Josué 6 - Kashibo-Kakataibo Biblia

Uisokin kara Israel unibunën Jericó ꞌati ꞌikë kixuan Diosan Josué ka bana

¹ Usa ꞌain ka anun Jericó ëmanu atsínti xëpúti upíokin xëpukë ꞌain anu tsókë unikamax uíxbi atsinima ꞌimainun chikíamabi ꞌikën Israel unibumi rakuë́kin upíokin xëpukë ꞌain.

² Usokin ꞌakë ꞌain ka Nukën ꞌIbun Josué kakëxa: ꞌËn kana Jericó ëmanu ꞌikë ꞌapu, aín suntárukama këñunbi ꞌanun mi ꞌamiti ꞌain.

³ Usa ꞌain ka Israel suntárukamax achúshi nëtën nëtën achúshitishi mapai achúshi ꞌimainun achúshi nëtë sënë́mi, Jericó ëma kaxú kuainakëti mañati ꞌikën.

⁴ Usai ꞌikëbë ka mapai achúshi ꞌimainun rabë́ sacerdotekama atúnribi bunántisa okin ꞌakë, kurin ratakakakë anua Diosan bana kuënëokë ꞌarukë a buani kuankin achúshi achúshi unin a banoti ꞌakë carnero manchan, buámainun ka mapai achúshi ꞌimainun rabë́ nëtë sënë́nkëbë ëma ratanarati mapai achúshi ꞌimainun rabë́ oí kuainakëti ꞌikën, usaía ꞌimainun ka sacerdotekaman aín carnero manchan a banoti ꞌikën.

⁵ Usakin banokian aín sënë́nkë a upíira ꞌinun tsiskëpakin ꞌaia kuatia kushiira kuënkënkankëbë ka anun ëma bëararakin kënëara ax rurukubuti ꞌikën. Usai ꞌia isi ka suntárukama ëmami kikiani kuanti ꞌikën.

⁶ Usakin katankëxa Dios sënë́an ka Josuénën sacerdote unikama kuënxun kakëxa: Mikaman kamina bunántisa okin ꞌakë kurin ratakakakë anua Nukën ꞌIbun bana kuënëokë ꞌarukë a buánti ꞌain, buámainun ka mapai achúshi ꞌimainun rabë́ mikamax bunántisa okin ꞌakë kurin ratakakakë a inui rëkuë́nkiani kuankin a banoti ꞌakë carnero manchan a buani rëkuë́nkianti ꞌain.

⁷ Usakin katankëxun ka Josuénën a ëmanu ꞌikë uni kamarairi kakëxa: Mitsux kamina ëma ratanarati kuainakëti kuanti ꞌain. Kuamainun ka axa ꞌakanantishi suntárukama ax bunántisa okin ꞌakë kurin ratakakakë a rëkuënmibiani kuanti ꞌain.

⁸ Usokin ꞌanúan Josuénën kakëxun ka kamaxunbi an kakësabiokin ꞌakëxa. ꞌAmainun ka mapai achúshi ꞌimainun rabë́ sacerdotekama ax anu Diosan bana kuënëokë ꞌarukë bunántisa okin ꞌakë a buánkin rëkuë́mibiankin mapai achúshi ꞌimainun rabë́ atun carnero manchan banoti ꞌakë a banobiani kuankëxa, kuankëbë ka an bunántisa okin ꞌakë kurin ratakakakë an buánkë akamaxribi a kati kabiani kuankëxa.

⁹ Kuamainun ka axa ꞌakánanti suntárukama ax sacerdotekama rëkuë́mibiani kuankëxa, kuanmainun ka ax tsiankiankë akamaxribi atu kaxú kuamainun, sacerdotekama atúxribi kuankin ënkinmaira carnero manchan banobiani kuankëxa.

¹⁰ ꞌAínbi ka Josuénën ësokin suntárukama kakëxa, unë́kiani kamina ñuitsima rikianti ꞌain, ꞌën mitsu kuënkëni munuma sharánun kakëx kuni kamina kuëënkëni kushin sharákanti ꞌain.

Israel unibunën Jericó kakë ëma bia bana

¹¹ Usakian Josuénën ꞌamikëxun ka achúshi okin ëma ratanarakin bunántisa okin akë Nukën ꞌIbunan a buánkëxa. Usakin buanx utëkëntankëx ka anu achúshi imë́ inúmi ꞌikankëxa.

¹² ꞌInëti pëkarakëma ꞌaínshia, Josué nirukëbëtan ka sacerdotekaman bunántisa okin akë kurin ratakakakë anua Nukën ꞌIbun ñukama ꞌarukë ꞌiakin biruakëxa.

¹³ Birukëbë rikiani ka mapai achúshi ꞌimainun rabë́ sacerdotekama ax anunbi bunántisa okin akë kurin ratakakakë a buámainun rëkuë́nkiani kuani aín carnero manchan banoima kuankëxa. Kuankëbë ka axa ꞌakánanti suntárukama axribi rëkuë́nkiani kuanmainun, aín patsan axribi a kaxú kuankëbë ka. An carnero manchan banókë axribi nirakëtimaira kuankin banoia kuakëxa.

¹⁴ Usai ꞌiónxa pëkaran ka amiribishi rikiantëkëanx ëma ꞌuri amiribishi mañarakëakëxa. Usai ka mapai achúshi ꞌimainun achúshi nëtë inúmi ꞌikankëxa.

¹⁵ Usai ꞌikë mapai achúshi ꞌimainun rabë́ nëtë ꞌikë anun ka pëkarakëma ꞌaínshi tsuakirukianx ëma ꞌuri mañarakëtëkëankëxa, bëráma ꞌikësabi oí, ka a nëtën mapai achúshi ꞌimainun rabë́ oi ëma uri mañarakëtëkënkankëxa.

¹⁶ Usakian sacerdotekaman aín manë banañu banokin mapai achúshi ꞌimainun rabë́okin ꞌakëbëtan ka Josuénën unikama kakëxa: ¡Munuma kuënkëni kamina sharati kiti ꞌain! Nukën ꞌIbun ka ënë ëma ꞌatima onun nu amia usa ꞌain kananuna ꞌati ꞌain.

¹⁷ A ëmax ka anu ꞌikë ñukama këñunbi rurapakin ꞌaisama oti ꞌikën, usakin ꞌanun ka Nukën ꞌIbu kiaxa. ꞌAnan kamina bëtsi bëtsi unibëa ꞌikë xanu Rahab kakë a ꞌimainun aín xubu ꞌukëmëu abë timë́kë aín aintsikamaishi uisabi otima ꞌain, an ka atun ëma ñachati xukë uni rabë́ a unëaxa.

¹⁸ ꞌAínbi kamina mitsun, a ëmanu atsínkin anu ꞌikë ñukama achirabi bitima ꞌain, mitsumi anu ꞌikë ñukama bikëbëtan ka anu Israel unibu nux ꞌikë aribi Nukën ꞌIbun ꞌaisama oti ꞌikën. Usakin ꞌakëbë kananuna nukamax ꞌaisama okë ꞌiti ꞌain.

¹⁹ ꞌAínbi ka anua ꞌikë kuri, manë uxua, ꞌimainun kamabi ñu manë panshian ꞌimainun manë kashtá ꞌakë a ñukamaishi anu ñu kupíira kupíkë Nukën ꞌIbunan ꞌinun nanti ꞌakë anu nanti biti ꞌikën.

²⁰ Usai ki Josué sënë́nkëbëtanshi ka aín carnero mancha banokankëxa. Bana oia kuatishi ka Israel suntárukamax, munuma kuënkëni sharati kikankëxa. Kikëbëshi ka ënën menma buinarakin ëma kënëarakë ax rurukubuakëxa. Usaia ꞌikëbë ami kikiani abákiani kuankin ami bëbarukin ëma ꞌibuakankëxa.

²¹ Usokin ꞌakinshi ka aín manë xëtokën anu ikë unikama, xanu, uni bënábu, këñunbi uni apan akamabi këñukin ꞌanan atun ꞌarakakë ñuinakama oveja, burro akamaribi këñukin ꞌakëxa. ꞌAkin ka ñuñuma ꞌitánun kamabi këñuakëxa.

²² Usomainun ka Josuénën an me ñachatia xukë uni rabë́ a kakëxa: “Aín xubunu kuanxun kamina bëtsi bëtsi unían aín nami ꞌakë xanu a bianan aín xubunu ꞌikë aín aintsikama aribi mitsun mi usakin ꞌakinuxun kakësabiokin biti ꞌain.”

²³ Kakëx aín xubunu kuanxun ka a uni rabëtan an kakësabiokin Rahab aín xubunua aín papa aín tita aín rarëbakë ꞌimainun aín xukë́n ꞌanáka bianan aín aintsi ꞌibukamaribi biakëxa, bibiankin ka anua Israel unibu bukukë ꞌuri anuxuan atun bërúantinubi buánkëxa.

²⁴ Usokin ꞌatankëxun ka Israel suntárukaman anua ikë ñukama këñunbi a ëma në́ankëxa. Në́anan ka anua kuri ꞌimainun manë uxua kamabi ñu manë panshian manë kashtá ꞌakë akama upíirabu ꞌashi Nukën ꞌIbunan ꞌiti nankë ñu anu nanti biakëxa.

²⁵ ꞌAínbi ka Josuénën Rahab ꞌimainun aín aintsikamainshi, Jericó ëma ñachatanun xukëx kuankë uni rabë́ ꞌakatsikixun barikaniabi unëkë a kupín uisabi okima biakëxa. Usa ꞌain ka Rahabnën rëbúnkikamax israel unikamabë upitax tsóakëxa.

²⁶ Usokin ꞌatankëx ka Josué ësai kiakëxa: “Nukën ꞌIbun ka ꞌëx kikë bana ënëx ka asérabi ꞌikë kixun ꞌunánia, uin kara Jericó ëma ꞌatëkënkin birutëkëntisa tania a unin bëchikë apanëx ka anun ëma bëararakin kënëkë ax ami rurukubukin chakakëx bamakë ꞌiti ꞌikën, ꞌimainun ka aín bëchikë ꞌanáka aribi anun ëmanu atsínti xëputi ꞌakin amibi birukin ꞌakë a chakamikë ꞌiti ꞌikën” (kiax ka Josué kiakëxa).

²⁷ Usokin Nukën ꞌIbun ꞌakinkëxua Josuénën ñu ꞌaia ka ax ka kushiira uni ꞌikë kixun unin ñuia kamabi menu ꞌikë unin kuakëxa.