Jueces 7 - Kashibo-Kakataibo Biblia

Gedeónën aín suntárukamabëtan abë ꞌakanankin kupitanuma madianita unikama ꞌa bana

¹ Gedeón ꞌikëbi Jerubaal kakinribi anëkë ax ka abëa ꞌikë aín suntárukama pëkarakëma ꞌaínshi tsuákarubiani kuantankëx anua Harod kakë anubia unia ꞌumpax ꞌikë ꞌurama anu bukubuakëxa. Anua atux ꞌimainun ka madianita unikama ax aín tsipumi anuaxa aín bashi Moré kakë pëukukë me sapan anu ꞌiakëxa.

² Anuxun ka Nukën ꞌIbun Gedeón kakëxa: “Uisati kaina ꞌaisamaira israelnën suntárukama min bëan, abë ꞌakanankin madianita unikama ꞌatankëx ka nubi kananuna ꞌa kiax anun rabiti ꞌëmi manukanti ꞌikën.

³ Usa ꞌain kamina min suntáru raírikama uix kara ꞌakanantimi rakuë́tia akama aín ꞌikënu kuantanun xuti ꞌain.” “Usakian kakëxun ka Gedeónën aín suntárukama tankëxa tankëxa veintidós mil kuantamainun ka diez mil suntáru bërúakëxa.”

⁴ ꞌAínbi ka Nukën ꞌIbun Gedeón amiribishi katëkëankëxa: ꞌItsaira ka min suntárukama bërutëkëanxa. Usa ꞌain kamina ꞌumpax xëanun buánti ꞌain anuxun kana ꞌën uikamax kara mibë kuanti ꞌikë ꞌimainun uikamax kara kuantima ꞌikë a ꞌën mi kati ꞌain.

⁵ Kakëxun ka Gedeónën aín suntárukama Diosan kakësabiokin ꞌumpax xëanun buánkëxa. Buánkë ka Nukën ꞌIbun kakëxa: An aín mëkënan bixun kamunan ꞌakësa okin ꞌumpax xëakë a kamina amo sëtë́nati ꞌain, ꞌanan kamina an rantipuruni tsóxun ꞌumpax ꞌakë aribi amo sëtë́nati ꞌain.

⁶ An mëkënan bixun ꞌumpax xëakë ꞌimainun an tsóxun ꞌumpax xëakë akamax ka trescientos suntárushi ꞌinun bërúakëxa. Usa omainun ka aín patsanën rantipuruni tsóxun ꞌumpax xëakëxa.

⁷ Usokian ꞌakë ka Nukën ꞌIbun Gedeón kakëxa: Ënë trescientos suntárukama bëtainshi kana mitsu ië́mikin madianita suntárukama ꞌamiti ꞌain. ꞌAmainun ka aín patsan raírinëx aín ꞌitinubi rikianti ꞌikën.

⁸ Usokin Diosan kakëxun ka Gedeónën aín patsan atun xubusa okin ꞌakë anua rikiantanun kixun xuakëxa; xukëxa rikiankëma ꞌaínshi ka amia atun ꞌumpax nikinkëkama a bianan atun carnero mancha aribi bixun atu xutankëx ka. Trescientos suntárukama kaískë a kamabëshi anua madianita suntárukama ꞌikë me sapan a inubiani kuanx a ꞌuri ꞌikankëxa.

⁹ A imë́ ka Nukën ꞌIbun Gedeón kakëxa: “Ënuax kuanxun kamina madianitakama ꞌai kuanti ꞌain, ꞌën kana mitsunmi abë ꞌakanankin abámikin ꞌanun mitsu ꞌamiti ꞌain.

¹⁰ ꞌAínbi kamina atu ꞌatimi rakuë́ti, anua ꞌikankë anu pain min kaniokë Purá abë kuanti ꞌain,

¹¹ anuxun kamina uisai kara mimi nishkë unikama kia kuati kuanti ꞌain.” Kuakin kamina abi kana ꞌati ꞌai kixun kushiokin sinánti ꞌain. Ësokian Diosan kakëx ka Gedeón an kaniokë Purá abë anua abë ꞌakánanti unikama ꞌikë me sënënakëkë anu kuankëxa.

¹² Usai ꞌimainun ka, madianita unikama ꞌimainun amalecita unikama ꞌianan amiaxa bari urukëmiaxa ukë unikama atux me tsitsibiani champu ꞌitsa iskësaira kiani kuankëxa. ꞌImainun ka atun camellokamax ꞌaisamaira ꞌaish parúmpapa kuëbínua masi bëru iskësaira ꞌiakëxa.

¹³ Usai kuanx abëa ꞌakánanti unikama bukukë anu bëbakin ka Gedeónën, suntáru achúshinëa aín namákë bëtsi ñuixunkin ësokin kaia kuakëxa: —ꞌËn kana achúshi pán cebada ꞌakë axa taramëkë kuatsini ꞌai ami ꞌikin anunu ꞌikë nun xubusa okin chupa ꞌakë nipatia namákin isan.

¹⁴ Kixuan ñuixunkëxun ka suntáru itsin bëtsi kakëxa: —Ax ka bëtsi ñumi namákëma ꞌikën, Gedeón suntárunën kushi Joásnën bëchikë israel uni an ka Diosan ꞌamikëxun nubë ꞌakanankin nun ꞌikënubi bëbarukin nu ꞌati ꞌikën.

¹⁵ Ësokia bëtsin aín namákë ñuixunia kuaxun ka, Gedeónën Nukën ꞌIbu rabiakëxa. Rabitankëx ka anua israel suntárukama bukukë anu kuanxun atu kakëxa: —¡ꞌAkanani kuanti kamina mëníokakanti ꞌain, Nukën ꞌIbun ka madianita unikama ꞌanun nu ꞌakinti ꞌikën!

¹⁶ Ësokin kakinshi ka trescientos aín suntárukama rabë́ ꞌimainun achúshi ꞌinun sëtë́nakin nitsinakëxa a kamabi atun carnero manchan ꞌinánan ka amia ꞌumpax nikinkë ñankáishi amia tiríoxun tsi buánkë aribi ꞌinánkëxa.

¹⁷ ꞌInánkin ka atu kakëxa: —ꞌËx abënu ꞌakánanti unikama bukukë ꞌukëmanan anu bëbarukin ꞌën ꞌaia iskin kamina uisakin karana ꞌai usaribi okin ꞌakánti ꞌain.

¹⁸ ꞌËn ꞌakëbëtan ka ax ꞌëbë kuankëkaman carnero manchan banoia kuakin kamina mitsunribi anua ꞌikankë a bëararakin mitsun carnero manchan banoti ꞌain, banoi kamina munuma kuënkëni sharati kikanti ꞌain: ¡Nukën ꞌIbu ñui kianan kamina Gedeónribi ñui sharákanti ꞌain!

¹⁹ Usakin atu kabiani ka Gedeón aín cien suntárukamabë kuanx anua abë ꞌakánanti unikama bukukë ꞌukëmanan anu bëbakëxa, bëbai ka anua abëa ꞌakánanti suntárukama atun pain bërúanëkë axa kuanmainun raírinëxribi bërúain uti hora ꞌurama imë́ naëx ꞌain ka Carnero manchan buánkë akama banonan amia ꞌumpax nikinkë ñankáishi akamaribi tukapakëxa,

²⁰ tukapati ka rabë́ ꞌimainun achúshi akamaxunbi sënën sënëbi ꞌitánun carnero manchan banonan amia ꞌumpax nikinkë akamaribi tukapakëxa. ꞌAkin ka tsi tiríokësa ꞌinun tiríokë a buánan aín mëkeu carnero manchan buani munuma sharati kikankëxa: “¡Bërí kananuna ꞌakananin! ¡Nukën ꞌIbu ꞌimainun Gedeónën nu ꞌakinkëx!”

²¹ Usai sharati kitankëxa israel unikama anuaxa sharákë anuax nëtë́ti bukubukëbëshi ka madianita suntárukamax atumi rakuë́ti sharákiani kuani anua ꞌikë anuax abákankëxa,

²² usai kuankëbëtan ka trescientos Israel suntárukama an ënkinma atun carnero manchan banokëxa, banokëbë ka axa abákëmakama ax Nukën ꞌIbun ꞌimikëx atúxbi ꞌakanankëxa, ꞌakanani abati ka raírinëx anun Sereránu kuanti bainu ꞌikë Bet-sitá kakë ëma anu bëbakëxa, ꞌimainun ka raírinëx anua Abel-meholá kakë ëma aín me sënënakëkë Tabat kakë ëma ꞌikë abu kuankëxa.

²³ Usai ꞌikëbëtan ka Gedeónën Neftalí Aser ꞌimainun Manasés aín suntárukamaribi bëi uxuan madianita suntáru abatia nui unun kixun kamiakëxa.

²⁴ Usa ꞌain ka Gedeónën aín suntáru Efraínën rëbúnkikama aín menuax ꞌakanani unun kamina ësokin kai kuanti aín kixun uni kakëxa, madianita unikamabë ꞌakanani ukian Jordán kakë baka anun sikatisa a bëaranan Bet-bará kakë ëma aribi atux anu bëbakëma ꞌaínshi uxun bëaranun kixun kati ꞌain. Kakëxun ka Efraínën unikaman usakinbi ꞌakëxa,

²⁵ ꞌakin ka madianitakaman ꞌapu rabë́ Oreb kakë ꞌimainun Zeeb kakë a ñatankankëxa. Usakin ꞌaxun ka Oreb kakë ꞌapu chaiira mapara anuxun rëtëkankëxa anuxun rëtëa ꞌikë ka Orebnën mapara kakin anëa ꞌikë ꞌunánkania. Zeeb kakë ꞌapu anuxun ꞌakë aribi aín anënbi anëakëxa, ax ka anuxun uvas aín baka biti chakati ꞌakë anu ꞌiakëxa. Usakin madianitakama ꞌatankëx kuankin ka Oreb ꞌimainun Zeeb aín maxká Gedeón buánxunkankëxa.