Juan 14 - Kashibo-Kakataibo Biblia

Nucën Papa Diosnan ꞌinux ca uni Jesúsmi catamëti ꞌicë quicë bana

¹ Usaquin catancëxun ca ësaquinribi Jesusan aín ꞌunánmicë unicama cacëxa: —Masá nuituaxma ca ꞌican. Nucën Papa Diosmi camina catamëti ꞌain. Nucën Papa Diosmi catamëti ca ꞌëmiribi catamët.

² ꞌËn Papan ꞌicënu ca anu ꞌiti ꞌitsa ꞌicën. Anu ꞌiti ꞌaíma ꞌain cana, anu ꞌiti ca ꞌaíma ꞌicë quixun mitsu catsían. Usa ꞌain cana anumi ꞌicánti a mitsu mëníoxuni cuanin.

³ Mëníoxunbëtsini cana anumi ꞌëbë ꞌinun mitsu bitsi utëcënuxun ꞌain, ꞌëx anu ꞌicë anumi mitsux ꞌëbë ꞌinun.

⁴ ꞌËx anu cuanti a ꞌunánan camina ëx anun cuanti bai aribi mitsun ꞌunanin.

⁵ Cacëxun ca Tomásnën cacëxa: —Uinu caramina cuanin, a cananuna ꞌunaniman. ¿Usa ꞌixun caranuna uisaxun mix anun cuanti bai ꞌunánti ꞌain?

⁶ Cacëxun ca Jesusan cacëxa: —ꞌËx cana anun cuanti bai, a ꞌain. ꞌIanan cana an Nucën Papa Diosan sináncë ñucama ꞌunánquin ax cuëëncësabi oquin ꞌacë, a ꞌain. ꞌIanan cana an uni anun tsóti nëtë ꞌináncë, a ꞌain. Uix cara Nucën Papa Diosnu cuainsa tania ax ca ꞌëmi pain catamëti ꞌicën.

⁷ Mitsun ꞌë upí oquin ꞌunáncë ꞌixun camina ꞌën Paparibi upí oquin ꞌunántsian. Usa ꞌain camina bërí a ꞌunanin, a camina isan.

⁸ Quia ca Felipenën cacëxa: —Nucën Papa Dios ca nu ismit. Bëtsi ñuuma, ashi cananuna mi ñucatin.

⁹ Cacëxunbi ca Jesusan cacëxa: —¿Camabi nëtën mitsubë ꞌiabi caramina uisa uni carana ꞌai quixun ꞌë ꞌunaniman? An ꞌë iscë uni, an ca Nucën Papa Diosribi isia. ¿Usa ꞌaínbi caramina uisa cupí, nu ca Nucën Papa Dios ismit quin?

¹⁰ ¿ꞌËx cana Nucën Papa Diosbë ꞌain, Nucën Papa Dios ax ca ꞌëbë ꞌicë quixun caramina sinaniman? ꞌËn mi cacë bana ënëx ca ꞌënbi sinani quicë banama ꞌicën. Ax ꞌëbë ꞌixun ca Nucën Papa Diosan ax cuëëncë ñu ꞌanun ꞌë ꞌamia.

¹¹ ꞌËx cana Nucën Papa Diosbë ꞌai quianan Nucën Papa Dios ax ca ꞌëbë ꞌicë quia camina a banax ca asérabi ꞌicë quixun sinánti ꞌain. ꞌËx quicë bana ax ca asérabi ꞌicë quixun sinánquinmabi camina ꞌën ñu ꞌaiami iscë, acama cupí, ꞌëx cana asérabi Nucën Papa Diosnuax uá ꞌai quixun ꞌunánti ꞌain.

¹² Asérabi cana ꞌën mitsu cain, ꞌëx Nucën Papa Diosnu cuancë cupí ca axa ꞌëmi catamëcë uni, an ꞌën ꞌacë ñuribi ꞌati ꞌicën, ꞌanan ca ꞌën ꞌacësamaira oquin ñu ꞌati ꞌicën.

¹³ Añu caramina ꞌën anën ñucácësa oquin ꞌëx cuëëncësabi oquin ñucati, a cana mitsu ꞌaxúnti ꞌain, Nucën Papa Dios ca cushiira ꞌicë quixuan ꞌën ꞌaia isquin unin ꞌunánun.

¹⁴ Añu caramina ꞌë sinánquin ꞌëx cuëëncësabi oquin ñucati, a cana mitsu ꞌaxúnti ꞌain.

Jesusan aín Bëru Ñunshin Upí aín unicamanu xuti

¹⁵ Asérabi ꞌëmi sináncë ꞌixun camina ꞌën mitsu cacësabi oquin ñu ꞌati ꞌain.

¹⁶ Usaquinmi ꞌacëbëtan cana an mitsu ꞌaquinti a mitsubëa ꞌinun xunun Nucën Papa Dios ñucáti ꞌain, axa xënibua ꞌaínbi mitsubë ꞌinun.

¹⁷ Ax ca Nucën Papa Diosan Bëru Ñunshin Upí ꞌicën, an Nucën Papa Diosan sináncë ñucama ꞌunáncë, a. A ca an Nucën Papa Diosan bana sináncëma unin ui cara ax ꞌicë quixun ꞌunántima ꞌicën, ca a istima ꞌicën. Usa ꞌaish ca atux Nucën Papa Diosan Bëru Ñunshin Upíñu ꞌitima ꞌicën. Usa ꞌaínbi camina mitsun a ꞌunánti ꞌain, axa mitsunu ꞌianan xënibua ꞌaínbi mitsubë ꞌicë cupí.

¹⁸ ꞌËn cana mitsu ꞌibuñumoima, cana mitsunu utëcënin.

¹⁹ ꞌItsama nëtë ꞌicëbëtan ca an Nucën Papa Diosan bana cuacëma unin ꞌë istëcëntima ꞌicën. Usa ꞌaínbi camina mitsun ꞌë istëcënuxun ꞌain. ꞌËx pain Nucën Papa Diosbë ꞌicë cupí camina usaribiti mitsúxribi abë ꞌinuxun ꞌain.

²⁰ A nëtën camina ꞌunánuxun ꞌacanin, ꞌëx cana ꞌën Papabë ꞌain, usaribiti camina mitsux ꞌëbë ꞌain, ꞌëxribi mitsubë ꞌimainun.

²¹ An ꞌën bana ꞌunánquin ax quicësabi oquin ꞌacë uni ax ca axa ꞌëmi asérabi sináncë uni a ꞌicën. Axa ꞌëmi sináncë uni a ca ꞌën Papánribi nuibatia. Usaribi oquin cana ꞌënribi a uni nuibaquin uisaira carana ꞌëx ꞌai quixun ꞌunánminuxun ꞌain.

²² Cacëxun ca Judas Iscariote ama, bëtsi Judasnën Jesús cacëxa: —¿Uisa cupí caramina nu uisaira caramina mix ꞌai quixun ismiquinbi an Nucën Papa Diosan bana cuacëma unicamaribi ismitima ꞌain?

²³ Cacëxun ca Jesusan cacëxa: —Uix cara ꞌëmi sinania, ax ca ꞌëx quicësabi oi ꞌiti ꞌicën. Usai ꞌia ca ꞌën Papan nuibati ꞌicën. An nuibacëbë cana ꞌën Papabë ꞌëxribi a unibë ꞌiti ꞌain.

²⁴ Axa ꞌëmi sináncëma uni ax ca ꞌëx quicësabi oi ꞌima. ꞌËn mitsu cacë bana, ënëx ca ꞌënbi sinanx quicëma ꞌicën. Ax ca Nucën Papa Dios, an ꞌë ënu ꞌinun xuá, an ꞌë sinánmicë ꞌicën.

²⁵ Mitsubë ënë nëtënu ꞌixúinshi cana ënë banacama mitsu ñuixunin.

²⁶ Usa ꞌaínbi ca Nucën Papa Diosan ꞌë cupíshi aín Bëru Ñunshin Upí, an uni ꞌaquinti, xuti ꞌicën. Xucëxun ca an camabi ñu ꞌunánmianan ꞌën ñuixuncë banacama manutimoquin mitsu sinánmiti ꞌicën.

²⁷ ꞌËx cuancëbëbi camina chuámashirua bucucanti ꞌain. ꞌËn ꞌimicëx camina ënë menu ꞌicë ñu sinani cuëëncësamaira oi ꞌënan ꞌaish cuëëni chuámarua ꞌiti ꞌain. Usa ꞌain ca masá nuituaxma ꞌianan racuë́axma ꞌican.

²⁸ ꞌËn mitsu, cana cuanin, cuantancëxbi cana mitsubë ꞌinux utëcëni cuani quixun cacëxun camina camaxunbi cuacan. Asérabi ꞌëmi sináncë ꞌaish camina mitsux, ꞌësamaira ꞌën Papa anu cana cuani quixun ꞌën cacëx cuëëntsian.

²⁹ Ënë ñucama ꞌiisama pain ꞌain cana mitsu ñuixuan, mitsúnmi ënë ñucama ꞌia isquin, asérabi cana ꞌëx Nucën Papa Diosan xuá ꞌai quixun ꞌunánun.

³⁰ Ënë banacamaishi cana mitsu cain. An ënë menu ꞌicë unicama ax cuëëncësa oquian ꞌanun ꞌamicë ꞌapu ca aia. Usa ꞌain cana bana itsiribi ñuiquin mitsu caiman. Uxunbi ca an ꞌë uisoima.

³¹ Usa ꞌaínbi cana camabi unían ꞌëx cana ꞌën Papami sinani quixun ꞌunánun, an ꞌë cacësabi oquin ꞌain. Ënëishi cana mitsu cain. Cuanti ca nirut —quixun ca Jesusan aín ꞌunánmicë unicama cacëxa.