Juan 3 - Kashibo-Kakataibo Biblia

Nicodemoa Jesús isi cuan

¹ Fariseo uni achúshi ca Nicodemo caquin anëcë ꞌiacëxa. Ax ca judíos unicaman ꞌapu achúshi ꞌiacëxa.

² Usa ꞌixun ca anu ñantan cuanxun Jesús cacëxa: —Unían mix camina cushiira ꞌai quixun ꞌunánun camina uinu ꞌicë unínbia ꞌacëma ñu ꞌain. Nucën Papa Diosa abëma ꞌain ca uinu ꞌicë unínbi minmi ꞌacësoquin ñu ꞌatima ꞌicën. Usa ꞌain cananuna ꞌunan, Nucën Papa Diosan ca minmi nu ꞌunánminun ënë menu mi xuacëxa quixun.

³ Cacëxun ca Jesusan cacëxa: —Asérabi cana ꞌën mi cain, axa aín cushin bacë́ntëcëncëma uni ax ca Nucën Papa Diosnan ꞌitima ꞌicën.

⁴ Usaquian cacëxun ca Nicodemonën cacëxa: —¿Uisax cara bëráma cania ꞌaish uni bacë́ntëcënti ꞌic? ¿Amiribishi cara aín titan pucunu atsíanx bacë́ntëcënti ꞌic?

⁵ Nicodemonën cacëxun ca Jesusan cacëxa: —Usama ca. Asérabi cana ꞌën mi cain, ꞌunpax ꞌimainun Nucën Papa Diosan Bëru Ñunshin Upitan bacë́ntëcëncëma uni ax ca Nucën Papa Diosnan ꞌitima ꞌicën.

⁶ Axa xanunuax bacë́ncë, ax ca unishi ꞌia; axa aín Bëru Ñunshin Upitan bacë́ncë uni, ax ca Nucën Papa Diosan Bëru Ñunshin Upíñu ꞌia.

⁷ Nucën Papa Diosan cushin camina bacë́ntëcëncë ꞌiti ꞌai quixun ꞌën mi cacëx ratúaxma ca ꞌit.

⁸ Uinuax cara suñu bëëqui banaquiania camina cuatin, ꞌixunbi camina isima, uinuax cara a suñu aia, uinu cara cuania quixun. An ñu shaícaianu suñu iscëma usaribi oquin cananuna Nucën Papa Diosan Bëru Ñunshin Upitan uni bacëntëcënmia isiman.

⁹ Cacëxun ca Nicodemonën Jesús catëcëancëxa: —¿Uisa ꞌaish cara usai ꞌiti ꞌic?

¹⁰ Cacëxun ca Jesusan Nicodemo cacëxa: —¿Mix an Israel unicama ꞌunánmicë ꞌixunbi caramina ꞌën mi cacëxun uisai qui quicë cara quixun cuatiman?

¹¹ Asérabi cana mi cain, nun ꞌunáncë ñu ñuianan nun iscë ñuribi ñui cananuna nux quin. Quiabi camina nun bana ca asérabi ꞌicë quixun sinaniman.

¹² ¿Ënë menu ꞌicë ñu ꞌën ñuia cuaquinma caramina uisaxun ꞌën naínu ꞌicë ñu ñuia cuati ꞌain?

¹³ Uinu ꞌicë unínbia anu ꞌicë ñu ꞌunáncë ꞌaímabi cana ꞌën cuni anuax uá ꞌixun ꞌunanin.

¹⁴ Moisésnëan anu uni ꞌicëma menuxun manë ꞌacë runu, camabi unin isnun, i nitsínxun anu nansaribi oquin ca uni ꞌinux Nucën Papa Diosnuax uá ꞌicë, ꞌë unin ꞌati ꞌicën,

¹⁵ uinu ꞌicë unix cara ꞌëmi catamëtia axa nëtë́timoi Nucën Papa Diosnan ꞌinun.

Nucën Papa Diosan ënë menu ꞌicë unicama nuibacë bana

¹⁶ Camabi uni asérabi nuibaquin ca Nucën Papa Diosan aín Bëchicë achúshi ënë menu xuacëxa, uicamax cara ami catamëtia axa nëtë́timoi abë ꞌinun.

¹⁷ Nucën Papa Diosan ca aín Bëchicë an ënë menu ꞌicë unicama aín ꞌucha cupí ꞌuchonun xuáma ꞌicën. Ama, ënë menu ꞌicë unicama aín ꞌucha tërë́nquin ainan ꞌinun ië́minun quixun ca xuacëxa.

¹⁸ Aín Bëchicëmia catamëcë uni ax ca Nucën Papa Diosan ꞌuchocë ꞌima. Usa ꞌaínbi ca axa ami catamëcëma uni ax aín Bëchicë achúshi ami catamëcëma cupí Nucën Papa Diosan aín ꞌucha cupí castícantishi ꞌicën.

¹⁹ Axa ami sináncëma unicamax ca aín ꞌucha cupí Nucën Papa Diosan castícantishi ꞌicën, atúan an aín sinan upíira ꞌixun uni upí ꞌimiti ax uánbi ami catamëisama tanquin ꞌatima ñu ꞌatishi cuëëncë cupí.

²⁰ An ñu ꞌatima ꞌacë unicaman ca an ꞌaia unin isti rabanan xabánuxun ꞌati cuëënquinma bëánquibucënuxun ñu ꞌaia.

²¹ Usa ꞌaínbi ca an Nucën Papa Dios cuëëncësabi oquin ꞌacë uni, an ꞌaia isquian —an ca Nucën Papa Diosan ꞌaquincëxun ñu ꞌaia —quixun unin ꞌunánun xabánuxun ñu ꞌaia.

Amiribishia Juanën Jesús ñuitëcëan bana

²² Usa ꞌain ca Jesusan aín ꞌunánmicë unicamabë Judea menu ꞌicë ëmacamanu cuantancëx anu ꞌixun uni nashimiacëxa.

^23-24 Nashimimainun ca Juanënribi sipuacëma pain ꞌixun Enón caquin anëcë ëma, anua ꞌitsa ꞌunpax ꞌain, anuxun uni ricuatsincë nashimiacëxa. Enón cacë ëma ax ca Salim caquin anëcë ëma ꞌurama ꞌiacëxa.

²⁵ Usa ꞌain ca judío uni achúshinëx Juanëan ꞌunánmicë unicamabë, aín raraxa quiásabi oquin Nucën Papa Diosa cuëënun ñu ꞌati ñui cuëbicanancëxa.

²⁶ Usai cuëbicananquiani anu cuanxun ca Juan cacëxa: —A ñuiquinmi nu cacë uni axa mibë Jordán ꞌucë manan ꞌicë, Jesús, an unicama nashimicëbë ca camabi unix anu ricuatsinia.

²⁷ Cacëxun ca Juanën cacëxa: —Uinu ꞌicë unínbi ca Nucën Papa Diosan ꞌimicëxunma usa ñu ꞌatima ꞌicën.

²⁸ Mitsun camina, Cristoma cana ꞌai ꞌëx quia cuan. Nucën Papa Diosan ca ꞌë caxua ax unun ꞌëx pain rëcuë́ncuatsini unun ꞌë xuaxa.

²⁹ Ësa ca. Ainan ꞌinúan unin bicëx ca xanu ainan ꞌia. Ainan ꞌiti xanu bitsia uni cuëëni banaia cuati ca axa abë nicë uníxribi cuëënia. Usaribiti cana ꞌëx —unicaman ca Jesusan bana cuatia —quixunmi mitsun ꞌë cacëxun cuati chuámarua tani cuëënin.

³⁰ Usa ꞌain ca Nucën Papa Diosan usai ca ꞌiti ꞌicë quixun ñuiasabi oi, axira ꞌësama cushiira ꞌain camabi unix ꞌë ëanan anuishi cuanti ꞌicën.

Axa naínuax ucë uni ñuicë bana

³¹ Axa naínuax uá, an unio ñucamabë sënë́nma cushiira ꞌaish ca bëtsi unisamaira ꞌicën. Unían bëchicëxa bacë́ncë uni an ca unishi ꞌixun ënë menu ꞌicë ñuishi ñuia. Axa Nucën Papa Diosnuax uá, ax ca an unio ñucamabë sënë́nma cushiira ꞌaish bëtsi unisamaira ꞌicën.

³² An ca an iscë ñucama ñuianan, an cuacë banacamaribi ñuia, ñuiabi ca uinu ꞌicë unínbi aín bana ca asérabi ꞌicë quixun sinanima.

³³ Usa ꞌaínbi ca axa aín bana cuati ami catamëcë uni, an —Nucën Papa Diosan banax ca asérabi ꞌicë —quixun sinánan —ca usa ꞌicë —quixun unicama ñuixunia.

³⁴ Usai ꞌinun ca Nucën Papa Diosan aín Bëru Ñunshin Upí ñonquinma aín Bëchicë ꞌinania. Usaquian ꞌináncëxun ca an xucë́xa ucë uni, Jesús, an aín Bëru Ñunshin Upitan sinánmicë ꞌixun Nucën Papa Dios cuëëncësabi oquin unicama bana ñuixunia.

³⁵ Nucën Papa Diosan ca aín Bëchicë nuibaquin axa aín ꞌibu ꞌinun camabi ñu a ꞌináncëxa.

³⁶ Axa aín Bëchicëmi catamëcë uni, ax ca ainan ꞌaish Nucën Papa Diosbë nëtë́timoi ꞌia. Usa ꞌaínbi ca axa Nucën Papa Diosan Bëchicëmi sinántisama tancë uni, ax ainanma ꞌaish Nucën Papa Diosbë nëtë́timoi ꞌima. A uni ca Nucën Papa Diosan aín ꞌucha cupí ꞌaisamaira oquin castícancë ꞌiti ꞌicën.