Jueces 8 - Kashibo-Kakataibo Biblia

Abë ꞌakanankin Gedeónën madianita ꞌapukama ñatan ñuikë bana

¹ Efraínën rëbúnkinën ñakánu ꞌikë suntárukama atux ka Gedeónën abëtan madianita unikama ꞌai kuanxun kamikëma kupín ami nishi abë kuëbikanankëxa.

² Usai ꞌiabi ka Gedeónën kakëxa: —¿Mitsunmi ꞌën ꞌakësamaira okin ꞌakë a kaina sinaniman? Mitsúnmi ꞌitsamashi ꞌakë ax ka nun nu ꞌitsaira ꞌakë usamaira ꞌinunmi ꞌakankë ꞌikën.

³ Diosan ka mitsu madianitanën ꞌapu Oreb ꞌimainun Zeeb ꞌanun ꞌamiaxa. ¿Añu karana ꞌën mitsun akëbëtan sënë́nmaira ꞌitánun ꞌan? Ësakin Gedeónën kakëxun kuati ka Efraínën rëbúnkinën suntárukama atúxa xuamati nishkë tantibuakëxa.

⁴ Usa ꞌain ka Gedeón ꞌimainun aín trescientos suntárukama abë ꞌakanankë unikama nuibiani kuani ꞌaisamaira atsánkë ꞌaíshbi Jordán kakë baka bëbatankëx sikarakëakëxa.

⁵ Sikarakëxun ka Sucot ëmanu tsókë unikama Gedeónën atun ñu ñukákin kakëxa: ꞌëbë ukë suntárukama kamina ꞌaisamaira abë ꞌakanankë unikama nuibaëxax atsanxa usa ꞌain kamina mitsun ñu tani nanxun na pinun ꞌinánkanti ꞌain kixun kakëxa, nux kananuna madianita ꞌapu Zébah ꞌimainun Salmuná nui ꞌitsaira nibaixan.

⁶ Ësokin kakëxunbi ka Sucotnu ꞌikë ꞌapukaman Gedeón kakëxa: ¿Nun piti ꞌinánun kara min suntárukaman Zébah ꞌimainun Salmuná ñatanbëtsinkin bëat?

⁷ Kakëxunbi ka Gedeónën atu kakëxa: Asabi ka usa ꞌain kana Nukën ꞌIbun ꞌë ꞌakinkëxun Zébah ꞌimainun Salmuná kakë ꞌapu ñatanbëtsini ꞌëx utëkënkin kana anu uni ꞌikëma menu ꞌikë muxa pëñan bitsini ukin mitsun namibi anun tukapakin raëxpati ꞌain.

⁸ Ësokin kabiani Penuel kakë ëma anuribi kuanxun ka Sucot ëmanu ꞌikë unikama ꞌakësaribi okin ñukákëxa: Ñukákëxunbi ka Penuelnu ꞌikë unikamanribi Sucotnu ꞌikë unikaman ꞌakësaribi okin kakëxa,

⁹ kakëxun ka aturibi Gedeónën kakëxa: Uínsaran karana abë ꞌakanankin unikama ꞌabëtsini utëkëni anun kana mitsun ëmanu ꞌikë torre ënë rurupati ꞌai kixun ka kakëxa.

¹⁰ Usaia ꞌimainun ka Zébah ꞌimainun Salmuná Carcol kakë ëmanu mapai rabë́ ꞌimainun mapai achúshi mil aín suntárukamabë ꞌiakëxa, akamax ka amiaxa bari urukë amiaxa kuankë suntárukamaishi ꞌiakëxa. Atux bërúmainun ka ciento veinte mil suntárukama ꞌakanani këñukë ꞌiakëxa.

¹¹ Usa aín ka Gedeón anu uni ꞌikëma me sënënakëkë abi ratanbiani kuani Nóbah ꞌimainun Jogbehá kakë ëma kikiani kuarukin, atun ꞌunánkë ꞌaímabi ratuishi ami bëbarukin anua bukukë atu ꞌakëxa.

¹² ꞌAkëbë ka Zébah ꞌimainun Salmuná anuax abákëxa: ꞌAínbi ka Gedeónën abatiabi ain suntárukamabëtan nuibianxun ñatankëxa, ñatankëbë ka aín suntárukama ꞌaisamairai rakuëkankëxa.

¹³ Usokin atu ꞌabëtsini Heres kakë bai anunbi utëkënkin ka Gedeónën bëna uni achúshi ñatankëxa,

¹⁴ uni bëna achúshi Sucot kakë anua ñatanxun ka rakuëoxun ñukákëxa: Ñukákëxun ka setenta ꞌain kushibu Sucotnu ꞌikë atún anë kuënëoxun ꞌinánkëxa.

¹⁵ ꞌInánkëx Sucotnu atsínkin a ëmanu ꞌikë unikama Gedeónën kakëxa: —Kamina sinánkanti ꞌain, uisai kaina mitsux ꞌën Zébah ꞌimainun Salmuná ñatankëma aín ꞌëmi kuai kikan kixun. ꞌIanan kamina sinánkanti ꞌain, ꞌën suntárukamami mitsun piti, ꞌaisamaira nitsi atsánkë ꞌikëbi ñonkin mitsu piti ꞌinánnuma kamina abë ꞌakanankin ꞌapu rabë́ bëráma bitsínkin bëkëma aín kikan. ¡A kënë ꞌikë kananuna bitsínkin bërí bëan!

¹⁶ Katankëxun ka anu uni ꞌikëma menua bitsinkë i pëñan muxañu bëkë anun. Sucot ëmanu ꞌikë aín kushibu anun mëëkin rishkiakëxa.

¹⁷ Usakin ꞌanan ka Penuelnu ꞌikë aín torre rurupanan anu ꞌikë ain unikamaribi ꞌakëxa.

¹⁸ ꞌAtankëxun ka Zébah ꞌimainun Salmuná ñukákëxa: —¿Uisa unibu kara mitsunmi Tabor kakë aín bashinua ꞌakë atux ꞌiakëx? Kixun ñukákëxun ka atun kakëxa: —Mi iskësabu ꞌianan ka atu achúshi achúshinëx ꞌapu iskëtinbu ꞌiaxa kixun ka atun kakëxa.

¹⁹ Usakian kakëx munuma kuënkëni ka Gedeón kiakëxa: —¡ꞌËn xukë́nanbi ka! ¡ꞌËn xukë́n ꞌibukama ꞌaxa! Asérabi ka Nukën ꞌIbu tsotia usa ꞌain ka atúxribi tsotia usa ꞌain kana ꞌën ribi mitsu bërí rëtëtsianma.

²⁰ Kikinshi ka Gedeónën ain bakë bëchikë apan Jéter kakëxa: —Min manë xëtokë bitsi nirukin kamina ënë uni rabë́ ꞌati ꞌai kixun kakëxunbi ka Jéternën bëná ꞌixun rakuë́kin ain manë xëtokë aín xakánua ëchíkin biama ꞌikën.

²¹ Ëchitiama okin ka Zébah ꞌimainun Salmunánën Gedeón kakëxa: —¡Minbi kamina nu rëtëti ꞌain! ¡Axa ꞌakananshikë uni a kananuna aín sinan kushi ꞌikë ꞌunanin! Kakëxun aín manë xëtokë bikin Gedeónën anun Zébahkëñun Salmuná a ꞌakëxa ꞌaxun ka ꞌain camello tëñumikë aín ñu upíbu a biakëxa.

²² Usokin ꞌakë ka israel unibunën kakëxa: —Min kamina madianita unikaman ꞌatimoiabi nu ꞌakian, usa ꞌain kananuna mi ꞌimainun min rëbúnkinëx nun ꞌapu ꞌiti kuëënin.

²³ Kixuan kakëxunbi ka Gedeónën atu kakëxa: —ꞌË ꞌimainun ꞌën bëchikënëxbi ka mitsun ꞌapu ꞌitima ꞌikën, Nukën ꞌIbux kuni ka mitsun ꞌapu ꞌiti ꞌikën.

²⁴ Usa ꞌain kana ꞌën abë ꞌakanankin ñatankë bikë unikama atun mëñusuti ꞌë ꞌinánti kuëënin. A mëñusuti kuri ꞌakë ax ka anu uni ꞌikëma menu ꞌikë unikama suntárunën mëñukë a ꞌiakëxa.

²⁵ Usokian kakëxun ka Israel unikaman achúshi tari menu ꞌapátankëxun kamabi atun bikë mëñusuti bëxun anu bukunkin Gedeón kakankëxa minmi nu bënun kakë mëñusutikama akënë ꞌikën.

²⁶ Usokian mëñusuti kuri ꞌakë a kamabi timë́këx ka diecinueve kilosa ꞌiakëxa, ꞌaínbi ka raíri ñukama anun rabunkian atun tëñuanan pañukë manë uxua ꞌakë ꞌimainun anua Madiánu ꞌikë ꞌapukama rakukë chupa minanën pukukë akama ꞌimainun atun camellokama tëñumikë akama tupunkëma ꞌiakëxa.

²⁷ A kurikama timë́kë ka Gedeónën achúshi ñu pará ꞌinun ꞌakëxa ꞌakë ka a rabikanti Ofrá kakë ëma anu nitsíankëxa, usokin ꞌakë ka kamabi Israelkamax efod a rabi Nukën ꞌIbumi sinánma ꞌikën, usakian Gedeónën ꞌakë ax ka ainan ꞌimainun aín aintsikamanan achúshi ñu ꞌaisama ꞌakë ꞌiakëxa.

²⁸ Usa ꞌain ka madianita unibunëx Israelkama abë ꞌakanankin atu kananxun atu bikë ꞌaish, anuax kaitëkëni cuarenta baritia sënë́mi amiribishi Gedeón a menu tsókëpan ꞌain atubë ꞌakanantëkëama ꞌikën.

Gedeón ñua ñuikë bana

^29-30 Jerubaal kakë ꞌianan Gedeón kakëribi uni ax ka ain ëmanubi tsóti kuankëxa, anuxun ka setenta uniakë sënë́nmikin bakë bëchipakëxa, ꞌianan ka ꞌitsaira xanuñu uni ꞌiakëxa.

³¹ ꞌImainun ka achúshi xanu Siquem kakë ëmanu ꞌikë an ñu ꞌaxunkë amiribi achúshi okin bakë bëchiakëxa, bakë bëchixun ka aribi Abimélec kakin anëakëxa.

³² Usa ꞌain ka Gedeón kaniakëkë ꞌaish aín ñuti nëtë sënënkëbë ñuakëxa, ñukë ka ain aintsikaman anua ain papa Joás ñuia maían bashi kini anubi maínkankëxa, ax ka Ofrá kakë ëma anua Abiézernën rëbúnkikama tsókë me anu ꞌiakëxa.

³³ Usai Gedeón ñukë ꞌain ka Israel unikama amiribishi amabi dios isakixun bëtsi bëtsi ñu Baal ꞌaxunkë a rabi Diosmi manúkankëxa, manukin ka amabi Baal-berit kakë ax isa Dios ꞌikë kixun sinánkin rabikankëxa.

³⁴ Usokin ami manuxun ꞌai ka ax atubë ꞌakanankatsi kixun sinánkë unikaman atu bëarabuinkë ꞌikëbia an ꞌakinkë Nukën ꞌIbu amira manúkankëxa,

³⁵ ꞌimainun ka an atu ꞌakinkë Jerubaal kanan Gedeón kakë uni ax ñukëma pain ꞌixuan atu ꞌakinkë a sinanima ain aintsi ꞌibukamabë nuibanani tsótima atubë nishanankëxa.