Juan 15 - Kashibo-Kakataibo Biblia

Aín icëñun uvasnën pëñan Jesusan bana ñuixuan

¹ Usaquin catancëxun ca ësaquinribi Jesusan aín ꞌunánmicë unicama cacëxa: —Ësa ca. ꞌËx cana uvas ꞌapácë aín i rarasaribi ꞌain. ꞌImainun ca ꞌën Papax an ñu ꞌapácë bërúancë unisa ꞌicën.

² Usa ꞌixun ca an uinu ꞌicë ꞌën pëñanëx cara bimiñuma ꞌicë a tëaxun nia. Nianan ca uinu ꞌicë ꞌën pëñanëx cara bimiñu ꞌicë a upíira oquian tuanun ramëníoia.

³ Micaman ꞌën mitsu ñuixuncë bana cuacë cupí camina mitsun nuitu mëníocë ꞌaish upí ꞌain.

⁴ ꞌËx mitsubë ꞌimainun ca mitsúxribi ꞌëbëbi ꞌit. Ësa ca: Uva pëñan pëónxquicë ꞌaish aín i rarami upiti tacáshquicëma ꞌixun ca upí oquin tuaima. Upiti aín rarami tacáshquicë ꞌixun cuni ca upí oquin tuaia. Usaribiti camina mitsux asérabi ꞌëbë ꞌima uvas tuáñumasaribi ꞌiti ꞌain.

⁵ ꞌËx cana uvas aín i rarasaribi ꞌain. Aín pëñánsaribi camina mitsux ꞌain. Usa ꞌaish camina ꞌëmi catamëanan ꞌëmi upiti sinánan ꞌëx mibë ꞌain, min sinan ꞌën sinánsaribi ꞌaish ꞌëx cuëëncësabi oquin ꞌanan ꞌën bana quicësabi oi ꞌiti ꞌain. ꞌËx mitsubëma ꞌain camina ꞌëx cuëëncësa oi ꞌitima ꞌain.

⁶ Uva pëñan bimiñuma ax ca unin tëaxun nicëx xanania. Xanania bucúnrutancëxun tsi rëquirucëmi nicëx ca xaratia. Usaribiti ca axa ꞌëmi catamëti ꞌëmi sináncëma unicamax ꞌiti ꞌicën.

⁷ Mitsux ꞌëmi catamëanan ꞌën bana manuima ꞌëx quicësabi oi ꞌicë ꞌixunmi ñucácëxun ca Nucën Papa Diosan mitsúnmi cacësabi oquin mitsu ꞌaquinti ꞌicën.

⁸ Mitsun ꞌën sinánsaribi ꞌixun upí ñu ꞌaia isquin ca unin ꞌunánti ꞌicën, mitsux camina asérabi ꞌën uni ꞌai quixun. Usa ꞌixun ca mitsu cupí unin Nucën Papa Dios rabiti ꞌicën.

⁹ ꞌËn Papan ꞌë nuibacësaribi oquin cana mitsu ꞌitsaira nuibatin. ꞌËn mi nuibamainun camina ꞌë manuima ꞌëmi sinánti ꞌicanin.

¹⁰ Ax quicësabi oi ꞌia ca ꞌën Papa Diosan ënquinma ꞌë nuibatia. Usaribitimi ꞌëx quicësabi oi ꞌia cana ꞌënribi ënquinma mitsu nuibatin.

¹¹ ꞌËx ꞌicësaribitimi mitsúxribi chuámarua tani cuëëni bucucanun cana ënë banacama ñuixunquin mitsu cain.

¹² Ënëx ca asérabi ax quicësaími ꞌicanti bana a ꞌicën: ꞌËn mitsu nuibacësaribiti camina bëtsibë bëtsibë nuibananti ꞌain.

¹³ Abëa nuibanancë uni axa bamati ꞌaínbi ca a uni bamati rabanan a nuibacë uni ax bamati ꞌicën. Usa unin ca uni itsin ꞌacësamaira oquin uni nuibatia.

¹⁴ ꞌËn cacësabi oi ꞌi camina mitsux ꞌëbë nuibanancë uni ꞌain.

¹⁵ Usa ꞌain cana ꞌën ñu mëëmicë uni camina ꞌai quixun mitsu caiman. An ñu mëëxuncë unin ca uisoquin ñu ꞌati cara an ñu mëëmicë unin sinania quixun ꞌunanima. ꞌËbë nuibanancë unicama camina ꞌai quixun cana mitsu cain. Usa ꞌicë cana ꞌën Papan ꞌë cacë ñucama mitsu ꞌunánmian.

¹⁶ ꞌËx mitsun ꞌibu ꞌinúnmi ꞌë caíscancëxunmabi cana ꞌënan ꞌinun mitsu ꞌënbi caísan. Usotancëxun cana mitsúnmi ꞌën sinánsaribi ꞌixun upí ñuishi ꞌanun mitsu can, xënibua ꞌaínbia Nucën Papa Dios cuëënun. Usaquin ꞌaia ca ꞌëx cuëëncësabi oquinmi ñucácëxun mitsu ꞌaxúnti ꞌicën.

¹⁷ Usa ꞌain cana mitsu catëcënin, camina bëtsibë bëtsibë nuibananti ꞌain.

Jesúscëñun aín unicamamia ënë nëtënu ꞌicë uni nisha

¹⁸ Ësaquinribi ca Jesusan aín ꞌunánmicë unicama cacëxa: —Nucën Papa Diosan bana cuacëma unicamaxa mitsumi nishcëxun camina sinánti ꞌain, ꞌëmi pain ca nishcancëxa quixun.

¹⁹ Mitsun atun sinánsaribi ꞌicë ca an Nucën Papa Diosmi sinánquinma ënë nëtënu ꞌicë ñuishi sináncë unicaman mitsu nuibatsianxa. ꞌAínbi camina mitsux ꞌën caíscë ꞌaish, atun sinánsama ꞌain. Usa ꞌain ca atun nuibatima mitsumi nishia.

²⁰ ꞌËn ësaquin mitsu cacë a camina sináncanti ꞌain, “an uni ñu mëëxuncë uni an ca an a ñu mëëmicë uni inuíma”. ꞌËmi pain nishquin ca unin ꞌë bëtsi bëtsi oia. Usaribi oquin ca ꞌënan cupí mitsu unin bëtsi bëtsi oti ꞌicën. Usa ꞌaínbi ca uni raírinën ꞌën bana cuati ꞌicën. Usaribi oquin ca ꞌënan cupí uni raírinën mitsun bana cuati ꞌicën.

²¹ Nucën Papa Dios an ꞌë xuá a ꞌunáncëma ꞌixun ca ꞌënan cupí raíri unin mitsu bëtsi bëtsi onuxun ꞌaia.

²² ꞌËn atu bana ñuixuni uáma ꞌain ca atux usabi ꞌitsíanxa. ꞌAínbi cana ꞌëx uá ꞌixun atu bana ñuixuan. Usa ꞌain ca ꞌën bana ꞌunanibi ꞌëmi catamëisama tancë cupí aín ꞌucha tërë́ncëma ꞌaish atun ꞌuchabi ꞌicën.

²³ Axa ꞌëmi nishcë uni, ax ca ꞌën Papamiribi nishia.

²⁴ Atúan isnun ꞌën uni itsin ꞌacëma ñu ꞌacëma ꞌain ca atux usabi ꞌitsíanxa. Usa ꞌaínbi ca ꞌën ꞌacë ñucama isaxa. A cupí ca ꞌëmi nishanan ꞌën Papamiribi nishaxa.

²⁵ Nucën Papa Diosan bana cuënëo ax ca ꞌë ñui ësai quia: “ꞌËn ꞌatima ñu ꞌacë ꞌaímabi ca ꞌëmi nishcanxa”. A bana quicësabi oi ca ꞌia.

²⁶ Unicamax ꞌëmi nishcë ꞌaínbi ca aín Bëru Ñunshin Upí, an Nucën Papa Diosan sináncë ñucama ꞌunánan uni ꞌaquincë, an uisa carana ꞌëx ꞌai quixun mitsu ꞌunánmiti ꞌicën. Ax ca an Nucën Papa Diosan sináncë ñucama ꞌunáncë, a ꞌicën. A cana Nucën Papa Dios cuëëncësabi oquin mitsubëa ꞌinun xuti ꞌain.

²⁷ Mitsúnribi camabi nëtën ꞌëbë ꞌixun ꞌën bana ñuixunia cuanan ꞌën ñu ꞌaia iscë ꞌixun camina ꞌë ñuiquin uisa carana ꞌëx ꞌai quixun unicama ꞌunánmiti ꞌain.