Juan 5 - Kashibo-Kakataibo Biblia

ꞌIan Betesda cacë, a rapasunuxuan Jesusan nicuainquinbi tancëma uni pëxcüa

¹ Usotancëx ca anúan judíos unicaman Nucën Papa Dios rabiquin piti nëtë ꞌain, Jesús Jerusalénu cuantëcëancëxa.

² Jerusalénu cënëa aín xëcuë achúshi, Oveja cacë, a bëtánain ca unin ꞌacë ꞌian ꞌiacëxa. Ax ca hebreo banan Betesda caquin anëcë ꞌiacëxa. A ꞌian rapasu, anua uni niti, anu ca mëcën achúshi itá nitsíncë ꞌaish manan tapuñu ꞌiacëxa.

³ Ax ca a tëmú bucuxuan uni ꞌinsíncëcama, bëxuñu ꞌimainun aín niti bëtsicë ꞌimainun racábucë, acaman ángelnëan ꞌunpax cubínmia caíncë ꞌiacëxa.

⁴ Caíncëxuan uisa nëtën cara ꞌibutia, a nëtën ꞌibúxun ángelnën a ꞌunpax cubínmicëbë caísa ax paían anu butucë, uisa ꞌinsínñu cara, a uníxbi pëxüacëxa.

⁵ Usa ꞌain ca anu ꞌicë uni achúshi treintiocho baritia ꞌinsíncë ꞌiacëxa.

⁶ Ax anu racácë isquin ca —ꞌuran ca ënë uni usai ꞌiaxa —quixun ꞌunánquin Jesusan cacëxa: —¿Caramina pëxcútisa tanin?

⁷ Cacëxun ca ꞌinsíncë unin cacëxa: —ꞌUnpax cubíncë nëbëtsi an ꞌë butúnti uni ca ꞌaíma ꞌicën. Usa ꞌain ca ꞌëx cuancëma ꞌaínshi ꞌë rëtibiani cuanx, uni itsix pain ꞌunpax cubíncënu butuia.

⁸ Quia ca Jesusan cacëxa: —Niruquin anumi racácë min bacë́ti bibiani ca cuantan.

⁹ Usaquian Jesusan cacëxëshi ca a uni aín ꞌinsíncë pëxcúacëxa. Pëxcúquin aín bacë́ti bibiani ca cuancëxa. Anun ñu mëëtima nëtë ꞌaínbia anua racácë aín bacë́ti bibiani,

¹⁰ cuania isquin ca judíos unicaman ꞌinsíncë ꞌaíshbia pëxcúcë uni cacëxa: —Ënë nëtëx ca anun ñu mëëtima nëtë ꞌicën. Ënë nëtën camina anumi racácë ñu ꞌiábiantima ꞌain.

¹¹ Cacëxun ca cacëxa: —An ꞌë pëxcucë uni an ca, anumi racácë min bacë́ti bibiani ca cuantan, quixun ꞌë caxa.

¹² Quixuan cacëxun ca atun cacëxa: —¿Ui uni cara min bacë́ti bibiani ca cuantan quixuan an mi cacë, ax ꞌic?

¹³ Cacëxunbi ca ꞌaisamaira uni anu ꞌaían Jesús ꞌuri cuan, ui unin cara a pëxcüaxa quixun ꞌunánma ꞌicën.

¹⁴ Usa ꞌain ca a pëxcucë uni a anuxun Nucën Papa Dios rabiti xubunuxun mëraquin, Jesusan cacëxa: —Ca is, bërí camina pëxcúcë ꞌain. Usa ꞌain camina mix ꞌiásamairai ꞌinsíntëcënti rabanan amiribishi ꞌuchatëcëntima ꞌain.

¹⁵ Usaquian Jesusan cacëxun, ax ca Jesús ꞌicë quixun sinánbiani cuanxun ca a unin judíos unicama, —Jesusan ca ꞌë pëxcüaxa —quixun cacëxa.

¹⁶ Usa ꞌain ca anun ñu mëëtima nëtëan uni pëxcucë cupí, judíos unicamax Jesús ꞌacatsi quiax ꞌësë́nancëxa.

¹⁷ ꞌËsënaniabi ca Jesusan atu cacëxa: —ꞌËn Papan ꞌacësaribi oquin cana ꞌën ꞌain.

¹⁸ Usaía Jesús quia cuati ami nishquin ca judíos unicaman ësaquin sináncëxa, —Usai qui ca Nucën Papa Dios ax isa aín papa ꞌicë quianan ax isa Nucën Papa Diossaribi ꞌicë quia. Usaquin sinani ca anun ñu mëëtima nëtën uni pëxcucë cupí ami nishanan, usaía quicë cupíribi ami nishquin, a ꞌacatsi quiax ꞌësë́nancëxa.

Jesusan aín Papabëtan ñu ꞌa

¹⁹ Usa ꞌain ca Jesusan atu cacëxa: —Asérabi cana mitsu cain, ꞌëx Nucën Papa Diosan Bëchicë ꞌixunbi cana ꞌënbi ñu ꞌaiman. ꞌËn Papan ñu ꞌaia isquin cuni cana ꞌënribi ꞌain. ꞌËn Papan bëtsi bëtsi ñu ꞌacëbëtan cana ꞌëx aín Bëchicë ꞌixun ꞌënribi an ꞌacësaribi oquin ꞌain.

²⁰ ꞌËn Papan ca ꞌëxira aín Bëchicë ꞌicë nuibaquin an ꞌacë ñucama ꞌë ismia. An ca mitsúnmi iscësamaira ñu, a isími mitsux ratúti, a ꞌë isminuxun ꞌaia.

²¹ ꞌËn Papan ca uni bama abi baísquimitancëxun axa tsónun ꞌimiti ꞌicën. Usaribiquin cana ꞌëx aín Bëchicë ꞌixun ꞌimitisa tanquin ꞌënribi tsónun uni ꞌimiti ꞌain.

²² ꞌËn Papax ca uicamax cara aín ꞌucha tërë́ncë ꞌicë quianan uicamaxribi cara ꞌuchañu ꞌicë quiax quima. Usa ꞌixun ca ꞌëx aín Bëchicë ꞌicë usoquin ꞌanun ꞌë cuni ꞌimiaxa,

²³ a rabicësaribi oquían camabi unin ꞌëribi rabinun. An aín Bëchicë ꞌicë ꞌë rabicëma, an ca ꞌën Papa an ꞌë xuá, aribi rabima.

²⁴ Asérabi cana ꞌën mitsu cain, axa ꞌën bana cuati an ꞌë xuá ami sináncë uni, ax ca ainan ꞌaish nëtë́timoi Nucën Papa Diosnan ꞌia. A cupía Nucën Papa Diosnan ꞌitima ꞌicëbi aín ꞌuchacama tërë́ncë cupí ꞌuchañuma ꞌaish ca bamatancëxbi nëtë́timoi Nucën Papa Diosbë ꞌiti ꞌicën.

²⁵ Usa ꞌain cana asérabi mitsu cain, ca uti ꞌicën, anúan aín ꞌucha cupí bamacësa ꞌixunbi unicaman ꞌën bana cuati nëtë. ꞌËn bana unin cuati nëtë, a nëtë ca ënëx ꞌicën. Usa ꞌain ca an —asérabi ca aín bana ꞌicë —quixun ꞌë ꞌunánquin ꞌëx quicësabi oquin ñu ꞌacë unicama ax, aín ꞌucha tërë́ncë cupí Nucën Papa Diosnan ꞌaish, nëtë́timoi abë ꞌiti ꞌicën.

²⁶ Usa ꞌinun ca Nucën Papa Diosan, ënë nëtënu tsónan ainan ꞌaish aín nëtënuribi abë ꞌinun uni ꞌimia. An ca aín Bëchicë ꞌënribi usaribi oquin uni ꞌiminun ꞌë ꞌimiaxa.

²⁷ Uni ꞌinux anuax uá cupí ca uicamax cara aín ꞌucha tërë́ncë ꞌicë isanan uicamax cara ꞌuchañu ꞌicë isnun, Nucën Papa Diosan ꞌë ꞌimiacëxa.

²⁸ Usa ꞌain ca ꞌën mi ñuixuncëxun cuati ratúaxma ꞌit. Anúan ꞌëx ucëbëtan ꞌën bana cuati, bama unicama baísquiti nëtë ca uti ꞌicën.

²⁹ Baísqui ca anu maían anuax chiquíti ꞌicën. An upí ñu ꞌá unicamaxa Nucën Papa Diosbë nëtë́timoi ꞌinux baísquimainun ca an ñu ꞌatima ꞌá unicamax aín ꞌucha cupí ꞌuchocë ꞌinux baísquiti ꞌicën.

Nucën Papa Diosan Jesús xuá ñui quicë bana

³⁰ Ësaquinribi ca Jesusan cacëxa: —ꞌËn cana ꞌënbi sinánquin ñu ꞌaiman. ꞌËn Papan ꞌë cacësabi oquin cana ꞌën, cara castícancë ꞌiti ꞌicën, cara castícancë ꞌitima ꞌicë quixun uni cain. ꞌËx cuëëncësoquin ꞌaquinma cana an ꞌë xuá, axa cuëëncësabi oquin ñu ꞌain. Usa ꞌain ca ꞌën uni cacë banax asábi ꞌicën.

³¹ ꞌËxbi, usa cana ꞌëx ꞌai quiax quia ca unin ꞌën bana ca asérabi ꞌicë quixun ꞌunántima ꞌicën.

³² Usa ꞌaínbi ca axa ꞌë ñui quicë ax Nucën Papa Dios ꞌicën. ꞌË ñuia quicë bana ax ca asérabi ꞌicë quixun cana ꞌunanin.

³³ Mitsun camina ꞌë ñuiquian a ñucánun quixun Juanu uni xuan. Xucëx cuanxun ca ñucáxa, ñucácëxuan Juanën ꞌë ñuiquin cacë bana ax ca cëmëma ꞌicën.

³⁴ Uisai cara uni ꞌë ñui quiti ꞌicë usai quicëbëtanbi cana ꞌënbi, ꞌën bana ca asérabi ꞌicë quixun ꞌunanin. ꞌËn cana Juanëxa ꞌë ñui quicë banami sinánun mitsu sinánmin, a bana sinanimi Nucën Papa Diosnan ꞌinux ꞌëmi catamëti ië́nun.

³⁵ Unían upí oquin isnuan bëánquibucë ꞌaínbi lamparínën pëcacësaribi oquin ca Juanën ꞌë ñuiquin uni bana ñuixuanxa. Usaquian ñuixuncëbë camina mitsux bënëtishi aín bana cuati cuëëan.

³⁶ Juanëan ꞌë ñuiquin mitsu cacë ꞌixun camina an cacësabi oquin ꞌën ꞌaia isquin upí oquin ꞌunánti ꞌain, Nucën Papa Diosan ca ꞌë xuacëxa quixun.

³⁷ Mitsun aín bana cuacëma ꞌixunmi uisa cara ax ꞌicë quixun iscëma ꞌaínbi ca Nucën Papa Dios, an ꞌë xuá, aín banax ꞌë ñui asérabi quia.

³⁸ Nucën Papa Diosan xucë ꞌicëbimi mitsun ꞌën bana cuacëma ꞌain cana ꞌunanin, camina aín bana mitsun nuitunën sinánquin cuacëma ꞌai quixun.

³⁹ Uisari caramina ainan ꞌaish xënibua ꞌaínbi abë ꞌiti ꞌai quixun ꞌunánuxun camina Nucën Papa Diosan bana cuënëo upí oquin isin. Usa ꞌaínbi ca a bana ꞌë ñuia quicë ꞌicën.

⁴⁰ A banaxa usai ꞌë ñui quicë ꞌaínbi camina ainan ꞌaish Nucën Papa Diosbë ꞌinux ꞌëmi catamëisama tanin.

⁴¹ Unían ꞌë rabiti cana sinaniman.

⁴² ꞌËn cana mitsu ꞌunan. Mitsun nuitunënbi camina Nucën Papa Diosmi sinanima cana ꞌunanin.

⁴³ ꞌËx ꞌën Papan xucëx uá ꞌicëbi camina mitsun ꞌën bana cuaisama tanin. Usa ꞌixunbi camina Nucën Papa Diosan xucëxmabia axbi ucë unin bana cuati ꞌain.

⁴⁴ Nucën Papa Dios axëshi Dios ꞌixun mitsu upíoti cuëënima camina mitsúxbi upíonani rabiananti cuëënin. ¿Nucën Papa Diosan mitsu upí oti cuëëncëma ꞌaish caramina uisax ꞌëmi catamëti ꞌain? Camina ꞌitima ꞌain.

⁴⁵ ꞌËn isana mitsumi Nucën Papa Dios manóin quixun sinánxunma ca ꞌat. Moisésnëan cuënëo bana, ax isa upí ꞌicë quiáxmi quicë, ax ꞌë ñui quicë ꞌaínbimi ꞌëmi sináncëma cupí camina ꞌuchocë ꞌiti ꞌain.

⁴⁶ Moisésnëan ꞌë ñuiquin cuënëo ꞌain camina an cuënëo bana ca aserabi ꞌicë quixun sináncë ꞌaish ꞌëmiribi sinántsian.

⁴⁷ Usa ꞌaínbi camina Moisesnëan cuënëo bana cuaisama tancë ꞌixun ꞌëx quicë bana cuatima ꞌain. Usaquin ca Jesusan judíos unicama cacëxa.