Jueces 16 - Kashibo-Kakataibo Biblia

Gaza kakë ëmanua Sansón kuan ñuikë bana

¹ Achúshi nëtën ka Sansón Gaza kakë ëmanu nitsi kuankëxa. Kuanxun ka anua achúshi xanu bëtsi bëtsi unin aín nami ꞌakë mërax aín xubunu abë a imë́ ꞌi bërúakëxa.

² Bërúkëbi ka Gaza ëmanu tsókë filisteo unikaman Sansón ka nun ëmanu uaxa kixun ñuikania kuakëxa, kuaxun ka anun ëmanu atsínti xëkuënu bëaraxun a nëtën bërúankankëxa. Bërúanbaiti ka bëbakishbukëbë pëkarakëbëtan kananuna bixun rëtëti ꞌai kiax kanankiani tanti rikiankankëxa.

³ Rikiankë ꞌain ka Sansón axi ꞌuxnë́ti imë́ naëx niruakëxa. Nirukiani kuankin ka anun ëmanu atsínti xëkuë ꞌikë anu kuankin ami takáshkakian ꞌakë akëñunbi, anun xëpukin xëarakë akamabi ax kushiira ꞌixun ëchíxun ꞌiabiankin Hebrón kakë ëma bëtánain ꞌikë aín bashi manan anu buáruakëxa.

Sansón ꞌimainun Dalila ꞌiá ñuikë bana

⁴ Usa ꞌain ka Sansón achúshi xanu Dalila Sorec kakë menu tsókë abë kuëënankëxa.

⁵ Kuëënania kuabiani ka filisteo ꞌapukama Dalila isanan abë banai rikianxun ësokin kakëxa: —Abë banakin kamina Sansón paránxun uisax kara ax kushiñuira ꞌikë kixun ñukati ꞌain, usakinmi ñukatia kananuna nun bixun; nëaxun bërúanti ꞌain. Usokinmi ꞌakë kananuna nukama, achúshi achúshinën mil cien kuríki manë ꞌakë mi ꞌinánti ꞌain.

⁶ Ësokin kabiania filisteo ꞌapukama rikian ka, Sansón aín xubunu bëbaia xanun kakëxa: —ꞌË kamina uinuax kara min kushi ꞌaia kixun bërí kati ꞌain. ¿Uisokin ꞌaxun karanuna mi churukutima okin nëati ꞌain?

⁷ Kakëxun ka Sansónnën kakëxa: —Mapai achúshi ꞌimainun rabë́ kata kanti mëxi ëskikëma anun tëkërëkakëx kuni kana, ꞌën kushi nëtë́ti bëtsi unikamasaribi ꞌiti ꞌain, kixun ka Sansónan kakëxa.

⁸ Usakin ñuixunbiania kuan ka filisteo unikaman ꞌapun Dalila mapai achúshi ꞌimainun rabë́ kanti mëxi ió anúan Sansón tëkërë kanun kixun buánxuankëxa, buánxunkëxun ka anun nëakëxa.

⁹ Nëakë ꞌain ka bërámashi aín ꞌuxtinu unëkë unikama anu ꞌain munuma kuënkëni kikankëxa: —¡Sansón mi ka filisteo unikaman ꞌaia, kikëbë ratuti nirukin ka anúan nëakë kanti mëxi, a ñuman xënira ꞌakësokinshi të́kakëxa! Usokin ꞌakëbë ka uisa ꞌaish kara kushiira ꞌikë kiax filisteo unikamax Sinánkasmakëxa.

¹⁰ Usakin ꞌaia ka Dalilanën kakëxa: —¡ꞌË kamina parán! ¡Këmë kamina mix ꞌain! Usa ꞌain kamina bëríra uisa okin karana mi nëati ꞌai kixun ꞌë kati ꞌain.

¹¹ Kixun ñukákëxun ka Sansónnën kakëxa: —ꞌËmi uínsaranbi anun ñu nëakëma itsi iotan, nëakëx kuni kana ꞌën kushi nëtë́ti bëtsi unikamasaribi ꞌiti ꞌain.

¹² Usa ꞌain ka Dalilanën itsi rastun iókama bikë anun upíokin Sansón nëatankëx munuma kuënkëni kiakëxa: —¡Sansón mi ka filisteo unikaman ꞌaia kixun kuënkëonkin kakëxa! Usakin ka bëtsi nëtën ꞌakësokin unikama aín ꞌuxtinu unëtëkëntankëx kiakëxa; kikëbë nirukin ka Sansónnën anun nëakë itsi ñuman bëntsinra ꞌakësokinshi tëkapakëxa.

¹³ Usakin ꞌaia ka Dalilanën Sansón kakëxa: —¡Amiribishi kamina ꞌë parántëkëan! ¡Usakinbi kamina min ꞌë paráinshitin! ¡ꞌË kamina kati ꞌain uisa okinra karana mi nëati ꞌai kixun! Kakëxun ka Sansónnën kakëxa: —ꞌËn bu anun ꞌë tëkërë kati ꞌakin kamina, mapai achúshi ꞌimainun rabë́okin chupasani këñun mëskukin xëotankëxun a i tëakë memi takáshkakin matáskin nitsínxun ami ꞌënbu tëkërë kati ꞌain. Usokëbë kana ꞌën kushi nëtë́ti bëtsi uni kamasaribi kushiñuma ꞌiti ꞌain. Usokin ꞌanúan kakëxun ka Dalilanën Sansón ꞌaímai napëkëtia ꞌuxnun ꞌuxmitankëxun mapai achúshi ꞌimainun rabë́ okin aín bu chupasani këñun xëokëxa,

¹⁴ xëotankëxun ka imaxu tëakë memi takáshkakin nitsinkëmi aín bu xëokë a tëkërë katankëx munuma kuënkëni kiakëxa: —¡Sansón filisteo unikamax ka mi ꞌai aia kiaxa. Kikëbë nirukin ka Sansónnën i tëakë memi takáshkakin nitsínkë amia aín bu xëoxun chupa sanikëñun ami tëkërëkakë a ëchíkin tëkapakëxa!

¹⁵ Usakin ꞌaia iskin ka aín xanu Dalilanën kakëxa: —¡Këmëntapun! ¿Uisati karamina ꞌë ismina kuëëni kikínbi ꞌë paránin? Bërí ka rabë́ ꞌimainun achúshi okinmi ꞌëmi kuaikin usokin ꞌë ꞌakë ꞌikën, ꞌaínbi kamina bëríbi uisa kushiñuira ꞌaish kaina usai ꞌi ꞌë kakëma ꞌain.

¹⁶ Usakian Dalilanën nëtë́tibi kamabi hora ꞌurainra ubíokin an kakësabiokin ñukákëx, ka Sansón atsanx a kuaisama tani anunbi bamatisa tankëxa;

¹⁷ usakin urainra ubíokin ñukákëxun ka Sansónnën Dalila uisa ꞌaish kara ax usai ꞌia kixun ñuixuankëxa: —Uínbi ka uínsaranbi ꞌën bu tëama ꞌikën, ꞌëx kana ꞌën titan tuakëma pain ꞌaish Diosan kaískë uni a ꞌain. Aín uni ꞌain ka Nukën ꞌIbu kikësabiokin uínbi ꞌën bu tëatima ꞌikën. Usa ꞌain kana ꞌën bumi tëakëbë kushiñuma ꞌi ꞌën kushi nëtë́ti bëtsi unikamasaribi ꞌiti ꞌain.

¹⁸ Usakian kakëxun ka bëríra kana ꞌunanin, uisa ꞌaish kara usa kushiñuira ꞌikë kixun ꞌunánkin ka Dalilanën filisteo ꞌapukama anua unun kixun ësokin kamiakëxa: —¡Bërí kamina ukanti ꞌain mitsu ñuixunun, Sansónnën ka uisa ꞌaish kara usa kushiñuira ꞌikë kixun ꞌë ñuixuanxa! Usakian kamikëx ka anúan Dalila kupíoti kuríki bëi rikuatsiankëxa.

¹⁹ Umainun ka Dalilanën Sansón aín kisinu makëpimëtia ꞌuxnun ꞌuxmiakëxa, ꞌuxmixun ka achúshi uni an aín bu mapai achúshi ꞌimainun rabë́ okin xëokë a tëanun kuëankëxa. Kuënkëx uxuan aín bu tëan ka. Sansón bësuni,

²⁰ munuma kuënkëni kiakëxa: —¡Sansón mi ka filisteo unikaman ꞌaia ka bësut! Usai kikëbë ka aín bu tëakëma ꞌaísha ꞌikësa usai ꞌiisa sinani Sansón bësuakëxa, bësukinbi ka Nukën ꞌIbun ka ꞌë ëanxa kixun ꞌunánma ꞌikën.

²¹ Usai ꞌia kushiñuma ꞌaish sinánkasmaia ka filisteo unikaman ñatanxun aín bëru rabë́ ëchiakëxa, ëchíxun ka Gaza kakë ëma anu buánxun manë risi uxua ꞌakë anun tëkërë kaxun anun ñu rënti ꞌakë anua ñu rëni sipunuax tënun ëankëxa.

²² Usaia sipuakë ꞌaish anu ꞌimainun ka amiribishi aín bu urui bëráma ꞌikësabi ꞌitánun kuainbutëkëankëxa.

Sansón ñua ñuikë bana

²³ Usokin Sansón ꞌatankëx ka bëtsi nëtën filisteo unibunën ꞌapukamax Sansón kananuna kupitanuma bia kixun sinánkin atun dios Dagón kakë a kuëënkin rabikin ñuina xaroxuni timëkamë ꞌëotankëx kantakankëxa: “Nun diosan ka Sansón aminu nishkë a binun nu bimiaxa.”

²⁴ Usai atux ꞌia isi ka unikamaxribi atun dios rabi ësai ki kantakëxa: “Nun diosan ka axa numi nishkë Sansón a binun nu ꞌamiaxa, an ka nun ñu ꞌapákëkama ꞌatima onan nun aintsi raírikamaribi ꞌitsaira ꞌaxa.”

²⁵ Usai ꞌaisamaira kuëëni ka atubëisa kuëënun isa Sansón bënun kiax kikankëxa. Kikëbëtan ka Sansón sipunua chikíankëxa chikínbëtsinkin bëkë ka ami kuaikin anuxun atun dios rabiti xubu ꞌakin nitsínkë rabë́ a nëbëtsi nitsínun kiax kuëëni kikankëxa.

²⁶ Usa ꞌain ka Sansónnën an mëinxun bëkë tuá a kakëxa: —ꞌË kamina anuxun atun dios rabiti xubu ꞌakin ami puruti nitsínkë rabë́ anuxun mëkënan tainsabinu ami këpiti ninun ꞌë nitsínti ꞌain.

²⁷ Usai ka kamabi filisteo ꞌapukama anuxuan atun dios rabikë xubu anu timë́kë ꞌiakëxa, timë́kë ꞌaish ka ꞌaisamaira uni ꞌimainun xanu timëkamë ꞌëokë ꞌiakëxa. Usai ꞌimainun ka tres mil unibëtan sënë́nsa unikamaribi xubu manámi uisakin kara Sansón abë kuëënkin raíritan ꞌaia isi anu kuaruax timëkamë ꞌëokë ꞌiakëxa.

²⁸ Usai filisteo unikama anu timëkamë ꞌëokë ꞌain ka, Sansónnën munuma banakin Dios kakëxa: “ꞌËn ꞌIbu ꞌën kana mi kain usa ꞌain kamina achúshira ꞌoíshi ꞌëmi sinántëkënti ꞌain, ꞌë kamina min kushi ꞌinánti ꞌain, ꞌën bëru rabë́ ëchikë kupí filisteo unikama achúshi okin ꞌakë anuishi bëríbi këñuminun.”

²⁹ Ësakin Dios katankëx sënë́nkinshi ka ami xubu puruti nëbë́tsi nitsínkë rabë́ a aín mëkënan ramëkin tanishi,

³⁰ munuma kuënkëni kiakëxa: “¡filisteo unikama mitsux kamina ꞌëbëbi bërí bamakanti ꞌain!” Usai kikian aín kushibëtanbi titikakin xutunkëx ka anuxua atun dios rabikë xubu atumi rurukubukin filisteo unikama atun ꞌapukama këñunbi xubun kuaintanuma atu këñuakëxa. Usakin ꞌakin ka ax asábi ꞌixuan abë ꞌakanankin ꞌasamaira okin abëbi bamakin Sansónnan xubu chakamikin uni këñuakëxa.

³¹ Usai aín xukë́n filisteo unikamabëbi ñukë kuabëtsini uxun ka aín xukë́antu ꞌimainun aín aintsi ꞌibukaman Sansón bamakë biakëxa, bibiankin buánxun ka aín nami anua aín papa Manoa bamakë maían Sorá ꞌimainun Estaol anu aín papa ñuia maínkë anubi maíankëxa. Usai ka veinte baritia pain Israel unikama ꞌapu ꞌixun ꞌakintankëx Sansón anuishi sënëni ñuakëxa.