Josué 5 - Kashibo-Kakataibo Biblia

Israel unibu Guigal kakë anu bëbax ꞌikan bana

¹ Kamabi amorreo unibunën ꞌapukaman ka amia bari kuabúkë Jordán kakë baka a ꞌurama ꞌikë ꞌimainun kamabi cananeo unikaman ꞌapu axa parúmpapa Mediterráneo kakë a ꞌurama ꞌikë, akamanbi ka Nukën ꞌIbun Jordán kakë baka anúan Israelkama sikarakënun ëskinun ꞌimikë kuakëxa, kuati ka ꞌaisamaira israel unibumi rakuë́ti abë ꞌakánanti sinánma ꞌikën.

² Bëtsi nëtën ka anuxun Nukën ꞌIbun Josué kakëxa, ꞌitsamashi maxá kuënukin ꞌatankëxun kamina anun amiribishi israel unibukama aín nëtokë ñu maxaka tëakin ꞌunánti opabuinti ꞌain.

³ Kakëxun ka Josuénën maxáx kuënukin ꞌatankëxun kamabi Israel nukëbënë unikama aín nëtokë ñun maxaka matá me Aralot kakë anuxun tëapakëxa.

⁴ Usakin ka aín nëtokë ñu rëbu maxaka tëakankëxa, kamabi ax suntáru ꞌiisa nukëbënë unikama ax Egipto menuax ai anu uni ꞌikëma me anuax këñuti maëi në́a ꞌain.

⁵ Kamabi unikama Egipto menuax kuankë axa aín nëtokë ñu rëbu maxaka tëakë aínbi ka kuania anu uni ꞌikëma menuax bakënkiankë akamax aín nëtokë ñu rëbu maxaka tëakëma ꞌiakëxa.

⁶ Usai kuani ka anu uni ꞌikëma menu, cuarenta baritia ꞌimi nitsi axa Egipto menuax chikíkiani kuankë unikama maëakëxa. A unikaman ka Nukën ꞌIbun kakësabiokin ñu ꞌaisama tankëxa, usa ꞌikë ka an sinanatëkëntima okin atu ësokin kakëxa, mitsux kamina a me ꞌinánnuxun ꞌën min chaitiokëkama ka anua ꞌaisamaira a piti ñu ꞌimainun a xëati ñu ꞌitsaira ꞌikë a menu kuantima ꞌain.

⁷ Usa ꞌain ka Josuénën atun papa ñua ꞌain, aín bakë bëchikëkaman nëtokë ñu rëbu maxaka tëapakëxa, ax ka Nukën ꞌIbun aín papa ñukëbëtan usokin ꞌati kia ꞌiakëxa, usa ꞌaish ka bërámabi aín nëtokë ñu rëbu maxaka tëakëma ꞌikankëxa, atúxa kuankëbë ka anúan usakin ñu ꞌati nëtë ꞌaíma ꞌiakëxa.

⁸ Usakian aín nëtokëñu rëbu aín maxaka tëakin sënë́onkëx ka anua ꞌikankë anuaxpain pëxkúti anu pain ꞌikankëxa.

⁹ Anuxun ka Nukën ꞌIbun Josué kakëxa: ꞌËsokin aín nëtokë ñu rëbu aín maxaka tëakë ënën ka egipcio unibunën aín menuxun ñu mëia tëmëra a sinani katë́kë a ëmiti ꞌikën. Usakin anuxun ꞌaxun Guilgal kakin anëa ꞌaish ka a me usakinbi anëkë ꞌikën.

¹⁰ Usa ꞌain ka Guilgal kakë anu pain israel unikama ꞌiakëxa, mapai rabë́ ꞌimainun rabë́ ꞌimainun rabë́ nëtë a xupibukëbëtan ka anua ꞌikankë Jericó ꞌuramanuxun Pascua nëtë inúkin fiesta ꞌakankëxa.

¹¹ A nëtënbi ka anun chamiti ñukëñunma ꞌakë pán këñun trigo tutush okë pikankëxa, pionkë a pëkarakëbëtan ka a menu ꞌapákë bikë ñu aribi pikankëxa.

¹² Usakian ñu ꞌapákë aín bimi pikin pëukë ꞌain ka atúan pikë maná ax nëtë́ti amiribishi ꞌibútëkëama ꞌikën, usai ꞌikëbëtan ka a barin Israel unibunën Canaán menu ꞌapákë ñukama ashi bixun piakëxa.

Josué Nukën ꞌIbun suntárunën ꞌapubë mërana ñuikë bana

¹³ Achúshi nëtë́n Jericó ꞌurama ꞌixun ka Josuénën, ami achúshi uni aín manë xëtokë tuianx a bëmáno nikë isakëxa. Isi a ꞌurama obiani kuankin ka ñukákëxa: —¿Mix karamina nubë ꞌikë kama a ꞌain, ama ꞌaish kaina numi nishkë unikama a ꞌain?

¹⁴ —ꞌËx kana axa mimi nishkë uni a ꞌianan axa mibë ꞌikë uni ama ꞌain —kixun ka axa ami mërakë uni an kakëxa—. ꞌËx kana Nukën ꞌIbun suntárukama aín ꞌapu ꞌain. Ësakian uni an kakëxun ka Josuénën rantinpuruni aín bëmánanën me tikai tsóbukin ñukákëxa: —¿Añu ꞌaxúnumi ꞌë kanun kara Diosan mi xuax?

¹⁵ Kakëxun ka Nukën ꞌIbun suntárunën ꞌapun kakëxa: —Min taxaka kamina ëchiti ꞌain, anumi nikë me ënëx ka bëtsi me kamasama upíira ꞌaish Diosnan ꞌikë kixun kakëxa. Kakëxun ka Josuénën aín banatankin an kakësabiokin ꞌakëxa.