Jueces 5 - Kashibo-Kakataibo Biblia

Débora ꞌimainun Barac cananeo unikama abë́ ꞌakanankin kupitanuma ꞌatankëx kanta bana

¹ A nëtë kaman ka Débora ꞌimainun Barac Abinóamnën bakë bëchikë ax ësaiki kantakëxa:

² Kamaxunbi ka Nukën ꞌIbu rabikan, Israel unibunu ka axa ꞌakanani kuainsa unikama ꞌikën; usa ꞌaish ka Israel unibunu ꞌakanani kuanti ka kixuan aín ꞌapun kakëx kuantishi ꞌikën.

³ ¡ꞌË kamina kuati ꞌain, ꞌapuirakama! ¡ꞌËx kimainun kamina bëtsi ëmanu ꞌikë ꞌapukama mitsun kuati ꞌain! ¡ꞌËx kana Nukën ꞌIbu rabi kantain! ¡Kantai kana Israel unikaman Dios a rabi kantain!

⁴ Seír kakë me anuax chikíkiani mix kuankëbë ka me shaíkimainun naíkamë ꞌëo shaíkiakëxa, ꞌimainun ka naí kuin masákuatsinkë anuax ꞌuñe ꞌibúakëxa.

⁵ Mix Nukën ꞌIbu ꞌianan israel unibunën Dios ꞌain ka aín bashi Sinaí ax shaíkiakëxa.

⁶ Anúan Samgar Anatnën bëchikë tsóa a bari ꞌimainun, Jael tsóa a barikaman ka israel unikamax anúan nikë bai a ꞌimainun amo pátsinkiani nitsi me ꞌaisama anunbi nikiani kuankëxa;

⁷ usai ꞌikëbë ka anua Israel unikama ꞌikë aín ëma chukúmakama ax uniñuma ñankáishi ꞌinun bërúakëxa. Usai ꞌikëbëtan kana ꞌën Israelkama ꞌakinti sinánkën. ¡Usa ꞌain kana Débora ꞌën aín titasa ꞌixun Israel unikama ꞌakinti sinánkën!

⁸ “Usa ꞌain ka raíri unikama an bëtsi dios rabiti kuëënkë anu ꞌain, atux xëkuënua ꞌakanantishi ꞌiakëxa. Usa ꞌixun ka uínbi aín manë pará ꞌimainun aín paka pia xëtokë achúshirabi cuarenta mil uni ꞌixunbi Israel unibunën ami katamënuxun biama ꞌikën.

⁹ ¡ꞌËn kana Israelkaman ꞌapukama asábi ka kain, atux ka ꞌën ꞌakánanti unun kamikëx uax ꞌakananxa! ¡Usa ꞌain ka kamaxunbi Nukën ꞌIbu rabikanti ꞌikën!

¹⁰ Mitsux kamina kiti ꞌain, uni ñuñu axa burro aín xanu uxuanën kaxunu tsókë ꞌimainun ñuñuma uni axa nishikë kamaxribi ka kiti ꞌikën:

¹¹ ¡anuxun ñuina ꞌumpax xëamikë anu kuanxun kamina, manë pará rabë́ bëtsimi tsarankakín ransai banakin Nukën ꞌIbun mitsu ꞌakinkë ñukama ñuiti ꞌain, ꞌimainun ka raíri ëmanu ꞌikë unikama axribi ësai kiti ꞌikën!

¹² ¡Kamina bësuti ꞌain Débora kamina bësuti ꞌain, bësui kamina achúshi kanta Dios rabi kantati ꞌain! ¡ꞌImainun Barac Abinóamnën bakë bëchikë minribi kamina ami ñatankë unikama aribi buánti ꞌain!

¹³ Usa ꞌain ka Israel unibunëx abë ꞌakanania ukë kushiira suntárukamabë ꞌakanani kuabuakëxa; kuanx ka ꞌën kuënkë́xa ukë Nukën ꞌIbun suntárukama ax ka ꞌakánanti ꞌunan unikamabë ꞌakananxa.

¹⁴ Raíri Efraínnën unikamaxa anuax ꞌakánanti me anu ukëbë ka atu kaxú Benjamínën suntárukamaribi uaxa. Ukëbë ka Maquir aín ꞌapukamabë umainun Zabulón axribi aín ꞌapukamabë uaxa.

¹⁵ Kuamainun ka Isacarnën ꞌapukamaribi Débora buani abë kuankëxa; kuani ka Isacarnën unikama Barac ꞌakini anuaxa ꞌakánanti me anu kuankëxa. Kuankëbëbi ka Rubénën rëbúnkikama aín sinan kushibu ꞌakanainsabu ꞌaíshbi tikiakëxa,

¹⁶ ¿uisa kupín kara an ñuina bërúankë unikaman aín ovejakama kuënia kuatíbi bërúax? ¡Rubénën rëbúnkikamax ka chaiira unibu ꞌaish aín sinan kushibu ami katamëisa ꞌaíshbi rakuë́ti bëruaxa!

¹⁷ Galaadnu ꞌikë unikama axribi Jordán kakë baka ꞌukëmanan bërúmainun ka Dannën rëbúnki akamaxribi anua manë nunti këñurukë a rapasu bërúakëxa, ꞌimainun ka Asernën rëbúnki atúxribi parúmpapa kuëbí bërúax kuainima aín butunubi ꞌiakëxa;

¹⁸ ꞌaínbi ka ain bashi matán me anuax Zabulón ꞌimainun Neftalí ain suntárukamabë bamati tana ꞌakananxa.

¹⁹ Usa ꞌain ka abë ꞌakánanti ꞌapukama ax Taanac kakë ëma ꞌimainun Meguido kakë rapasua ꞌikë xëxá anu kuankëxa, kuankinbi ka cananeo ꞌapukaman Israel unikama abë ꞌakanankin atu ꞌaxun aín ñu biti sinanx kuankin atún ñu buanima ꞌianan aín manë uxuabi buánma ꞌikën.

²⁰ Naíkamë ꞌëo anua ꞌikë anuaxbi ka ꞌispa Sísara abë ꞌakanankin uni ꞌamainun nirakëakëxa;

²¹ Quisón kakë xëxá bërámabi unia an ꞌuñe ꞌibúkian ñu tërënbiankë usaribi okin ka atu ꞌakëxa. ¡Mix xëxá ꞌixun kamina axa mibë ꞌakanani ukë unikama aín kushibu këruti banaima abátanun ꞌimiakën!

²² ¡Usa ꞌain ka caballokamax abákin aín taën me pënkakin banamikë ax ꞌinsaira ꞌiakëxa!

²³ Usai ꞌikëbë ka Nukën ꞌIbun ángel ësai kiaxa: ¡ꞌËx kana Meroz kakë ëma ꞌimainun anu ꞌikë unikama ꞌatimokë ꞌiti kuëënin! Atux ka axa ꞌakanani kuankë unikamasaribi ꞌixun ꞌakanania Nukën ꞌIbun unikama ꞌakini kuankëma ꞌikën.

²⁴ ¡Jael ax ka bëtsi xanukama samaira ꞌaish rabikë ꞌiti ꞌikën, ax ka Héber quenita uni aín xanu ꞌikën! ¡Ax ka abëa tsókë xanukama samaira ꞌikën!

²⁵ Jaelnën ka Sísaranën aín ꞌumpax ñukákëxunbi; aín vaca xuma ꞌinánxa. ¡ꞌInánan ka sëruakin vaca xuma ꞌakë aribi ain xampa upirami ꞌinánxa!

²⁶ ꞌInánkëxuan xëamainun ka mëkën mëmiunën ami chupasa okin ꞌakë tëkërëkati manë xëtokë a bianan aín mëkën mëkeu anun ñu matásti mamúokin manë ꞌakë a bixun anun Sísara aín bëmanamixun memibi takáshkakin matáskin ꞌaxa.

²⁷ Usakia aín ꞌuxkënuabi Jaelnën ꞌakëx ka Sísara tarishki kushi pënkërakëbëkini ꞌitankëx ñuaxa.

²⁸ Usakin ꞌakëxa aín tuá Sísara panákëbëtan ka aín xubu xëkuë chukúmanën kara aia kixun iskinbi aiama oi bënëti ain tita kiakëxa: ¿Uisa kupín kara aín caballonën nikinkë ñun bënëti aíma panatin? Aín caballonën nikinkë ñu taëkama sapi ka ramianan ëchikianan kia usa ꞌain sapi ka panatia.

²⁹ Usai kia kuakin ka an ñu tankë xanukaman ësokin kakëxa kakëxbi ka atux kikësaibi ësai kítëkëankëxa:

³⁰ ꞌËn sinánkëx sapi ka ꞌakanankian bikë ñukama pain ꞌinánani ꞌia. ꞌIanan sapi ka xanu bixun an ñu mëëxunti achúshi ꞌinánkinma xanu rabë́ rabë́ axa ꞌakanankë unikama ꞌinani ꞌia; ꞌianan sapi ka Sísara aín chupa bëtsi bëtsi okin pukukë aribi achúshi ꞌinánkinma rabë́ ꞌinani ꞌia ꞌianan kara chupakama upíokin kuënëokë, an ira uni ꞌakëkama anúan tëtata kinun ꞌinani sapi ka ꞌia kiax ka kiakëxa.

³¹ ¡Nukën ꞌIbu ꞌëx kana axa min unikamami nishkë unikama këñuti kuëënin, ꞌimainun ka an mi nuibakë unikamax upitax bukui barin urukin aín kushin pë́kabëtsinkësa usaribi ꞌiti ꞌikën!” Usai ꞌiaxa sënë́an ka cuarenta baritia ꞌimi a menuax ꞌakanantëkënima upitax buküakëxa.