Juan 4 - Kashibo-Kakataibo Biblia

Samaritana xanubë Jesús bana

¹ Fariseo unicaman ca —Juanën ꞌunánmicë unicama ꞌitsaribi ꞌaínbi ca Jesusan ꞌunánmianan nashimicë unicamaxira ꞌaisamaira ꞌicë —quixuan ñuicania cuacëxa.

² Usa ꞌaínbi ca Jesusanma aín ꞌunánmicë unicaman cuni uni nashimiacëxa.

³ Usaquian fariseo unicaman cuacëxun ꞌunánbiani ca Jesús Judea menuax amiribishi Galilea menu cuantëcëancëxa.

⁴ Anu cuanti sinani ca Jesús Galilea nëtënu cuani Samaria ꞌabiani cuancëxa.

⁵ Cuanx ca Jacobnëan aín bëchicë José ꞌinan me ꞌurama ꞌicë ëma, Sicar cacë, anu bëbacëxa.

⁶ Bëbatancëx ca Jacobnëan naëa ꞌunpax anu ꞌain, Jesús ꞌuran cuanbaiti cuainsama tani, baria xamárucëbë, a rapasu tsóbuacëxa.

^7-8 Tsóbutancëxa anu tsómainun ca aín ꞌunánmicë unicama a piti ñu bitsi Jesús ëbiani cuancëxa. Cuan ca Samaria nëtënu ꞌicë xanu achúshi ꞌunpax bitsi uacëxa. Chumu bëi aia isquin ca Jesusan cacëxa: —¿ꞌË ca ꞌunpax ꞌanun ꞌinan?

⁹ Cacëxun ca a xanun cacëxa: —¿Uisati caramina mix judío uni ꞌixunbi ꞌëx samaritana xanu ꞌicëbi ꞌunpax ꞌinánun quixun ꞌë cain?, judíos unicamax samaritano unicamabë nuibanancë ꞌaínmabi.

¹⁰ Cacëxun ca Jesusan cacëxa: —Ën mi ꞌunpax ñucácë ꞌaínbi camina ui carana ꞌai quixun ꞌë ꞌunaniman. ꞌË ꞌunánan añu cara Nucën Papa Diosan mi ꞌinánti ꞌicë quixun ꞌunáncë ꞌixun camina ꞌë ñucátsian. Ñucácëxun cana anúnmi nëtë́timoi Nucën Papa Diosnan ꞌiti ꞌunpax mi ꞌinántsian.

¹¹ Cacëxun ca cacëxa: —Anua ꞌunpax biti ënëx ca nëmin ꞌicën. Anun ꞌunpax biti ñuñuma camina ꞌain. ¿Uinua caramina anun ꞌëx nëtë́timoi Nucën Papa Diosnan ꞌiti ꞌunpax a biti ꞌain?

¹² ¿Nucën rara Jacóbsamaira caina mix ꞌain? An ca ënë anua ꞌunpax biti naëacëxa, naëxun ca ꞌacëxa, ꞌanan ca aín bëchicëribi ꞌamianan a rabucucë ñuinacamaribi ꞌamiacëxa. Jacobnën aín rëbúnquicamanribia ꞌanun naëa ꞌicë cananuna nunribi ënë ꞌunpax ꞌain.

¹³ Cacëxun ca Jesusan cacëxa: —An ënë ꞌunpax ꞌacë uni, ax ca amiribishi shimatëcënia.

¹⁴ Usa ꞌaínbi ca an ꞌën ꞌináncëxun ꞌunpax ꞌacë uni, ax amiribishi shimatëcëntima ꞌicën. Me ꞌucë mëúcüaxa chiquitia ꞌunpax xobucësaribiti ca ꞌën ꞌináncë ꞌunpax nëtëtima uninu ꞌiti ꞌicën. Usaía ꞌicëbë ca uni nëtë́timoi Nucën Papa Diosnan ꞌiti ꞌicën.

¹⁵ Usaquian cacëxun ca xanun cacëxa: —A ꞌunpax ca ꞌë ꞌinan. Amiribishi shimai ꞌunpax bitsi utëcënunma ca ꞌë ꞌinan.

¹⁶ Cacëxun ca Jesusan cacëxa: —Min bënë cuënbëtsini ca abë utan.

¹⁷ Cacëx ca —ꞌëx cana bënëñuma ꞌai —quiacëxa. Quia ca Jesusan cacëxa: —Usa ca. Bënëñuma cana ꞌai qui camina cëmëiman.

¹⁸ Mix camina mëcën achúshi bënëñu ꞌiacën. Usa ꞌaínbi ca axa bërí mibë ꞌicë uni ax asérabi min bënëma ꞌicën. Usa ꞌain ca —bënëñuma cana ꞌai —quiaxmi quicë ax cëmëma ꞌicën.

¹⁹ Cacëxun ca xanun cacëxa: —Bërí cana mix caina ui ꞌai quixun ꞌunanin. Mix camina an Nucën Papa Dios quicë bana uni ñuixuncë uni a ꞌain.

²⁰ Samaria unicama nun raran ca tucu ënuxun Nucën Papa Dios rabiacëxa. Usa ꞌaínbi camina mitsux quin, Jerusalénuxun ca unin Nucën Papa Dios rabiti ꞌicë quiax.

²¹ Cacëxun ca Jesusan cacëxa: —Asérabi cana mi cain, anúnmi ënë tucunuxunmabi, Jerusalénuxunmabi anumi mitsux ꞌicënuxunbi, Nucën Papa Dios rabiti nëtë ca aia.

²² Mitsun camina ui caramina rabi quixun ꞌunaniman. Nun cananuna ui caranuna rabi quixun ꞌunanin. An uni Nucën Papa Diosnan ꞌinun ië́miti, ax ca judío uni ꞌiti ꞌicën. An usaia ꞌinun mënío, a cananuna nun rabin.

²³ Anúan an Nucën Papa Dios rabicë unix asérabi ami sinani ax cuëëncësabi oi ꞌiti cuëënquin a rabiti nëtë ca aia, bërí ca a nëtë ꞌicën. Usaquian unin a rabiti ca Nucën Papa Dios cuëënia.

²⁴ Nucën Papa Dios, ax ca unima ꞌaish nami, imi, xo, acamañuma ꞌicën, a ca unin isima. Usa ꞌain ca an Nucën Papa Dios rabicë unin asérabi ami sinani ax cuëëncësabi oi ꞌiti cuëënquin a rabiti ꞌicën.

²⁵ Cacëxun ca xanun cacëxa: —Mesías, Cristo cacë, ax ca uti ꞌicë quixun cana ꞌunan. Ax uquin ca nun nu ꞌunánun camabi ñu ñuixunti ꞌicën.

²⁶ Cacëxun ca Jesusan cacëxa: —A cana ꞌëx ꞌain, abë camina banain.

²⁷ Cacëbëbi ca aín ꞌunánmicë unicama utëcëancëxa. Uquin xanubëa Jesús banaia isi ratúquinbi ca uinu ꞌicë unínbi —¿añu caramina cuëënin? —canan —¿añu ñui caramina a xanubë banain? —quixun cáma ꞌicën.

²⁸ Usa ꞌain ca a xanun aín ñutë tsónbiani aín ëmanu cuanx bëbaquin anu ꞌicë unicama cacëxa:

²⁹ —ꞌËbë banaquin ca achúshi unin ꞌëx usai ꞌicëcama ñuiquin ꞌë caxa. Ënëx sapi ca asérabi Cristo ꞌicën, ca isi ut.

³⁰ Usaquian xanun cacëxa ca a ëmanu bucucë unicama anua Jesús ꞌicë anu ricuatsiancëxa.

³¹ A xanúa cuancëbëtan ca aín ꞌunánmicë unicaman Jesús —camina piti ꞌai —quixun cacëxa.

³² Cacëxunbi ca Jesusan cacëxa: —Mitsun ꞌunáncëma pitiñu cana ꞌëx ꞌain.

³³ Cacëx ca aín ꞌunánmicë unicamax —bëtsi unin sapi ca a piti bëxuanxa —quiax canancëxa.

³⁴ Canania isquin ca Jesusan cacëxa: —An ënë menu ꞌë xuá axa cuëëncësabi oquin ꞌanan an a ꞌanun ꞌë ca, a sënë́onuxun ꞌai cana ꞌëx picësa ꞌain. Usaquin ꞌën ꞌacëx ca ax ꞌën piti ñusa ꞌicën.

³⁵ Ësoquian cacëbëbia a ëmanu ꞌicë unicamax aia isquin ca Jesusan aín ꞌunánmicë unicama cacëxa: —Mitsux camina quin, rabë́ ꞌimainun rabë́ ꞌuxë cëñúcëbëa shaínquibutia cananuna ñu bimi biti ꞌain. Usa ꞌaínbi cana ꞌën mitsu cain, ca is, axa ucë unicama ënëx ca anun biti nëtë sënë́ncëbëtan aín ꞌibun binuan bimi pëcëti sënë́ncësaribi ꞌicën.

³⁶ An uni ꞌëmi catamënun ꞌaquincë uni an ca aín cupí bitsia. A unin ꞌaquincëxa ꞌëmi catamëcë unicama ax ca xënibua ꞌaínbi Nucën Papa Diosnan ꞌia. Usa ꞌain ca an paían ꞌën bana uni ñuixuncë unicamabë an ꞌëmi catamënun uni ꞌaquincë unicamaxribi cuëënti ꞌicën, atúan ꞌënan ꞌinun uni ꞌaquincë cupí.

³⁷ Usa ꞌain ca ësai quicë banax asérabi ꞌicën: Bëtsi unían ꞌapácëxa pëcëtia ca bëtsi unin bimi bitsia.

³⁸ Mitsúnmi bëtsi unían ꞌunánmicë unicama ꞌëmia catamënun upí oquin ꞌaquinun cana mitsu xuan. Uni raírinëan ꞌunánmicë ꞌicëbi camina mitsun a unicama upí oquin ꞌëmia catamënun ꞌimian.

³⁹ Usai Jesús aín ꞌunánmicë unicamabë banamainuan a xanun cuanxun —a unin ca ꞌëx usai ꞌicëcama ñuiquin ꞌë caxa —quixun cacëx ca a ëmanu ꞌicë samaritano uni ꞌitsáxira —Jesús ax ca Nucën Papa Diosnuax ucë ꞌicë —quixun sinani Jesúsmi sináncëxa.

⁴⁰ Ami sinánquin a isi cuanxun ca Jesús cacëxa: —Nubë pain camina ꞌi cuanti ꞌain. Cacëx cuanx ca atubë rabë́ nëtën ꞌiacëxa.

⁴¹ ꞌIxúan, bana ñuia cuati ca samaritano ꞌitsáxira —asérabi ca ax Nucën Papa Diosnuax ucë ꞌicë —quixun ꞌunani ami sináncëxa.

⁴² Usai ꞌiquin ca a unicaman a xanu cacëxa: —Minmi nu cacëxun cuaxunbi cananuna bërí nunbi aín bana cuaquin ꞌunanin, asérabi ca ax Cristo, an camabi menu ꞌicë uni Nucën Papa Diosnan ꞌinun ië́miti, a ꞌicë quixun.

An ꞌapu ñu mëëxuncë unin bëchicëa Jesusan pëxcüa

⁴³ Usa ꞌain ca rabë́ nëtë anu ꞌitancëx Jesús anuax cuanx Galilea nëtënu bëbai cuancëxa.

⁴⁴ Cuanux ca quiacëxa: —An Nucën Papa Dios quicë bana unicama ñuixuncë uni a ca anuaxa canicë nëtënu ꞌicë unicaman aín bana cuaisama tania.

⁴⁵ Usai quiax cuanxa Galilea nëtënu bëbaia ca anu ꞌicë unicaman upí oquin Jesús biacëxa. A unicamax Pascua anun carnero ꞌati nëtë ꞌain, Galileanuax Jerusalénu cuancë ꞌixun ca an ñu ꞌaia iscë ꞌixun a unicaman aín nëtënua bëbaia cuëënquin Jesús biacëxa.

⁴⁶ Usa ꞌain ca Galilea nëtënua ꞌicë ëma Caná, anuxuan bëráma ꞌunpax vino ocë, anu Jesús bëbacëxa. Bëbamainun ca ꞌapun uni achúshi aín bëchicënëx Capernaúm ëmanu ꞌinsíncë ꞌiacëxa.

⁴⁷ Usa ꞌain ca Jesús Judea nëtënuax Galilea nëtënu bëbaia quixuan unin ñuia cuabiani cuanxun ꞌapun unin mëraquin Jesús cacëxa: —ꞌËn bëchicë ca ꞌinsíanxa, ca bamatisa ꞌicën. A camina ꞌë pëxcuxuni cuanti ꞌain.

⁴⁸ Cacëxun ca Jesusan cacëxa: —Mitsun camina ꞌën, uni itsin ꞌacëma ñu ꞌaiashi istisa tanin. ꞌËn usa ñu ꞌacëbëtanma camina, ëx cana asérabi Nucën Papa Diosnuaxa uá a ꞌai quixun sinántisama tanin.

⁴⁹ Cacëxun ca ꞌapun unin cacëxa: —ꞌËn bëchicë ca nëtë́tisaira ꞌicën. Nëtë́cëmaishi camina a isi cuanti ꞌain.

⁵⁰ Cacëxun ca Jesusan cacëxa: —Min bëchicë ca ñuima, asábi ca, ca istan. Cacëx ca —asérabi ca pëxcúti ꞌicë —quixun sinánbiani cuancëxa.

⁵¹ Usa ꞌain ca baían cuania mërananquinquin an ñu mëëxuncë unicaman cacëxa: —Min bëchicë ca ñucëma ꞌicën, asábi ca.

⁵² Cacëxun ca a tuacën papan cacëxa: —¿Uinu bari ꞌain cara ꞌën bëchicë aín ꞌinsin nëtë́onx? Cacëxun ca —imë́ishi bari cuainacë́cëbë ca aín ꞌitsis nëtë́onxa —quixun cacëxa.

⁵³ Usaquian cacëxun ca a tuacën papan —Anu bari ꞌain ca Jesusan ꞌë, min bëchicë ca ñuima, ca pëxcutia quixun ꞌë coonxa quixun sináncëxa. Usaquin sinani ca aín xubunu ꞌicë unicamabë —asérabi ca Jesús Nucën Papa Diosnuax ucë ꞌicë —quiax ami sináncëxa.

⁵⁴ Usaquin ca Jesusan Judea nëtënuax cuantancëxun Galilea menuxun bëráma ꞌacësa oquin uni itsin ꞌacëma ñu ꞌatëcëancëxa.