Jueces 15 - Kashibo-Kakataibo Biblia

¹ Usakin ꞌakë ꞌitsama ꞌuxë ꞌikëbëa anun trigo bimi biti ꞌuxë ꞌain ka Sansón aín xanu iskatsi kixun sinánbiani cabra tuá achúshi bibiankin buani kuankëxa, kuanx nukúkin ka ain kuku kakëxa: —ꞌËn xanu isi kana uan usa ꞌain kana a istisa tanin. Kakëxunbi ka ain kukun aín xubunu atsímisama tankëxa,

² atsímisama tankin kakëxa: —ꞌËn kana ꞌën bëchikë kamina kuëënima kixun sinan, usa ꞌain kana min ꞌunánkë uni achúshi aín xanu ꞌiti ꞌinan. Usa ꞌain kamina ain xukë́n ꞌanáka ax ka asamaira upí xanu ꞌikën; a kuni kamina aín apan a ꞌimainun biti ꞌain.

³ Kixuan kakëxunbi ka Sansónnën kakëxa: —¡Bëríra kana filisteo unikama kupitanuma ꞌën ira ꞌatima okëxun ꞌati ꞌain!

⁴ Usokin kabiani kuanxun ka trescientos kapa ꞌinu bixun rabë́ rabë́ aín ꞌinanbi bëtsikëñun tëkërë kapatankëxun anua tëkërëkapakë anubi anua tiríoti ñu tëkërëkapakëxa;

⁵ usotankëxun aín inanu tëkërëkapakë ñu anu bimitankëxun ka kapa ꞌinukama a filisteo unikaman ñu ꞌapákë anu kuantanun xuakëxa. Xukëx tsuákikiani kuankin ka trigo a pain bixun bukúnkë ꞌimainun bikëma ain inubi ꞌikë, ꞌanan uvas ꞌapákë a këñunbi olivos ꞌapákë akamaribi xarokëxa.

⁶ Usokian ꞌakë ka filisteo unikaman uin kara usokin atun ñu ꞌapákë axa kixun ꞌunánkatsi kixun bariakëxa, barikinbi Sansónnëa ain kukúan aín xanu bikuanxun an ꞌunánkë uni ꞌinánkë kupín ꞌakë ꞌunánbiani anu rikianxun ka xanu akëñun aín papa nënkankëxa.

⁷ Usakian ꞌakë ꞌunáni ka Sansón ësai atu kai kiakëxa: —Mitsun kamina usakin ñu ꞌan, usa ꞌain kana asérabi manutima okin mitsu kain, ¡këñukin mitsu ꞌatankëx pain kana ꞌëx asábi ꞌiti ꞌain!

⁸ Ësokin atu kaíbi ꞌaisamaira nishkin tankin anua ꞌikë unikama ꞌitsaira ꞌabiani ka Etam kakë menu ꞌikë mapara kini anu tsóti kuankëxa.

Sansón ꞌimainun burron maxkanu ꞌikë aín kuësha ñuikë bana

⁹ Filisteo unikamax ka utankëx Judá menu bëbax anu ꞌikankëxa, ꞌika anua Lehi ꞌikë anubi sënëni ꞌikankëxa,

¹⁰ anua ka Judá menu ꞌikë unikaman ñukakankëxa: —¿Uisa kupi kaina nukamabë ꞌakananux ukan? Kakëxun ka atu achúshitan kakëxa: —Nukamax kananuna nua ꞌatima okë kupin Sansón ñatankin bitsi uan kakëxa.

¹¹ Ësokin kakëxun kuabiani ka tres mil uni Judá ñakánu ꞌikë unikama Etamnu ꞌikë xaxun papa kininu kuanxun atu achúshitan Sansón kakëxa: —Min kamina ꞌunánin filisteo unikamax ka nukamasama kushiirabu ꞌikë kixun. Ënu utima kamina ꞌian, atun ka mi nuibëtsianxa bërí kananuna ꞌaisama ñu inúti ꞌain. Kakëxunbi ka Sansónnën atu kakëxa: —ꞌËn kana ꞌë ꞌakësabi okin atu an, usa kupi ka usai ꞌiaxa.

¹² Usakin kakëxunbi ka atunribi kakëxa: —Nukamax kananuna mi filisteo unikama ꞌinánti ñatankin bitsi uan. Kakëxunbi ka Sansónnën kakëxa: —ꞌË kamina sinanátëkëntimokin mitsun kamina ꞌë rëtëtima ꞌai kixun kati ꞌain.

¹³ Kakëxun ka atun kakëxa: —Usama ka mi kananuna ꞌaiman. Ñatanxunshi kananuna mi filisteo unikama ꞌinánkatsin. Usa ꞌain ka bitankëxun itsi ió rabëtan nëatankëxun anua unë́kë kini anua chikíankëxa.

¹⁴ Chikin bëtsinkin bëkëxa Lehi anu bëbakëbë ka filisteo unikama abë mëranani ꞌitsaira kuëëni kuënkëni chikiakëxa. ꞌAínbi ka Diosan bëruñunshinan ꞌamikëxun Sansónan anúan aín pëñan këñun aín mëkën tëkërëkakë itsikama a tëkapakëxa, tsin xarokë lino risikama ꞌakësokinshi;

¹⁵ usokin ꞌatankëxun ka anua burro maxo ꞌaimairai ëskikëma a biakëxa, bixun ka anun mil filisteo unikama rëtëakëxa.

¹⁶ Usakin ꞌatankëx ka kiakëxa: Achúshi burro maxkanu ꞌikë ain kuëshatan; kana achúshi tsaman ꞌanan rabë́ tsamanribi ꞌan achúshi burro maxo ain kuëshatan kana mil filisteo rëtëan.

¹⁷ Usokin ꞌatankëxun kana burro maxo a nian, usa ꞌain ka anuxun ꞌakë me ax Ramat-lehi kakin anëkë ꞌikën. (Ramat-lehi kikë ax ka burro kuësha ki kikë bana ꞌikën.)

¹⁸ ꞌImainun ka usokin ꞌatankëx Sansón ꞌitsaira shimakë ꞌixun, Nukën ꞌIbu kuënkin kakëxa: ¿Min kamina axa numi nishkë unikama ënë kupitanunma ꞌanun ꞌë ꞌamian, usakin ꞌaxunbi kaina bërí ꞌë shiman bamanun ꞌimianan axa min bana kuakëma unikama ꞌëx ñukëbë ꞌënun kuainun ꞌimiti ꞌain?

¹⁹ Usa ꞌain ka Diosan Lehi kakë me anua kini naëkënua ꞌumpax mëranun ꞌimiakëxa, ꞌimikëxa chikitia ka ꞌumpax Sansónnën xëakëxa, xëaika Sansón amiribishi kushitëkëankëxa. Usa ꞌaish ka anua unikë ꞌumpax Lehinu ꞌikë ax En-hacore kakin anëa ax anubi ꞌikën. (En-hacore kikë ax ka ꞌumpax ñukákë ki kikë bana ꞌikën.)

²⁰ Usa ꞌixun ka Sansónan veinte baritia ꞌimikin Israel unikama atun ꞌapu ꞌixun ꞌakiankëxa, filisteo unikaman ꞌibua ꞌain.