Josué 4 - Kashibo-Kakataibo Biblia

Mapai rabë́ ꞌimainun rabë́ maxax Jordán kakë baka ëskikë anua bia bana

¹ Usai kuania kamabi Israel unibunëx Jordán kakë baka sikarakëti sënë́an ka Nukën ꞌIbun Josué kakëxa:

² Mapai rabë́ ꞌimainun rabë́ uni kamina achúshi achúshi ñaká uni anua kaisti ꞌain,

³ a kamina kati ꞌain, mapai rabë́ ꞌimainun rabë́ maxax anuaxa baka tëarabëti ëskikë anua sacerdotekama nirakëkë anuabia achúshi achúshi maxax bibiakin uinu kara ñantabukëbë bëankibutia anubi buánun kati ꞌain.

⁴ Usa ꞌain ka Josuénën mapai rabë́ ꞌimainun rabë́ uni kaískë a kuënxun,

⁵ ësokin kakëxa: Jordán baka ëskikë nëbë́tsi anua Diosan bunántisa okin ꞌakë kurin ratakakakë ꞌikë anua kamina mitsun achúshi achúshi ñakánu ꞌikë unin maxáx ꞌiarukin mapai rabë́ ꞌimainun rabë́ sënën ꞌitanun biti ꞌain.

⁶ Akamax ka a isi numi sinania nun rëbúnkikama ënuxun ka Diosan atu ꞌakinkin ñu chaiira ꞌakëxa kixun sinánti ꞌiti ꞌikën, sinánkin ka mitsun bakë bëchikëkaman ñukáti ꞌikën: ¿Uisoti nan kara ënë maxákama ënëx ꞌik?,

⁷ kixun ñukákëxun kamina mitsun kati ꞌain: Ax ka Nukën ꞌIbun bunántisa okin ꞌakë kurin ratakakakë a sacerdotekaman Jordán kakë baka sikarakëkinkin rëkuë́mibiankëbëa baka tëarabëakëxa kixun kati ꞌikën. Ënë maxakamax ka Israel unibunëan ënuax ka usai ꞌiakëxa kixun sinánti ꞌikën.

⁸ Usokian Josuénën kakëxun ka an kakësabiokin. Jordán kakë baka panárabëti ëskikë anua, mapai rabë́ ꞌimainun rabë́ maxá achúshi achúshi Israel unin bibiankin anua ꞌikankë anu buánxun maburukin nankëxa, usokin ꞌanúan Nukën ꞌIbun Josué kakësabiokin.

⁹ ꞌAmainun ka Josuénënribi mapai rabë́ ꞌimainun rabë́ maxáx bixun anua sacerdotekamax bunántisa okin ꞌakë kurin ratakakakë anua Diosan bana usai ꞌiti ꞌarukë a ꞌiax baka ëskikë nëbë́tsi sëtë́kë anubi bukunrukin nankëxa. A maxákama ka bëríbi anu ꞌikë kixun ñuikin atun aintsikama ñuixunkankëxa.

¹⁰ Usa ꞌain ka sacerdotekama bunántisa okin ꞌakë kurin ratakakakë anua usai ꞌiti bana ꞌikë an uankë akamaxa Jordán kakë baka tëarabëti me rakákë anu sëtë́mainun Israel unibunën usokin ꞌanúan Nukën ꞌIbun Josué kakësabiokin ka kamabi ñu ꞌakëxa. Usakin ꞌaminuan Moisésnën Josué kakësabiokin. ꞌAkëbë ka anuax unikama bënëtishi sikarakëakëxa,

¹¹ usai unikama sikarakëti ꞌukëmanan ꞌirui sënë́nkëbë ka sacerdote unikama an bunántisa okin ꞌakë kurin ratakakakë anua Diosan ñukama ꞌikë uankë atúxribi sikarëkëkiani kuankin unikama inubiani rëkuë́nkiankëxa.

¹² Kuankëbë ka atu kaxuribi axa ꞌakánanti ꞌunáinrakë unibu Rubénën rëbúnki, akamabë Gadnën rëbúnki ꞌimainun Manasésnën rëbúnkikama ꞌitsamashi akamaribi. Anúan ꞌakánanti mëníokëishi ꞌaish sikarakëkiani Israel unibu kuankëxa, usaía ꞌinun Moisés kiásabi oi ka usai ꞌiakëxa.

¹³ Kuani ka atux cuarenta mil uni sënën ꞌiti urama ꞌiakëxa, usa ꞌaish ka ꞌakanantishi ꞌinun mëníokakëishi ꞌaish rëkuë́nkiani kuamainun a inubiani Nukën ꞌIbun ismainunbi anua Jericó me ꞌikë au kikiani kuankankëxa.

¹⁴ A nëtën ka Nukën ꞌIbun kamabi Israel unibu Josuénën usakin ñu ꞌaia isi rakuë́kin aín bana tankin an kakësabiokin ꞌanun ꞌimiakëxa, Moisés ñukëma pain ꞌixun ꞌamikëxua abëtan ñu ꞌasarabi okin ka usokin ꞌakëxa.

¹⁵ Usa ꞌain ka Nukën ꞌIbun Josué kakëxa:

¹⁶ Sacerdote unikaman bunántisa okin ꞌakë anua Diosan bana kuënëokë ꞌarukë an buánkëma unikama a kamina kati ꞌain Jordán baka panárabëti ëskikëbëa me rakákë anu sëtë́këkama a kamina kuaitanun kati ꞌain.

¹⁷ Kakëxun ka Josuénën anuaxa kuaitanun kixun atu kakëxa,

¹⁸ kakëxa bënëtishi Jordán kakë baka anua atux sëtë́kë anuax kuaini këñurukin me amákëbëishi baka chitë́kë ax anubi rakarakëtëkënkin kamabi maputëkëankëxa.

¹⁹ A nëtë́an Israel unibu Jordán kakë baka anun sikarakëkë anun ka mapai rabë́ nëtë ꞌianan achúshi ꞌuxë ꞌirutabakë anun ka Guilgal kakë anu nukúkankëxa ax ka amiaxa bari urukë Jericó kakë ëma ꞌurama ꞌiakëxa.

²⁰ Anu ka Josuénën mapai rabë́ ꞌimainun rabë́ maxax Jordán bakanua bitsínkin bëkë a bukurunun ꞌamiakëxa.

²¹ Anuxun ka Israel unikama kakëxa: Mitsun bakë bëchikë kaman ka mikama ñukánuxun ꞌaia. ¿Uisoti kara ënë maxákama unin ënu buküankëx?,

²² kixun ñukákëxun kamina ësokin ñuixukanti ꞌain uisai kara Israel unikama Jordán kakë baka panárabëti me rakarakëkëbë anun sikarakëti ꞌiakëxa kixun,

²³ ꞌimainun kamina ësokinribi ñuixunti ꞌain uisakin kara Diosan Jordán kakë baka meishi rakátanun anun nux inúnun ëskimiakëxa kixun, bëráma parúmpapa xónsa kakë anun nun chaitiokëkama sikarakënun ꞌimiasaribi okin.

²⁴ An ka usakin ñu ꞌakëxa kixun ka kamabi menu ꞌikë unin Nukën ꞌIbu ax ka kushiira ꞌikë kixun ꞌunánti ꞌikën, usa ꞌikë kamina ashi mitsun Nukën ꞌIbu ikë rabiti ꞌain.