Josué 2 - Kashibo-Kakataibo Biblia

Josuénën rabë́ uni Jericó kakë ëma ñachatanun xuá bana

¹ Achúshi nëtën ka anua Israel unikama bukukë Sitim kakë anuxun rabë́ uni Josuénën unë́kianxuan istánun xuakëxa: Xukin ka kakëxa anu kuanxun kamina Canaán kakë me ñachanan anua ꞌikë Jericó ëma a isikuanti ꞌain. Usakin kakëx ka a uni rabë́ kuantankëx bëtsi bëtsi unin ꞌain nami ꞌakë xanu Jericó ëmanu ꞌikë Rahab aín xubunu ñantan ꞌuxi bërúakëxa.

² ꞌAínbi ka anu ꞌikë unin ñuia kuabianxun Jericó ëmanu ꞌikë ꞌapu ësokin kakëxa: —Uiti israel uni sapi kaisa nun me ñachai ënë imë́ uonxa.

³ Usakin kakëxun ka a ëmanu ꞌikë ꞌapun aín suntáru anu kuanxuan Rahab katánun kixun xuakëxa: —Xukëx kuanxun ka anu bëbakin kakëxa, min xubunu bëbakë unikama a kamina chikínti ꞌain, atux ka nun me ñachai uaxa.

⁴ ꞌAínbi ka a xanun a rabë́ atux ukëmapan ꞌaínshi unëxun ësokin kakëxa: —Asérabi ka a unikamax ꞌën xubunu uaxa, usai ukëbi kana uinu ꞌikë unira kara ꞌën ꞌunánkëma ꞌain.

⁵ Usa ꞌaish ka bari kuabuti ñantabukëma ꞌaínshi atux kuanxa, mitsúnbi kamina ꞌunan xupibutia bari kuabuti ñantabukëbëtainshi ka anun ëmanu atsínti xëkuë xëpúia, usa ꞌain kana uin kara atux kuanxa kixun ꞌunaniman. ꞌAínbi kamina mitsun bënëtishi kuankin nuibianxun sapi kamina kuania atu nukuti aín kixun ka xanun kakëxa.

⁶ A xanunbi ka aín xubu manámi buánxun anua xapusa lino kakë barionti tsamankë a mëu unëkë ꞌiakëxa.

⁷ Usakian kakëxëshi ka ꞌapun suntárukama ax unikama me ñachai ukë ax isa anun kuanxa kixuan xubu ꞌibu an paránkin kakëx Jordán kakë baka, ami kikiani kuani anunribi anunribia uni sikarakëkë anubi bëbakin nuiakëxa. Usokin nui kuania suntárukama ax chikikiankëma ꞌaínshi an xëputi bëruankë unikama a ëmanu anun atsínti xëputi xëpúakëxa.

⁸ Usa ꞌain ka Israel uni rabë́ ax ꞌuxkëma ꞌaínshi, Rahabnën aín xubu manámi kuaruxun uni rabë́ a kakëxa:

⁹ ꞌËn sinánkëxun ka Nukën ꞌIbun mitsunan ꞌinun ënë me mikama ꞌinánti ꞌikën, usa ꞌain kananuna nukamax ꞌitsaira rakuë́tin. Usa ꞌain ka axa ënë menu tsókë unikama mitsux ukë kuati rakuëtan bamaia.

¹⁰ Nun kananuna ꞌunanin mitsux Egipto menuax chikíküatsini ukëbëtan ka Diosan anun sikarakënun parúmpapa xónsa kakë a aín nëbë́tsi ëski panárabënun ꞌimiakëxa. ꞌImainun kananuna ꞌunanin mitsun kamina Sihón ꞌimainun Og, amorreo kakë unibunën ꞌapu rabë́ axa Jordán kakë baka ꞌukëmanan bukukë a aín unikama këñunbi maërakatanun këñuakën.

¹¹ Usakin mitsun ꞌakë kuati kananuna nukamax ꞌaisamaira rakuëakën, usa ꞌain ka uinu ꞌikë ꞌën aintsikamaxi mitsubë ꞌakánanti kuëënima. Nun kananuna ꞌunanin mitsun rabikë Dios ax ka naí manámi ꞌikësaribi ꞌianan ënë menu kushiira ꞌikën.

¹² Usa ꞌain kana mi ñukatin ënuxunbi kamina Nukën ꞌIbun anën sinanátëkëntimokin asérabi ꞌë kati ꞌain, ꞌën aintsikama kamina mitsu bërí ꞌën ꞌakësaribi okin ënë ëmanu ꞌikë unikama ꞌakinbi ꞌatima ꞌain. Asérabi karamina këmëima ꞌunánnun kamina ꞌë kati ꞌain,

¹³ Usa ꞌain kamina ënë me bitsi atsínkin ꞌën papa ꞌën tita ꞌimainun ꞌën xukë́n ꞌën rarëbakë, ꞌianan abëa ꞌikë unikama këñunbi nu ꞌatima ꞌain. ¡ꞌAkinma kamina nukama këñunbi ëñëmiti ꞌain!

¹⁴ Ësokin kakëxun ka rabë́ unin kakëxa: Nun ënë me bitsi ukin min aintsikama ꞌaia ka Diosan nuribi bamanun ꞌimiti ꞌikën, usa ꞌain kamina nun mi kakë bana ënë uibi ñuixuntima ꞌain. Usa ꞌain kananuna Nukën ꞌIbun ënë me ꞌinánkëxun bixun nukaman mi upíokin ꞌakinti ꞌain.

¹⁵ Usa ꞌain ka Rahabnën xubu ax anun ëma kënëkin buinarakin kënëkë amibi birukin a manámibi ꞌakë ꞌiakëxa, usa ꞌikë ka atun me ñachai kuankë uni rabë́ a itsi në́nkë tëkërëkaxun anun aín xubu xëkuë chukúma manámi ꞌikë au nanpákëxa.

¹⁶ Nanpákin ka kakëxa: Ënuax kuantankëx kamina an mi baritia ꞌapun xukë suntárukaman mi mërakëma ꞌaínshi ninu unëti kuanti ꞌain. Anu kamina rabë́ ꞌimainun achúshi nëtë atux pain ëmanu utëkëntamainun unë́ti ꞌain. Usa ꞌain kamina anuaxbi min nëtënu kuanti ꞌain.

¹⁷ Ësokian kakëxun ka uni rabë́ anribi kakëxa: —Nun kananuna sinanátëkëntimokin min nu kakësabiokin asérabi ꞌati ꞌain.

¹⁸ ꞌAínbi kamina nux ënë menu bëbai ukëbëtainshi, itsi achúshi xónsa anun nux ꞌibúkë ënë min xubu xëkuë chukúma ënu bënë́kinshi bëntanti ꞌain. Usakin ꞌanan kamina min xubunu min papa min tita ꞌimainun min xukë́n min rarëbakëkama ꞌimainun min papan aintsikamaribi bënë́kinshi timëti ꞌain.

¹⁹ Uix kara min xubunuax ëman chikitia ꞌakëx bamaia ax ka aín ꞌuchabi ꞌiti ꞌikën; usa ꞌain ka ax nun ꞌuchama ꞌiti ꞌikën. ꞌAínbi ka uin kara min xubunu ꞌikë uni anu atsínxun ꞌaisamoia ax ka nux ꞌuchakë ꞌiti ꞌikën.

²⁰ Usa ꞌain kamina uinu ꞌikë unibi nun mi kakë bana ënë ñuixuntima ꞌain, usama ꞌain ka asérabi usakin ꞌaxúnun mi kakë ënëx usabi ꞌiti ꞌikën.

²¹ —Asabi ka usa ka ꞌiti ꞌikë —kixun ka xanun kakëxa. Katankëxun ka na kuantanun xuakëxa. Xukëx kuankëbëtan ka aín itsi xónsa anun sënkikianxa ꞌibúkë a bitankëxun aín xubu kaxú xëkuë chukúma anu bëntankëxa.

²² Usokian ꞌakëx ka an me ñachai ukë uni rabë́ ax kuantankëx rabë́ ꞌimainun achúshi nëtë ꞌimi ninu unëakëxa, usaía ꞌimainun ka suntárukaman mëranuxumabi mekama okin pë́kasmakin baribiani amiribishi Jericó kakë ëmanu kuantëkëankëxa.

²³ Kuantamainun ka an me ñachai kuankë uni rabë́ axribi anua unëkë ni anuax kuanx, Jordán kakë baka shitákiani anua ꞌikë anu kuanxun Josué usaía ꞌikë kamabi ñuixunkin.

²⁴ Ësokin kakëxa: Nukën ꞌIbu ka asérabi a mekama binun nu ꞌakinti ꞌikën. Usa ꞌain ka a menu ꞌikë unikama ꞌitsaira numi rakuë́tia.