Josué 10 - Kashibo-Kakataibo Biblia

Israel unibunën amorreo suntárukama abë ꞌakanankin abámia bana

^1-2 Adonisédec kakë uni ax ka Jerusalén ëmanu ꞌapu ꞌiakëxa, anuxun ka Josuénën abë ꞌakanankin Ai kakë ëmanu ikë suntárukama këñukin ꞌaxa kixun ñuiña kuakëxa, Jericónu ꞌikë ꞌapu aín unikama këñunbi ꞌakësaribi okían këñúkë kuati ka ꞌitsaira rakuëkankëxa, ꞌimainun ka gabonita unikamabë ka israel unikamax bërí atubë timë́ax tsotia kixun ñuikania kuakëxa. Usai atux ꞌikë kuatira ka ꞌaisamairai rakuëkankëxa, Gabaón kakë ëma ax ka chaiira ꞌaish Ai ëmabëtan sënë́nma upíira ꞌiakëxa, usa ꞌaish ka anu ꞌapu ꞌiisa ꞌaíshbi a ëmanu ꞌapu ꞌaíma ꞌiakëxa ꞌimainun ka anu ꞌikë suntárukamax ꞌakánanti ꞌunánbuira ꞌiakëxa.

³ Usai ꞌitsaira rakuë́kin ka Adonisédec Jerusalénnu ꞌikë ꞌapu an ñakáitsinu ikë ꞌapukama katánun xukin kamia a ka ënëkama ꞌiakëxa Hoham, Hebrónnu ꞌikë ꞌapu ꞌimainun Jarmut, kakë ëmanu ꞌikë ꞌapu Piram ꞌianan Jafía Laquisnu ꞌikë ꞌimainun Debir Eglón anu ꞌikë ꞌapu akamabi kamiakëxa:

⁴ “Kamikin ka ësokin katánun kixun kamiakëxa, nukama kamina Gabaón unikamabë ꞌakanania ꞌakini uti ꞌain, atux ka Josué Israel unibubë ꞌakananima atubë nuibanani birananxa.”

⁵ Kamikëx ka mapai achúshi amorreo ꞌapukama abë Jerusalénnu ꞌikë ax biranankëxa, atux ka Hebrón Jarmut, Laquis ꞌimainun Eglón akamax timëkiani atun suntárubë Gabaónnu ꞌikëkama ꞌakatsikiax kuankëxa.

⁶ Usaia atu ꞌakatsi kiax timëkiani kuankë, kuakin ka Gabaón ëmanu ꞌikë ꞌapun, Josué Guilgal menu ꞌia ësokin kamiakëxa: ꞌËn kamikëx kamina kana kuanima kiax kima an mi ñu mëëxunti unikama ënë mix kikësabiokin ꞌakini min suntárukamabëbi uti ꞌain. Aín bashinu tsókë Amorreo unibunën ꞌapukamax ka aín suntárukamabëbi timë́kuatsini nu ꞌakatsikiax uaxa.

⁷ Ësokian Gabaónu ꞌikë ꞌapun kamikëx ka Josué Guilgalnuax axa rakuë́timaishi ꞌakanankë ain suntárukamabë küancëxa,

⁸ timë́kë ka Nukën ꞌIbun Josué kakëxa: mitsun kamina amorreo unikama rakuëkimaishi, mi kupitanuma ꞌati ꞌain.

⁹ Usakian Diosan kakëx ka Josué anua ꞌikë Guilgal kakë anuax aín suntárukamabë imë́ kuanëkin ñu sinánkëmabi ratukinshi amorreo unibu ꞌakëxa.

¹⁰ ꞌAia ka Nukën ꞌIbun israel unibunën ꞌakëxa ꞌitsaira atumi rakuënun ꞌimiakëxa, usaía ꞌia ka Josuénën suntárukaman anuaxa ꞌakanankë Gabaón anuxun ꞌaisamaira amorreo unibunën suntárukama ꞌakëxa. Usokin ꞌakëxa anun Bet-horónnu, kuanti bai a bibiani abatiabi ka nuibiankin amorreo suntárukama Azecá ꞌimainun Maquedá kakë ëma rabë́ ami kikiania Israel suntárukaman kuania mërakin ꞌakëxa.

¹¹ ꞌAkëbëa amorreo suntáru rairinëxribi abati Bet-horón kakë ëma ratanbiani israel suntárukaman ꞌakëx abati kuankëbëtanbi ka Nukën ꞌIbun matsin tita aín bëru chaiirabu ꞌibúkin aín manë xëtokën israel suntárukaman ꞌakësamaira okin këñunun ꞌamiakëxa.

¹² A nëtë́an Nukën ꞌIbun ꞌamikëxun israel unibunën amorreo unikama ꞌakë a nëtën ka Josuénën aín suntárukaman kuamainun Nukën ꞌIbun ñukákin ësokin kakëxa: Barix ka Gabaón puntë nirakëti ꞌikën; ꞌimainun ka ꞌuxëribi Aialón kakë me puntë ami nirakëti ꞌikën.

¹³ Usaia kikëbë ka ꞌuxë nirakëmainun bariribi nirakëakëxa nirakëkëbëtan ka Israel unibunën axa ami nishkë unikama abë ꞌakanankin ꞌakëxa. Ënë banax ka bëtsi kirikanu kuënëokë ꞌikën usaía Israel unibu ꞌakanamainun ka bari naí nëbëtsi nirakëax achúshi nëtë ꞌimi kuabuama a bana ñuikin ꞌakë ꞌikën.

¹⁴ Uinsaranbi ka achúshi nëtë ënë nëtë́an ꞌakësaribi okin Nukën ꞌIbun achúshi unin kakëxun kuakin ñu ꞌakë ꞌaíma ꞌiakëxa, an ka Israel unibunën rabanan në́kin ami nishkë uni ꞌanun ꞌamiakëxa.

¹⁵ Usai ꞌakanankiani ka Josué Israel unibubë anua ꞌikë Guilgal kakë anubi kuantëkëankëxa.