Josué 24 - Kashibo-Kakataibo Biblia

Ashikian Josuénën Israel unibunën ꞌapukama timë́xun ka bana

¹ Josuénën ka kamabi ñaká Israel unibu Siquem kakë ëma anu timë́nun kixun kamiakëxa. Kamikin ka uni apankama ꞌapu an bana mëníokë akama ꞌimainun, suntárunën kushikama anuxun Nukën ꞌIbu rabiti xubusa okin chupa ꞌakë ꞌurama anu timë́nun kamiakëxa,

² kamikëx rikuatsinkë ka Josuénën kamabi unikama kakëxa: —Ësokin ꞌën mitsu kanun ka Israel unibu nun Dios kiaxa: Bërámaira ka Térah ꞌimainun aín bakë bëchikë rabë́ Abraham kakë ꞌimainun Nahor mitsun chaitiokëkama, atux Éufrates kakë baka kuëbí tsókë ꞌixun bëtsi dioskama rabiakëxa.

³ Rabia kana Éufrates kakë baka kuëbí anua Abraham, chikínbiankin Canaán kakë mekama oi ninun ꞌimiakën. ꞌImianan kana aín bakë bëchikë Isaac a pain bëchinun ꞌamiakën,

⁴ ꞌamikëxun ka aín bakë bëchikë Isaacnën Jacob ꞌimainun Esaú a rabë́ pain bakë bëchiakëxa. Usoxun kana Esaú Seír kakë me anu tsónun ꞌinánkën, ꞌinámainun ka Jacobnëx aín bakë bëchikëkamabë Egipto kakë menu tsóti kuankëxa.

⁵ Usai ꞌiá ꞌain kana ꞌitsa baritia inúkëbëtan ꞌën mitsun chaitiokë Moisés ꞌimainun Aarón xuakën, ꞌimainun kana mitsux chikinuxun Egipto menu ꞌikë unikama ꞌitsaira ꞌën tëmëramiakën.

⁶ A nëtë́an mitsun chaitiokëkama Egipto menuax chikíkë anun ka egipcio suntárukaman anuax ꞌakanankë caballonën nikinkë ꞌimainun caballonën kuankiribi parúmpapa xónsa kakë anubi bëbarukin ꞌakatsikixun nuiakëxa.

⁷ Usokëxuan atun ꞌakinun kixun ñukákëxun kana, bëánkibukë chaiiran atu bëaranun ꞌamianan parúmpapan kuaniabi mapukin egipcio unikama këñunun ꞌamiakën. Usakin ꞌaia ka nun chaitiokëman Egipto menuxun isakëxa. Usai pain ꞌitankëx ka raírinëx ñumainun ꞌitsa baritia ꞌimi anu uni ꞌikëma menu niakëxa,

⁸ nitsiabi kana anua atu amorreo unikaman menu bëakën, ax ka Jordán kakë baka amiaxa bari urukë au ꞌiakëxa. Anuax mitsubë ꞌakananiabi kana, ꞌën abámikin mi ꞌanun mitsu ꞌamiakën, ꞌamikëxun abámikin ꞌaxun kamina atun me bikankën.

⁹ Balac, Sipornën bëchikë moabita unibunën ꞌapu an pain ka mitsubë ꞌakánanti sinánxun, Balac an Beornën bëchikë Balaam nuisa ꞌatimokin sinánxuni unun kixun kamiakëxa.

¹⁰ ꞌAínbi kana ꞌën Balaamnën usakin ꞌaisama onun ꞌamikinma mitsu nuibanun sinánmiakën. Usakin kana mitsu ië́miakën.

¹¹ Usa ꞌain kamina mitsux Jordán kakë baka a sikarakë kianx Jericó kakë ëma anu bëbakën. Bëban ka Jericó ëmanu tsókë unikama mitsubë ꞌakanankëxa, ꞌakananiabi kana mitsun ira kupitanunma ꞌanun ꞌamiakën, ꞌamitankëxun kana (amorreos, ferezeos, cananeos, hititas, gergeseos, heveos ꞌimainun jebuseo) a unikamaxribi mitsubë ꞌakananiabi kana mitsun ira kupitanuma ꞌanun ꞌamiakën.

¹² Mitsunmi amorreos unibunën ꞌapu rabë́ aín suntárukëñunbi ꞌa ax ka ꞌakánanti ꞌunan ꞌixunmi manë xëtokën ꞌanan mitsun pian ꞌama ꞌikën, ꞌën kana mitsux kuankë ꞌaímabia atux irapain abánun ꞌimiakën.

¹³ ꞌËn kana a menu tëa ꞌikëmabi mitsun me ꞌinánan ëmakamaribi mitsun ꞌa ꞌikëmabi ꞌinánkën. Anu tsókin kamina bërí mitsun ꞌapá ꞌixunmabi uvas ꞌimainun aceituna akama a menua ꞌapá ꞌikë pikanin. Ësokin katankëxun ka Josuénën atu katëkëankëxa:

¹⁴ —Ësokian kamabi ñu an a kupín kamina mitsun Nukën ꞌIbu asérabira ami sinánkin rabiti ꞌain. Rabikin kamina mitsun chaitiokëkaman Éufrates kakë baka kuëbí tsókin rabianan Egipto menuxun rabia dios a ënkin Nukën ꞌIbuira ashi rabiti ꞌain.

¹⁵ Usa ꞌain kamina mitsun Nukën ꞌIbu rabitisama tani, bëríbi uisa dios kaina mitsun rabitisatani kiax kiti ꞌain: Kaina mitsun chaitiokëkaman Éufrates kakë baka kuëbí pain tsókë ꞌixun rabia dios, a rabiti ꞌain ꞌakima karamina anumi bërí tsókë amorreo unibunën me anu ꞌikë dios akama rabiti ꞌai kiax kamina kiti ꞌain. ꞌAínbi kana ꞌën, xanu ꞌën bakë bëchikëkamabëbi Nukën ꞌIbu kuëënkësa oíshi ꞌiti ꞌain.

¹⁶ Ësakin kakëxun ka Israel unibunën ribi kakëxa: —¡Nun kananuna a rabikinma bëtsi bëtsi dios rabia Nukën ꞌIbun nu ënti kuëenima!

¹⁷ Nukën ꞌIbu an ka chikínbëtsinkin nukama ꞌimainun nun chaitiokëkama Egipto menuxun tëmërakin ñu mëëiabi nu bëakëxa. An ka ꞌaisamaira ñu ꞌakin nun ismainunbi ꞌakëxa, ꞌimainun ka bëtsi bëtsi ëma inubiani kuania nu bërúankin ꞌakiankëxa.

¹⁸ An ka anun nux uti menu ꞌikë ëmakamanu tsóa unikama chikínun ꞌimiakëxa, usaribi okin ka amorreo axa ënë menu tsóa akamaribi ꞌakëxa. Usokin akama ñu ꞌa ꞌikë kananuna nunribi a rabiti ꞌain ax ka nun Dios ꞌikën.

¹⁹ Usai kikania kuatankëxun ka Josuénënribi kakëxa: —Mitsun kuainxunshi rabitisama ka Nukën ꞌIbu ꞌikën, ax ka Dios upíira ꞌianan uisa ñu ꞌatimabi ꞌai ami mitsux ꞌuchati kuëënima.

²⁰ An ka mitsunmi a ënkin bëtsi dioskama rabia, ka Nukën ꞌIbu upíokian mitsu ꞌakinkë a ënkin ꞌaisamaira okin tëmëramiti ꞌikën.

²¹ Usakian kakëxunbi ka Israel unikaman Josué katëkëankëxa: —Usai ꞌikima kananuna nukaman axa Nukën ꞌIbu ꞌikë ashi rabiti ꞌain.

²² Usai kikania ka Josuénën katëkëankëxa: —Mitsuxbi kamina Nukën ꞌIbu ismina rabinuxun ꞌai kiax kikanin. Kakëxun ka —atúnribi nukamanbi kananuna a ꞌai —kixun kakankëxa.

²³ Kiabi ka Josuénën kakëxa: —Asabi ka, usa ꞌain kamina mitsun dios isa kixun, ꞌarakakë ñukama bitankëxun puti ꞌain, putankëxun kamina Israelkama mitsun nuitunënbi Dios amishi sinánkin rabiti ꞌain.

²⁴ Ësokin kakëxunbi ka Israelkaman amiribishi Josué kakëxa: —Nukaman kananuna Nukën ꞌIbu Dios rabiti ꞌain, ꞌimainun kananuna uisai ꞌinun kara ax kia usaibi ꞌiti ꞌain.

²⁵ A nëtënbi ka Siquemnuxun, Josuénën kamabi unibëtan achúshi ñu ꞌanan Moisésnën usai ꞌiti banakama kuënëo a ꞌinánkëxa,

²⁶ a bana ka Josuénën anua a tanti Diosan bana ꞌikë anubi kuënëokëxa. Kuënëotankëxun ka mapara pará bixun xubusa okin chupa ꞌakë anuxun Nukën ꞌIbu rabiti a ꞌurama ꞌikë i pëñanakëkë tëmú anu nitsíankëxa,

²⁷ usokin ꞌatankëxun ka Josuénën Israel unikama kakëxa: —Ënë mapara chaiira ꞌën nitsinkin nankë ënëx ka, uisakin karanuna nun Nukën ꞌIbun ꞌamikëxun ñu ꞌakën kixunmi mitsun ñuiti ꞌinuxun ꞌaia. Ënëx ka a isia bëtsi unikamax mitsux ismina usai ꞌiakën kikë ax këmëkësa ꞌitima kupín kamina upiti Diosmi sinánkanti ꞌain.

²⁸ Usokin pain katankëxun ka Josuénën aín menubia kuantëkëntanun an ꞌakintia buánkë unikama a xutëkëankëxa.

Josué ñua ñuikë bana

²⁹ Usokin pain ñu ꞌatankëx ka Josué Nunnën bëchikë Nukën ꞌIbun uni ax, ciento diez baritiañu ꞌaish ñuakëxa.

³⁰ Ñukë ꞌikë ka aín me Timnat-sérah kakë ꞌain tsipumia ꞌikë Gaas kakë, Efraínnën bashikama kakë ꞌia anu maíankëxa,

³¹ israel unibunën ka Josué ñutisamapan ꞌaish tsótan Nukën ꞌIbu rabiakëxa, rabia ꞌixun ka ax ñua ꞌain uni apankama an Nukën ꞌIbun kamabi ñu Israel unibu ꞌaxunia isa ꞌixun ꞌunánkë unikama atúxribi ñukëma ꞌaish tsótan rabiakëxa.

Israel unikaman Josénën xo maían ñuikë bana

³² Israel unibunën ka Josénën xo Egipto menua bitsínkin bëínëa ꞌixun, Siquem kakë me anu maíankëxa, a mex ka Jacobnën cien kuríki manë ꞌakë kupín Hamornën bakë bëchikë, Siquemnën papa aín me ꞌikëbi marua a ꞌiakëxa, a me ka Josénën rëbúnkikaman atunanbi ꞌinun biakëxa.

Eleazar ñua ñuikë bana

³³ Eleazar, Aarónën bakë bëchikë ñukë ꞌikë ka aín aintsikaman aín bakë bëchikënën me anua Efraín unibu ꞌikë, Finees kakë uni aín me anubi maíankëxa.