribi kakëxa.

⁴ Kanan ka setenta kuríki manë ꞌakë a anuxun Baal-berit rabiti xubunu ꞌikë kuríki a bixun Abimélec ꞌinánkëxa. ꞌInákëxun a kuríki bixun ka anun Abimélecnën ꞌatima unikama a isa nuikin ꞌakinun kixun kupíokëxa. Usokëx ka a uni ꞌatimakama a nuibiani abë kuankëxa,

⁵ anua ain papa Jerubaal tsóa Ofrá kakë ëma anu kuankëxa, kuanxun ka anuxun achúshi mapara chaiira anu unëxun setenta ain xukë́nkamaishi Abimélecnën ꞌamiakëxa. ꞌAmikëbë ka aín xukë́n ꞌanáka Jerubaalnën bëchikë Jotam kakë axëshi istirabanan unëakëxa.

⁶ Usokian aín xukë́nkama ꞌakë ka Siquemnu ꞌikë unikaman ꞌimainun Bet-miló anu ꞌikë unikamanribi in papa tëmú Siquemnu ꞌikë anu ꞌimainun maxax chaiira ꞌaish upíira anu timë́xun Abimélec atun ꞌapu ꞌinun anëakëxa.

⁷ Usokin aín xukë́nkama ꞌamitankëxa Abimélec ꞌapu ꞌikë kuati ka aín bashi Guerizim anu mapërakëax anuax munuma kushinra kuënkëni kamabi Siquemnu ꞌikë unikaman kuanun ain xukë́n ꞌanáka Jotam kiakëxa: ¡Siquemnu ꞌikë unikaman ꞌëx kia kamina upíokin kuankanti ꞌain! ¡ꞌËx kia mi kuakësa usaribi okin ka Diosan mitsux kia kuati ꞌikën!

⁸ Bëtsi nëtën ka ikaman ꞌapuñu ꞌisatankin olivos kakë i ain ꞌapu isa ꞌinun kixun kaxa.

⁹ Kakëxunbi ka olivos kakë in kaxa ꞌëx i kaman ꞌapu ꞌinuxun kana, ꞌën biminua unin xënibikë a ëni bimitëkëntima ꞌain, anuma unikamax Dios mabi uni rabinux ꞌikania usa ꞌain kixun ka kakëxa.

¹⁰ “Usokin kakëxun ka i kaman higuera kakë i aribi aín ꞌapu isa ꞌinun kixun kakëxa.

¹¹ ꞌAínbi ka higuera kakë i an ësokin kakëxa, ꞌëx i kaman ꞌapu ꞌinuxun kana bataira okin tuanan nëishira ꞌinun tuákë a ënti ꞌain kixun kakëxa.

¹² Usakin kakëxun ka i kaman uvas ꞌapákë aribi atun ꞌapu isa ꞌinun kixun kakëxa.

¹³ Kakëxunbi ka uvas ꞌapákë anribi aín ꞌapu ꞌinuxumabi ësokin kaxa: ꞌëx i kaman ꞌapu ꞌinuxun kana ꞌën unían aín baka bixun ꞌanun Dios rabi kuëëanan atúxbi anun kuëënkë ꞌëx bimikë a ënti ꞌain.

¹⁴ Usakin ꞌurainra ꞌuran ñukákëxbia kuëënkëbëma sënë́nkin ka ikaman aín ꞌapu isa ꞌinun kixun muxa achúshiribi ñukákëxa.

¹⁵ Ñukákëxun ka muxanribi ikama ësokin kakëxa, ꞌëx asérabi mitsun ꞌapu ꞌiti kuëëni kamina mitsux ꞌën tupën okë tëmú ꞌiti ꞌain; ꞌaínbi ka ax ꞌëx ꞌapu ꞌiti kuëënkëbëma anuax achúshi tsi rëkirukin Líbano kakë menu ꞌikë kunxankama këñuti ꞌikën.

¹⁶ Bërí kana ꞌën mitsu ñukatin: ¿Mitsun kaina asérabi Abimélec ꞌapu ꞌimikin upíokin ñu ꞌan? ¿Mitsun kaina ꞌën papa Jerubaal ꞌimainun aín aintsi ꞌakinkësaribi okin mitsunribi ꞌakian?

¹⁷ ꞌËn papa ax ka mitsu ꞌakini ñuti tana madianita unikamabë mitsu kupín ꞌakanankëxa;

¹⁸ usa ꞌaínbi kamina bërí mitsux ꞌën papa ꞌimainun aín aintsikamami nishkin aín bakë bëchikë setenta unikama a maxá chaiira ꞌikë anuxun ꞌakan. Usokin aín xukë́nkama ꞌaxun kamina, xukënñuma uni ꞌakësokin Abimélec ꞌapu anëkan, ax ka Jerubaalnëa aín xanu an ñu mëëxunkë xanumi bakë bëchia ꞌaish mitsun aintsi ꞌikë kupíshi kamina usokin ꞌakan.

¹⁹ ꞌAínbi kana ꞌën bërí ësokin mitsu kain: mitsunmi asérabi ꞌën papa Jerubaal ꞌimainun aín aintsikama, upíokin ꞌakinkë ꞌaish ka asábi ꞌiti ꞌikën, usa ꞌain kamina mitsubëa Abimélec ax upí ꞌimainun mitsúxribi abë upí ꞌikanti ꞌain;

²⁰ usokin mitsun ꞌakëma ꞌain ka ¡Abimélecnuax achúshi tsi rëkirukian Siquemnu ꞌikë unikama ꞌimainun Bet-milónu ꞌikë unikama këñuti ꞌikën, ꞌimainun ka Siquemnuax ꞌianan Bet-miló anuax tsi achúshi rëkirukin abi tsin këñuti ꞌikën!”

²¹ Ësokin pain atu kai sënë́nkiani ka Jotam Beer kakë ëma anu tsóti ain xukë́n apan Abimélec ami rakuë́ti abákëxa.

²² Usakin ꞌapu ꞌimikankëx ka Abimélec achúshi ꞌimainun rabë́ baritia israel unikaman ꞌapu ꞌiakëxa.