Josué 3 - Kashibo-Kakataibo Biblia

Israel kama Jordán kakë baka sikarakëa bana

¹ Usakian kónkëx ka pëkarakëma ꞌaínshi, Josué ꞌimainun israel unibu Sitim kakë anu paia bukukë anuax kuantankëx Jordán kakë baka anu bëbakankëxa; bëbatankëx ka sikarakënux anu pain ꞌikankëxa.

² Anuxun ka rabë́ ꞌimainun achúshi nëtë ꞌikëbëtan aín kushibunën anua ꞌikankë akamanubi kuankin

³ ꞌianan ka ësokin Israel unibu kakëxa: Uínsaran kaina sacerdote levita unikaman anu Nukën ꞌIbun bana kuënëokë nankë a bunántisa kurin ratátakakë a buánkania iskani anun kamina uinu kaina ꞌikani anuaxbi chikíkiankin nuibiankanti ꞌain.

⁴ Usai kuankin kamina uimi karamina kuani a ꞌunánkanti ꞌain, uinu ꞌikë mitsúnbi kamina ënë me anu nikin ꞌunánkëma ꞌain. ꞌAínbi kamina bunántisa okin ꞌakë kurin ratakakakë anua Diosan bana kuënëokë nankë a ꞌuramaira oíma, a kaxu achúshi kilómetro ꞌura kuanti ꞌain.

⁵ ꞌImainun ka Josuénën ësokin atu kakëxa: Mitsux kamina imë́ishi Nukën ꞌIbu kara aín kushin uisakin ñu ꞌaia isnux upiti mëníokati ꞌain.

⁶ Kanan ka sacerdotekamaribi kakëxa: Bunántisa okin ꞌakë kurin ratakakakë a ꞌukëmëua a tanti banakama ꞌikë ënë ꞌiarukin bibianx kamina a rëkuë́mibiani kuani unikaman ismainun abë baka sikarakëti ꞌain. Usakin kakëxun ka sacerdote kaman bunántisa okin ꞌakë kurin ratakakakë a unikaman ismainunbi buánkëxa.

⁷ Usokëbëtan ka Nukën ꞌIbun Josué kakëxa: Bërí ka Israel unikaman ësokin ꞌën ꞌakëbëtan mix kamina ꞌën kaískë uni atun ꞌapu ꞌai kixun ꞌunánti ꞌikën. Usa ꞌain ka ꞌën kana Moisés ꞌakiansaribi okin mi ꞌakini kixun ꞌunánti ꞌikën.

⁸ Minribi kamina sacerdote an bunántisa okin ꞌakë kurin ratakakakë a ꞌukëmëu ꞌikë a tanti banakama buannun kati ꞌain, kuani ka Jordán kakë baka aín kuëtsín amáti nirakëkëbëa ëskikëbë ꞌurira kuani anu nirakëti ꞌikën.

⁹ Usakin kakëxun ka Josuénën Israel unikama kakëxa: Nëri kamina rikuatsinti ꞌain Nukën ꞌIbu Diosan ka ësokin nu ꞌakinkin ñu ꞌakatsi kiaxa mitsu kanun.

¹⁰ Ax ka nubë ꞌikë kixun nukaman ꞌunánun ka Diosan aín kushínbi aín menu bëbakin nun cananeo, hititas, heveos, ferezeos, gergeseos, amorreos ꞌimainun jebuseos akamabi aín me bikuanti ꞌikën.

¹¹ Kamina kuakanti ꞌain, Nukën ꞌIbu kamabi men ꞌibu ꞌianan bunántisa okin ꞌakë kurin ratátakakë anua kamabi aín bana ꞌikë aka sacerdote unikaman mitsun ismainunbi Jordán kakë baka a sikarakëkinti ꞌikën.

¹² Usa ꞌain kamina mapai rabë́ ꞌimainun rabë́ ñaká uni anua achúshi achúshi Israel unikama kaisti ꞌain.

¹³ Uínsaran kara sacerdotekaman bunántisa okin ꞌakë kurin ratakakakë anua Nukën ꞌIbun kamabi men ꞌibu ain bana a buani tapukikiankëbë ka tëarabëti amo rabë́ chairui aín rëbumiax ꞌia ubúkë ax tikimainun kuabúkë ax amorabë́ chitëti nunkuruti ꞌikën.

¹⁴ Ësokin kaia Josué sënë́nkëbë ka Israel unibu anua ꞌikë anuax bunántisa okin ꞌakë kurin ratakakakë anua a tanti banakama ꞌikë a buani sacerdotekama kuankëbë a kaxú Jordán kakë baka shítati kuankankëxa.

¹⁵ Kuankian bunántisa a pain rëkuë́nkin biani sacerdotekama baka tapukikiankëbëshi ka aín xobukë nëtë́ti baka tëarabëakëxa. Ax ka anun ñu ꞌapákë biti ꞌuxë ꞌaia Jordán kakë baka mita ꞌain chaiira ꞌinun ꞌëkë ꞌaish kuëtsëkënkëma pan ꞌain ꞌiakëxa.

¹⁶ Ënëx ka anua israel unibu ꞌikë a ꞌurakëoxa ꞌiá ꞌikën, ax ka anua Adam kakë ëma ꞌurama, Saretán ꞌikë a ꞌuramabi ꞌiakëxa, usa ꞌain ka ꞌumpax ax kuabuti parúmpapa bamakë kakë anubi timë́kë ꞌiakëxa. Usakin ka Diosan anúan Israelkama Jericó kakë ëmanu kuani sikarakënun bakanu ꞌikë ꞌumpax tëa rabëti ëskinun ꞌimiakëxa.

¹⁷ Usakian Jordán kakë baka ëskinun ꞌimikëbë Israel unibu sikarakëmainun ka sacerdote unikama anua a tanti Diosan bana ꞌikë bunántisa okin ꞌakë, kurin ratakakakë buánkë unikama ax Jordán kakë baka ë́skia me rakákë a nëbëtsi kamabi uníxa sikarakëmainun nirakëakëxa.