Juan 12 - Kashibo-Kakataibo Biblia

Achúshi xanúan Jesús ꞌinínti ron tachuca

¹ Mëcën achúshi ꞌimainun achúshi nëtë anun carnero ꞌati nëtë ꞌiisama pain ꞌain, ca Jesús Betania ëmanu cuancëxa, a ëmanuxuan Lázaro bamacëbi baísquimicë anu.

² Cuanxa Jesús atun ꞌitinu bëban ca Martanën piti ꞌaruacëxa. ꞌAruxuan ꞌináncëxun ca Jesúsbëtan Lázaro ꞌimainun anu ꞌicë unicaman mesanuxun piacëxa.

³ Pimainun ca Maríanën ꞌitsaira cupícë ꞌinínti ro sanuira, nardo cacë, a medio kilosa bëacëxa. Bëxun anun tachabotancëxun ca Jesús aín bun tatërëancëxa. Usoquian ꞌacëxa xubu namë́ camabi tsitsirui bëqui sanuia ca xëcancëxa.

⁴ Usoquian Maríanën Jesús ꞌaia isi ca aín ꞌunánmicë uni achúshi, Judas Iscariote, an uni Jesús ꞌinánti, ax quiacëxa:

⁵ —¿Uisoti caranuna ënë ro maruxun aín cupí trescientos curíqui bixun ñuñuma unicama ꞌináncëma ꞌain?

⁶ Asérabi ñuñuma unicama nuibati sinani ca usai Judas quiáma ꞌicën. Ax an curíqui mëcamacë uni ꞌixun, anua Jesusan aín ꞌunánmicë unicamabëtan curíqui ꞌarucë burasa bërúanquin, anua curíqui mëcamacë ꞌaish ca usai quiacëxa.

⁷ Quia ca Jesusan Judas Iscariote cacëxa: —Usabia ꞌinun ca ën. An ca anúan bamaia ꞌë ꞌati a ro nanxa. A ro ca ënëx ꞌicën.

⁸ Camabi nëtën camina a mitsun ꞌaquinti ñuñuma uni isin. Usa ꞌaínbi camina mitsun xënibuquin ꞌë istima ꞌain.

Lázaromi unicama ꞌësënan

⁹ Usa ꞌain ca —Jesús ca Betanianu ꞌicë —quixun cuabiani a isanan, bamacëbia baísquimicë Lázaro aribi isi judíos unicamax riquiancëxa.

^10-11 Riquiani ca ꞌitsa uni an Lázaro baísquimicë cupí, Jesúsmi sináncëxa. Usa ꞌain ca Jesusan bana cuaquian unicaman atun ñuicë bana cuaisama tancë cupí, sacerdotenën cushicaman Lázaroribi ꞌati sináncëxa.

Jerusalénu cuania unicaman Jesús rabia

¹² Usa ꞌain ca Pascua anun carnero ꞌati nëtën Jerusalénu uëxancë unicamax timëcamëꞌëocë, an —Jesús ca Jerusalénu aia —quixun ñuicania cuacëxa.

¹³ Cuabiani ca camaxunbi xëbin pëchi tëaquin bibiani, bain aia Jesús bëñaquin bitsi biránanquiani riquiancëxa. Riquiancëbëa ucëbë ca munuma banai sharati quicancëxa: —Nucën Papa Dios rabinun ca ꞌacan. Nucën ꞌIbu Diosan xucëx ca Israel unibunën ꞌapu ënëx aia.

¹⁴ Usaquian a rabicamainun ca Jesús burro mërai anu ꞌiruquiani Jerusalénu cuancëxa, usaquiania cuantia Nucën Papa Diosan bana unin ësaquin cuënëosabi oi:

¹⁵ Siónu ꞌicë unicama, racuë́axma ca ꞌican. Mitsun ꞌapu ca burron caxunu tsotax aia.

¹⁶ Usai ꞌia isquinbi ca aín ꞌunánmicë unicaman, a ñuiquin cuënëo bana quiásabi oi ca ꞌia quixun ꞌunánma ꞌicën. Baísquitancëxa Jesús naínu cuantëcëan cuni ca a ñuiquian, usai ca ꞌiti ꞌicë quixun cuënëosabi oi ca ꞌiaxa quixun ꞌunáncancëxa.

¹⁷ Usa ꞌain ca an Jesusan Lázaro bamacë matá me naëcënu mëníoëxancëbi cuënquin baísquimia isëxancë unicaman Jerusalénuxun a bana ñuiacëxa.

¹⁸ Ñuia cuabiani ca anu ꞌicë unicama —usoquin ca Jesusan uni itsin ꞌacëma ñu ꞌaxa —quixun sinani a isti sinánbiani Jesús mërananquini riquiancëxa.

¹⁹ Usaía ꞌicancëbë ca fariseo unicamax canancëxa: —Camina iscanin, camabi unix ca ami sinani a isi cuanxa. Usaía ꞌia isquin camina ꞌunáncanti ꞌain, nun Jesús ꞌacatsi quiax ꞌësë́nanquinbi cananuna añubi oiman.

Griego banan banacë unían Jesús istisa tan

²⁰ Judíos unicamax Pascua anun carnero ꞌati nëtën Jerusalénu cuanmainun ca griego banan banacë unicama raírinëxribi atubë Nucën Papa Dios rabi cuancëxa.

²¹ Cuanxun ca Galilea menu ꞌicë ëma itsi, Betsaida, anu ꞌicë uni, Felipe, a mëraquin cacëxa: —Jesús cananuna istisa tanin.

²² Quixuan cacëx cuanxun ca Felipenën Andrés pain cabiani a rabëtaxbi cuanxun —griego banan banacë unin ca mi istisa tania —quixun Jesús cacëxa.

²³ Cacëxun ca Jesusan Felipecëñun Andrés cacëxa: —Uni ꞌinux Nucën Papa Diosnuax uá ꞌaish cana ꞌëx bamatancëx baísquiti ꞌain. A nëtë ca bërí ꞌurama ꞌicën.

²⁴ Asérabi cana ꞌën mitsu cain, me ꞌucë mëu ꞌapácëma ꞌaish ca ñu bëru aín nami ax usabi ꞌimainun aín napu axribi nëtëtima usabi ꞌia. Me ꞌucë mëu ꞌapácëxun cuni ca aín nami nëtë́cëbëbi aín napu ax cotancëxun upí oquin tuaia.

²⁵ Axa ënë nëtënu upiti tsótishi sináncë uni ax ca ainanma ꞌaish Nucën Papa Diosbë ꞌitima ꞌicën. Usa ꞌaínbi ca axa ënë nëtënu ax cuëëncësa oishi upiti tsótishi sináncëma uni, ax ainan ꞌaish nëtë́timoi xënibua ꞌaínbi Nucën Papa Diosbë ꞌia.

²⁶ Axa ꞌënan ꞌiisa tancë unin ca ꞌëx cuëëncësabi oquin ꞌati ꞌicën. Usoquin ꞌai ca uinu carana ꞌëx ꞌain, anuribi ax ꞌiti ꞌicën. An ꞌëx cuëëncësabi oquin ꞌacë unicama a ca ꞌën Papan nuibaquin ꞌaquinia.

Jesusan aín bamati ñuia

²⁷ Cana ꞌitsaira masá nuitutin. ¿Uisaquin carana ꞌën Papa cati ꞌain? ¿Carana, Papan, bërí uisa cara ocaniabi ca ꞌë ië́mit quixun cati ꞌain? Usama ca. Uisa cara oti ꞌicë usa oquin ꞌacánun cana uacën.

²⁸ Papan, unicaman mix cuëëncësa oquin mi rabinun ca uisashi cara, ꞌë ocancëxbi asábi ꞌiti ꞌicën. Cacëxun ca naínuax banaquin aín Papan cacëxa: —Atúan ꞌë rabinun cana mëníocën, mënío ꞌixun cana ꞌëa rabinun sinánmitëcënti ꞌain.

²⁹ Usai naínuax banaia cuax ca anu ꞌicë unicama raírinëx —caná ca banaxa —quiacëxa. Quimainun ca raírinëxribi —ángel ca Jesúsbë banaxa —quiax quiacëxa.

³⁰ Quia ca Jesusan atu cacëxa: —Ënë banax ca ꞌën cuanun ꞌën Papa quicëma ꞌicën. Mitsúnmi cuanun ca quiaxa.

³¹ Bërí ca ënë nëtënu ꞌicë unicama, cara ꞌëmi sinania, cara ꞌëmi sinanima quixun Nucën Papa Diosan isti ꞌicën. Isanan ca an ꞌëmi sináncëma unicaman ꞌapu, ñunshin ꞌatimanën ꞌapuribi ax cushi ꞌicëbi ꞌën unicama ꞌibuatimoquin ñusmoti ꞌicën.

³² ꞌËx unin i curúsocënu matáscë ꞌitancëxun cana camabi menu ꞌicë uni ꞌëmia sinánun ꞌimiti ꞌain.

³³ Ësoquin ca uisai ꞌiax cara bamati ꞌicë quixun cacëxa.

³⁴ Usaquian cacëxun ca unicaman Jesús cacëxa: —An Nucën Papa Diosan bana cuënëo uni ñuixuncë unían a bana isquin unicama ñuixunia cananuna cuan, ax ca ësai quia, Cristo ax ca nëtë́timoi xënibua ꞌaínbi ꞌiti ꞌicën. ¿Usa ꞌaínbi caramina min, axa Nucën Papa Diosnuax uni ꞌinux uá, ax ca i curúsocënu matáscë ꞌiti ꞌicë quixun nu cain? ¿Ui cara Nucën Papa Diosnuaxa uni ꞌinux uá ax ꞌic?

³⁵ Cacëxunbi ca Jesusan, ꞌëmi camina sinánti ꞌai quixun caquin ësaquin catëcëancëxa: —ꞌItsama nëtë́inshi ca an mitsu upí oquin sinánmiti, ax mitsubë ꞌiti ꞌicën. Usa ꞌain camina ax cuancëma pan ꞌain, an mitsu ꞌunánmicësabi oi ꞌiti ꞌain, ax cuancëbëmi usabi ꞌinun. A an ꞌunánmicëma uni, an ca uisai cara ꞌiti ꞌicë quixun ꞌunanima.

³⁶ Usa ꞌain camina an mitsu upí oquin ꞌunánmiti, axa mitsubë ꞌaínshi, an ꞌacësaribi oquinmi mitsúnribi sinánun, aín bana ca asérabi ꞌicë quixun sinani ami catamëti ꞌain. Usaquin catancëx ca Jesús atun isnunma cuani nëtë́acëxa.

Judíos unicama Jesúsmi sinántisama tan

³⁷ ꞌItsa oquin Jesusan uni itsin ꞌacëma ñu ꞌaia isquinbi ca judíos unicaman ax ca asérabi Cristo ꞌicë quixun sinánma ꞌicën.

³⁸ Nucën Papa Diosan sinánmicëxun aín bana Isaíasnën cuënëosabi oi ca ꞌiacëxa. A banax ca ësai quia: Nucën ꞌIbu, ¿Uinu ꞌicë unin cara, min bana nun ñuixuncëxun cuaquin, asérabi ca quixun sinanx? ¿Uinu ꞌicë unin cara minmi ñu ꞌaia isquin mix camina asérabi cushi ꞌai quixun sinanx?

³⁹ Uisa ꞌaish cara ami sinántisama tania quixuan unin ꞌunánun ca Nucën Papa Diosan bëtsi banaribi Isaías cuënëomiacëxa. Ax ca ësai quia:

⁴⁰ Nucën Papa Diosan ca acama atun nuitu mëu ꞌunántisama tanan atun pabitan cuaquinbi uisai quicë cara quixun ꞌunántisama tanun ꞌimiaxa. ꞌImianan ca atun bërun isquinbi, ꞌëx cana cushiira ꞌai quixun sinántisama tanía ꞌën ië́misama ꞌinun ꞌimiaxa.

⁴¹ Ësaquin ca Isaíasnën cuënëocëxa, an Nucën Papa Diosan ꞌimicëxun Jesusan usoquin ñu ꞌati isanan bana ñuixunti iscë cupí.

⁴² Usa ꞌaínbi ca ꞌitsaira judíos uni ꞌimainun aín ꞌapu raírinënribi Jesús, ax ca Cristo, axa utia atun caíncë, a ꞌicë quixun sináncëxa. Atun nuitu mëu usaquin sinaníbi ca chiquiracëti banama ꞌicën, fariseo unicamami racuëti —atun sapi ca anua judíos unicama timë́ti xubunu nu atsínmitëcëntima ꞌicë —quixun sinani.

⁴³ Nucën Papa Dios cuëënun ꞌicësamairai ca a unicama fariseo unicamami racuëti atux cuëëncësa oíshi ꞌiacëxa.

Jesusan bana cuaisama tancë cupí uni ꞌuchocë ꞌiti

⁴⁴ Usa ꞌain ca Jesusan munuma banaquin atu cacëxa: —Axa ꞌëmi catamëcë uni ax ca ꞌëmishi catamëtíma, Nucën Papa Dios, an ꞌë xuá, amiribi catamëtia.

⁴⁵ An ꞌë iscë uni an ca Nucën Papa Dios, an ꞌë xuá, aribi isia.

⁴⁶ An aín sinan upíira ꞌixun uni upí ꞌimiti ꞌëx cana unicama ñu ꞌatima ꞌacë ꞌaíshbi sinanati ꞌëmi catamëti upí ꞌinun ꞌiminux uacën.

⁴⁷ Uinu ꞌicë unin cara ꞌën bana cuaquinbi ꞌëx quicësabi oquin ꞌaima, a uni cana ꞌën ꞌuchoiman. ꞌËx cana ënë nëtënu ꞌicë uni ꞌuchoi uáma ꞌain. Atúxa Nucën Papa Diosnan ꞌinux ië́nun cana uacën.

⁴⁸ An ꞌë timaquin ꞌën bana cuaisama tancë uni ax ca ꞌën bana quicësa oquin ꞌacëma cupí, ënë mecama cëñúti nëtën ꞌuchocë ꞌiti ꞌicën.

⁴⁹ ꞌËx cana ꞌënbi sinánx banaiman. ꞌËn Papa, an ꞌë xuá, an ca uisai carana banati ꞌain, uisoquin carana uni ꞌunánmiti ꞌai quixun ꞌë caxa.

⁵⁰ ꞌËn cana ꞌunanin, an ꞌë cacë bana ax ca anúan uni ainan ꞌaish Nucën Papa Diosbë nëtë́timoi ꞌiti a ꞌicën. Usaquin ꞌunánxun cana ꞌën Papan ꞌë cacësabi oquin bana ñuin.