Juan 10 - Kashibo-Kakataibo Biblia

An aín cënënuxun carnero bërúancë uni

¹ Ësaquinribi ca Jesusan fariseo unicama cacëxa: —Asérabi cana ꞌën mitsu cain, axa anu carnero ꞌicë cënë aín xëcuën atsinima amo ꞌicë manámitan atsíncë uni ax ca an ñu mëcamacë uni ꞌicën, mëcamaxuan an ñu buáncë uni ca ax ꞌicën.

² Usa ꞌaínbi ca axa aín xëcuën atsíncë uni ax asérabi an carnero bërúancë uni ꞌicën.

³ Axa ucëbëtan an xëcuë xëócacë unin xëócacëbë atsínxuan an bërúancë unin aín anën cuëncëxun ca carnerocaman aín bana cuatia. Cuabëtsinia aia ca cënënua ëman buania.

⁴ Usoxuan rëcuë́nquianquin buáncëxun ca carnerocaman aín bana cuaquin a caxu cuanquin nuibiania.

⁵ A ꞌunáncëma uni, a ca carnerocaman nuima, usa ꞌaish ca an cuëncë́xbi aín bana ꞌunáncëma ꞌaish abatia.

⁶ Usaquin caquian —an carnero bërúancë unisaribi cana ꞌëx ꞌai —quixun caquin Jesusan ꞌunánmisa tancëxunbi ca anu ꞌicë unicaman uisai quicë cara a bana ꞌicë quixun cuama ꞌicën.

Jesusan upí oquin aín unicama bërúancë bana

⁷ Usa ꞌain ca Jesusan amiribishi cacëxa: —Asérabi cana ꞌën mitsu cain, ꞌëx cana carneronën cënën xëcuësaribi ꞌain.

⁸ ꞌËx ucëma pan ꞌaían anpáinra uá unicama ax ca an mëcamacë unisa ꞌiacëxa. Usa ꞌixun ca Nucën Papa Diosan bana isa ñuixunia quixun aín bana cuanun quixun uni paráncëxa. Usa ꞌicë ca atun bana unicaman cuaisama tancëxa.

⁹ ꞌËx cana anua carnero ꞌicë cënënu anun atsínti xëcuësaribi ꞌain. Axa ꞌëmi catamëcë unicama ax ca Nucën Papa Diosnan ꞌinux iëtia. Usa ꞌaish ca chuámashirua ꞌaish, carnerocama cënënuax chiquíxun pasto pitancëx atsíntëcëncësaribi ꞌiti ꞌicën, ꞌen bërúancëx.

¹⁰ Axa mëcamacë unicama, ax ca mëcamanan ꞌaracacë ñuina rëquin ꞌatimoi aia. Usa ꞌaínbi cana ꞌëx a unicaman ꞌacësa oquin ꞌaquinma ꞌëmi catamëtia upitax bucunun unicama ꞌimi uacën, bamatancëxribia xënibua ꞌaínbi Nucën Papa Diosbë ꞌinun.

¹¹ ꞌËx cana ainra carnero upí oquin bërúancë asaribi ꞌain. Ainra carnero upí oquin bërúancë, ax ca aín carnero bamati rabanan bamanuxunbi bëarati ꞌicën.

¹² Usa ꞌaínbi ca an curíqui biti cupíshi carnero bërúanquin ñu mëëcë uni, ax ꞌinu aia isquin carnero ëbiani abatia, ax asérabi aín ꞌibuma ꞌaish. Abácëbë uxun ca bëtsi biquin ꞌinun raíri tsuácaia.

¹³ An carnero upí oquin bërúanti sinánquinma curíqui binuxuinshi ñu mëëcë uni, ax ca carnerocaman rabanan nëëtima abatia.

^14-15 ꞌËx cana ainra carnero upí oquin bërúancë a ꞌain. ꞌËn Papan ca ꞌë ꞌunánxa, ꞌënribi cana a ꞌunan. Usaribi oquin cana ꞌën carnerocamaribi ꞌën ꞌunanin, atúnribi ca ꞌë ꞌunania. Usa ꞌaish cana ꞌëx bamatsianxmabi anun rabanan bamati ꞌain.

¹⁶ Bëtsi carneroñuribi cana ꞌain. A ꞌaíshbi ca ënë cënënu ꞌicëma ꞌicën. Aribi cana ënë cënënua ꞌinun bëti ꞌain. Acamanribi ca ꞌën bana cuati ꞌicën. Usaquin ꞌën ꞌacëx ca ꞌën carnerocamax achúshi cënënushi ꞌiti ꞌicën, achúshishi ca an a bërúancë ꞌiti ꞌicën.

¹⁷ Baísquitëcëanx tsónux ꞌëx bamatsianxmabi bamati cupí ca ꞌën Papan ꞌë nuibatia.

¹⁸ ꞌËx cuëëniama ca unin ꞌë bamamitima ꞌicën. Bamatsianxmabi cana ꞌëxbi cuëëncë cupí bamati ꞌain. ꞌËx cuëëncë cupí cana bamati ꞌain, bamatancëx cana baísquitëcënti ꞌain. Usai ꞌinun ca ꞌën Papan ꞌë caxa.

¹⁹ Usaquian cacëxun cuaxun ca a banan rabanan judíos unicaman bëtsi bëtsi oquin sináncëxa.

²⁰ Sinani ca ꞌitsa uni —ñunshin ꞌatimañu ca a uni ꞌicën, ca ñunshíanxa. ¿Uisa cupí caramina aín bana cuatin? —quiacëxa.

²¹ Usa ꞌain ca raírinëxribishi —ësai ca ñunshin ꞌatimañu uni banaima. Ñunshin ꞌatimanënbi ca bëxuñu uni bëpëxcutima ꞌicë —quiax quiacëxa.

Jesús cuëëanma bana

²² Anuxun a rabiti xubu mëníotancëxun anun ami sinánquin —asábi ca —quixun cá, a nëtë sinánquin Nucën Papa Dios rabinux ca judíos unicama mita ꞌain Jerusalénu timë́acëxa.

²³ Usa ꞌain ca Jesús anuxun Nucën Papa Dios rabiti xubu amo ꞌicë, anua uni niti, Salomón cacë, anun niacëxa.

²⁴ Nitsia ca judíos unicaman nëbë́tsioraquin cacëxa: —¿Uisati caramina nu chiquiracëquin caiman? Mix Cristo, axa utinu nun caíncë, a ꞌixun ca nu upí oquin cat.

²⁵ Cacëxun ca Jesusan cacëxa: —Cana mitsu can, cacëxunbi camina ꞌëx cana a ꞌai quixun sináncëma ꞌain. ꞌËn Papan cacë ꞌixun ꞌën ñu ꞌaia isquin ca unin, ꞌëx cana Cristo ꞌai quixun ꞌunánti ꞌicën.

²⁶ ꞌËn ꞌaia isquinbi, camina ꞌëmi catamëcëma ꞌixun, asérabi cana Cristo ꞌai quixun sinaniman.

²⁷ Carneronëan an bërúancë unin bana cuacësaribi oquin ca axa ꞌëmi catamëcë unin ꞌën bana cuatia. Cuatia cana acama ꞌën ꞌunanin. Usa ꞌixun ca ꞌën bana cuaquin a bana quicësabi oquin ꞌaia.

²⁸ Acama cana nëtë́timoi Nucën Papa Diosnan ꞌinun ꞌimiti ꞌain. ꞌImia ca uínbi atu ꞌë bicuantima ꞌicën.

²⁹ Atux ca ꞌën Papa, axa uinu ꞌicë unibëtanbi sënë́nmaira, an ꞌënan ꞌinun ꞌëmi sinánmiquin ꞌë ꞌináncë ꞌicën. Usa ꞌicë ca uínbi atu a bicuantima ꞌicën.

³⁰ ꞌËx ꞌën Papabë rabë́ ꞌaíshbi cananuna achúshishi ꞌain.

³¹ Usaquian cacëxun ca judíos unicaman anun rëcatsi quixun maxax biacëxa.

³² Bitsia ca Jesusan cacëxa: —ꞌËn Papan ꞌë ꞌamicëxun cana mitsúnmi isnun ꞌitsa ñu ꞌan. ¿ꞌËn usoquin ꞌacë uinu ꞌicë ñu cupí caramina ꞌë maxaxan ꞌacatsi quin?

³³ Ësoquian cacëxun ca judíos unicaman cacëxa: —Minmi upí ñu ꞌacë cupí cananuna mi maxaxan ꞌaiman. Mixmi Nucën Papa Dios ñui ꞌatimati banacë cupí cananuna mi ꞌain. Mix camina unishi ꞌaíshbi mix isamina Dios ꞌai quiax quin. A cupí cananuna mi ꞌain.

³⁴ Cacëxun ca Jesusan cacëxa: —Nucën Papa Diosan bana cuënëo ca ësai quia: “Mitsúxbi camina dioscama ꞌain”.

³⁵ Cananuna ꞌunanin, Nucën Papa Diosan bana cuënëo a ca unin —asérabima ca —quixun catima ꞌicën. Usa ꞌain ca an asérabi ami sinánquin aín bana cuacë unicama Nucën Papa Diosan “ꞌËn bëchicë ꞌaish camina dioscama ꞌai” quixun cacëxa.

³⁶ ¿Nucën Papa Diosan ënë menu uni ꞌinun ꞌë xuá ꞌaínbi caramina mitsun uisa ꞌixun, aín Bëchicë cana ꞌai qui cana Nucën Papa Dios ñui ꞌatimati banai quixun ꞌë cain?

³⁷ ꞌËn ñu ꞌacë ax ꞌën Papan cushínbi ꞌacëma ꞌain camina ꞌëx cana Nucën Papa Diosnuax uá ꞌai quixun sinántima ꞌain.

³⁸ ꞌËmi sinánquinmabi camina ꞌën, uni itsían ꞌacëma ñu ꞌaia isquin ꞌën Papa Dios ax ca asérabi ꞌëbë ꞌicë quixun ꞌunánan ꞌëxribi cana abë ꞌai quixun ꞌunánti ꞌain.

³⁹ Usaquin cacëxuan biisa tancancëxbi ca anuax cuani nëtë́acëxa.

⁴⁰ Jordán ꞌucë manan cuantëcëntancëx ca Jesús anuxuan Juanën uni nashimia, anu ꞌiacëxa.

⁴¹ Anua ꞌain, a isi riquianxun axa quia cuati ca ꞌaisamaira uni quiacëxa: —Juanëan uni itsían ꞌacëma ñu ꞌá ꞌaínmabi ca axa ënë uni ñui quiá banacama ax asérabi ꞌicën.

⁴² Usaquin sinánquin ca anuxun ꞌitsa unin aín bana cuaxun —ax ca asérabia Nucën Papa Diosnuax uá ꞌicë —quixun sináncëxa.