Jueces 4 - Kashibo-Kakataibo Biblia

Débora ꞌimainun Baracnën abë ꞌakanankin Sísara ꞌa bana

¹ Usa ꞌain ka Ehud, kakë atún ꞌapu ax ñukë ꞌain Israelkaman amiribishi ñu ꞌatima ꞌatëkënia ka Nukën ꞌIbun ꞌaisama atu isakëxa,

² usokin ꞌaia iskin ka Nukën ꞌIbun achúshi cananeo uni Jabín kakë ꞌapu ax ka Hasor kakë ëmanu ꞌain, abë ꞌakanankin ꞌanun ꞌamiakëxa. A unin suntárunën kushi ka Sísara kakë uni ꞌiakëxa, ax ka Haróset-goím kakë ëma anu tsókë ꞌiakëxa.

³ Jabín kakë ꞌapu ax ka novecientos caballonën nirinkë manë ꞌakë ñu ꞌiakëxa, usa ꞌixun ka a ꞌapun Israel unibu veinte baritia ꞌimikin tëmëramikin ꞌatimokëxa, ꞌatimokëx tëmërakin tankin ka Nukën ꞌIbu an ꞌakinun kixun ñukákankëxa.

⁴ A nëtëkaman ka Débora Lapidotnën xanu an Israelkaman ñu ꞌatima ꞌaia aín ꞌapu ꞌixun mëníoxuankëxa.

⁵ Usa ꞌaish ka anubi tsókë ꞌaish Débora ax kuanx kuanx xëbin nikë tëmú tsókë xanu ꞌiakëxa (usa unánxun ka “Déboranën xëbin kakin anëakëxa”) ax ka Efraín unikaman me Ramá ꞌimainun Betel an nëbë́tsiorakë ëma anu ꞌiakëxa, anu ꞌain ka Israelkamax uix kara nishanani ꞌatima onanxa ax an mëníoxunun anu kuankëxa.

⁶ Achúshi nëtën ka Déboranën Barac kakë uni Abinóamnën, Quedes kakë ëma achúshi anua Neftalí ñaká unikama bukukë anua katánun xukin ësokin kakëxa: Israelkaman ꞌIbu ꞌimainun ain Dios ax ka ësokinmi ꞌanun kiaxa: Aín bashi Tabor kakë anu kamina diez mil Neftalí ꞌimainun Zabulón unikaman suntáru anu timëti ꞌain.

⁷ ꞌËn kana Sísara ꞌapu Jabín ain suntárunën kushi axa, Quisón kakë xëxá anuax mitsubë ꞌakanankin atun caballonën nikinkë anuax ꞌakánanti a ꞌimainun ain suntárukamabi bëi unun ꞌimiti ꞌain. ꞌAínbi kana ꞌën mitsunmi kupitanuma ꞌanun ꞌamiti ꞌain, ka Dios kiaxa.

⁸ —Asabi ka mixmi ꞌëbë kuankëbë kana kuanti ꞌain, —kixun ka Baracnën kakëxa—. ꞌAínbi kana mixmi ꞌëbë kuankëbëma kuantima aín.

⁹ —Usa ꞌain kana mibë kuanti ꞌain —kixun ka Déboranën kakëxa—. ꞌAínbi ka ënë ꞌakanania achúshi xanúan Sísara ꞌanun Nukën ꞌIbun ꞌamiti ꞌikën, usa ꞌain kamina abë ꞌakanankin ꞌatankëx ꞌën kana a unikama ꞌa kiax kitima ꞌain. Usai pain kanankiani ka Déborabë Barac Quedes kakë ëma anu kuankëxa.

¹⁰ Anuxun ka Baracnën Zabulón ꞌimainun Neftalínën unikama anua ax ꞌikë anu kuanun kixun kamiakëxa, kamikëx aia ka Baracnën aín kushi ꞌixun diez mil suntáru timëakëxa. Timëbiani kuankëbë ka Débora abë kuankëxa.

¹¹ Quedes kakë ꞌurama anua in papa chaiira nikë Saanaim kakë me anu ka Héber kakë quenita uni ax tsóakëxa, ax ka aín aintsi quenita kamabë ënanan ꞌaish axi tsókë uni ꞌiakëxa, ax ka Moisésnën kukun bakë bëchikënën rëbúkinkama ꞌiakëxa.

¹² Usaia aín bashi Tabor kakë anu kuankë a ñui kia ka Sísaranën Barac kuakëxa,

¹³ kuakin ka anribi kamabi aín suntárukama ꞌimainun novecientos caballonën nirinkë anuax ꞌakánanti manë ꞌakë akama buani Haróset-goím anuax kuankëxa, kuantankëx ka Quisón kakë xëxá anu bëbakëxa.

¹⁴ Usa ꞌain ka anu bëbaxun Déboranën Barac kakëxa: —¡Bërí nëtën kamina min suntárukamabëtan Sísara ꞌai kuanti ꞌain, Nukën ꞌIbun ka min mi ꞌanun mi ꞌamiti ꞌikën! ¡Nukën ꞌIbun ka atua ꞌanun min suntárukama ꞌakinti ꞌikën! Usokian kakëx ka Barac aín bashi Tabor kakë anuax aín diez mil suntárukamabë kuabuakëxa,

¹⁵ kuabutankëx atubë ꞌakananiabi ka Nukën ꞌIbun atun suntárukama ꞌimainun axa anuax ꞌakánanti manë ꞌakë caballonën nirinkë anuax ꞌakanankë Sísaranën suntárukama ꞌaisamaira rakuë́ti aín manë xëtokën Baracbë ꞌakananima abánun ꞌimiakëxa; usai ꞌikëbë ka Sísaranëxribi anuaxa ꞌakanankë caballonën nirinkë anuax ꞌibukiani abákëxa.

¹⁶ Usaia ꞌimainun ka Baracnën aín suntáru ꞌimainun axa caballonën nirinkë anuax ꞌakanankë anun kuaniabi nuibiankin Haróset-goím kakë anubi bëbarukin ꞌakëxa. Usakin ka a nëtën Sísaranën suntáru achúshibi kuaintanuma kamabi këñukin ꞌakëxa.

¹⁷ Jabín kakë ꞌapu Hasor ëmanu ꞌikë ax ka Héber quenita aín aintsikamabë upí ꞌiakëxa, usa ꞌain ka Sísara ax abati kuanx Hébernën xanu Jael kakë aín xubunu bëbakëxa,

¹⁸ bëbaia iskin ka kakëxa: —ꞌËn ꞌIbu ꞌën xubunu kamina rakuë́tima atsínti ꞌain. Kakëx ka aín xubunu atsímiakëxa anua ka Sísara Jaelnën chupa achúshitan mapukin unëakëxa;

¹⁹ usakian ꞌakëxun ka Sísaranën shimairaxun ꞌumpax ñukákëxa. Ñukákëxun ka Jaelnën anua leche ꞌarukë ñuina xaká a mapëntankëxun bixun na xëanun ꞌinánkëxa; ꞌInántankëxun ka amiribishi amia xëakë a maputëkëankëxa.

²⁰ Maputankëxun ka Sísaranën kakëxa: —Min xubusokin chupa këxtú ꞌakë aín xëkuënubi kamina bërúti ꞌain anuxun kamina uni ukian min xubunu kara uni ukëma ꞌikë kixun ñukákëxun kamina ënu ka uíxbi ukëma ꞌikë kixun kati ꞌain.

²¹ Usakin katankëx ka Sísara nibaiti atsanx tënëtisamaira tani ꞌaímai napëkëti ꞌuxakëxa. Usai ꞌuxan ka Jaelnën martillo achúshi ꞌimainun ami xubusokin chupa këxtú ꞌakë tëkërëkati nitsínti ꞌakë manë xëtokë a bibiani ñuitsima anua Sísara ꞌuxkë anu kuankëxa, kuanx nirakëkinshi ka manë xëtokë anun aín bëmánan pëánkabianxun memi takáshkakin ꞌakëxa. Usakin ꞌakëx ka Sísara ñuakëxa.

²² Usakin ꞌanbi ka abákë Sísara baribiani kuanx ami bëbaruia iskin ka, Jaelnën Barac kakëxa: —Ënu ka ami barikë uni a ꞌikë mi isminun kamina uti ꞌain. Kakëx xubusokin chupa ꞌakë anu atsínkibi ka Sísara aín maxkánu manë xëtokën pëánkabianxun memi takáshkakin ꞌakëxa ñukë rakákë mërakëxa.

²³ Usa ꞌain ka Nukën ꞌIbun cananeo unikaman ꞌapu Jabín axa Israel unibu kikësa ꞌoíshi ꞌinun ꞌimiakëxa.

²⁴ Usa ꞌain ka a nëtëkaman Israel unibunën atian ira ñusmoxun ꞌakian Jabín aín unikama këñunbi ꞌatimonun ꞌamiakëxa.