Jueces 6 - Kashibo-Kakataibo Biblia

Diosan Gedeón kakë uni kuëan ñuikë bana

¹ Nukën ꞌIbun iskëxbi ka Israelkaman ꞌakë ñu ꞌaisama ꞌiakëxa, usa iskin ka mapai achúshi ꞌimainun rabë́ baritia madianita unikaman ꞌatimonun Israel unibu Nukën ꞌIbun ꞌamiakëxa.

² Usokin ënkëa madianitakaman israel unikama ꞌatimaira okin ubíokëx ka aín bashinua ꞌikë kini baritankëx anua barikinbi mëratisamanu unëkankëxa.

³ Israel unibunën ñu ꞌapákë tibi uxun ka madianita unikama ꞌianan amalecita ꞌimainun amiaxa bari urukë amiax uxun bëtsi unikamanribi atun ñu ꞌapákë binuxun abámiakëxa.

⁴ Abámitankëxun ka Israelkama anu ꞌikë me anu ꞌixun atún ñu ꞌapákë masókin, Gaza kakë me anu kuainakëkë anubi sënë́onkin israel unibunën piti ꞌaíma ꞌitánun ꞌanan atun oveja, asno, ꞌimainun vaca ain bënëkama abi mëkamakëxa.

⁵ Usakin anuxun Israel unibu ꞌanux rikuatsinkin ka anua ꞌuxti chupasa okin ꞌakë a ꞌimainun atún ñuinakamaribi bëtankëx anua bukukankë me anu bëbakëxa. Bëbai ka ain camellonën champu ꞌitsa ukësa kuatsini ꞌaisamaira uni uakëxa.

⁶ Usokian madianita unikaman atu ꞌakëx ka israel unibukama pitiñuma ꞌaish ꞌaisamaira tëmërakëxa, usai tëmërakin ami sinanatëkënkin ka Nukën ꞌIbu an ꞌakinun kixun ñukákankëxa.

⁷ Usakian israel unibunën Nukën ꞌIbu madianita unikaman tëmëramikëxun ꞌakinun ñukákëxun ka

⁸ an achúshi uni an Dios kikë bana uni ñuixunti xuakëxa: Ësakin mitsu kanun ka Israel unibunën ꞌIbu ꞌimainun ꞌain Dios kiaxa: ꞌËn kana mitsu Egipto menu tsókëpan ꞌaish ꞌaisamaira tëmëraiabi chikiankën,

⁹ ꞌimainun kana mitsuishi egipcio unibunua chikinkima, an mitsu ꞌatima oisatankë unikama aribi chikiankën. Atu mitsun ismainunbi chikíkin kana anua tsókë unikama ain me mikama ꞌinánkën.

¹⁰ ꞌImainun kana ꞌëx mitsun ꞌIbu Dios ꞌai kixun kana mitsu kakën, usa ꞌain kamina amorreo unikaman rabikë aín dios ami rakuë́kantima ꞌain, kamina bërí atun menu tsótan; ꞌaínbi kamina ꞌën mitsu kakësabiokin ꞌakëma ꞌain.

¹¹ Usa ꞌain ka Nukën ꞌIbun ángel achúshi uax Ofrá kakë ëma anua ꞌikë in papa tëmú tsóakëxa, ax ka Joás kakë uni Abiézer ain rëbúnki ainan ꞌiakëxa. Anuxun ka Gedeón kakë uni Joásnën bëchikë an aín trigo unëxun tákakëxa, anuxun ka uvas aín baka xëati biti chakakë anuxun ka madianita unikaman isma mëraia kiax rakuë́ti unëxun ka usakin ꞌakëxa.

¹² ꞌAkëbë ami mërakin ka Nukën ꞌIbun ángelnën kakëxa: ¡Nukën ꞌIbu ka mibë ꞌikën, usa ꞌain kamina uni rakuëma ꞌianan kushi sinánñu ꞌiti ꞌain!

¹³ Kakëxun ka Gedeónënribi kakëxa: —ꞌËn ꞌIbu ësokin kana mi kain Nukën ꞌIbu ka nubë ꞌikën, ¿Uisa kupín karanuna nux ënë ñukama ësai inutin? ¿Uinu kara an nun chaitiokëkama Egipto menua chikínkin bëtsi bëtsi ñu ꞌaxuan ꞌikëa nu ñuixunkë Nukën ꞌIbu Dios ax ꞌik? Nukën ꞌIbun ka madianita unikaman ꞌatimonun nu ëankëxa.

¹⁴ Ësokian kakëxun ka Nukën ꞌIbun ángelnën bëískin kakëxa: —Mix kamina ꞌaisamaira kushiñu ꞌain, usa ꞌain kamina madianita unikaman Israelkama ꞌaisamaira okë a isti ꞌain. ꞌËn kana mi kuantanun xuti ꞌain.

¹⁵ ꞌAínbi ka Gedeónën amiribishi katëkëankëxa: —ꞌËn ꞌIbu amiribishi kana mi katëkënin, ¿uisaxun karana ꞌën Israelkama ië́nun ꞌakinti ꞌain? ꞌËn aintsi Manansésnën rëbúnkikama atux ka ñuñuma unibu ꞌikën, usa ꞌain kana usa ꞌën aintsikama ꞌain ꞌëx usa ka a uni ꞌikë kixun unin kaisama ꞌain.

¹⁶ Kiabi ka Nukën ꞌIbun ángelnën katëkëankëxa: —Kamina ꞌati ꞌain ꞌën kana minmi ꞌaia mi ꞌakinti ꞌain. Min kamina madianita unikama ꞌakin achúshi unira ꞌakësokinshi ꞌati ꞌain.

¹⁷ Ësokian kakëxun ka Gedeónën amiribishi kakëxa: —Asabi ka mix kuëënkin kamina asérabi kara Diosan mi xuaxa isnun kamina achúshi ñu ꞌë ꞌaxúnti ꞌain, usakin ꞌaxunkëxun kana asérabi kamina ꞌëbë bana kixun ꞌunánti ꞌain.

¹⁸ Usa ꞌain kamina ënuxunbi kuankinma ꞌën mi ꞌinainshitisa tankë ñu bitamainun kaínti ꞌain. Usakian kakëxun ka Diosan ángelnën asábi ka kana mi aia kaínti ꞌai kixun kakëxa.

¹⁹ Kabiani aín ꞌikënu kuanxun ka Gedeónën achúshi cabranën tuá rëxun mëníonan, veinte litrobëtan sënë́nsa harina anun chamiti ñu këñuma pán ꞌakëxa; ꞌatankëxun ka aín nami tasánu ꞌaruanan aín baka bikë a kënti achúshinu ꞌaruakëxa, ꞌarubiankin ka anua in papa ꞌikë a tëmú akamabi buani kuankëxa.

²⁰ Buánkë ka Diosan ángelnën mapara kamanan aín nami nanan pán anun chamiti ñukëñunma ꞌakë aribi nania amibia aín baka ampë́nkanun kixun kakëxa. Usokian Gedeónën an kakësabiokin, ꞌan ka

²¹ ángelnën aín tsati rëbun nami ꞌimainun pánkama a tikakëbëshi maparanuax rëkirukin tsin nami ꞌimainun pán këñukin xarokëxa; xarokëbëa aín bërunuaxbi Nukën ꞌIbun ángel nëtë́tia ka Gedeónën istëkëama ꞌikën.

²² Usai ꞌia iskin Nukën ꞌIbun ángel ka asérabi ax ꞌiaxa kixun sinani ka Gedeón kiakëxa: ¡ꞌËn ꞌIbu ꞌëx kana min ángelbë ꞌën ꞌunánkë unibë ꞌikësai asérabi isi kanan!

²³ Kia ka Nukën ꞌIbun ësokin kakëxa: —Rakuëama ka ꞌik, kamina ñuiman. ꞌËn ꞌimikëx kamina chuámarua tani kuëënti ꞌain.

²⁴ Ësokin kakëxun ka Gedeónën anuxun ñuina xaroti achúshi anubi ꞌatankëxun anuxun Nukën ꞌIbu rabikin xarotankëxun; “Nukën ꞌIbuinshi ka nu chuámarua ꞌimia kixun kakin anëakëxa. Anuxun ñuina xaroti Gedeónën ꞌa ax ka bëríbi anua Abiézernën rëbúnkikama ꞌikë Ofrá kakë ëma anu ꞌikën.”

²⁵ Usakian ꞌakë a imë́bi ka Nukën ꞌIbun Gedeón kakëxa: —Min papan ꞌarakakë vacanua kamina aín bënë achúshi bianan, bëtsiribi mapai achúshi ꞌimainun rabë́ baritia ñu biti ꞌain, bitankëxun kamina min papan anuxun Baal ñuina xaroxunti ꞌakë a rurupanan, kamina i tëakë upíokin mëníoxun nankë anuxun ñuina Baal xaroxunti rapasu nitsínkë aribi nipati ꞌain,

²⁶ ꞌimainun kamina anua ꞌikë aín bashi manámi anubi anuxun ñuina xaroti achúshi min Dios ꞌaxúnti ꞌain. ꞌAtankëxun kamina, vaca ain bënë bëtsi pain bitankëxunmi tsiankin bikë a ꞌë ꞌaímai këñutanun xaroxunkin i upí a rabikë ꞌikëbi nipakë abi karuaxun anunbi xaroti ꞌain.

²⁷ Usakian kakëxun ka Gedeónën mapai rabë́ aín uni bitankëxun Nukën ꞌIbun kakësabiokin kamabi ñu ꞌakëxa; ꞌakin ka nëtë́n ꞌakinma aín papan aintsikama ꞌimainun a ëmanu ꞌikë unikamami rakuë́kin imë́ribi ꞌanëakëxa.

²⁸ Usokin ꞌanë́kë ꞌain ka pëkarakëma ꞌaínshi nirukinbi ka a ëmanu ꞌikë unikaman anuxun Baal rabikin ñuina xarokë a rurupanëkë mërakankëxa, mëranan ka anuxun ñuina xaroti rapasua ꞌikë i upíira nitsínkë aribi pakëti tëkëbukë aribi mëranan, anuxun ñuina xaroti bëtsi bënokin ꞌaxuan anuxun vaca bënë xaronëkë mërakëxa.

²⁹ Usokin ꞌanë́tia mërai ratuti ka bëtsibë bëtsibë ñukákanani kanankëxa: ¿Uin kara ësokin ñu ꞌanë́tin? Usai kanankin uin kara ꞌaxa kixun pain ñukákin puntëkinbi ka Gedeón Joásnën bakë bëchikë an ka axa kixun ꞌunánkankëxa, ꞌunánbiani anu kuanxun ka aín papa Joás kakankëxa:

³⁰ —Min bakë bëchikë kamina rëtënun nukama ꞌinánti ꞌain. ¡An kaisa Baal rabikin anuxun ñuina xaroxunti a rurupanan a rapasu nitsínkë i upíira aribi tëkëbutanun nipanëtia!

³¹ Kiabi ka Joásnën anu rikuatsinxua an kakë unikama kakëxa: —¿Mitsux kaina Baalnën rabanan në́ti anun rabanan mëëananti ꞌain? ¡ꞌËx kana kuëënin uix kara Baalnën rabanan në́tia ax ka pëkarakuatsínkëma ꞌaínshi ñukë ꞌiti ꞌikën! Baal ax Dios ꞌixun ka anuxun a rabiti rurupakë a abi mëníoti ꞌikën, ax ka anuxun a rabikë ꞌiakëxa.

³² Usokin anuxun ꞌakë ka Gedeón ꞌikëbi Jerubaal kakin anëi ësai kikankëxa: “Baalnëx ka abi bërúankati ꞌikën,” Gedeónnëbi ka anuxun Baal ñuina xaroxunti a rurupaxa.

³³ Usakian ꞌan ka madianita unikama ꞌimainun amalecita unikama ꞌianan amiaxa bari urukëmiaxa ukë unikama, timëtankëx Jordán kakë baka sikarakëkianx Jezreel kakë me sapan anu ꞌikankëxa.

³⁴ ꞌAínbi ka Nukën ꞌIbu bëru ñunshin upitan Gedeón abë ꞌixun ꞌakiankëxa, ꞌakinkëxun carnero manchan banokëbë ka Abiézernën rëbúnkikama timëakëxa;

³⁵ timëmainun ka aín ñakánuaxa Manasésnën aintsikamaribi timë́ti unun kamiakëxa. Kamianan ka aín ñakánuaxa Aser, Zabulón, Neftalínën rëbúnkikamax abë timëti unun kixun kamiakëxa, kamikëx utankëx ka abë timë́kankëxa.

³⁶ Usaia ꞌian ka Gedeónën Dios kakëxa: “Asérabi kaina ꞌën aintsi Israelkama ꞌakinun ꞌë ꞌakinti ꞌain, mixmi kikësabiokin,

³⁷ isnuxun kana carnero xaká achúshi aín rani këxtuira anuxun trigo tákakin mëníoti ꞌakë anu nanti ꞌain. Nankëa nibitan pëkarakëma ꞌaínshi ꞌibúkin chabókë, ꞌaínbia anu nankë me ax chabákëma ꞌain kana ꞌën ꞌunánti ꞌain asérabi kamina ꞌën Israelkama ië́minun mix kikësabiokin ꞌë ꞌakinti ꞌai kixun ka kakëxa.

³⁸ Usaia asérabi ꞌikë ka. Pëkarakëma ꞌaínshi nirukianxun Gedeónën tasun achúshimi buákakin chininkin nibí an ñuinanën xaká chabókë a biakëxa.

³⁹ Usakin ꞌatankëxunbi ka, amiribishi Gedeónën katëkëankëxa: ꞌËn amiribishi katëkënkëx kamina ꞌëmi nishtima ꞌain. ꞌAínbi kana ashikin mi ënë imë́ tantëkënti ꞌain. Ënë ꞌatëkënkin kamina ñuina xaká a chabókima anu nankë meshia nibitan chabónun ꞌimiti ꞌain.”

⁴⁰ A imë́bi ka Diosan usakinbi ꞌaxuntëkëankëxa. ꞌAkë a pëkarakëbë ka ñuina xaká noonkë ax chabákëma ꞌimainun anua noonkë me axëshi nibítan chabónëkë ꞌiakëxa.