Jueces 13 - Kashibo-Kakataibo Biblia

Usai Sansón bakë́an ñuikë bana

¹ Usa ꞌain ka Israelkama an ismainunbi ñu ꞌatima ꞌatëkënia okin Nukën ꞌIbun filisteo unikaman cuarenta baritia ꞌimikin tëmëranun ꞌimiakëxa.

² Sorá kakë ëma anua Dannën rëbúnkinën me ꞌikë anu ka achúshi uni Manoa kakë ꞌiakëxa. Aín xanu ax ka uínsaranbi tuama ꞌiakëxa.

³ ꞌAínbi ka achúshi nëtën Nukën ꞌIbun ángelnën ami mërakin kakëxa: Mix kamina uínsaranbi tuakëma xanu ꞌain, usa ꞌaínbi kamina bërí tutankëx achúshi bëbu tuá bakënti ꞌain.

⁴ Usa ꞌain kamina uvas baka xëanan uisa ñu paë batabi xëatima ꞌain, ꞌanan kamina a pikëma ñu a pitima ꞌain,

⁵ ësokin kamina ꞌati ꞌain, ami bakënti tuá ax ka Diosan uni achúshi ꞌikën kixun unikaman ꞌunánun ka kania uínbi ain bu tëatima ꞌikën, an pain ka filisteo unikaman ꞌatima oia israel unibu ꞌakinti ꞌikën, ainanshi ꞌinun ka Diosan bakënkë ꞌikëmabi kaisaxa.

⁶ Usokin kakëx kuanxun ka xanun aín bënë ñuixunkin kakëxa: Achúshi Diosan uni ka anu ꞌëx ꞌikënu uaxa, anuxun ka ënkinma ꞌë kaxa, kakëxun iskëxbi ka Nukën ꞌIbun ángel iskësa ꞌiaxa. Usa ꞌikë kana uikara ax ꞌikë kixun ñukákëma ꞌain, anbi ka ui uni kara ax ꞌikë kixun ꞌë kakëma ꞌikën.

⁷ ꞌAínbi ka ësokinshi ꞌë kaxa: ꞌËx isana achúshi bëbu tuáñu ꞌiti ꞌai kixun, kanan ka uvas baka vino ꞌakë paëkë abi xëaxunma ꞌanan a pitima ñu pixunma ꞌanun ꞌë kaxa, a tuakëxisa Diosnanshi ꞌiti ꞌikën, ꞌianan isa a bakënkëma ꞌikë kaísa ꞌixun ain bamati nëtë utamainun ꞌakinti ꞌikë kixun ka ꞌë kaxa.

⁸ Ësokian aín xanun ñuixunkë ꞌixun ka Manoanën abë banakin Nukën ꞌIbu kakëxa: ꞌËn kana mi kain ꞌën ꞌIbu amiribishi kamina ami xukë min uni a nunu xutëkënti ꞌain, uisokin karana ax bakënti tuá axa bakënkëbëtan ꞌati ꞌai kixun ꞌunánun nu kai unun.

⁹ Ësokian Manoanën ñukákëxun ka Diosan kuakëxa, kuaxun ka aín ángel achúshi xukëx kuanx ka aín xanua naënu ꞌain ami mëratëkëankëxa. ꞌAínbi ka ain bënë Manoa abëma ꞌiakëxa,

¹⁰ usai ami mërakëxun ka abákiani kuanxun ain bënë kakëxa: —¡Ka kuat, axa bëtsi nëtën ꞌëmi mëraëxankë uni ax ka amiribishi ꞌutëkëanxa kamina isi kuanti ꞌain!

¹¹ Ësokian aín xanun kakëx ka bënëtishi nirukiani Manoa aín xanubë kuanxun uni anubi nikë mërakin kakëxa: —¿Mix kaina axa ꞌën xanubë bëtsi nëtën banaëxankë uni a ꞌain? Kakëxun ka unin kakëxa, ꞌëx kana a ꞌain.

¹² Ësokin kakëxun ka Manoanën kakëxa: Minmi nu kakë usaibi ꞌikëbëtan, ¿karana uisokin a tuá kanioti ꞌain? ¿uisa karanuna a tuá oti ꞌain?

¹³ Kakëxun ka Nukën ꞌIbun ángelnën ësokin kakëxa: —Min xanun ka añu ꞌanun karana ꞌën kan usakinbi ꞌati ꞌikën:

¹⁴ ꞌakin ka uvas baka ꞌakë vino a xëanan bëtsi ꞌinun uvas baka bëtsiokin paëokë a xëatima ꞌikën, ꞌanan ka a pitima ñu ꞌatima a pitima ꞌikën. Usakin bëtsi ñu ꞌakinma ka ꞌën ꞌanun kakë usakinshi ꞌati ꞌikën.

^15-16 A unix ka Diosan ángel ꞌikë kixun ꞌunánkinmabi ka Manoanën ësokin kakëxa: —Mi kuanun kamina ꞌën cabra bëna achúshi rëtankëxun piti ꞌarumimainun kaínti ꞌain. Kixun kakëxunbi ka Nukën ꞌIbun ángelnën kakëxa: —ꞌËx tikixunbi kana minmi ꞌamikë piti mibëtan pitima ꞌain. Usa ꞌaínbi kamina min cabra bëna a rëtankëxun Nukën ꞌIbu upíokin xaroxunti ꞌain.

¹⁷ Usakian kakëxun ka Manoanën Diosan ángel kakëxa: —ꞌË kamina uisokin anëkë kaina mix ꞌai kixun kati ꞌain, nun kananuna min nu kakë bana usai ꞌikëbëtan asérabi ka an nu kakësabi oi ꞌiaxa kixun sinánti ꞌain.

¹⁸ Kiabi ka ángelnën kakëxa: —¿Uisoti kaina ꞌën anë unántisa tanin? ꞌËn anëx ka uínbi ꞌunántisama ꞌaish upíira ꞌikën.

¹⁹ Usokian kakëx kuanxun ka Manoanën ain cabrito bëna bianan akëñuan ꞌati ñu bimikama bitankëxun mapara kamanan nanxun Nukën ꞌIbu ꞌaímai këñutanun xaroxuankëxa. Usokin ꞌakë ka Nukën ꞌIbun Manoa ꞌimainun ain xanu an iskëma ñu upíira ꞌaxuankëxa:

²⁰ ꞌaxunkëbëa tsi rëkirui rëarukësa a nëbë́tsia anun Nukën ꞌIbun ángel naínu kuania ka Manoa ꞌimainun ain xanun isakëxa. Usai ꞌia isi ka rabëtaxbi aín bëmánanën me tikai tsóbuakëxa.

²¹ Usai ꞌia iskin ka Manoanën sinánkëxa a unix ka asérabi Nukën ꞌIbun ángel ꞌiaxa kixun, usai ꞌitankëx ka amiribishi ami mëranan ain xanumiribi mërátëkëama ꞌikën;

²² usai ꞌian ka aín xanun ësokin kakëxa: Bërí sapi kananuna nu rabë́ ñuti ꞌain, nun kananuna asérabi Dios isan.

²³ Kiabi ka aín xanun kakëxa: —Nukën ꞌIbun nu bamamisa tankin ka nunnu a xaroxunkë ñukama ꞌimainun a ꞌinainshiti ꞌakë ñukama upí isanan ënë ñukama nu ismikë ꞌitsianma, ꞌimainun ka ënë banakamaribi nu ñuixunkëma ꞌitsianma.

²⁴ Usakian kakëx tutankëx ka aín nëtë sënë́nkëbë achúshi bëbu tuá bakë́ankëxa, bakënxun ka Sansón kakin anëakëxa. Anëkëx kania ka Nukën ꞌIbun a tuá upíokin sinánxukin nuibakin ꞌakiankëxa.

²⁵ Achúshi nëtën ka Sansón anua Dan kakë unikama bukukë Sorá ꞌimainun Estaol kakë ëma anuxunbi, Nukën ꞌIbun bëru ñunshinan añu kara ꞌati ꞌikë kixun ismiakëxa.